Cine

El 5u Festival de Cine Asturianu va celebrase la selmana que vien nel Teatru Filarmónica d’Uviéu. Güei xueves, a les siete la tarde, Xaviel Vilarero, director del Festival y los directores José Bors, Jesús Álvarez, Ángeles Muñiz, Pedro Touceda, Daniel Valledor, Eva Gallego, Rebeca Iglesias, Alfonso Suárez van presentar el programa del festival nel Club de Prensa Asturiana, asitiáu na cai Calvo Sotelo 7, d’Uviéu.

Les actividaes van llevase a cabu esti martes 7 d’abril, a partir de les seis de la tarde, cola proyección de los curtiometraxes finalistes presentaos por María Xesús Rogríguez y Jesús Menéndez. Más tarde, a partir de les 20,30 hores, va estrenase la obra “De rebaxes na sablera” pol Grupu Teatru de Güeñu. Darréu, a les 21 hores, van proyectase los documentales finalistes.

El miércoles, a les sies de la tarde, va celebrase la Gala de Pieslle, cola entrega de premios del Festival, presentada por Pepa Martínez y Jesús Piquero y coles actuaciones del Ballet Baidán, Celia González y Pelayu Cuaya. Ye nesa mesma gala, onde va facese homenaxe a Lilián de Celis y onde van proyectase los curtiometraxes ganadores.

A les diez de la nueche va producise l’estrenu de la obra “El misteriu del pelu roxu” del Grupu Teatru de Güeñu. Toles sesiones son de baldre pa los espectadores.

Esti próximu 2 d’abril a les 19 hores van presentase los directores y obres nominaes a los premios quintu Festival de Cine Asturiana nel Club de Prensa Asturiana del diariu La Nueva España. El día 7 d’abril nel marcu del Teatru Filarmónica proyectaránse los curtiumetraxes y documentales finalistes y el miércoles 8 d’abril sedrá la Gala de Pieslle de magar les 18 hores cola entrega de premios.

El Festival de Cine Asturianu presentará esti añu como novedá dos estrenos teatrales de dos obres cortes n’asturianu a cargu de la Compañía Teatru de Güeñu, amás de la yá habitual presencia de les coreografíes del Ballet Baidán d’Uviéu que tamién tarán presentes na Gala d’entrega de premios.

Los llargometraxes nominaos a la Meyor Película esti añu son ‘Oviedo express’, ‘La torre de Suso’ y ‘El orfanato’. Al Premiu al Meyor Curtiumetraxe en Castellanu tán nominaos ‘Juega conmigo’ (José Bors, 2004), ‘Ella’ (Jesús Álvarez, 1999), ‘Propiedad Privada’ (Ángeles Muñiz, 2006), ‘Salvemos el teatru’ (Xavi Vilareyo, 2009), ‘Polillas’ (Pedro Touceda, 2007), ‘Lebensraum’ (Daniel Valledor, 2007), ‘Normas de la casa’ (Eva Gallego, 2008), ‘Ingredientes’ (Rebeca Iglesias, 2007). Los nominaos al Meyor Documental son, finalmente, ‘Ensin xéneru de duldes’ (Worldtv-Europe, 2008) y ‘Voces en imágenes’ (Verité, 2008).

Esti añu’l Premiu d’Honor va ser pa l’actriz y cantante asturiana Lilián de Celis, que recibirá un emotivu homenaxe na Gala de Pieslle. L’artista nació en Fíos, Parres, en 1935, y rodó como actriz unes 17 películes ente España y México, onde vivió nueve años. Considerada reina del cuplé, con una escelente voz de sopranu, trabayó dende 1953 en Radio Madrid nun famosísimu programa de canciones tituláu ‘Aquellos años del cuplé’. Dempués entamó la so carrera en cine musical con obres como ‘Aquellos tiempos del cuplé (1958’), ‘Alma aragonesa’ (1960) o ‘Los claveles’ (1960).

