Educación

L’últimu informe sobre rendimientu académicu na Universidá d’Uviéu recueye que’l doce por cientu de los matriculaos, ún de cada ocho estudiantes, llogra rematar la carrera nel tiempu afayadizu. La media de rendimientu de la institución académica asturiana ta nel 55,9 por cientu, una de le más altes del estáu.

El rector, Juan Vázquez, presentó nel últimu Conseyu de Gobiernu un estudiu elaboráu pol Vicerrectoráu de Calidá, Planificación ya Innovación nel que se reflexa qu’ún de cada ocho universitarios, el 12 por cientu, llogra acabar la carrera nel tiempu que marca’l so plan d’estudios.

Les carreres técniques tán a la cola en rendimientos académicos, asitiándose nel nueve por cientu el porcentaxe de los estudiantes qu’entren nuna escuela o facultá y nun lleguen al final. El dossier entamáu pola Universidá d’Uviéu revela que l’universitariu asturiano tarda como media 2,2 años más de los establecíos p’acabar la carrera.

Un datu relevante refierse a la tasa de rendimientu, conceptu que determina la relación ente’l númeru d’estudiantes aprobaos nuna asignatura y el total de matriculaos. L’estudiu señala que’l nivel más altu de rendimientu rexístrase en Ciencies de la Salú, con un 81,3 por cientu. Los otros campos docentes queden asina: 57,5 por cientu n’Humanidaees; 55,5 por cientu en Ciencies Xurídico-Sociales; 51,9 por cientu n’ Esperimentales y 51,8 en titulaciones técniques. La media xeneral asítiase nel 55,9 por cientu, una de les más elevaes del estáu.

SUATEA critica duramente nun comunicáu l’alcuerdu robláu ente la Conseyería d’Educación y ANPE y FETE-UXT el pasáu 23 d’avientu de 2005 por considerar que nun algama la suba salarial reclamada unitariamente por tolos sindicatos y amás, según esta organización, “camuda les condiciones llaborales del profesoráu” al llantar un incentivu a l’asistencia que penaliza ausencies xustificaes.

Pa SUATEA la suba del salariu nun 2 por cientu y l’aumentu de les pagues estres recoyío nel alcuerdu “nun son frutu de la negociación sinón en cumplimientu de lo alcordao na Llei de Presupuestos Xenerales del Estáu”. El sindicatu caltién que la cifra de suba de 170 euros al mes pa xineru de 2008 ye la mesma que separaba al profesoráu d’Asturies del d’otres comunidaes en xineru de 2005 y que l’administración “namás pon del so bolsu 1000 euros pa tol profesoráu non percibibles na so totalidá hasta xineru de 2008”.

El Secretariáu d’Asturies de SUATEA llama l’atención amás sobre la cantidá que se destina añalmente como incentivu d’asistencia cola que “les ausencies inda seyan xustificaes,penalicense económicamente”. Un colectivu especialmente perxudicáu, a xuiciu del sindicatu autónomu, ye’l de los interinos: “namás van percibir 420 euros” una suba que SUATEA califica de “ridícula, como toles demás”. El restu de les subes conteníes nel alcuerdu firmáu pola Conseyería con ANPE y FETE-UXT: el 2% del salariu global ya incrementos nes paques estres son compartíes pol restu del profesoráu del estáu al tar contemplaes nos Presupuestos Xenerales “Poro, nun van reducir la diferencia salarial n’absoluto”, afirma SUATEA.

El sindicatu autónomu anuncia una campaña pa denunciar el conteníu d’esti alcuerdu retributivu qu’a xuiciu d’esta organización dexa al profesoráu asturianu “nuna situación tan desfavorable nel aspectu retributivu como lo taba en xineru de 2005 cuando escomenzamos les movilizaciones conxuntes”, afirma’l comunicáu.

El cursu pa encuestadores de material oral entamáu pola Oficina de Política Llingüística en colaboración col Seminariu de Filoloxía Asturiana de la Universidá d’Uviéu y que superó toles espectatives de matriculación previstes polos organizadores,superando les 50 places, llega esti mes a la so fin, con unes práctiques de campu que desendolcase esti sábadu 14 y domingu 15, la primera, y la otra, el sábadu 21 y el domingu 23.

