Escéniques

Xixón lleva a escena el teatru asturianu más inmediatu. Ocho compañíes escéniques del Principáu presentarán los sos últimos montaxes na Feria Europea de Teatru pa Neños (Feten), qu’arranca el prósimu domingu cola participación total de 43 grupos teatrales. Nun tris, Higiénico Papel, El Negrito, Fernando Hurtado, Plus, Los Piromantes, Factoría Norte y Kumen escenificarán los sos trabayos más recientes.

Por xéneros, la presencia asturiana en Feten 2005 -que se cellebrará en Xixón del 20 al 25 de febreru- estenderáse del estrictu teatru d’actor a les marionetes, la dancia y los pasucáis n’estremaos escenarios interiores ya esteriores repartíos pola ciudá. En total, mediu millar de programadores, autores, críticos y actores especializaos siguirán l’estrenu de los montaxes, con una presencia de públicu albidrada en 18.000 espectadores.

La compañía Nun Tris, que vien de ser premiada ente los meyores grupos estranxeros pola Universidá de Buenos Aires, presentará ‘Runa, un mundo redondo’, mientres que Higiénico Papel representará ‘Cielos’, una hestoria conducida por dos personaxes onmiscientes dende l’altor d’una ñube. Pol so llau, Títeres el Negrito ufrirá los montaxes de marionetes ‘Malote y popilote’ y ‘La media flor’, y la Compañía Fernando Hurtado escenificará ‘¡Pareja de dos!’, cola dancia como filu conductor.

Amás d’ello, Factoría Norte presentará en “Son-nidos” la so incursión nel llinguaxe secretu de los soníos, Los Piromantes sacarán a les cais a un grupu de xigantes en ‘Los buscandones buscan trabajo’, Teatro Plus representará’l montaxe de marionetes ‘El teatro de karabás’ y Teatro Kumen amestará teatru y llectura nel aula didáctica ‘Cuentos en la caja’.

Depués d’una esbilla ente les más de 300 compañíes de toa Europa qu’optaben a participar nel certame, la decimocuarta edición de la Feria Europea de Teatru pa Neños apuesta por promover el teatru “familiar”, a partir básicamente d’adaptaciones de llibros clásicos y cuentos, que marcarán el gruesu de les obres programaes pa esti añu.

Archivu. La Feria de Teatru pa Neños espera axuntar a 18.000 espectadores en 60 representaciones

L’alta representación asturiana nel Teatru Real desapaez en cinco meses. Depués de la marcha en setiembre pasáu de la entós xerente’l coliséu madrilanu, Inés Argüelles, los responsables del Real confirmaron güei que l’escenógrafu uvieín Emilio Sagi, director artísticu’l teatru dende payares de 2001, sedrá sustituyíu nel cargu pol críticu y promotor musical Antonio Moral.

Conforme avanzaba hai agora una selmana el diariu La Razón, el cese ta fundamentáu en razones técniques y non de tipu políticu, pesie a que tanto la marcha de Sagi como la dimisión d’Argüelles enmárquense nun enrarecimientu de les relaciones ente les autoridaes polítiques y los altos cargos del Teatru Real depués del nomamientu de Carmen Calvo como Ministra de Cultura, la pasada primavera.

Nacíu n’Uviéu en 1948 y formáu como musicólogu en Londres depués de doctorase en Filosofía y Lletres, Emilio Sagi presentóse como director d’escena na capital asturiana en 1980 al frente’l montaxe de ‘La Traviata’ de Verdi. Na década de los noventa foi director del prestixosu Teatru de La Zarzuela y llevó a escena venti producciones d’ópera y lírica.

Sagi, miembru’l Conseyu de les Artes y les Ciencies del Principáu, ocupaba’l cargu de director artísticu’l Teatru Real dende payares de 2001 y agora dexará esi llabor en manes del castellanu manchegu Antonio Moral, presidente de la Fundación Scherzo, asesor musical de la Fundación Caja Madrid y dende xineru de 2001 director artísticu de la Selmana de Música Relixosa de Cuenca.

Cuatro intérpretes pa romper la estética de “boina y cayáu” del monólogu en llingua asturiana. Toño Caamaño, Lluis Antón González, Chechu García y Benxa Pérez pondrán-y voz al primer certame de monólogu modernu n’asturianu, entamáu pola asociación H.a Xareos pa sigui-y el rastru al ésitu de los monólogos en castellán y sacar al subxéneru asturianu del ‘guetu’ rural.

Sedrá’l xueves 3 de marzu nun espaciu priváu asociáu a la cellebración asidua de conciertos, la Sala Albéniz, en Xixón. De fechu, el festival empezará y acabará con música: Una folixa previa preparará-yos el tarrén a los monologuistes a pertir de les 21 hores y el grupu de folk Tarañu pesllará’l certame con una actuación en directu.

