Una esposición recuerda’l pasáu reciente d’España como país d’emigrantes

“De la España que emigra a la España que acoge” ye’l títulu de la muestra que tien aniciu güei nel Centru de Cultura Antiguo Institutu de Xixón. La esposición, que ta iguada pola Fundación Largo Caballero y podrá visitase hasta’l prósimu 26 d’Abril, cuenta cola collaboración del Ayuntamientu de Xixón y el Principáu d’Asturies.

La esposición recueye’l pasáu reciente d’España como país migratoriu al travies de más de 400 pieces orixinales, ente semeyes, obxetos y documentos, suministraos por distintos archivos, particulares y colecciones privaes. Ente los obxetos espuestos hai abondos elementos cedíos por instituciones asturianes como l’Archivu del Pueblu d’Asturies, el Museu Etnográficu Juan Perez Villamil, les semeyes de Francisco Crabiffosse, l’Archivu d’Hestoria d’Asturies, l’Archivu d’Indianos y l’Archivu de l’Asociación d’Emigrantes Retornaos.

El material ta espuestu en diferentes secciones: La emigración a America (1882-1935), La emigración política, Les migraciones interiores, La emigración a la Europa del desarrollu (1956-1974), De nuevu faciendo les Ameriques, La emigración temporal, El retornu, la permanencia y España, país d’agospiu. Amás, van emitise videos con imáxenes inedites y música d’Amancio Prada y Pablo Guerrero.

La muestra completase cola esposición de dos obres artístiques de los artistes Fernando Clavería y Pepa Rubio. La primera d’elles, nomada “Ulises” ye un conxuntu escultóricu basáu nes escaleres qu’un grupu d’inmigrantes usaron pa cruzar la frontera de Melilla. “Ghuraba. El cuerpu del náufragu”, obra de Pepa Rubio ye una obra fecha a partir de los materiales atopaos nes playes de Cádiz tres el desembarcu de pateres.