Cine

El cine español dobló les sos recaudaciones nel primer semestre del 2008 gracies a que “Los crímenes de Oxford” y “Mortadelo y Filemón: Salvar la tierra” allugáranse ente les cinco películas mas vistes y namái que superaes oor dos superproducciones estadounidenses.

Esti día dábense a conocer los datos estadísticos del Ministeriu de Cultura qu’amuesen que les películas españoles pasaron de recaudar 19,3 millones d’euros (ente’l 1 de xineru y el 17 de xunu de 2007) a los 39,2 millones d’euros d’esti primer semestre de 2008.

“Los crímenes de Oxford” (con 8,2 millones d’euros recaudaos), y “Mortadelo y Filemón: Salvar la tierra” (con 7,7 millones d’euros)sólo foron superaes por “Indiana Jones y el Reino de la Calavera de Cristal”, la más taquillera n’España nesti 2008 con 17,5 millones d’euros, y por “10.000”, qu’algamara en taquilla 8,3 millones d’euros.

La película que Woody Allen rodó’l branu pasáu en Barcelona, Asturies y Nueva York, “Vicky Cristina Barcelona”, ya tien cartelu. Nelli apaecen los tres protagonistes de la comedia: Penélope Cruz, Scarlett Johansson y Javier Bardem.

“Vicky Cristina Barcelona” foi presentada nel pasáu Festival de Cannes y estrenarase n’España el 19 de septiembre.

La Mancomunidá d’El Cabu Peñes va celebrar la presentación del vídiu ganador del “Primer Certame de Vídiu Promocional de la Mancomunidá d’El Cabu Peñes en Llingua Asturiana” güei, vienres 27, nel Centru Polivalente de Candás a les 20:00 hores.

Na presentación va cuntase cola actuación de Jorge Tuya y Luis Estrada, “ Dúo Astur”, dos de los grandes de la escena asturiana y de les voces fundamentales de la tonada contemporánea.

L’actu organízalu’l Serviciu de Normalización Llingüística de la Mancomunidá d’El Cabu Peñes, del que ye responsable Aránzazu Prado García-Jove.

Según anunció ayeri la organización del Festival de Cine Asturianu, dirixíu por Xaviel Vilareyo, el realizador uviedín Gonzalo Suárez va recibir un homenaxe nel Auditoriu del Atenéu de Madrid, asitiáu na cai Prado, 21, como Premiu d’Honor del 4u Festival de Cine Asturianu y dientro de la Gala de Pieslle y entrega de premios que va tener llugar el miércoles 2 de xunetu.

La Gala de Pieslle del 4u Festival de Cine Asturianu va entamar a les 6 de la tarde y n’ella van presentase los nueve curtiumetraxes finalistes a los Premios del xuráu. De siguío y a partir de les ocho la tarde va siguise cola entrega de Premios del Festival que concede galardones pa ocho categoríes amás del Premiu d’Honor, que va inclyuir un homenaxe públicu y un repás per tola so obra cinematográfica.

Gonzalo Suárez Morilla (Uviéu, 1934) ye un de los primeros creadores del nomáu Nuevu Cine nos años 1960, intentando facer un nuevu llinguaxe cinematográficu mui influenciáu pola lliteratura. En 1958 llega a Barcelona onde trabaya como periodista y guionista y empieza publicar los sos primeros llibros (De cuerpo presente, Los once y uno, Trece veces trece, El roedor de Fortimbrás). En 1966 adapta pal cine dalgunos rellatos suyos como Ditirambo vela por norotros (1966) y El horrible ser nunca visto (1966). En 1967 rueda la so primer película Ditirambo, considerada la primer película moderna del cine asturianu. Trátase de facer un nuevu cine d’autor, expresionista, rupturista y de vanguardia, un cine acosáu pola censura y alloñáu del cine oficial que se facía en Madrid. Llueu rodaría películes como El extraño caso del Doctor Fausto, Aoom (rodada en Llanes), Morbo, Al diablo con amor y La loba y la paloma. En 1974 rueda n’Uviéu La Regenta pal productor Emiliano Piedra, integráu yá daquella na industria hespañola del cine comercial, a la que siguen otres adaptaciones lliteraries de prestixu pero nun escrites por él como son Beatriz y Parranda.