Nel pasáu mes d’avientu celebróse’l I CURSU D’ENCUESTADORES DE DIALECTOLOXÍA, TOPONIMIA Y CULTURA POPULAR, entamáu pola Conseyería de Cultura (Oficina de Política Llingüística) y el Seminariu de Filoloxía Asturiana (Facultá de Filoloxía), con un bultable ésitu de participación, ya que¡l cursu algmaó los 51 matriculaos.

Agora, esti Cursu compleméntase nesti mes de xineru con unes práctiques de campu, dirixíes polos profesores Fernando Álvarez-Balbuena (práctiques de dialectoloxía), Llinu Álvarez Santidrián (práctiques de toponimia) y Xosé Antón Fernández “Ambás” (práctiques de lliteratura oral y música popular). Estes práctiques fadránse en dos rioles: una, el sábadu 14 y domingu 15; y otra, el sábadu 21 y el domingu 23. Los profesores y alumnos desplazaránse a CANGAS DEL NARCEA pa facer visites a distintes parroquies del Conceyu. Collabora la Conceyalía de Cultura del Conceyu de Cangas.

A finales de mes, nel día que se comunicará, fadráse un actu d’entrega de Diplomes a los alumnos del I Cursu d’Encuestadores de Dialectoloxía, Toponimia y Cultura Popular, y a los del I Cursu Básicu de Llingua Asturiana pa Profesionales de la Información.

El cursu ya entamara n’Ochobre

La última convocatoria de places pa personal interín de la Conseyería d’Educación inda nun contempla l’apertura d’una bolsa específica pa les vacantes de llingua asturiana y gallego-asturiano. Mentantu s’abre una llista específica -anguaño en procesu de baremación- según les bases de la convocatoria cualaquier inscritu nel Rexistru de Capacitación puede solicitar les places de les llingües asturianes.

La páxina web oficial de la Conseyería, Educastur, anuncia la convocatoria con fecha 10/01/06 de les nueves places pa personal interín y caltién tovíes colgaes les instrucciones de les anteriores convocatories ente les que ta la qu’afirma testualmente que “les places de LLINGUA ASTURIANA y GALLEGO/ASTURIANO podrán ser solicitaes, amás de polos convocaos de LLINGUA ASTURIANA, por cualaquier aspirante convocáu que estéa inscritu nel Rexistru de Capacitación”.

Dellos colectivos d’interinos especialistes en Llingua Asturiana y tamién los mesmos sindicatos d’enseñanza pidieran repetidamente a les autoridaes educatives del Principáu l’apertura de bolses y llistes específiques pa esta asignatura. Darréu de meses de negociación los representantes sindicales llograron d’Educación el comprosimu de l’apertura de bolses específiques pa llingua asturiana, una realidá qu’inda ta en procesu de baremación y que podía concretase nel prósimu mes de febreru, según pudo saber Asturnews.

Convocatoria d’interinos

“Animalinos” ye’l títulu d’un llibru-xuegu n’asturianu empobináu a rapacinos de 0 a 4 años qu’acaba de publicar la editorial Ámbitu. Les ilustraciones cuerren a cargu del dibuxante Enrique Carballeira alrodiu d’una idea orixinal de Lourdes Álvarez y Sabel Tuñón.

El cuentu recién editáu ye’l primeru d’esti calter que se fai en llingua asturiana y tenta que los neños se familiaricen col idioma escritu al empar qu’enrieden y se divierten. Les ilustraciones de Carballeira, a páxina entera, van acompañaes por un testu breve n’asturianu de pregunta-rempuesta sobre’l soníu que fain los animales domésticos más comunes.

El llibru editáu por Ámbitu cuenta con una sobvención de la Conseyería de Cultura.

L’Ayuntamientu de Cangas del Narcea abre una bolsa de trabayu empobinada a la contratación de técnicos n’Educación Infantil pa la futura escuela de 0 a 3 años del conceyu. Les places son de calter temporal dientro un conveniu de colaboracíón col gobiernu del Principáu.

Los interesaos na bolsa de trabayu han presentar la documentación pertinente nel Rexistru del Ayuntamientu de Cangas nel plazu de 30 días hábiles contaos dende la publicación de la convocatoria nel Tablón d’Anuncios municipal. El sistema d’accesu va ser por concursu- oposición.

