Educación Vázquez conviértese nel primer rector reelixíu de la democracia reciente by asturnet 31 de marzu, 2004 El caderalgu d’Economía Juan Vázquez siguirá siendo’l rector de la Universidá d’Uviéu hasta 2008, depués de derrotar nes urnes por sólo 152 votos al so únicu oponente, Vicente Gotor, nos primeros comicios universitarios abiertos a estudiantes y personal llaboral non docente de la institución académica asturiana. Vázquez conviértese asina nel primer rector asturianu de la democracia reciente que resulta reelixíu nel cargu depués del so primer mandatu. Los resultaos de la votación foron enforma más reñíos de lo que marcaben les previsiones: Vázquez recibió’l 51,2 por cientu de los votos ponderaos, frente al 48,7 por cientu qu’axuntó el caderalgu de Química Vicente Gotor, vencedor ente’l personal alministrativu y de servicios. Pol contrariu, foi l’apoyu mayoritariu de la comunidá estrictamente académica -profesores y alumnos- el qu’acabó por entornar la balanza del llau del agora reelixíu rector de la Universidá d’Uviéu, qu’afronta como retu cimeru l’adecuación de les titulaciones superiores al nuevu sistema européu d’enseñanza superior, d’equí a 2010. El triunfu electoral permitirá-y amás a Juan Vázquez -enfotáu en gobernar “pa toos”, según precisó acabante ser reelixíu- siguir al frente de la Conferencia de Rectores de les Universidaes Españoles y continuar exerciendo la presidencia de la Conferencia Iberoamericana Universitaria. 31 de marzu, 2004 0 FacebookTwitterPinterestEmail
Educación La demanda d’asturianu en Xixón esbarrúmbase na Secundaria by asturnet 18 de febreru, 2004 Medio enllenu o medio vacíu. El vasu de la demanda de l’asignatura de Llingua Asturiana en Xixón, el conceyu con más habitantes d’Asturies, pue vese de dambes formes: Más de la mitá de los escolinos de Primaria deprenden asturianu nos colexos, pero esi porcentaxe esbarrúmbase hasta alpenes el 4 por cientu nos institutos, onde ruempe de mou traumáticu la cadena de deprendizaxe académicu del idioma autóctonu. Asina, frente a los 3.500 alumnos d’asturianu que tán matriculaos nos colexos xixoneses namás hai 450 estudiantes de Llingua Asturiana nos institutos del conceyu, una disparidá de cifres que afecta tamién al collectivu de profesores: 23 na Primaria y namás cuatro na Secundaria. Tala situación de falta de continuidá quier iguala l’acabante constituyir Oficina municipal de la Llingua de Xixón, que se plantega como xeres más urxentes la recuperación de la toponimia tradicional del conceyu, l’aprobación d’una ordenanza municipal pa regular l’usu l’asturianu y la formación de los conceyales, llabor esti últimu pal que va entamase un cursu monográficu. 18 de febreru, 2004 0 FacebookTwitterPinterestEmail
Educación El Principáu alitará la edición de llibros de textu n’asturianu by asturnet 4 de febreru, 2004 El Gobiernu del Principáu d’Asturies, alitáu pola Oficina de Política Llingüística, prepara una convocatoria pública d’ayudes editoriales pa l’espublizamientu de llibros de textu n’asturianu que permitan iguar la falta de material bibliográficu afayadizu pa los escolinos que decidan cursar l’asignatura de Llingua Asturiana. La iniciativa canalizaránla de forma conxunta les Conseyeríes d’Educación y Ciencia y de Cultura, Comunicación Social y Turismu, dirixíes respectivamente polos socialistes José Luis Iglesias Riopedre y Ana Rosa Migoya, y tendrá un presupuestu inda por concretar. Sedrá toa una novedá na promoción editorial del asturiano que vien faciéndose nos últimos años, yá que les subvenciones a la industria editorial integrábense nun paquete únicu y nun s’espublizaben nel Boletín Oficial del Principáu de forma dixebrada y singular según el xéneru. La promoción de los llibros de textu apoyaráse amás según Ramón D’Andrés, director de la Oficina de Política Llingüística del Principáu, na recuperación de la denomación “llingua asturiana” pa designar tala materia nos currículos educativos, onde agora se designa “Lengua tradicional: bable/asturiano”. 4 de febreru, 2004 0 FacebookTwitterPinterestEmail
Educación Cursu de llinguaxe non sexista de la JSO by asturnet 30 de payares, 1999 Les Xuventudes Socialistes d’Uviedo (JSO) organicen pa esti vienres 26 d’ochobre un Cursu de Llinguaxe Non Sexista, que tendrá llugar nel Centru Xuvenil Santullano (Avda. Fernández Ladreda, 48), a partir de les 18:00 hores. El cursu, van impartilu Begoña Donaire (experta en xéneru), y Rocío Álvarez (presidenta de l’asociación “Mujeres Jóvenes” de Xixón) y ye d’asistencia llibre y gratuita, anque dende la JSO pídese confirmación de la mesma na dirección de corréu infoarrobajsoviedo.org, pa prever el númberu de participantes. 30 de payares, 1999 0 FacebookTwitterPinterestEmail
Educación L’Ayuntamientu Corvera destina 6000 euros a beques universitaries by asturnet 1 de xineru, 1970 El conveniu foi robláu nel conceyu de Corvera pol rector de la Universidá, Vicente Gotor, y l’alcalde, José Luis Vega, nun actu nel que tamién tuvieron presentes el vicerrector d’Estudiantes, Luis Rodríguez Muñiz, y el conceyal de Facienda y Servicios Xenerales, Iván Fernández. La Universidá d’Uviéu va convocar estes ayudes destinaes a financiar el treslláu y material d’universitarios de Corvera en función de la renta y l’espediente académicu. Anguaño, cerca de 230 alumnos procedentes d’esi conceyu cursen estudios na Universidá d’Uviéu y unos 60 cuntaben con beca del ministeriu’l pasáu cursu académicu. El rector estimó al Conceyu de Corvera’l so compromisu colos universitarios y confió en que’l conveniu anueve añu a añu mientres persista l’actual crisis económica. 1 de xineru, 1970 0 FacebookTwitterPinterestEmail