Conceyos

El conceyu de Saberu acueye güei’l pieslle de la quinta edición de les Xornaes en Defensa del Patrimoniu Hestóricu y Cultural de la cuenca de Saberu, entamaes polos Amigos del Muséu Mineru-Ferrería de San Blas.

Representantes de La Caleya, Facendera y Furmientu van falar de «Las asociaciones para la defensa de la llingua llionesa: su razón de ser», falando darréu Nicolás Bartolomé Pérez de «La lliteratura popular oral llionesa». Les xornaes van rematar darréu cola presentación del documental “Asina Falamos”.

La edición catorce del Festival Intercélticu d’Occidente va entamar esti martes, 17 d’agostu. Como cada añu la música ye protagonista, pero van celebrase tamién talleres, charres, esposiciones y otres actividaes qu’apinarán Tapia de cultura atlántica. La inauguración va facese na plaza del Conceyu a les siete la tarde, cuntando col alcalde de Tapia, Gervasio Acevedo y la conceyala de cultura, Laura Nogueiro.

Per cuartu añu consecutivu’l mercáu medieval va enllenar de vida les cais más céntriques de la villa. Esta cita engloba a más de trenta puestos artesanos que van faer les delicies de los tapiegos y los visitantes. Amás, va haber una pulpería gallega y diverses actividaes d’animación. L’horariu de l’amuesa estiéndese dende les 11 a les 23 hores.

Na primer xornada la banda de gaites Marín Tapiega va animar el centru de la villa. Amás, na sala del Institutu Marqués de Casariego, va inaugurase la esposición “Polisones y Miriñaques”, un viaxe a la moda de los sieglos XIX y XX.

Nel Auditoriu de la Casa de Cultura va celebrase estos díes la II edición de Culturalingua, entamando a les 19:45, cola presentación de la obra última del escritor Manuel García-Galano, “Faraguyas”, a cargu del filólogu Ignacio Vares. Darréu, l’escritor Xosé Miguel Suárez va falar nel auditoriu del so postreru llibru “El teatru aldeanu da biblioteca popular circulante de Castripol”, dándo-y pislle al actu una actuación musical.

Mañana, 3 d’agostu, a les siete, l’escenariu de Begoña acueye a Luggoni. A la mesma hora, en La Plazuela, va actuar el Ballet Folclóricu Magisterias Huahuacoyotl de Durango, México. La Plaza’l 6 d’agostu acueye a “Cuatro perros”, y a les ocho, “Zzaj duo” na Ciudadela.

La Sociedá Uviedina de Festexos saca esti sábadu, 1 d’agostu, a les cais del Cascu Antiguu y a partir de les 11:30 hores, les actuaciones de la banda de gaites “Xácara” d’Uviéu y el grupu de baille “Filandón”, tamién de la capital asturiana.

El Serviciu de Normalización Llingüística del Cabu Peñes dio anuncia del entamu de cursos de l’Academia de la Llingua Asturiana nos conceyos de Gozón y Carreño. Los cursos busquen “l’ameyoramientu y perfeccionamientu de la llingua” d’aquellos vecinos interesaos. Con un llargor de 36 hores caún de los dos niveles, l’horariu y repartu de les hores “van concretase cola xente interesao”. Pa que se puedan facer los cursos necesítase un mínimu de 10 persones per caún.

El xueves 2 de setiembre a les 18:00 y nel Centru Polivalente “La Baragaña” de Candás va facese’l conceyu pa conocer les preferencies d’horarios de los interesaos nos cursos, que tienen un costu de trenta euros.

L’Academia ufre a los participantes el manual “Xeitu”, un exemplar de les “Normes Ortográfiques” y otru de la “Gramática de la Llingua Asturiana”. La idea ye facer un cursu de cada nivel en cada conceyu pero en casu nun algamar el númberu pa cada cursu “organizaráse unu pa los dos Conceyos”. La fecha p’apuntase ye hasta’l llunes 1 de setiembre de 2010. En terminando, cada alumnu recibirá un certificáu d’asistencia.

