Educación

Mil quinientos profesores de la Universidá d’Uviéu podrán ver medrar la so nómina hasta en 4.000 euros al añu. El presidente asturianu, Vicente Álvarez Areces; el rector, Juan Vázquez; y los sindicatos UXT, CCOO y SIPU formalizaron güei un alcuerdu llargamente negociáu que-y supondrá al Principáu un desembolsu de seis millones d’euros y qu’equipara salarialmente a los docentes universitarios asturianos a los sos colegues d’otres comunidaes autónomes.

El pactu firmáu esti mediudía, qu’afita un complementu retributivu contempláu na Llei Orgánica d’Universidaes, aumentará ente 3.000 y 4.000 euros de media el sueldu añal de los 1.500 profesores de la Universidá que lleven exerciendo xeres docentes hai a lo menos cinco años, sobre un total de más de 1.700 profesores universitarios, y sedrá plenu en 2006, acordies con un calendariu d’aplicación progresiva.

No concreto del universu numéricu, les cantidaes adicionales que van empezar a cobrar los profesores -como reconocencia o estímulu de la calidá de la docencia, la investigación y la xestión- encuádrense n’hasta siete grupos, tres d’ellos lligaos a la docencia, otros tres a la investigación y el restante vinculáu a la xestión.

No que cinca a la docencia, l’antigüedá premiaráse con 1.200 euros añales pol primer quinqueniu y otros mil euros más al cumplir tres y cinco quinquenios como profesor. Cantidaes asemeyaes a lo que va aplicase na investigación, onde los primeros seis años merecerán un plus añal de 1.200 euros, más otros mil al aportar al segundu y al cuartu sexeniu.

El complementu de xestión ye d’un 10 por cientu de les perres recibíes llueu de cuatru años nun cargu, polo que ciertos profesores podríen llegar a cobrar, xuniendo tolo anterior, hasta 7.400 euros más cada añu. Magar d’ello, la mayoría de los docentes percibirá ente 3.000 y 4.000 euros adicionales.

Los universitarios asturianos titulaos n’Informática, Económiques, Empresariales o Xestión y Alministración d’Empreses tienen más facilidá p’atopar un puestu de trabayu que’l restu. Asina lo amuesa la llista de peticiones fecha pol mediu cientu d’empreses de diverses estayes aconceyaes nel III Foru d’Emplegu entamáu pola Universidá d’Uviéu, que se cellebra nel recintu ferial de Xixón.

Si se toma esi llistáu de pidimientu de llicenciaos y diplomaos como un termómetru válidu de per ónde va na práctica el mercáu llaboral cualificáu n’Asturies, les titulaciones rellacionaes col mundu de la empresa son les que más facilidaes -yos dan a los estudiantes p’alcontrar un trabayu: De les 54 empreses presentes nel foru, la mitá demanden titulaos en Ciencies Económiques, Empresariales y Xestión y Alministración d’Empreses.

Na mesma estaya del mundu del trabayu, 12 empreses dicen necesitar titulaos en Relaciones Llaborales, 9 reclamen estudiantes de Ciencies del Trabayu y otres 7 piden diplomaos na especialidá de Xestión y Alministración Pública d’Empreses.

Informática nun desmerez n’absolutu: 29 de les empreses aconceyaes en Xixón ufren trabayu a titulaos nesta disciplina, seya na so variante técnica o na superior. El restu d’inxenieríes caltienen un pesu discretu pero efectivu nel cuadru global d’oferta d’emplegu, cola Inxeniería Industrial como la más solicitada y tres d’ella Mines y Química.

En niveles asemeyaos allúguense les ciencies esperimentales como la Bioloxía y la Física, mientres que’l panorama tórnase más bien desolador en tres estayes: la Educación, les Ciencies de la Salú y mui especialmente les Humanidaes. Asina, d’ente les 54 empreses presentes nel foru universitariu namás cinco busquen pedagogos, dos piden mayestros, cuatro requieren filólogos y tres anden a la gueta de titulaos en Xeografía o Hestoria del Arte.

Na cola de les ufiertes d’emplegu asítiense les titulaciones d’Hestoria, Musicoloxía, Enfermería, Educación Social, Fisioterapia, Medicina ya Odontoloxía, peles que s’interesa namás una empresa.

El III Foru d’Emplegu de la Universidá d’Uviéu empezó ayeri y pieslla güei les sos puertes nel recintu xixonés de la Feria Internacional de Muestres d’Asturies.

Llista completa d’ufiertes

Juan Vázquez opta pol continuismu. El caderalgu d’Economía, que mañana tomará posesión del cargu de rector de la Universidá d’Uviéu, siguirá gobernando la institución académica asturiana arrodiáu de gran parte del equipu que lu flanqueó nel so anterior mandatu: Repiten seis vicerrectores d’ente ocho, y pasen a integrase nel equipu rectoral l’ex conseyeru de Sanidá col PP Antonio Cueto y la caderalga de Drechu Paz de Andrés.

