Emigración

La representación permanente d’Asturies en Bruseles, epicentru de l’actividá del Parlamentu européu, sufragaráse en parte colos alquileres pagaos por otres comunidaes autónomes del continente. L’edificiu que’l Principáu inagurará a finales del prósimu setiembre pa defender ‘in situ’ los intereses asturianos alquilará dependencies a Cantabria, la rexón polaca de Silesia y la Rede Europea Transnacional pa la inclusión social (Retis).

Asina lo anunció güei na capital belga el presidente asturianu, Vicente Álvarez Areces, qu’amosó el so enfotu de que la oficina’l Principáu en Bruseles, n’obres dende hai dos años, abrirá a la fin les sos puertes el prósimu 24 de setiembre.

Darréu se produza esa apertura, Asturies contará con una delegación física permanente nel remocicáu edificiu del diariu ‘Le Peuple’, que’l Principáu mercó por poco más d’un millón d’euros y cuyes obres d’adecuación costaron otros 3,3 millones.

Nesi inmueble, qu’ayudarán a amortizar les comunidaes que van a alquilar dependencies nél pa contar con una sé propia en Bruseles, centralizaránse les funciones de representación de los intereses d’Asturies énte la Unión Europea, pero la previsión del Principáu ye que l’edificiu de ‘Le Peuple’ ayude a empresarios asturianos a captar inversiones y acueya actividaes culturales que promocionen la imaxe d’Asturies.

Allugáu nel centru urbanu de la capital de Bélxica, l’inmueble que’l Principáu inagurará na seronda tien una superficie útil de 2.800 metros cuadraos y, amás del emblemáticu periódicu ‘Le Peuple’, acoyó la sé de la Cooperativa de la Prensa Socialista belga.

Emigrante asturianu, mayor de 65 años y ausente hai más de dos décades. Esi ye’l perfil al que se dirixe la operación ‘Señaldá 2004’, promovida pol Gobiernu autonómicu pa sufragar el viaxe y una estancia de quince díes n’Asturies a emigraos que quieran realcontrase col so país, un programa pal que l’Axencia Asturiana d’Emigración destina un presupuestu de 185.000 euros.

Según un comunicáu asoleyáu güei por esti organismu, del que ye titular Luis Miguel Fernández Romero, el plazu pa solicitar una plaza nos vuelos de regresu a Asturies acabará’l prósimu 16 de xunetu, y queda abierta la puerta a una eventual almisión de solicitantes que, siendo menores de 65 años d’edá, lleven a lo menos 45 años ensin regresar al so país.

De pasu, los emigrantes que vuelvan a afincase n’Asturies podrán solicitar, tamién a partir de güei, una ayuda aconómica cola que pagar gastos estraordinarios causaos pol retornu o cubrir necesidaes monetaries derivaes de la situación na que queden los asturianos que regresen del estranxeru.

El plazu pa pidir formalmente una d’eses ayudes pa emigrantes retornaos, pa les que’l Gobiernu acuta una partida de 120.000 euros, pesllaráse’l 30 de setiembre prósimu. Entrarán dientro de los requisitos de la convocatoria dos colectivos distintos: D’un llau, los asturianos retornaos, los sos familiares y los sos descendientes hasta’l segundu grau de consanguinidá, con nacionalidá española y que volvieren p’Asturies como máximo hai dos años.

En segundu llugar, podrán solicitar les ayudes los emigrantes asturianos que tean temporalmente n’España, mesmo que los sos familiares, siempre que la causa que motiva la solicitú tea xenerada en territoriu l’Estáu

Una nueva oficina instalada en Madrid mirará pol bon funcionamientu y les necesidaes de los más de cien Centros Asturianos espardíos pol planeta. Sedrá l’aplicación más inmediata del conveniu, dotáu con 13.000 euros añales, que’l Gobiernu autonómicu y la Federación Internacional de Centros Asturianos (FICA) firmaron esta tarde n’Uviéu, col envís d’asegurar un vínculu estable ente los asturianos emigraos.