La Conseyera de Cultura y Turismu del Gobiernu d’Asturies, Mercedes Álvarez González, espresó la so felicitación a l’actriz madrinala Penélope Cruz pol Oscar a la meyor actriz de repartu pol so papel na última película de Woody Allen, “Vicky Cristina Barcelona”, de la que se rodaron numeroses secuencies n’Asturies.

Pa la Conseyera esti ye un “hestóricu premiu qu’afita’l gran nivel interpretativu y les dotes artístiques de Penélope Cruz” y, que p’Álvarez “va favorecer una mayor proyección del Principáu d’Asturies como destín turísticu”.

Nesi sen, la Conseyera albidra, que Woody Allen tuvo la capacidá “de llevar la imaxe d’Asturies al mundu” consiguiendo “xenerar curiosidá alredor del nuesu destín turísticu”. Por ello, la responsable de cultura y turismu “tenderá la mano a los directores y productores de cine y de televisión, xóvenes promeses y profesionales consagraos, pa que sigan apostando por Asturies como’l meyor plató natural pa rodar”.

El 5u Festival de Cine Asturianu yá tien nominaciones pa los premios de la edición d’esti añu 2009. El Festival va tener llugar n’Uviéu del 6 al 8 d’abril de 2009, cuando van presentase los directores y obres nominaes a la prensa. El 7 d’abril nel marcu del Teatru Filarmónica proyectaránse los curtiumetraxes y documentales finalistes y el miércoles 8 d’abril sedrá la Gala de Pieslle cola entrega de Premios. Esti añu el Premiu d’Honor ye pa l’actriz y cantante asturiana Lilián de Celis que recibirá un homenaxe na Gala.

El Festival de Cine Asturianu presentará esti añu como novedá dos estrenos teatrales de dos obres breves n’asturianu a cargu de la compañía Teatru de Bueñu, amás de la yá habitual presencia de les coreografíes del Ballet Baidán d’Uviéu que tamién tarán un añu más presentes na Gala d’entrega de premios.

Los nominaos al Premiu al Meyor Curtiumetraxe en Castellanu son: Juega conmigo (José Bors, 2004), Ella (Jesús Álvarez, 1999), Propiedad Privada (Ángeles Muñiz, 2006), Salvemos el teatru (Xavi Vilareyo, 2009), Polillas (Pedro Touceda, 2007), Lebensraum (Daniel Valledor, 2007), Normas de la casa (Eva Gallego, 2008), Ingredientes (Rebeca Iglesias, 2007).

Los nominaos al Meyor Documental son: Ensin xéneru de duldes (Worldtv-Europe, 2008) y Voces en imágenes (Verité, 2008). Les nominaes a la Meyor Película esti añu son: Oviedo express, La torre de Suso y El orfanato. Los miembros del xuráu daránse a la conocencia enantes de la Gala de Pieslle del Festival que cuntará cola presencia de la mítica actriz asturiana Lilián de Celis, Premiu d’Honor d’esta edición del Festival.

La ganadora del Premiu d’Honor d’esti añu, Lilián de Celis Collía, ñació en Fíos, Parres, en 1935 y va rodar como actriz unes 17 películes ente les grabaes nel estáu y les grabaes en México, onde vivió nueve años.

Indiscutible reina del cuplé, con una escelente voz de sopranu, a la que munchos consideren la sucesora de la mítica cantante y actriz Raquel Meller, Lilián de Celis trabayó dende 1953 en Radio Madrid nun famosísimu programa de canciones tituláu “Aquellos años del cuplé” onde cola orquesta del maestru Indalecio Cisneros tocando en directu rescató del olvidu abondes canciones que tuvieren yá de moda nos felices años 1920.