Como remate, la llectura d’un manifiestu en defensa de la llingua y la cultura asturianes darán-y dafechu un calter reivindicativu a un eventu que tamién tien el so llau mercantil. Les entraes venderánse en taquilla a un preciu únicu de 8 euros, pero ye posible mercar llocalidaes de venta anticipada a 6 euros na Llibrería Seronda d’Avilés; nel chigre El Naranco y el Llar Solidariu d’Uviéu; y en seis puntos de Xixón: Café Trisquel, El Barucu, Llibrería Paradiso, Alborá Llibros, Astur-King Disco-bar y Mavy’s Pub.

La novedosa iniciativa sal de la entidá H.a Xareos, especializada na organización d’eventos culturales, que-y otorga un llugar relevante a la normalización social de la llingua asturiana nos actos qu’entama, y constitúi el primer intentu espresu de modernizar el monólogu n’asturianu de forma collectiva y enriba d’un escenariu, depués que varies editoriales apostaren per esi xéneru pa da-y más difusión a la lliteratura en llingua asturiana.

Web de H.a Xareos

El teatru asturianu despunta n’Arxentina. Un xuráu de 32 espertos vinculaos a la Universidá de Buenos Aires destaca’l montaxe ‘K.’, de la compañía xixonesa Nun Tris, como ún de los tres meyores espectáculos teatrales estranxeros que pasaron pol país sudamericanu a lo llargo de 2004, xunta dos obres d’una compañía francesa y otra mexicana.

La distinción, encuadrada na sétima edición de los Premios ‘Teatro del Mundo’, reconoz el llabor de la compañía asturiana y supón una contrapartida a la xira que Nun Tris completó per Arxentina y Uruguay na seronda austral del añu pasáu, nel mes de marzu, cuando los integrantes del grupu pisaron emblemáticos escenarios como’l teatru San Martín de Buenos Aires.

Depués que 32 críticos ya investigadores especialistes en teatru analizaren espectáculos, ediciones y tornes dramátiques pa escoyer a los meyores de les artes escéniques en 2004, la estaya d’Hestoria y Teoría Teatral del Centru Cultural ‘Rector Ricardo Rojas’ de la Universidá de Buenos Aires posó los güeyos en ‘K.’, un montaxe creáu a partir de la obra ‘El procesu’, de Kafka.

Xunta’l trabayu de los cómicos xixoneses, recibieron la distinción como meyor espectáculu estranxeru el montaxe mexicanu ‘Pasaporte con estrellas’, d’Emilio Carballido, y la obra francesa ‘Los díes felices’, dirixida por Arthur Nauzyciel.

Producciones Nun Tris nació como grupu en 1992, impulsáu polos actores Inma Rodríguez y Toño Caamaño. Destacáu nel so apueste pol idioma asturianu como llingua de dramatización, el grupu xixonés prevé poner n’escena en 2005, ente otros montaxes, una versión del ‘Quijote’ n’asturianu, la recreación d’un ritual célticu que’l mal tiempu impidió estrenar na última nueche celta de Sotu d’Ayer, una versión llibre d’Antígona’ y dellos monólogos.

Web de la compañía Nun Tris

De Suecia a l’Asturies rural de primeros del sieglu XX, col so entornu social y el so idioma propiu. La compañía Margen estrena nel teatru Palacio Valdés d’Avilés la so versión de ‘Xulia’, obra del autor suecu August Strindberg, nun apueste pola rellectura de montaxes clásicos en llingua asturiana cuyu biltu remóntase al añu 2002.

La escenificación que Margen estrenará énte’l públicu a les 20,15 hores d’esta nueche ta dirixida por Arturo Castro, interpretada por Ángeles Arenas, José Antonio Lobato y Verónica Gutiérrez ya incorpora una dramaturxa de los propios Castro y Lobato sobro la base del espectáculu orixinal, difundíu antes n’España baxo’l títulu ‘La señorita Julia’.

Los componentes de Margen presenten la so nueva incursión nel teatru en llingua asturiana como una amuesa de que l’idioma emplegáu nes artes escéniques nun dexa de ser una parte del espectáculu, que nesti casu tará más prósimu al públicu asturianu con rellación a obres qu’empleguen otres llingües.

Siguiendo una adaptación fecha pol filólogu y escritor Pablo Tejón y depués de poner en marcha, por encargu de l’Academia de la LLingua, la versión de la obra con ocasión del Día de les Lletres Asturianes del añu 2002, los integrantes de la compañía Margen aseguren que la hestoria narrada en ‘Xulia’ ye un amiestu de sentimientos universales, ente ellos el gociu y el sufrimientu.