Más tarde fizo películes como La reina zanahoria, los curtiumetraxes Una leyenda asturiana y Minimán y Superlobo, y en 1984 estrena Epílogo, onde vuelve pañar los sos personaxes de Ditirambo y Rocabruno namoraos de la mesma muyer, y obteniendo un gran ésitu. Remando col vientu (1987) foi otru de los grandes éxitos de crítica y públicu. Nos años 1990 rueda Don Juan en los infiernos, La reina anónima, El detective y la muerte, y Mi nombre es sombra, a les que siguieron títulos como El portero, El genio tranquilo y la exitosa Oviedo Express (2007), una irónica recreación de La Regenta que consagra tou un añu d’ésitos pal cine asturianu.

Pa la televisión Gonzalo Suárez rodó series d’ésitu como Los pazos de Ulloa, y los trabayos titulaos La mujer fría y El lado oscuro y anguaño sigue escribiendo y publicando llibros.

El Festival de Cine Asturianu ñació’l 27 d’abril del añu 2005 nel auditoriu del Atenéu de Madrid cola idea de celebrar el primer Centenariu del Cine Asturianu. Axuntáronse naquella ocasión figures tan destacaes como Gil Parrondo (Premiu d’Honor del Festival), Paz Pondal, Xuan Gona, Pedro María Sánchez, Paul Naschy (Meyor Actor), Julio César Acera o Asución Balaguer (Meyor Actriz), ente otres personalidaes más pa celebrar el nacimientu d’esti nuevu Festival de Cine. El miércoles 2 de xunetu pela tarde, el Festival celebra la so cuarta gala de pieslle, nel Auditoriu del Atenéu de Madrid.

El Festival de Cine Asturianu celebra añalmente unes gales d’entrega de premios, conocíos como los Fruteros de Cristal, n’homenaxe a la primer película asturiana, El robu de fruta, dirixida por Javier Sánchez Manteola en 1905 y tien como fines la difusión y promoción del cine asturianu y de los sos artistes. Pal cuartu Festival de Cine Asturianu tán nominaes a los premios obres de los realizadores siguientes: Raimundo García, José Antonio Salgot, Óscar Fernández, Pablo de María, Amanda Castro, Pelayo Muñiz, Jesús Álvarez, Santiago Torres, Kiko y Javier Prada, Alberto Rodríguez, Gonzalo Tapia y Luis Argeo.

Los curtiometraxes nominaos a los premios son los siguientes: El cantar del agua (Óscar Fernández), Espresionista (Pablo de María), A golpe de tacón (Amanda Castro), Ausencia (Pelayo Muñiz), El arte de vivir (Jesús Álvarez), Escollera (Santiago Torres Muro), Humanos con patatas (Kiko y Javier Prada), La reconversión de las gaviotas (Alberto Rodríguez) y Un juego de niños (Raimundo García).

D’otru llau, los nominaos al Premiu al Meyor Documental son: AsturianUS (Luis Argeo), Misiones pedagógicas (Gonzalo Tapia) y Mar de valientes (Óscar Fernández). Les nominaes a la Meyor Película son: Cubalibre, dirixida por Raimundo García y Dama de Porto Pim, dirixida por José Antonio Salgot. Los acttores y actrices nominaos a los premios son: José Luis López Vázquez, Caco Senante, Antonio Resines, Lola Herrera, Kira Miró y Emma Suárez.

Los miembros del xuráu oficial daránse a la conocencia na mesma Gala de Pieslle, onde se fairá tamién un homenaxe a los guionistes y escritores asturianos. La Gala va tar presentada pola escritora Rosario de la Cueva y el Premiu d’Honor del 4u Festival de Cine Asturianu, que va facese públicu próximamente.

La Casa Cultura de Quirós, en Bárzana, acoyó esti sábadu pasáu pela tarde la estrena del curtiu “Vencíu”, dirixíu pol cineasta Santos Hevia. El curtiu, rodáu dafechu en Quirós y Proaza trata de la hestoria d’un rapaz, Raúl, que busca los oríxenes de la so familia y atopa los silencios del pueblu. Na película, d’una duración d’unos quince minutos, cuntó con una banda sonora compuesta pal filme ya interpretada por una orquesta.

