Escéniques

Pasa-y revista al teatru “que facemos na vida cotidiana y que delles vegaes pasa inalvertíu”. Con esi envís xubirá esta nueche la Compañía La Cubana al escenariu del teatru Xovellanos de Xixón pa representar la primer función de ‘Mamá, quiero ser famoso’, un espectáculu concebíu como revista musical que’l director y guionista, Jordi Milán, promete “divertíu, colorista y con un puntu de reflexón”.

D’ello dan fe los trabayadores de los medios de comunicación qu’esta mañana asistieron a la pública presentación del montaxe énte la prensa y alcontráronse protagonizando un ‘casting’ retransmitíu en tiempu real pa los compañeros qu’aguardaben nel patiu de butaques.

Esa interacción col públicu ye la que buscará La Cubana nes cinco funciones previstes hasta’l domingu en Xixón, y que tendrán continuidá la prósima selmana n’Avilés, cola amuesa d’un espectáculu que nun asonsaña a los famosos de la tele “porque d’eso yá s’encarga la propia tele”, según Milán.

Famosos ensin causa, neños prodixu, tertulianos y fabricantes de fama desfilarán pol escenariu nun montaxe teatral con gran presencia de la música que quier denunciar la “llocura de creer na televisión como si fora l’únicu mediu pa dicir ‘equí toi, esisto”. Pa facer too ello posible, La Cubana cuenta cola presencia de 10 actores que se desdoblen en más de 50 personaxes y tres técnicos que coordinen la continuidá del espectáculu.

‘Mamá, quiero ser famoso’ representaráse dende güei al domingu, al ritmu d’una sesión diaria qu’empezará a les 20,30 hores y pa la que les poques llocalidaes que queden a la venta viéndense a unos precios de 12 euros pa xeneral y de 20 euros pa entresuelu y patiu de butaques.

Cambiu radical del Ayuntamientu de Xixón na so postura sobro’l teatru Arango. Eso ye lo qu’anuncien los miembros de la plataforma pola reapertura de la sala, que constaten la ‘marcha atrás’ de los responsables consistoriales na so negativa a apoyar la recuperación del teatru y anuncien soluciones pa dientro d’un mes. Integrantes del collectivu ‘espioyáronse’ ayeri énte l’Arango en rempuesta al propietariu de la sala, que se refiriera a ellos como “pioyosos”.

Según apuntó Boni Ortiz, ún de los voceros de la plataforma Cultura pal Arango, el xiru na opinión de los grupos políticos municipales débese en gran parte a la iniciativa’l conceyal d’Izquierda Xunida-Bloque por Asturies Jesús Montes Estrada y pue traducise en resultaos tanxibles nun plazu aprosimáu de 30 díes, de sutaque los miembros de la plataforma accedan al interior del teatru y faigan una completa midición que permita tasar la sala del mou más cabal posible.

Los responsables del collectivu pola reapertura del Arango con sofitu municipal farán esi llabor con optimismu: Abúltase-yos que’l ‘sí’ definitivu del Conceyu p’apoyar la recuperación del teatru con fines culturales ta enforma prósima porque tala recuperación ye “ambiciosa y razonable”, daqué que, sostienen, pudieron afitar en recientes alcuentros colos distintos grupos políticos de la Corporación xixonesa.

Mientres llega esi decisivu xestu del Ayuntamientu, la plataforma sigue atropando firmes de los ciudadanos p’avalar la puesta en marcha de la céntrica sala como espaciu cultural públicu. Más de 3.000 xixoneses sofitaron yá cola so rúbrica les pretensiones del collectivu, que prevé cellebrar asamblees abiertes tolos xueves a les puertes del propiu teatru pa informar del estáu de les negociaciones.

La primera d’elles tuvo llugar a última hora de la tarde d’ayeri y acabó col simbólicu ‘espioyamientu’ de varios miembros de la plataforma en rempuesta a ún de los propietarios del teatru, Manuel Arango, que nuna entrevista asoleyada por ‘La Voz de Asturias’ refirióse a ellos como “pioyosos”.

A la consigna de “hai que s’espioyar pa dir curiosos a negociar cola propiedá, que de parásitos sabe un güevu”, integrantes del collectivu Cultura pal Arango sometiéronse a la simbólica desinfección d’un emisor de fumu, y ún d’ellos completó’l procesu con un públicu corte de pelu.

