Gala de la Emigración Asturiana

El Conseyeru de Xusticia, Seguridá Pública y Rellaciones Esteriores, Francisco Javier García Valledor, acompañáu pol Director de l’Axencia Asturiana d’Emigración, Luís Miguel Fernández Romero, va asistir el xueves 1 de marzu a les 19:30 hores de la tarde nel Teatru Filarmónica d’Uvieu a la III Gala de los Artistes Asturianos na Emigración.

La Gala que yá alcanza la so tercer edición, premia a los y les artistes asturianos que durante l’añu 2006 –y en gales anteriores nos años 2005 y 2004- collaboraron a traves de l’Axencia Asturiana d’Emigración colos emigrantes asturianos de tou’l mundu, acompañándolos y llevando l’arte asturianu ellí onde se reclamó.

Nes tres ediciones de les Gales de la Emigración yá fueron distinguíos pola Conseyería, casi mediu centenar d’artistes, lliteratos, deportistes y asociaciones asturianes que collaboraron cola nuesa emigración.

La distinción que va entregar el Conseyeru Valldor, consiste nun grabáu del artista asturianu Astur Paredes que representa al Páxaru Atlantis, símbolu de la emigración asturiana. El gran páxaru qu’axunta coles sos ales les orielles de l’Asturies esterior y la interior.

Ente los premiaos d’esti añu figuren representantes de l’Asociación d’Interpretes de la Canción Asturian, de la Federación Asturiana de Folklore, de la Xuntanza de Gaiteros Asturianos, asina como artistes plásticos, músicos y escritores.