El Principáu quier escenificar nos actos al rodiu’l 8 de Setiembre la xunidá de la colonia asturiana en Madrid

Superar “controversies” pasaes. Esi ye l’envís central que’l Gobiernu’l Principáu quier asigna-y a la primer cellebración itinerante del Día d’Asturies nel esterior, que va desendolcase en Madrid a partir del vienres y na que l’Executivu quier escenificar l’intierru de la llarga engarradiella ente los dos grandes collectivos d’asturianos na capital: el Centru Asturianu y l’asociación Asma.

Asina lo declaró güei n’Uviéu el conseyeru de Xusticia, Seguridá Pública y Relaciones Esteriores, Francisco Javier García Valledor, que presentó los actos previstos en Madrid como unes cellebraciones concebíes pa que “la comunidá asturiana proyecte una imaxen de xunidá” nel Ateneo de Madrid, un espaciu elixíu, según el conseyeru, porque permite acoyer a un mayor númberu d’asistentes. Les invitaciones difundíes son billingües n’asturianu y castellán.

Como ayeri adelantó Asturnews, l’Executivu autonómicu escoyó Madrid como sé del primer Día d’Asturies itinerante nel esterior n’atención al gran númberu d’emigraos asturianos residentes na capital y a la veteranía’l Centru Asturianu de Madrid, pero tamién, aseguró güei Valledor, como “un actu de solidaridá col pueblu de Madrid, que llogró convertir la conmoción n’acción” nos atentaos del pasáu 11 de marzu.

“Los nuesos emigrantes son un capital social y humanu imprescindible pa la construcción d’Asturies”, señaló’l conseyeru, que na so comparecencia tuvo flanqueáu pol director de l’Axencia Asturiana d’Emigración, Luis Miguel Fernández Romero; representantes de les empreses Alsa y Caxastur, que collaboren na organización de los actos; y Fe Santoveña, secretaria del collectivu Muyeres, cuyu conciertu abrirá’l vienres les cellebraciones.

Nesi recital, que supondrá la presentación en Madrid de la formación vocal asturiana -entamada en 1994 sobro una idega’l productor Lisardo Lombardía y a partir de grupos d’investigación etnográfica-, Muyeres fará un recorríu musical a la xeografía asturiana con un repertoriu de 25 pieces, ente elles siete bailles tradicionales.

Darréu de l’actuación del grupu, los asistentes a la cellebración -que’l Gobiernu’l Principáu calcula en más de 300 persones- participarán nuna espicha con sidra de mesa, quesos y otros productos asturianos.

Más de 300 persones participarán en Madrid na primer cellebración itinerante del 8 de Setiembre