L’ésitu del programa radiofónicu y de les presentaciones teatrales foi tan grande qu’entamó toa una serie de películes musicales basaes nestes canciones y temes antiguos del cuplé como la famosa película L’últimu cuplé (1957), que nun principiu diba llevar la voz de Lilián de Celis na so banda sonora pero la so negativa a prestar la so voz pa otra actriz fizo cambiar los planes de la película viéndose asina obligada Sara Montiel a cantar los temes d’esta película. El debú de Lilián de Celis nel cine musical paecía asina obligáu y merecíu, faciéndose llueu al añu siguiente como protagonista destacada nuna película pensada especialmente pa ella y dirixida por Mateo Cano y José Luis Merino que llevaría por títulu unu paecíu al famosu programa de Lilián na radio: Aquellos tiempos del cuplé (1958). La película foi mui bien acoyida pol públicu por facer valer nella les versiones musicales de Lilián de Celis, más fieles al estilu orixinal de la “Belle Epoque”, que los arreglos modernizaos fechos pa les películes de Sara Montiel, lo que xeneró llargos debates populares ente los partidarios d’una y d’otra actriz. Llueu rodaría en 1960 Alma aragonesa, Los claveles y en 1961 rodó otres dos películes: Las estrellas, y Júrame. En 1962 entama una xira per Sudamérica instalándose en México durante nueve años onde tamién rodaría delles películes más (Los apuros de dos gallos). Volvió a la so tierra en 1972 rodando en 1975 la película Yo fui el Rey.

El Festival de Cine Asturianu nació’l 27 d’abril del añu 2005 nel auditoriu del Atenéu de Madrid cola idea de celebrar el primer Centenariu del Cine Asturianu. Axuntáronse naquella ocasión figures tan destacaes como Gil Parrondo, Paz Pondal, Xuan Gona, Pedro María Sánchez, Paul Naschy, Julio César Acera o Asución Balaguer, ente otres personalidaes más pa celebrar el nacimientu d’esti Festival de Cine.

Les bases del Festival de Cine Asturianu almiten trabayos en dos estayes principales: obres en llingua asturiana y en cualesquier otra llingua. Al Concursu pueden presentase llargumetraxes, curtiumetraxes, o documentales en cualesquier formatu y duración, siempre que tean realizaos en llingua asturiana, tamién pueden presentase obres de realizadores asturianos o rodaes básicamente n’Asturies o nos territorios del dominiu llingüísticu del asturianu en cualesquier llingua. El Festival de Cine Asturianu celébrase añalmente y piésllase con una gala d’entrega de premios, conocíos como los Fruteros de Cristal, n’homenaxe a la primer película asturiana, El robu de fruta, dirixida por Javier Sánchez Manteola en 1905 y tien como fines la difusión y promoción del cine asturianu y de los sos artistes. Sergio G. Sánchez, Teresa Marcos, Santos Hevia, Carmen Rico, Carlos Rico, Alberto Rodríguez de la Fuente, Pablo de María, Xuan Lluis Ruiz, Luis Argeo, Eva Lesmes o Toni Salgot son dalgunos de los ganadores d’ediciones pasaes del Festival de Cine Asturianu. N’ediciones anteriores del Festival, el Premiu d’Honor concedióse-y a Gil Parrondo, Mary Paz Pondal, Xuan Gona y Gonzalo Suárez.

L’equipu de “La Señora” torna a Asturies pa grabar nuevos capítulos de la segunda temporada de la serie. Esta producción de Diagonal TV pa Televisión Española va emitise selmanalmente en ‘prime time’ a principios del prósimo añu, depués que la primer temporada de la historia de la familia Mázquez, ricos burgueses propietarios d’unes mines de fierro y de fábriques de tabacu, fora seguida pola audiencia cada xueves y algamara na so despedía los cuatro millones d’espectadores.

Dende’l martes 16 d’Avientu al vienres 19, un importante grupu de los principales actores de “La Señora” viaxará a Asturies pa rodar nuevos capítulos de la serie que trescurren nel oriente asturianu.