Pa más información pue visitase la páxina web www.faronorte.org o ponese en contactu col Serviciu de Normalización Llingüística de la Mancomunidá d’El Cabu Peñes nos teléfonos: 985872406 y 985883050. Tamién nos correos: llingua@mcabop.com y clasesdavid@hotmail.com, teniendo en cuenta que del 23 al 31 de xunetu y del 13 al 31 d’agostu esti Serviciu echa’l pieslle por vacaciones.

L’actuación del Grupu de Teatru “L’Horru” (de Barcia-Valdés) cola obra “Nel cielu hai una estrella” va abrir güei a les 21:30 hores los actos de los XV Alcuentros cola Cultura Tradicional d’Asturies, na Sala Loreto de Colunga. Esta edición va ser pesllada cola celebración del VI Mercáu Tradicional nos Alcuentros, y va cuntar con charres, música y otres actividaes venceyaes a la cultura’l país que van celebrase en Colunga, La Isla y Llastres.

Mañana, xueves 15, les cais, places, chigres y Campu Loreto de Colunga van acoyer a partir de les 12 hores los Cantares de Chigre, colos cantantes Andrés Cueli y Maximino Solís acompañaos a la gaita por Iñaki Sánchez y Rodrigo Joglar. Esta actividá enmárcase nel III Requexu de la Tonada Asturiana.

El vienres, el Centru de Servicios Múltiples “El Piqueru” de Llastres va celebrar a les 19:30 hores, la charra al cargu d’Alberto Álvarez Peña, “Lleendes Asturianes”, con proyección de diapositives. El llunes siguen los actos cola actuación, na Sala Loreto de Colunga, y a les 21:30 hores, del Grupu de Teatru “Carbayín” (de Siero) cola obra “Ello yera una vegada”.

Ente los díes 22 y 23, Colunga y La Isla van acoyer el taller de repostería “tradiciorixinal”, tituláu “Llambiotaes nos alcuentros”. Tamién el xueves 22, a les ocho y media, va celebrase un conciertu en Colunga, con Xuacu La Miranda y Mento Hevia.

El sábadu 24 y domingu 25 na Plaza del Conceyu, en Colunga celebraráse esti Mercáu que va sirvir de colofón a los Alcuentros y que, amás de diversos puestos de venta y esposición de productos artesanos y alimenticios, va cuntar con talleres en vivu sobre antiguos oficios, xuegos tradicionales, animaciones y actuaciones folclóriques y musicales. Va haber, tamién nel so marcu, una esposición de preseos tradicionales ya intervenciones en directu con curdión, zanfonía, xiblates, percusión…

El día 24, sobre les 20:00 h. va tener llugar nel Mercáu el Festival de l’Asociación d’Intérpretes de la Canción Asturiana (A.I.C.A.) cola intervención de los cantantes de tonada asturiana Juan Robledo Iglesias, Laudelina Hortal y Juan Luis García Lobo, acompañaos a la gaita por Francisco José Álvarez. va cuntase nesti Festival cola actuación del Grupu de Teatru “La Cruz de Ceares” que va representar la obra “El recateo”.

La Casa de la Llingua del Conceyu de Corvera ufre un programa d’actividaes pa neños,d’ente 6 y 12 años. Ente’l 23 y el 30 de xunetu, van celebrase cuentacuentos na biblioteca de Los Campos y del 17 al 20 d’agostu en Les Vegues. Amás, ente’l 23 al 27 d’agostu, en Cancienes. Toles actividaes son de baldre y n’horariu de les 11 hasta les 13 hores.

Non tolos llugares d’Asturies escueyen el 23 pa celebrar la foguera. La llocalidá cabraliega d’Arenas va celebrar la so foguera güei, vienres 25 xunu, a les 12 la nueche. La música y el fueu van dar la bienllegada al branu unos díes más tarde que’l restu de los conceyos.

Nel Campu San Xuan d’Amandi, en Villaviciosa celébrase una fiesta de prau, a la oriella del ríu, xunto a la ponte medieval y la ermita del Santu. Un espaciu mui especial nel que pela tarde va celebrase una xira a la que da pasu una verbena. A media nueche, báillase la Danza de San Xuan d’Amandi alredor de la foguera, col sofitu, nesta ocasión del Grupu Folcklóricu “Villaviciosa”. La folixa sigue darréu hasta l’amanecer.