Les personas que superen les pruebas van ser contrataes con calter temporal dientro’l Conveniu de Colaboración col Principáu d’Asturies pa la execución del Plan d’Ordenación de les Escueles del Primer Ciclu d’Educación Infantil. La vixencia de la bolsa d’empléu va ser de dos años a partir de la so creación y los aspirantes han estar en posesión de la titulación de maestru especialista n’Educación Infantil, técnicu especialista en Xardín d’Infancia o técnicu superior d’Educación Infantil.

Más información

l sindicatu SUATEA fexo públiques les sos reivindicaciones pendientes pal añu qu’entra. Nun escritu empobináu al ministru d’Administraciones Públiques, Jordi Sevilla, la organización autónoma d’enseñantes, llama l’atención sobre la perda de poder adquisitivu y precariedá llaboral nel personal docente, les tendencies a la privatización y la esternalización de servicios, asina como les práctiques de negociación colectiva impuestes pola Administración.

Pa SUATEA l’aumentu de namás un 2 por cientu nes retribuciones fixes supón cásique “una baxada de sueldu”, polo que consideren necesario que s’aplique una cláusula de revisión salarial pañando como referencia l’últimu IPC hasta dir afayándolu a les perdes de los caberos años. El fin de la temporalidá llaboral nel administraciones públiques xunta l’aplicamientu real de la xornada de 35 hores son otres de les reivindicaciones pendientes del sindicatu pal prósimu añu 2006.

SUATEA denuncia tamién la privatización y esternalización de los servicios públicos nel ámbitu de la enseñanza, pidiendo la reorientación d’eses polítiques. La organización autónoma recalca amás la defensa del caltenimientu del sistema públicu de pensiones.

La última de les reivindicaciones de SUATEA cinca a la negociación colectiva y nella afírmase que les administraciones públiques cultiven la tendencia a favorecer un calce negociador con una parte namás de los sindicatos, marxinando a otros, y al empar llévase a cabu una política d’imposición de les condiciones en vez d’ufiertar la posibilidá de negociales primero, denuncia’l sindicatu unitariu.

La Universidá d’Uviéu apuesta pola adaptación de los sos estudios al nuevu espaciu européu cola propuesta de siete títulos de postgrao. Les nueves especialidaes van coesistir colos actuales títulos propios hasta l’adaptación dafechu a la nueva realidá académica comunitaria.

Les titulaciones propuestes pola Universidá d’Uviéu son Biotecnoloxía alimentario; Ciencies de la Tierra; Xéneru y Diversidá; Inxeniería Web; Música, Comunicación y Espectáculu na Sociedá Contemporánea; Dirección y Planificación del Turismu; y Dirección y Administración d’Empreses. L’orixen d’unos títulos son los másteres y n’otros los doctoraos de calidá.

Les nueves titulaciones aprobóles el Conseyu de Gobiernu de la Universidá d’Uviéu na so reunión d’esti miércoles 21 xunta’l presupuestu pal añu qu’entra, cifráu en 183,2 millones d’euros.

Propuesta de títulos de potsgrao

La Xunta de Personal docente de centros non universitarios decidió ayer por unanimidá denunciar a la Conseyería d’Educación del Principáu énte la Inspección de Trabayu por incumplimientu de la llei en materia de prevención y riesgos llaborales.

Los sindicatos representaos na Xunta de Personal afirmen na so denuncia qu’Educación nun tien entamáu nengún plan de prevención y qu’hasta la fecha nun los informó alrodiu de nenguna actuación en materia de salú. L’órganu de representación de los trabayadores de la enseñanza n’Asturies considera que la Conseyería ye autora de “sistemáticos incumplimientos de la llei” tocante a la prevención de riesgos llaborales.

La Universidá d’Uviéu tien abiertu’l plazu de solicitú de movilidaes Erasmus pal cursu académicu 2006-2007. En xunto ufiértense 1.005 places pa estudiar en diferentes universidaes de venticinco países europeos, d’elles, 72 pa cursos de doctorao.

Les solicitúes pueden facese hasta el prósimu 13 de xineru de 2006 y, por primer vez permítense les inscripciones al través d’internet. Los alumnos qu’algamen movilidaes Erasmus van poder optar, amás, a les ayudes complementaries pa estudiantes con escasos recursos qu’ufierta, en segundu añu consecutivu la Conseyería de Xusticia, Seguridá Pública y Relaciones Esteriores.

La Universidá d’Uviéu ofrez tamién 79 movilidaees fuera del Programa Erasmus pa estudiar n’universidaes d’ Alemania, Arxentina, Brasil, EE.XX., Italia, México y Perú.