Un Cervantes atemporal qu’amuesa cómo’l númberu de fatos va espoxigando y acaba por poblar les estayes más altes de la sociedá. La compañía catalana Els Joglars, que güei ufre en Xixón la segunda representación de ‘El retablo de las maravillas’, presentó nel teatru Xovellanos les sos credenciales como una de les principales factoríes de teatru d’anguaño.

L’argumentu central de la cretinización al traviés de los medios de comunicación, sofitada nuna puesta n’escena mui dinámica con una gran pantalla de plasma incluyida, guió ayeri a los 900 espectadores qu’acudieron a la primera de les dos representaciones previstes por Els Joglars en Xixón, col resultáu final d’una interacción ente el sieglu XVI -cuando Miguel de Cervantes asoleyó l’entremés que-y da nome a la obra- y el XXI.

Los roles cervantinos amiéstense con papeles y personaxes públicos d’anguaño y lleven al públicu de sorpresa en sorpresa a lo llargo de dos hores de montaxe, de la mano de 50 personaxes que son productu de la camaleónica capacidá dramática de namás ocho actores.

L’humor satíricu con resonancies d’apellíos como Aznar, Arzak y Rouco Varela conduz una narración intensa na persona d’un pícaru xuglar que caltién la esencia cervantina del testu y que va esplorando con quirúxica ironía la relixón, l’arte contemporáneu, la gastronomía y la política. Toes eses estayes son exemplos, demuestren Els Joglars, de que “cada día qu’alborez, el númberu de fatos crez”.

La compañía catalana representa a partir de les 20,30 de güei el so últimu pase en Xixón de ‘El retablo de las maravillas’, con precios que van de los 12 a los 18 euros.

“Cada día qu’alborez, el númberu de fatos crez”. La compañía teatral catalana Els Joglars plantega a partir d’esi aforismu l’espectáculu ‘El retablo de las maravillas’, basáu nel entremés homónimu de Miguel de Cervantes y qu’a partir de güei ponse n’escena nel teatru Xovellanos de Xixón. Miembros del grupu defendieron ayeri’l montaxe como una sátira’l cretinismu de quienes nun quieren pasar por cretinos.

Asina, los integrantes d’Els Joglars presentaron la obra que representarán esta nueche y mañana, xueves, en Xixón como una síntesis de la “paradoxa clásica de cómo los cretinos puen vendenos la nada a costa’l temor de los sos semeyantes a pasar por cretinos”, un argumentu que pue paecer llonxanu nel tiempu pero que resulta nun lo ser tanto.

De la mano de personaxes d’anguaño como una top-model, una galerista d’arte, un guarda de seguridá, un repartidor de pizza y varios relixosos de les estremaes xerarquíes de la Ilesia católica, Els Joglars recuperen un clásicu con plena vixencia pa valtiar el sistema de valores de la sociedá de güei.

Pa ello, la compañía catalana esparde enriba l’escenariu ocho actores que se ‘multipliquen’ a sigo mesmos hasta representar a casi mediu cientu de personaxes en cuatro estayes estremaes nel montaxe: política, relixón, gastronomía y arte contemporáneu.

Les dos representaciones previstes nel teatru Xovellanos empezarán a les 20,30 hores. Les entraes tán a la venta a precios que van de los 12 euros pa les llocalidaes de xeneral a los 18 euros n’entresuelu y patiu de butaques.

Uviéu sedrá la quinta de seis. El quintetu arxentín Les Luthiers, qu’amiesta nes sos actuaciones humor y música con instrumentos de fabricación propia, prevé presentar el 5 de setiembre nes pistes de San Llázaro el so espectáculu más reciente, ‘Con Les Luthiers y Sinfónica’, dientro d’una xira que tamién inclúi A Coruña, Almería, Sevilla, Ponferrada y Zaragoza.

Según el calendariu d’actuaciones del veteranu grupu cómicu, Les Luthiers farán d’Uviéu la quinta etapa de la so xira española, qu’entamará el 26 d’agostu en Coruña col estrenu del espectáculu, una versión meyorada de ‘El Grosso Concerto’ que contará col apoyu escénicu de cincuenta músicos españoles y un director d’orquesta llegáu d’Arxentina.

Magar de les novedaes qu’inclúi l’últimu espectáculu de los cómicos sudamericanos, ‘Con Les Luthiers y Sinfónica’ incluyirá la representación revisada de vieyos númberos del grupu, ente ellos ‘La hija de Escipión’, ‘La bella y graciosa moza’, ‘Perdónala’ y ‘Concerto Grosso Alla Rustica’.

