Conceyos

El Grupu de Baille San Félix de Candás entama la cuarta edición del Cursu de Baille Tradicional que se va desendolcar nel so llar social, asitiáu en La Baragaña, Candás, por 20 euros. El cursu va facese de payares de 2010 a mayu de 2011 y va presentase a los interesaos el próximu miércoles 27 d’ochobre a les 19:30 hores nel yá conseñáu llar social.

El conceyu Xixón del Bloque por Asturies espresó’l so esmolecimientu polo qu’entiende “una falta d’interés y voluntá, pela parte del Teatru Xovellanos, en respetar la toponimia oficial del conceyu”.

El Bloque por Asturies en Xixón encamienta al Teatru Xovellanos y a les demás empreses municipales a respetar y facer respetar la Llei venceyada a la toponimia tradicional del Conceyu Xixón, “yá que de poco sirven les lleis destinaes a la recuperación y normalización de la llingua asturiana si dempués nun se ponen en práctica pela parte de les instituciones”, afirmen.

El Bloque recuerda que n’ochobre de 2006 un alcuerdu ente la Xunta de Toponimia del Principáu y l`Ayuntamientu Xixón, afitó los nomes oficiales de barrios y parroquies del conceyu. “Pese a ello, dalgunes empreses municipales, como nesti casu`l Teatru Xovellanos, vienen ninguneando esti alcuerdu, colo que tán incumpliendo la Llei no que se refier a toponimia de Xixón”, recuerden.

Esti martes, 5 d’ochobre, a les 18:30 hores, nel Llar de Les Vegues (Corvera) fadráse la primera de les xornaes de L’Arribada nesti conceyu, dientro de la so estaya “Per Asturies”. Les actividaes entámense a comuña ente l’Asociación Cultural L’Arribada y l’Ayuntamientu de Corvera d’Asturies. El programa consistirá nuna mesa redonda sobre Deporte y Llingua y un homenaxe a la maestra Choni Álvarez.

Los participantes na mesa redonda sedrán l’escritor xixonés Vicente García Oliva y los futbolistes José Antonio Pérez Boudón, José Manuel Espinosa Gómez y Eloy José Olaya Prendes, amás d’Humberto Gonzali, coordinador de L’Arribada.

Los asistentes a esti actu recibirán un exemplar d’El pallabreru del fútbol qu’editara l’añu pasáu la Oficina Municipal de la Llingua de Xixón.

El viniente xueves, 7 d’ochobre, a les 18:30, realizaráse la segunda xornada de L’Arribada en Corvera, na que se proyectará’l primer llargumetraxe dobláu al asturianu (por Gonzali Producciones), el clásicu de George A. Romero ‘La nueche de los muertos vivientes’.

La Conceyalía de Cultura de Grau entama dos cursos d’asturianu d’estremaos niveles col sofitu de la Conseyería de Cultura y Turismu d’Asturies. La inscripción ye de baldre hasta’l miércoles 13 d’ochobre na Biblioteca Municipal de Grau. Los cursos van tener una duración de trés meses, con dos díes a la selmana de clases, con Xosé Lluís Rodríguez Alberdi como maestru.

El vienres, 24 de setiembre, a les ocho la tarde, el Centru Cultural Vicente Álvarez González de Sobrescobiu va acoyer l’actuación de José Armes L’Ilusionista, que trai a esti conceyu asturianu’l so espectáculu “Ilusiones II”, que ta collechando un gran ésitu nel Circuitu d’Artes Escéniques d’Asturies.

Una actuación pa toos los públicos na que los asistente van esfrutar de les distintes disciplines de la maxa: los efectos con espaes, palombos y otros animales, el mentalismu, la cartomaxa, la manipulación, la maxa con dineru y oxetos cotidianos, la maxa d’escena, rutines musicales, lluces misterioses, apaiciones y desapaiciones, humor, efectos especiales,… y lo más importante, la participación del públicu, pa que los asistente formen parte de los efectos máxicos y seyan los auténticos protagonistes.

N’ochobre entamen los talleres de pintura que s’ufierten a toles edaes nel Conceyu de Grau y nel que se trabaya tantu l’oliu como l’acuarela, témpera, acrílicu, carbonciellu, etc. Les clases tan al cargu d’Ana Rodríguez Iglesias y van dase en trés turnos: martes de 16 a 18:30 hores; vienres de 17 a 19:30 hores; y xueves peles mañanes. El preciu ye de 25 euros al mes y la inscripción pue facese na Biblioteca Municipal de Grau o nel teléfonu 985754813.

La Oficina Municipal de la Llingua del Conceyu de Xixón ta acabante espublizar “El pallabreru de la natación”, el segundu vocabulariu qu’espubliza esta oficina, que l’añu pasáu sacaba’l del fútbol. El pallabreru ye obra de Cristina Bobes Limenes, Teresa Rodríguez Fernández y Maria Xosé Rodríguez López, ya inclúi más d’un cientu de términos sobre la práctica d’esti deporte en piscines, los distintos estilos, la natación n’agua abierto, la natación sincronizada, los saltos y el waterpolu.

Editáronse 2.000 exemplares que van repartise de bladres nes piscines xixoneses al traviés del Patronatu Deportivu Municipal y ente tola xente interesao al traviés de la Oficina Municipal de la Llingua.

Coles mires de averar l’axedrez y y conocer el xuegu de la estratexa, el próximu sábadu 18 de setiembre a les 18:30 nel chiringu La Guinda, na cai San Franciscu, Santiago Bertault va xugar un simultanea d’axedrez contra les persones que quieran xunise al retu. P’apuntase los interesaos han mandar un corréu col nome y apellíos a info@jsoviedo.org L’actu entámenlu les Mocedaes Socialistes d’Uviéu.

L’Asociación Cultural El Rapigueiro celebra esti sábadu 4 de setiembre, a partir de les seis de la tarde, el V Ruxidoiru Ayandés, entamando con una conferencia a cagu de Naciu Llope “La música tradicional asturiana, una aproximación xenealóxica”, acompañáu por músicos del occidente astur.

Dende les ocho un pasacáis folixeru va percorrer les cais de la vil.la, cola Banda de Gaitas El Rapigueiro, pesllando los actos cola célebre tarta d’ablana moyada con vinu del país.

La Casa Municipal de Cultura de Grau acueye hasta’l 27 d’agostu la esposición “El Musel. Hestoria d’un puertu”, fecha pola Autoridá Portuaria de Xixón. Este mesmu añu percorrió tamién les sales municipales de los conceyos de Cangas, Degaña, Somiedu, Llanes, Cangues d’Onís, Piloña ya Ibias.

La esposición ye un percorríu poles principales obres y ampliaciones que, dende’l treslláu del puertu comercial al ancón d’El Musel, viniéronse realizando sucesivamente mientres tres siglo hasta l’actualidá. Al traviés de numberosos paneles y un ampliu repertoriu de 300 imáxenes -ente fotografíes, cartografía y planos de les distintes dómines-, l’amuesa esbilla la hestoria d’El Musel dende’l proyectu orixinal de Francisco Lafarga y Alejandro Olano, a finales del sieglu XIX, hasta’l nuesos díes, cuando se tán executando les obres d’una nueva ampliación, que va doblar la superficie actual portuaria.

L’equipu d’investigación, formáu por una ventena d’investigadores y espertos, tuvo dirixíu pol director de l’Autoridá Portuaria de Xixón, José Luis Díaz Rato, y el comisariu de l’amuesa foi José Moyano, xefe de Proyectos de l’Autoridá Portuaria de Xixón.