El primeru pasa a rexir el vicerrectoráu d’Ordenación Académica y Profesoráu, mientres que De Andrés asume la dirección del vicerrectoráu d’Estensión Universitaria. El restu del equipu caltiénse ensin variaciones significatives: Ana Isabel Fernández n’Investigación, Santos González n’Estudiantes y Movilidá, Isabel Viña en Campus ya Infraestructures, Esteban Fernández Rico en Calidá ya Innovación, Miguel Ángel Comendador en Converxencia Europea y Santiago Martínez Argüelles en Rellaciones Institucionales.

Completen l’organigrama del nuevu equipu rectoral Ignacio Villaverde, que sustitúi a Ramón Punset al frente de la Secretaría Xeneral, y José Antonio Díaz Lago, que repite como xerente de la Universidá.

Juan Vázquez convirtióse el pasáu 1 d’abril nel primer rector que resulta reelixíu na Universidá asturiana na democracia reciente, depués de ganar al so únicu oponente, el caderalgu de Química Vicente Gotor, por alpenes 150 votos de diferencia.

Llista oficial na web de la Universidá

Unos 16.000 escolinos cursen anguaño l’asignatura de Llingua Asturiana, venti años depués de que l’asturianu entrare como materia de deprendizaxe nos centros d’enseñanza. Son númberos del conseyeru d’Educación, José Luis Iglesias Riopedre, qu’esti mediudía intervino en Xixón nel actu escolar central de la XXV Selmana de les Lletres Asturies y al que una representación del profesoráu -y pidió más compromisu efectivu cola educación n’asturianu.

Un pidimientu que Xosé María García, ún de los primeros profesores de Llingua n’Asturies, sintetizó en tres cuestiones al so xuiciu urxentes: Faen falta más llibros de testu pa deprender asturianu, los profesores han tener mayor estabilidá xeográfica y hai qu’axilizar la capacitación de los docentes. García acusó amás al Principáu de “torgar” la enseñanza n’asturianu na Educación Infantil -de 0 a 3 años- y tildó de “impresentable” el fechu de qu’estudiantes de Secundaria qu’escueyen cursar Llingua nun puean estudiar tamién un tercer idioma.

Riopedre retrucó con cifres. Na so alocución, que tamién tuvo llugar nel trescursu d’una folixa escolar nel colexu Evaristo Valle de Xixón, el conseyeru d’Educación y Ciencia del Principáu precisó que más de la mitá de los escolinos asturianos estudien anguaño Llingua, y fexo un diagnósticu dende la matemática de la situación nel conceyu más pobláu, Xixón: En Primaria, impártese asturianu en 33 centros, lo que supón en 94 por cientu’l total, mientres qu’en Secundaria la Llingua cúrsase en namás 10 institutos, el 77 por cientu.

Cifres nes que Riopedre s’apoyó p’asegurar que “too ye meyorable, pero ye indudable qu’hebio un compromisu de l’Alministración educativa col asturianu”. Según el conseyeru, hai que dir xubiendo escalones p’hacia la oficialidá como oxetivu “futuru, non inmediatu”.

Nel planu más prósimu nel tiempu, la Conseyería d’Educación ta a piques d’entamar una campaña p’animar a pas y mas a qu’apunten a los sos fíos a clases d’asturianu, coincidiendo cola apertura’l plazu de matriculación pal cursu llectivu 2004-2005.

Debuxu, poemes, cantares. Escolinos de distintos centros públicos de Xixón, Sieru y A Veiga d’Eo sumáronse güei a los actos d’homenaxe a Andrés Solar -l’autor al que se-y dedica la XXV Selmana de les Lletres Asturianes- nuna emotiva xuntanza que se cellebró nel colexu xixonés ‘Evaristo Valle’, qu’hai agora dos décades acoyera les primeres clases de Llingua Asturiana impartíes n’Asturies nel cursu 1984-85.

D’esi centru d’enseñanza -y del cercanu institutu ‘Rosario Acuña’- yeren gran parte de los alumnos que tomaron parte del homenaxe, pero na cellebración tamién tuvieron presencia los institutos ‘Río Nora’, de La Pola Sieru, y ‘Elisa y Luis Villamil’, d’A Veiga d’Eo. La representación de los docentes encabezáronla Xosé María García y Xuan Lluis Bernardo, dos de los primeros profesores de Llingua Asturiana na dómina na qu’esta asignatura impartíase namás con calter de prueba.