Sesenta representaciones qu’esperen atrayer a 18.000 espectadores. La Feria Europea de Teatru pa Neños (Feten 2005), que se cellebrará en Xixón a finales de febreru, presentóse güei con eses dos grandes cifres, depués d’una esbilla ente les casi 300 compañíes qu’optaben a participar nel certame. La coordinadora de la feria, Marián Osácara, avanza que la decimocuarta edición de Feten apuesta pol teatru “familiar”.

A la fin, sedrán 43 grupos teatrales los encargaos d’espardir per espacios públicos de Xixón espectáculos de marionetes, circu, mimu, animación y pasucais ente los prósimos 20 y 25 de febreru, nun certame qu’afita el so ámbitu européu y que nesta ocasión desendolcaráse en dieciséis escenarios estremaos.

Completando los ‘númberos’ de la feria, mediu millar d’especialistes en teatru infantil -ente programadores, críticos y actores- asistirán al eventu xixonés en calidá d’invitaos, nuna edición que volverá acercar les creaciones dramátiques pa neños a los escolinos de centros públicos del Principáu y a les sos families.

De fechu, y según precisó la coordinadora’l certame, l’apueste de los organizadores céntrase en promover el teatru “familiar”, a partir básicamente d’adaptaciones de llibros clásicos y cuentos, que marcarán el gruesu de les obres programaes pa esti añu.

Pol so llau, la conceyala xixonesa de Cultura, Mercedes Álvarez, destacó l’altu númberu de compañíes que solicitaron tomar parte nel festival, el mayor na hestoria de la feria, lo qu’a xuiciu d’Álvarez amuesa l’altu interés que Feten suscita n’Europa.

“Nosotros yá nun tiramos más del asuntu”. Nesa frase resumen los responsables de la plataforma ‘Cultura pal Arango’ el fin de la so reivindicación pa recuperar el teatru xixonés como espaciu cultural, depués que Corporación Dermoestética refugare ayeri formalmente el plan d’usu compartíu de la sala. El collectivu censura’l silenciu del Ayuntamientu y acúsalu de nun escuchar a la ciudadanía.

Capítulu final de la movilización, poro. Según precisó esta mañana Boni Ortiz, voceru de la plataforma que venía reclamando’l resurdimientu’l teatru, la reivindicación dase por finada depués de la “educada” contestación de Dermoestética, qu’al traviés d’un comunicáu públicu tildó de “absolutamente inviable” l’estudiu técnicu ellaboráu por Cultura pal Arango pa recuperar la sala pa les artes escéniques.

Esi plan, que-y proponía a la empresa d’estética una xestión compartida del inmueble xixonés financiada por una fundación liderada pola propia Dermoestética, durmirá a partir d’agora nun caxón y l’Arango sedrá finalmente una macroclínica d’estética. Y nesi destín, entiende Cultura pal Arango, tien muncho que ver l’equipu de Gobiernu municipal de Xixón, integráu por PSOE ya Izquierda Xunida-Bloque por Asturies.

L’Ayuntamientu “ta alloñáu de la ciudadanía, nun la escucha y defende un Xixón desvertebráu”, sostienen los responsables de la plataforma, que censuren a los rexidores municipales por nun-yos dar una rempuesta formal al plan de viabilidá qu’ellos mesmos auspiciaron. “Nun-yos interesa salvar el teatru”, conclúi Ortiz.

La movilización pa recuperar l’Arango como sala cultural arrancó na pasada primavera y cristalizó en concentraciones selmanales y una manifestación nel mes de setiembre qu’axuntó a unes 300 persones.

Web de la plataforma Cultura pal Arango

Devolución íntegra del dineru. La empresa Mestizo Producciones, organizadora del espectáculu que Los Lunnis ufieron ayeri en Xixón, empezó güei a restituyir les perres de les entraes a los alredor de 2.000 persones qu’abandonaron el pabellón de L’Arena depués qu’una avería elléctrica postergara l’empiezu de l’actuación más de dos hores.

Con esa midida, los organizadores del eventu pretenden compensar a los pas y mas que desistieron d’esperar que s’iguase l’avería, ocasionada pol fallu d’un xenerador y que provocó tumultos nel recintu del espectáculu ente graves protestes de los espectadores.

De fechu, de los aprosimadamente 2.500 asistentes qu’accedieren al espectáculu de los populares muñecos televisivos -que tolos díes marquen en pantalla la hora d’acostase pa los más mozos- alpenes 400 d’ellos permanecieron hasta l’aniciu de l’actuación, que finalmente empezó con más de dos hores de retrasu.

