Cine

ASBRU (Asturianos en Bruseles) ta esibiendo ayeri xueves 22 y güei 23 de noviembre na Casa d’Asturies de Bruseles el II° Ciclu de Curtiometraxes y documentales asturianos en Bruseles. Embaxó’l nome de “Rellumes” y en collaboración cola organización del Festival Internacional de Cine de Xixón, esta esbilla de trabayos d’artistes asturianos pertenez al certame de cine xixones del añu 2006.

Ayeri tuvo llugar el primer pase de curtios con “Pomiedzy”, de Jose Enrique Iglesias, “Matar el Tiempu”, de Santos Hevia, “La Marea”, d’Iván Sáinz-Pardo, Dirk Soldner y Jim-Box, y “Longaniza con Patatas”, de Xuan Acosta. Una de les particularidaes de la edición d’esti añu ye l’atención especial que se-y va prestar al formatu documental y ya n’esti primer pase ava esibiose “AsturianUS”, una comparación ente’l pueblu castrillones d’Arnao y la ciudá estaunidense de Spelter al cargu de Luis Agreo. Estes dos poblaciones tan emparentaes por surdir al abellu de la Real Compañ´çia de Mines.

La segunda sesión d’esti vienres 23 22 acoyerá la esibición del documental documental “Resistencia” de l’asturiana Lucinda Torre sobre’l conflictu llaboral de los trabayadores de Duro Felguera. Tres la proyección, Torre va debatir col públicu asistente alredor de la situación d’anguaño na producción audiovisual d’Asturies y la so proyección nel estranxeru.

ASBRU lleva dende 2005 divulgando la cultura asturiana en Bruseles ya ufiertando a los asturianos de la ciudá y al restu d’habitantes la posibilidá de conocer dalgo de la xera cultural más innovadora del Principáu. No va d’añu, l’asociación organizó delles iniciatives como l’homenaxe al poeta Antonio Gamoneda o les II Xornaes Gastronómiques sobre la nueva cocina asturiana que tuvieren llugar lo caberu de xunu.

Ayeri pela tarde conocíemos la noticia de la muerte de Fernando Fernán-Gómez, actor y escritor venceyáu con Asturies dende va munchos años y per distintes razones. La más conocía, quiciabes, foi fundador del premiu de Novela “Café Gijón” en 1949 nel chigre madrialanu col mesmu nome, asitiáu nel Paséu de Recoletos, un premiu prestixosu que, col pasu’l tiempu cayerá nel escaezu y que recuperó l’Ayuntamientu de Xixón nel añu 1989.

L’alcaldesa de Xixón, Paz Fernández Felgueroso, mandó esta tarde un telegrama de condolencia a la familia del actor, según informaron fontes de la Casa Conceyu, destacando l’importante llabor de publicidá de la ciudá que fizo’l premiu creáu pol autor nos últimos cuasi sesenta años.

L’actor y escritor, muertu güei a los 86 años, protagonizó va unos años una película que tuvo como escenariu Asturies ‘El Abuelo’, na qu’interpretaba a un indianu que tornaba “cola maleta al agua”, una película del director asturianu Garci, que tuvo un gran ésitu y llegó a tar nominada a un Oscar de l’Academia del cine americana. Amás, en 1995, Fernán-Gómez recibió’l Premiu Principe d’Asturies de les Artes. La comunidá d’actores española ta de llutu y Asturies vive especialmente esti dolor.

Esti xueves 22 de payares, a les 20:30 hores, el Teatru Xovellanos de Xixón va acoyer la inauguración oficial del 45º Festival Internacional de Cine, con un actu inaugural, nel que van actuar en directo James Taylor Quartet y que va cuntar tamién cola proyección de “The Darjeeling Limited”, de Wes Anderson. Xunta esta película, van estrenase 22 títulos na Sección Oficial, de los que 18 entren a competición.

El vienres 23, nel Teatru Xovellanos, siguen les proyecciones de tarde de la sección, tanto en llargumetraxes como en curtiumetraxes, anque pela mañana, dende les 9:30 hores, tamién se proyecten películes d’otres secciones como la popular “Enfant terribles”.

El fórum de la FNAC nel centru comercial Parque Principado de Siero ta esibiendo esta selmana una esbilla de películes pertenecientes a la Cinemateca de Cuba. Ayeri proyectose “Una pelea cubana contra los demonios”, del cineasta Tomás Gutierrez Alea y esti miercoles ye’l turnu de “El siglo de las luces”, del cineasta Humberto Solás. La entrada al pase, como davezu, va ser de baldre y entamará s a les 19:00 hores.

“El siglo de las luces” (1992) d’Humberto Solás narra la vida de dos herederos d’un empresariu cubanu ya’l viaxe qu’entamen pol Caribe, Francia y la España del levantamientu del 2 de Mayu.