Santos Hevia quier pesllar con esta película la triloxía entamada nel añu 2000 cuando rodó’l primer curtiu nel conceyu de Quirós, “Hestoria d’un vezu”, a la que siguió “Matar el tiempo”, nel añu 2006. En toos ellos hai un elementu común refiríu a “un final”. Nel primeru quixo reflexar la fin d’un mundiu rural antiguu, nel segundu la fin de los pueblos y nel terceru la fin de la inocencia.

El repartu de “Vencíu” tien una importante presencia de vecinos del llugar, incluyíu’l protagonista, Illán González, un mozu quirosán de 12 años, que s’enfrentó nesti filme a la cámara per primer vegada.

El director, Santos Hevia, collechó colos sos curtios numerosos ya importantes premios. “Hestoria d’un vezu” llogró nueve premios n’otros tantos festivales de Bélxica, Francia, Alemaña, Suiza, México y Rusia. El segundu algamó bones crítiques y delles nominaciones y premios. Toos estos ésitos faen que’l director asturianu espere yá pa rodar el so primer llargometraxe, “La mirada de los hombres”.

L’Institutu Vieyu de Xixón va acoyer esti sábadu 24 de mayu la presentación del documental “Bruxas”, un dvd que percorre les hestories de bruxes y nel que participó la diputada d’IX Noemí Martín como actriz y Chema Vega na producción.

La obra va estrenase a 11:45 nel Salón d’actos del edificiu xixonés y va durar hasta alredor de la una y media. L’asistencia ye llibre.

El xueves a les 19:00 entamó, con una gala na Casa de Cultura d’Aviles (Plaza Domingo Álvarez Acebal, 2), el VII Certame de Curtios Villa d’Aviles. L’actu tuvo presentación del actor y cómicu de la canal Paramount Comedy y del espaciu La Hora Chanante, Raúl Cimas.

El festival fina’l sábadu cola esibición y entrega de premios a los curtios finalistes y la presentación de “Quid pro quo”: el ganador del IV Concursu de Xóvenes Realizadores Ciudad de Aviles. El restu del programa ta disponible na web del Ayuntamientu d’Aviles.

Más información

L’Ayuntamientu de Navia ta acabante abrir el plazu pa presentar trabayos al primer concursu de curtios cinamatográficos. Ta empobináu a favorecer la creación artística ente xóvenes de 13 a 25 años y va cuntar con un primer premiu de 150 euros y un accesit de 75 euros.

Van almitise trabayos con temática llibre y cualquier teunica d’animación. El formatu tien que ser AVI o MPEG y la duración máxima del curtiumetraxe tien que ser de 15 minutos. El plazu pa presentar trabayos fina’l 2 de xunu y hasta esi día van recoyese trabayos en CD.Rom o DVD nel Ayuntamientu de Navia (cai Real, númberu 6)

El festival “ADocS Asturias Documental”, que se ta cellebrando en La Polla L.lena durante esta selmana, llega esti sábadu 10 de mayu a la so última xornada. El documental que va zarrar esta edición del festival ye “El Astillero”, del asturianu Alejandro Zapico sobre los trabayadores d’un astilleru nel norte d’España que tiene que salir a la cai pa defender el so puestu de trabayu. El pase ye a les 19:00 hores nel Teatru Vital Aza.

La xornada tamiñen va cuntar cola actuación en direutu, de magar les 21:00 hores tamiñen nel Vital Aza, del artista cubanu Santiago Feliú, un de los pertenecientes al movimientu de la Nueva Trova y figura de la música caribeñas contemporánea.

Otramiente, de e 12.00 a 14.00 hores va tener llugar la Clínica de Proyectos Documentales nel que participen, como profesores, Agustín Furnari Alonso de Armiño, realizador y presidente de l’Asociación ProDocumentales Cine y TV, y l’arxentín Pedro Parodi, realizador ya investigador del cine documental y social llatinoamericanu.