L’actu valió amás pa formalizar la entrega de los premios correspondientes al Certame de Poesía y Debuxu ‘Andrés Solar’, que’l centru ‘Evaristo Valle’ convocaba coincidiendo cola cellebración de la Selmana de les Lletres. Nun faltó la música. Escolinos de los centros participantes interpretaron cantares n’asturiano, nuna xuntanza cuya entrada taba presidida por una pancarta de grandes dimensiones na que s’esixía el desendolcu darréu de la Llei d’Usu del Asturiano, en vigor dende 1998 pero entá ensin desarrollar.

La intervención musical enveredó l’actu p’hacia un acabu materializáu nuna espicha popular na que participaron profesores, escolinos, pas, mas y les autoridaes polítiques presentes, col conseyeru d’Educación y Ciencia, José Luis Iglesias Riopedre, y el director de la Oficina de Política Llingüística, Ramón d’Andrés, a la cabeza.

Doscientos alumnos y cinco carreres qu’en alpenes cuatro años camudaron en miles d’estudiantes y dos decenes de planes d’estudiu. La Universidá Popular ‘Madres de Plaza de Mayo’, fundada pola asociación homónima en Buenos Aires, promocionó n’Asturies les sos actividaes académiques y culturales al traviés del testimoniu de la veterana activista Hebe de Bonafini, qu’abogó en Xixón por facer universal la formación universitaria.

La incursión formal de les mas de Plaza de Mayu nel ámbitu educativu prodúxose nel añu 2000, col envís d’abri-y les puertes de la universidá a tolos ciudadanos -ensin necesidá de que tengan cursao estudios previos-, y col propósitu de formar académicamente a persones que llueu reviertan la so capacitación na sociedá al traviés d’esperiencies de trabayu collectivu.

D’esti mou, la universidá popular arxentina, que funciona ensin permisu oficial, ufre nueves carreres, siete seminarios y seis talleres cordinaos por reputaos profesores llatinoamericanos, y almacena una voluminosa llista d’espera de docentes que soliciten impartir clases na entidá.

El públicu qu’asistió a la comparecencia de Bonafini nel Antiguu Institutu de Xixón amosó, ensin embargu, mayor interés pola vertiente política’l discursu de la veterana cabezalera de ‘Madres’, qu’alitó a los collectivos españoles qu’anguaño investiguen les desapaiciones de ciudadanos na Guerra Civil a dexar de buscar calabres y centrase en “recuperar la memoria”.

‘Madres de Plaza de mayo’ fundóse como asociación hai dos décades pa reclamar polos 30.000 mozos que desapaecieron durante la dictadura militar que llideró n’Arxentina Jorge Rafael Videla. Al afitar que más de 10.000 persones foron amás fusilaes nes cais, 8.900 foron prisioneros políticos y más de millón y mediu marcharon pal exiliu, ‘Madres’ amplió’l so campu d’actuación hasta convertise nel principal collectivu llatinoamericanu de defensa de los drechos humanos. Anguaño agrupa a unes dos mil asociaes, d’ente 75 y 91 años d’edá.

Web de ‘Madres de Plaza de Mayo’

Unanimidá na hora de la firma. La Conseyería d’Educación y Ciencia del Gobiernu’l Principáu, representada pol conseyeru José Luis Iglesias Riopedre; cinco sindicatos de la estaya de la educación -FETE-UGT, CCOO, USO, FSIE y OTECAS-; y tres patronales del sector -Educación y Xestión, Federación Española de Relixosos de la Enseñanza y Confederación Española de Centros d’Enseñanza- suscribieron un alcuerdu pa los centros concertaos qu’estabiliza la situación de 200 docentes en 70 centros educativos.

El pactu, que ye d’aplicación pa tol 2004, supón una prórroga del alcuerdu rubricáu hai agora cuatro años y ye una inyección d’aliendu pa los colexos ya institutos privaos que funcionen con subvenciones públiques de l’Alministración asturiana, ún de los collectivos más combativos énte l’anterior gobiernu autonómicu del PSOE.

El nuevu documentu garantiza precisamente la recolocación de los profesores que quedaren ensin alumnos por mor de la reducción de xunidaes impuesta pol anterior Executivu de Vicente Álvarez Areces, y aborda la equiparación salarial de los docentes de la concertada colos sos homólogos de los centros públicos, que cobren unos 300 euros más al mes.

D’esti mou, queda abierta la puerta pa una negociación más a fondu sobro la igua de plantielles abondes en rellación al númberu d’alumnos, magar qu’Iglesias Riopedre dexó tresllucir que la conseyería prepara cambios nel ámbitu d’influencia de los colexos d’Asturies -el radiu imaxinariu qu’establez la capacidá natural de cada centru pa captar alumnos-, cambios que según el conseyeru van notase con especiales consecuencies na enseñanza concertada.