Participante nel Festival de Cine de Sundance, el de Sitges ya’l de Cannes “Taxidermia” llega esti miercoles 21 de payares al Cine Felgueroso de Sama de Llangreu a les 20:00 hores dientro de les esibiciones cinematográfiques que Cajastur programa durante tol añu. La cinta ye una cooproducción ente Hungría, Austria y Francia y ta dirixida ya interpretada por György Pálfi.

“Taxidermia” ta encadarmada alredor de tres histories que se correspuenden coles tres xeneraciones d’una familia perespecial. Esta cinta, la tercera na carrare del director, algamó’l prmer premio del p úblicu nel festival Fantasporto.

Los responsables del concursu de curtiometraxes pa telefonu movil organizáu poles Mocedaes Socialistes d’Uvieu dientro de les xornaes culturales “Jovetense 07” ta acabante d’ampliar el plazu de recepción de trabayos pa la edición d’esti año hasta’l prósimu 30 de payares.

Al concursu puen presentase obres grabaes en telefonos móviles con una duración másima de dos minutos y medio y de temática llibre. Nel casu de que se usen imáxenes de fechos reales o de actualidá ye necesario que les imáxenes sían del conceyu d’Uvieu.

El xuráu, que ta compuestu por críticos cinematográficos, espertos en imagen, y miembros de Mocedaes, otorga tres premios consistentes en 1º Premio: Vale FNAC 60€ + Lote DVD’s; 2º Premio: Vale FNAC 30€ + Lote DVD’s; 3º Premio: Vale FNAC 30 €.

Más información

Dende esti vienres 16 de payares y hasta’l 7 de xineru ta disponible en Xixón l’amuesa colectiva de videoarte “Signos de Ciudad” que se cellebra paralelemente al Festival Internacional de Cine de Xixón. Segun informó’l Conceyal de Cultura de Xixón, Justo Villabrille l’amuesa repasa dellos aspectos de la ciudá al travies de los videos de diecisiete autores como Jennifer Allora, Alex Campoy, Dionisio González, o Tomás Muñoz. Los trabayos seleccionaos pa la ocasión puen vese na sala 2 del Centru de Cultura Antiguu Instituto y na Galería Espaciu Líquido, organizadora tamien del eventu.

El festival Internacional de Vídeuarte de Xixón, Xixón Óptica 2007, va acoyer na villa una esbilla de proyecciones, directos y cellebraciones dicverses dende esti vienres 16 de payares hasta’l prósimu domingu 18 na que ye la so tercer edición. El Centru de Cultura Antiguu Institutu, el Conseyu de la Mocedá de Xixón, el Casinu d’Asturies, Mediavanced , Gallery Art & Food y la Sala Lai van ser los escenarios nos que se va desendolcar el programa de xeres, siempre con entrada llibre y de baldre.

Esperimentación nel campu de lo visual podria ser perfectamente’l lema que defina esta edición d’un festival nel que van participar más de 200 artistes de tol mundu. Nel programa va haber sitiu pa directos y delles xeres y tamiñen pal concursu competitivu nes secciones d’artistes independientes y galeríes que opten Premiu Óptica al meyor trabayu de videu, al Premiu del Xuráu y el Premiu Especial Óptica 2007.

Web del festival

Del 22 de payares al 1 d’avientu Xixón va ser l’escenariu d’una edición más, la númberu 45, del Festival Internacional de Cine de Xixón. El so director, Jose Luis Cienfuegos presentó el pasáu xueves la programación d’un eventu nel que por primer vuelta va treslladar parte de les esibiciones a les llocalidaes de Candás y de Llangreu. Cienfuegos fizo mención especial al ciclu de cine alemán, a les películes “Juno” de Jason Reitman y “Grace is Gone”, de James C. Strouse.

La película que va inaugurar el festival va ser la cinta “The Darjeeling Limited” del director Wes Andersonnuna gala que va cuntar cola presentación del actor Javier Veiga y la música del cuartetu del compositor y guitarrista nortemericanu James Taylor. A esta edición del certame van presentase 18 títulos a la competición oficial de llargometraxes y 16 a la de curtios. Precisamente nel concursu de curtios participa l’asturianu Alberto Rodríguez, ganador del Premiu Nuevos Realizadores 2006 cola obra “Darío y Verónica”.

Web del festival

Esti miercoles a partir de les 19:30 hores la biblioteca de la Casa del Pueblu d’Uvieu, na cai Jovellanos (nº19, 2º pisu) les Mocedaes Socialistes d’Uvieu van proyectar la película d’Ingmar Bergman “Una lección de amor”, dientro del programa de xeres que se tan desendolcando con motivu de la cellebracion de les xornaes culturales JOVETENSE 07.

“Una lección de amor” ye la historia d’un xinecólogu casáu, David, y la so muyer Marianne. Tres 15 años de casaos David, tien una aventura con una xoven y Marianne abandona al medicu pa vivir con un exnoviu. David decide dempues volver cola so esposay xuntos nel tren que va hacia Copenhague alcuerdense de les escenes de la so vida en pareya.