Incluyida nel programa festivu de San Mateo, l’actuación del quintetu arxentín en San Llázaro obligará a allugar nel recintu más de 5.500 sielles p’aumentar les 1.700 llocalidaes en grada. Les entraes pal espectáculu tienen unos precios previstos d’ente 20 y 55 euros.

El Circu del Sol canadiense arrancó la so presencia en Xixón col espectáculu ‘Saltimbanco’ esti vienres 25 de xunu con un entamu en llingua asturiana que foi mui aplaudíu pol públicu xixonés torgando que se sintiera’l restu la presentación. ‘Homes y muyeres: bones noches y afayáivos’ glayó la presentadora del espectáculu y depués de una pequeña introducción repitió “Homes y Muyeres: Saltimbanco”.

La sensibilidá llingüística y cultural de la compañía canadiense fizo rellumar entá más un espectáculu que foi premiáu en tou momentu pol públicu asturianu pol so gran altor cultural y calidá artística.

La páxina web de la compañía merez tamién una visita

El Circu’l Sol quier facer partícipe al públicu asturianu del so vixésimu cumpleaños. La compañía artística canadiense, que mañana entama a montar en Xixón el recintu de 20.000 metros cuadraos nel qu’ufrirá funciones hasta mediaos de xunetu, festexa los sos primeros venti años d’esistencia con un descuentu xeneral del 20 por cientu en toles entraes que se merquen hasta la medianueche de güei en caxeros, n’internet y n’establecimientos collaboradores.

Asina, los espectadores que quieran aforrar la quinta parte del preciu de les llocalidaes -a la venta a tarifes d’ente 24 y 57 euros, según l’allugamientu dientro de la carpa y el día del espectáculu- podrán alquirir güei la so entrada nos centros d’El Corte Inglés d’Asturies, nos caxeros automáticos de La Caixa y na propia web del Circu, www.cirquedusoleil.com.

El desembarcu efectivu de la premiada compañía canadiense en Xixón empieza al mediudía de mañana, col llevantamientu en tarrenos del puertu d’El Musel de la carpa qu’acoyerá les representaciones hasta mediaos de xunetu, una instalación de 50 metros de diámetru, 17 d’altor y aforu pa 2.500 persones.

El Circu’l Sol asitiará amás na zona portuaria de Xixón un complexu ambulante d’oficines, taquilles, una escuela propia y una cocina collectiva, nun recintu qu’ocupa 20.000 metros cuadraos y cuyu montaxe emplegará a 60 técnicos a lo llargo de más d’una selmana.

El ‘Cirque du soleil’ aporta a Asturies col espectáculu ‘Saltimbanco’, una cellebración de la vitalidá que propón una nueva visión del entornu urbanu al traviés del optimismu y el xuegu. Xixón, con 26 funciones programaes, conviértese na quinta ciudá del Estáu español qu’acueye a la compañía canadiense, qu’hasta agora visitara namás Madrid, Barcelona, Sevilla y Bilbao.

Ópera y zarzuela nel Campoamor, teatru nel Filarmónica, conciertos nel Auditoriu y congresos nel futuru Palaciu de Congresos. Asina quier reordenar l’Ayuntamientu d’Uviéu el so mapa cultural, nun procesu a llargu plazu que güei anunció el conceyal de Cultura, Alfonso Román López, na presentación de la LVII Temporada d’Ópera, qu’acoyerá les representaciones de les obres ‘Elektra’, ‘Tancredi’, ‘Les bodes de Figaro’, ‘Lucrezia Borgia’ y ‘Aida’.

De cada una d’eses óperes habrá, ente’l 22 de setiembre prósimu y el 28 de xineru de 2005, un total de tres representaciones, cifra que los responsables municipales prevén aumentar a cuatro en prósimes temporaes col Teatru Campoamor como sé indiscutible del certame.

De fechu, los planes del Consistoriu uvieín pa redistribuyir les actividaes culturales nos distintos equipamientos municipales empiecen pola dedicación esclusiva del Campoamor pa representaciones líriques -ópera y zarzuela-, derivando les funciones teatrales al Teatru Filarmónica darréu se remate el so remocicamientu. Amás, l’Auditoriu ‘Príncipe Felipe’ quedará acutáu pa la música en cuantes la construcción del futuru Palaciu de Congresos permita lliberalu de les xuntances corporatives y sectoriales que nél se vienen cellebrando.