La Universidá d’Uviéu repónse del trasiegu que supuso la elección de rector del pasáu 1 d’abril, na que Juan Vázquez renovó’l so cargu, colos güeyos puestos yá nes votaciones al claustru, el segundu gran procesu electoral internu llamáu a renovar los órganos decisorios de la institución académica asturiana. Casi 40.000 profesores, alumnos y emplegaos alministrativos y de servicios elixirán a los 300 claustrales.

Cola actividá retomada depués de les vacaciones de Selmana Santa, el calendariu electoral sigue en marcha. Tres de la publicación del censu definitivu, los integrantes de les estremaes candidatures habrán formalizar la presentación de les sos llistes ente’l 19 y el 23 d’abril. La campaña desendolcaráse del 5 al 17 de mayu, y la votación tendrá llugar el 19 d’esi mesmu mes, miércoles.

El claustru que salga d’estos comicios completará’l camín de la renovación de los órganos decisorios de la Universidá d’Uviéu, que’l pasáu 1 d’abril s’abrió cola elección de rector y qu’habrá culminar antes d’avientu de 2005 col nomamientu de decanos y directores de centros, departamentos ya institutos universitarios. Les xuntes de facultá, escuela y departamentu elixiránse tamién el 19 de mayu.

El claustru ye l’órganu cimeru de gobiernu de la Universidá asturiana. Presidíu pol rector, la mayoría de los sos 300 puestos tán reservaos a los profesores, que nos sos distintos graos ocupen 195 places. Xunta estos casi doscientos docentes, nel claustru que salga de les inminentes elecciones sentaránse amás 75 representantes de los alumnos y 30 miembros del personal d’alministración y servicios.

Web oficial de la Universidá d’Uviéu

Los colexos públicos y concertaos d’Enseñanza Infantil y Primaria podrán decidir los sos propios horarios de docencia hasta’l prósimu 14 de mayu. Esi ye’l plazu que fixa’l Gobiernu asturianu pa que los pas y mas de los alumnos espresen nes urnes si quieren que los sos fíos asistan a clase en xornada continua, partida o mixta, a propuesta’l conseyu escolar de cada centru y siempre que voten polo menos el 60 por cientu de les families.

Tres de la publicación de la midida nel Boletín Oficial del Principáu d’Asturies (BOPA), les comunidaes educatives de los colexos tán llamaes a escoyer ente una xornada estructurada nun únicu segmentu de 9 a 14 hores, o notra partida en dos con una parada pa xintar, de 9 a 12 y de 15 a 17 hores. Los pas podrán optar tamién por un amiestu d’esos dos modelos, combinaos según los distintos díes de la selmana.

La resolución de la Conseyería d’Educación del Principáu, basada nos cambios que demanda nel sistema educativu les nueves condiciones llaborales de pas y mas, requier el vistu bonu previu de dos tercios del conseyu escolar de cada colexu, y rebaxa al 60 por cientu el porcentaxe mínimu de pas qu’han votar pa que’l cambiu se produza. Antes, la llexislación estatal pidía a lo menos un 80 por cientu.

Col envís de facilitar la participación de les families nes respectives votaciones, Educación contempla la posibilidá’l votu por corréu dientro de los cinco díes previos a la xornada electoral.

Promulgación de la midida nel BOPA

Principáu y sindicatos de la estaya de la educación ultimen la negociación pa que la nómina de la mayoría de los profesores de la Universidá d’Uviéu medre ente 3.000 y 4.000 euros al añu, en virtú d’un conxuntu d’incentivos salariales que pretenden reconocer o estimular la calidá de la docencia, la investigación y la xestión

El pactu ente los docentes y la Conseyería d’Educación, que se pesllará previsiblemente enantes qu’acabe abril, beneficiará a unos 1.500 de los 2.000 profesores qu’imparten clases na Universidá, yá que l’alcuerdu esclúi a quienes tienen ingresos adicionales amás de so actividá docente.

No concreto del universu numéricu, les cantidaes adicionales que van empezar a cobrar los profesores encuádrense n’hasta siete grupos, tres d’ellos lligaos a la docencia, otros tres a la investigación y el restante vinculáu a la xestión.

No que cinca a la docencia, l’antigüedá premiaráse con 1.200 euros añales pol primer quinqueniu y otros mil euros más al cumplir tres y cinco quinquenios como profesor. Cantidaes asemeyaes a lo que va aplicase na investigación, onde los primeros seis años merecerán un plus añal de 1.200 euros, más otros mil al aportar al segundu y al cuartu sexeniu.

El complementu de xestión ye d’un 10 por cientu de les perres recibíes llueu de cuatru años nun cargu, polo que ciertos profesores podríen llegar a cobrar, xuniendo tolo anterior, hasta 7.400 euros más cada añu. Magar d’ello, la mayoría de los docentes percibirá ente 3.000 y 4.000 euros adicionales.