El documentu, que rubricaron na sé de la Conseyería de Xusticia, Seguridá Pública y Relaciones Esteriores el titular d’esti departamentu, Francisco Javier García Valledor, y el presidente de la FICA, José Luis Casas Villanueva, tendrá una continuidá añal y permitirá-yos a los representantes de los asturianos emigraos aconceyase más d’una vegada al añu, periodicidá que veníen manteniendo hasta agora con un alcuentru añal en Colombres.

Amás, los directivos de la Federación de Centros Asturianos emplegarán l’ayuda del Principáu pa esplorar ‘in situ’ los pruyimientos y la situación de les distintes comunidaes d’asturianos nel esterior, de móu que se fortalezan los llazos ente toes elles cola FICA como catalizador.

Momentos antes de la firma’l conveniu, a la que tamién asistió el director de l’Axencia Asturiana d’Emigración, Luis Miguel Fernández Romero, el conseyeru de Xusticia y Relaciones Esteriores destacó’l papel de la Federación de Centros Asturianos na promoción esterior del país y na difusión de la llingua y cultura asturianes, y xustificó’l conveniu como una midida qu’esclúi a la FICA de la convocatoria xeneral d’ayudes a los colectivos d’emigrantes pa da-y “un soporte económicu estable”.

García Valledor aprovechó la so comparecencia pública p’anunciar amás el compromisu’l Gobiernu autonómicu d’entamar nel estranxeru una cellebración del Ocho de Setiembre paralela a la se fai n’Asturies. Según Valledor, la intención del Executivu ye que cada añu, a partir d’esti mesmu, seya un país distintu el qu’acueya los actos conmemorativos, pa facilitar la participación de los asturianos emigraos a mui estremaos llugares.

Los fondos del Muséu de la Emigración, allugáu na llocalidá de Colombres, siguen medrando. El vicepresidente’l Conseyu de Ministros de Cuba, José Ramón Fernández, entregó-y esta mañana n’Uviéu al presidente’l Principáu, Vicente Álvarez Areces, nuevos documentos xeneraos pola gran afluencia d’asturianos a Cuba na dómina d’entesieglos que sedrán catalogaos y custodiaos nel equipamientu cultural del oriente asturianu.

Fernández, d’ascendencia asturiana, abrió güei una visita oficial de dos díes con una comparecencia pública xunta Areces na que sorrayó la candialidá de les rellaciones ente los Gobiernos d’Asturies y Cuba nos últimos 18 años, “ensin importar el presidente o el partíu políticu” que tuviera al frente l’Executivu asturianu en cada momentu.

Nuna rueda de prensa a la que tamién asistieron la embaxadora de Cuba n’España, Isabel Allende, y la conseyera de Presidencia, María José Ramos, el vicepresidente cubanu aprovechó pa denunciar el reciente refuerzu’l bloquéu económicu impuestu a la isla polos Estaos Xuníos, que según aseguró “va contra lo humano, lo económico y lo xusto”, y denigró al actual presidente norteamericanu, George W. Bush, como’l peor de los mandatarios posibles al frente de la Casa Blanca.

Na so breve estancia n’Asturies, José Ramón Fernández tien previsto asistir, ente otros actos, a una cellebración del décimu aniversariu del hermanamientu ente les ciudaes de Xixón y L’Habana, alcuentros con estremaes organizaciones que desendolquen proyectos d’ayuda humanitaria en Cuba y una xuntanza con más de 30 empreses asturianes interesaes n’invertir nel país caribeñu.

Llanes despide a Manolo del Campo mediu sieglu depués de velu colar p’América Llatina. El presidente’l Principáu, Vicente Álvarez Areces, encabeza la llista d’autoridaes qu’esta tarde asisten al funeral en Pría pol etenru descansu del que fora referente de la defensa de la tradición asturiana nel esterior, fallecíu el vienres pasáu en Buenos Aires llueu d’una llarga enfermedá.

L’actu relixosu de les 18 hores de güei sedrá l’epílogu d’un viaxe d’ida y vuelta que Del Campo entamó a finales de los años cuarenta y qu’ayer completóse cola llegada de los sos restos mortales al aeropuertu d’Asturies, onde foron recibíos por familiares y autoridaes ente les que se contaba el delegáu del Gobiernu y ex alcalde de Llanes, Antonio Trevín.