Con un presupuestu global de más de 800.000 euros y voluntá d’equilibriu nel programa, la LVII Temporada d’Ópera d’Uviéu organizaráse al rodiu de los cinco montaxes contrataos -composiciones de Strauss, Donizetti, Rossini, Verdi y Mozart-, pero incluyirá amás un conciertu homenaxe al malográu Guillermo Badanes y tres recitales didácticos empobinaos a allegar la ópera a tolos públicos.

L’Ayuntamientu de Xixón nun reflotará en solitario el Teatru Arango, peslláu hai cuatro años y cuyu llocal quier alquirir un particular pa convertir la sala nun centru d’estética. L’alcaldesa de la ciudá, Paz Fernández Felgueroso, declaró güei la imposibilidá financiera del Consistoriu pa sufragar la recuperación del teatru, pero dexó abierta la puerta a la collaboración municipal si un inversor priváu lleva la iniciativa.

D’esti mou, Felgueroso refuga la reivindicación cimera de la plataforma ciudadana ‘Cultura para el Arango’, recién constituyida pa reclamar la reapertura’l céntricu teatru xixonés, y mantién firme la negativa del equipu de gobiernu llocal a financiar el funcionamientu d’un segundu teatru públicu na ciudá.

El collectivu ciudadanu en defensa’l remocicamientu del Arango, que recuerda que’l propietariu del inmueble cifraba l’alquiler del llocal nunos 180 euros diarios nes últimes negociaciones cellebraes con él hai unos años, anuncia nueves movilizaciones ya insiste na conveniencia d’evitar que la empresa Corporación Dermoestética merque finalmente el teatru y faiga d’él una gran clínica de tratamientos estéticos.

L’alcaldesa de Xixón refugó la recuperación municipal del Arango nel trescursu d’un axitáu Plenu cellebráu esta mañana, nel que’l conceyal de Festexos, Iván Álvarez Raja, defendió la venta de paquetes d’entraes a empreses pal conciertu que Paul McCartney ufrió na ciudá el pasáu 25 de mayu como métodu qu’evitó amenorgar les perdes qu’ocasionó el recital.

L’espectáculu del ex Beatle nel estadiu d’El Molinón dexó un déficit d’alredor de 500.000 euros nes arques municipales xixoneses y desencadenó una turbonada de crítiques al departamento de Festexos por parte de la oposición, ostentada pol PP.

Escarniu públicu de los dogmas de la relixón católica. Esa ye la tipificación xurídica cola que cerca de venti asturianos visitaron distintes comisaríes d’Uviéu y Xixón pa denunciar formalmente a los responsables de la obra teatral ‘Me cago en Dios’, que se representó nel Círculu de Bellas Artes de Madrid hasta’l pasáu 2 de mayu y cuyu autor sufrió una grave agresión n’escena por parte de dos xóvenes, ún d’ellos nietu del cabezaleru ultradrechista Blas Piñar.

Los denunciantes qu’interpusieron les sos denuncies n’Asturies siéntense ofendíos na so condición de católicos, y secunden coles sos visites a Comisaría un movimientu popular de refugu desencadenáu por una carta que la presidenta de la Comunidá Autónoma de Madrid, Esperanza Aguirre (PP) asoleyó pa censurar el montaxe.

El director de la obra, Íñigo Ramírez de Haro, cuñáu de la propia Aguirre, precisó en declaraciones a la Cadena Ser que’l montaxe ye un repasu en clave d’humor autobiográficu d’un home que sufre estreñimientu y remembra, nun momentu de la pieza, la so infancia nun colexu rexentáu por xesuites, ensin falta-y en nengún momentu al respetu a les creyencies católiques.

Ramírez de Haro pidió-yos a les autoridaes que, “si van protexenos de los imanes, que nos protexan tamién de los obispos”, yá que l’Arzobispáu de Madrid sumóse a la censura de la obra al travién d’un comunicáu públicu que’l dragaturgu tildó de ‘fatwa’ (sentencia de persecución dictada por autoridaes relixoses islámiques).

Durante la representación del pasáu sábadu 1 de mayu, dos mozos arramplaron nel escenariu y agredieron violentamente a los responsables de la obra. Ún d’ellos yera nietu’l cabezaleru ultradrechista Blas Piñar, mientres que’l segundu de los agresores foi identificáu como nietu d’un golpista del 23-F.