L’Arribada entama esti llunes un repás a los ‘Nuevos rumbos de la lliteratura asturiana’

A les cinco la tarde d’esti cuartu día d’actividaes de l’Arribada 2007 va presentase un númberu nuevu de la revista ‘Asturies. Memoria encesa d’un país’ cola presencia d’Alberto Álvarez Peña. A les 17,30 va ser la presentación del llibru ‘La mirada aliella’ d’Antón García, espublizáu pol Atenéu Obreru de Xixón, na coleición ‘Tiempu de cristal’.

A les seis de la tarde va ser el momentu pal primeru de los homenaxes d’esta Arribada 2007, dedicáu a la escritora Eva González, con una ponencia de Xosé Lluis Campal. A les seis y media l’Academia de la Llingua Asturiana va presentar el númberu 24 de la revista Lliteratura, qu’inclúi dalgunes de les ponencies lleíes n’Arribada 2006.

A les19:30 hores y nel ciclu ‘Nomes propios de la lliteratura asturiana’, va celebrase’l segundu homenaxe de l’Arribada 2007, dedicáu a Enrique García Rendueles y tituláu por Xuan Xosé Sánchez Vicente, responsable del actu, ‘Los nuevos bablistas: Voluntá y fracasu asturianista’.

Y yá les ocho la tarde va entamar el ciclu ‘Nuevos rumbos de la lliteratura asturiana’, cola ponencia sobre l’esoterismu de David M. Rivas y una mesa redonda con Vital d’Andrés, Etelvino González, Humberto Gonzali, David M. Rivas y Xulio Viejo. Mañana la sidra va ser el centru d’esti ciclu que dura hasta’l vienres, penúltimu día de l’Arribada 2007.