Natural de Villanueva de Pría, Del Campo aportara a l’Arxentina en 1949. Nesi momentu entamó un llabor de más de mediu sieglu que, catalizáu pol Centru Asturianu de Buenos Aires, cristalizó na formación del Conxuntu de Dancies Pelayo, una institución de casi 70 persones que tien amás una escuela a la qu’asisten más de 30 rapaces y atesora un vestuariu con 800 traxes tradicionales.

Somorguiada Arxentina nuna prollongada crisis económica con derivaciones sociales, Manolo del Campo mantuvo asinamesmo un papel activu na defensa de los intereses de los asturianos emigraos al país qu’anguaño gobierna Néstor Kirchner, hasta qu’una llarga enfermedá acabó cola so vida el vienres pasáu en Buenos Aires.

El malográu defensor de la tradición asturiana nel esterior yera bien conocíu nel so conceyu natal y recibiere a lo llargo la so vida varios premios y distinciones, ente les que destaquen la concesión de la Medalla de Plata del Principáu y del títulu de Fíu Predilectu de Llanes.

La comunidá asturiana en Buenos Aires despidió esta fin de selmana a Manolo del Campo, que morriere esta selmana y que yera’l cimeru animador de la cultura asturiana en Buenos Aires. Con Manolo del Campo, Asturies pierde a ún de los sos más nomaos embaxadores culturales y a un home qu’algamara averar a les nueves xeneraciones de la emigración la cultura de los sos ancestros.

Una enfermedá que venía amuesando hai tiempu llevónos al home más activu de la emigración asturiana na Arxentina qu’amás de dirixir el Grupu Pelayo, qu’elli mesmu fundare na postguerra, yera l’encargáu de la comunicación institucional del Centru Asturianu de Buenos Aires. Les gaites asturianes que suenen na capital arxentina fainlo por mor del so esfuerciu por dar aliendu a la música tradicional nel Centru Asturianu y bon exemplu de la calidá musical de los rapazos qu’animare Manolo del Campo foron los que representaren a Arxetina nel Festival de Lorient d’hai tres años, la primer vegada que’l Premiu Macallan s’abriere a los gaiteros del otru lláu del Atlánticu.

Manolo del Campo aportó a l’Arxentina en 1949 proveniente de Villanueva de Pría, nel conceyu de Llanes y el so llabor ellí a lo llargo de casi mediu siglu de ye’l Conxuntu de dances Pelayo, una institución de casi 70 persones, que tien amás una escuela a la que van más de 30 rapaces y un vestuariu con 800 traxes tradicionales.

Manolo del Campo yera bien conocíu nel so conceyu de nacencia y reciere a lo llargo la so vida munchos premios y distinciones. Una d’eses distinciones de la que más orgullosu se dicía yera el nomamientu de sociu d’honor de la Federación Internacional de Centros Asturianos, la FICA, que reciere nel añu 1995.

Última entrevista a Manolo del Campo na Arxentina

Los residentes nel esterior puen presentar hasta’l mes de xunu solicitúes pa les colonies y los campamentos de branu del Ministeriu d’Asuntos Esteriores, que s’entamen tolos años pa descendientes d’españoles en primer y segundu grau. El plazu abrióse’l pasáu 7 d’abril y ye de dos meses pa les colonies de branu, y de cuatro pa los albergues y campamentos.

Les ayudes tienen como obxetivu averar a los emigrantes a la realidá española y permiti-yos que caltengan contautu colos mozos de la so edá que viven nel país.

Pa poer beneficiase d’esti sofitu los solicitantes tienen de vivir nel país d’emigración y caltener la nacionalidá española, amás d’alcontrase comprendíos ente los 12 y los 14 años, nel casu de les colonies de vacaciones, y hasta los 18 nel casu de les ayudes que tan empobinaes a los albergues y campamentos.

Nel casu les colonies, puen beneficiase tamién los descendientes españoles, hasta’l segundu gráu, magar ya nun tengan la nacionalidá. Les solicitúes tienen de presentase nes Conseyeríes de Trabayu y Asuntos Sociales de les Comunidaes Autónomes.