Un representante de la organización precisó que’l dineru de les entraes devuélvese dende esta mesma tarde na taquilla’l pabellón deportivu de L’Arena, devolución que continuará mañana, martes, y el miércoles n’horariu de mañana o tarde.

Los Lunnis tienen fechada la so prósima actuación n’Asturies pal prósimu vienres, nesta ocasión nel teatru Campoamor d’Uviéu y en doble función, la primera a les 16,30 hores y un segundu pase a partir de les 19 hores.

L’Ayuntamientu de Xixón pronunciaráse sobro’l plan de viabilidá pal teatru Arango depués del día de Reis. La conceyala de Cultura, la socialista Mercedes Álvarez, citó a los responsables de la plataforma Cultura pal Arango pa una xuntanza, inda ensin fecha esacta, na que la Corporación dará por primer vegada la so opinión pública sobro’l documentu que’l collectivu entregó a los rexidores municipales hai agora un mes.

Asina lo confirmaron güei representantes de la plataforma ciudadana, que reclama la recuperación del Arango como espaciu cultural y que defende la plena validez del plan de viabilidá pa evitar que’l céntricu teatru xixonés se convierta únicamente nuna macroclínica de Corporación Dermoestética.

Los responsables de Cultura pal Arango presentaron ayeri n’asamblea el conteníu’l plan, qu’Asturnews avanzó la selmana pasada, y felicitáronse de que l’Ayuntamientu se comprometa a proporciona-yos “una contestación nuna mesa, y non na prensa al traviés de nun se sabe quién”, n’alusión a les declaraciones d’un altu funcionariu anónimu al diariu ‘El Comercio’, nes que denostaba les soluciones propuestes nel plan.

Sálvese o non el teatru Arango -emplegando la terminoloxía de la plataforma cultural-, los miembros del collectivu volvieron poner enriba la mesa la conveniencia de da-y continuidá a la movilización xestada al rodiu de la recuperación de la sala xixonesa, “porque la confluyencia d’idegues crítiques ye un avance qu’hai que mantener”.

Siete grandes cifres

Nel plan de viabilidá plantéguense siete grandes cifres pa sufragar el ‘rescate’ cultural del teatru xixonés: 900.000 euros p’acondicionamientu del teatru, 240.000 pa la estructura del edificiu, otros 180.000 pa igües nel contiguu cine Albéniz, 160.000 pa equipamientu escénicu y 126.000 euros más empobinaos a mobiliariu.

Otres dos partíes menores completen les cantidaes suxeríes pa remocicar el céntricu edificiu de Xixón: 48.000 euros baxo’l conceptu d’instalaciones en xeneral y 14.000 euros más destinaos a valtiamientos y llimpieza. En total, 1.668.000 euros, que los representantes de la plataforma cultural proponen financiar creando una nueva fundación d’investigación, promoción y difusión de la cultura asturiana, liderada pola propia Corporación Dermoestética, qu’asumiría el pagu de 1,2 millones (tola inversión prevista, menos los 434.000 euros necesarios pa dividir horizontalmente el teatru, que pagaría directamente Dermoestética).

Archivu. Cultura pal Arango plantega un teatru de 350 butaques y una fundación pactada con Dermoestética

Habrá qu’escoyer ente trescientos candidatos. Un total de 297 compañíes de trece países d’Europa y América presentaron la so solicitú pa tomar parte de la XIV Feria Europea de Teatru pa Neños (Feten), que se cellebrará en Xixón a finales de febreru entamada pola Fundación Municipal de Cultura y que se consolida como un referente internacional del teatru infantil.

El númberu de candidatures asoleyólu güei un responsable de comunicación de la Fundación Municipal de Cultura, Educación y Universidá Popular, entidá qu’agora deberá facer una esbilla, acordies cola calidá y la idoneidá de los espectáculos propuestos, de la que saldrán les 45 compañíes participantes nel certame.

Ente’l 20 y el 25 de febreru de 2005, Xixón acoyerá unes 60 representaciones escéniques pa neños, ente animaciones de cai, obres convencionales, montaxes de títeres y númberos circenses, too ello nos mesmos escenarios que na edición anterior del festival: El teatru Xovellanos, l’Antiguu Institutu Xovellanos, el Centru Integráu de Pumarín la Colexata San Xuan Bautista y les propies cais de la ciudá.

En 2004, la sensibilidá oriental y les hestories inspiraes en noveles d’aventures protagonizaron el certame xixonés, nel que la compañía andaluza ‘La Canela Teatro’ algamó’l premiu al meyor espectáculu por ‘Mil grullas’, mientres que los vascos ‘Teatro Gorakada’ ficiéronse colos premios a la meyor dirección y a la meyor escenografía.

Información sobro Feten na web del Ayuntamientu de Xixón