Adriana Ugarte (Victoria), Rodolfo Sancho (Ángel), Roberto Enríquez (Gonzalo), Raúl Peña (Hugo), Fernando Cayo (Ventura), Carmen Conesa (Alicia), Pepo Oliva (Justo), Ana Wagener (Vicenta), Berta Ojea (Adela), Lucía Jiménez (Encarna), Pedro Miguel Martínez (Don Enrique), Raúl Prieto (Salvador) e Inma Cuevas (Rosalía) grabarán nueves trames allugaes en paisaxes averaos a la costa asturiana.

Los llugares de grabación de la serie van desendolcase na casa roxa allugada en Colombres, mui cerca de Llanes (martes 16, miércoles 17 y xueves 18 d’avientu); mos muelles y cais de Llanes (xueves 18) y nel cementeriu de Niembro (vienres 19).

El curtiometraxe “A golpe de tacón” de la realizadora asturiana Amanda Castro algamó’l premiu al meyor curtiometraxe otorgáu pola Radio Televisión Pública Andaluza nel XI Festival Nacional de Curtiometraxes Ciudá d’Antequera (Málaga) que se celebró estos díes. A los premios que ya recibiere xuntábase amás estos díes la so nominación como finalista nel III Festival de Curtiometraxes «Cobre y Malacate» que se celebra en Nerva (Huelva).

“A golpe de tacón” ye una producción de Por Tantas Cosas qu’amuesa’l papel de les muyeres nes fuelgues y movilizaciones de los mineros asturianos a principios de los años 60 n’Asturies a partir d’un guión orixinal de Pedro Alberto Marcos adaptáu por Sergio Guardado.

Los responsables del curtiumetraxe “Dos sabios”, rodáu la selmana pasada n’Uviéu pola directora Rocío García Campelo, tán acabante presentar el blogue oficial del curtiu y la banda sonora, que pue sentise n’esti vidiu y que ta compuesta pol escritor y músicu Xaviel Vilareyo, productor de “Dos sabios”.

El blogue del curtiumetraxe http://rociogarciacampelodossabios.blogspot.com/ inclúi delles estayes nes que pue consultase’l guión, basáu nun cuentu de Clarín, ver semeyes del rodaxe y de les llocalizaciones y conocer el pasu de la directora, realizadora de la BBC, per Asturies. La páxina contién los testos n’asturianu, castellán ya inglés, llingües nes que va poder vese la película, protagonizada por Lluis Antón González y Pepe Santovenia.

El curtiu “Dos sabios” va estrenase n’abril, dientro del Festival Asturianu de Cine, qu’esti añu va celebrase n’Uviéu.

Blogue oficial del curtiu “Dos sabios”

El Balneariu uviedín recibió esta fin de selmana’l rodaxe d’un curtiu n’asturianu dirixíu pola realizadora madrilana Rocío García Campelo, que trabayó como realizadora na BBC inglesa y tien fechos decenes de curtios, amás d’otros trabayos. Esti ye, por embargu, el primeru de los sos trabayos rodáu n’asturianu y tien por guión la hestoria del cuentu de Clarín “Dos sabios”, nuna adaptación de la propia directora, tornada por Xaviel Vilareyo, productor executivu del curtiu.

Los salones, habitaciones y zones de balneariu de Les Caldes sirvieron como llugar pa la grabación del curtiu, del que yá se grabaron delles tomes n’esteriores a lo llargo de la selmana pasada.

La película ta protagonizada por Lluis Antón González, Pente Santovenia ya Inaciu Galán. Nel proyectu participen amás Laura Lamadrid, Fahia Buche, Emilio Castelar y Pepa Martínez, ente otros.

El curtiu va estrenase a principios d’abril dientro del Festival Asturianu de Cine.

Güei, vienres 21, el FIC Xixón va facer el primer pase d’una película con sotítulos n’asturianu d’esta edición, “Sex is Comedy” (El sexu ye comedia).

N’esta película, Jeanne, una directora de cine, tien auténticos problemes pa filmar les escenes de sexu ente la so pareya protagonista, nel rodaxe de la so última película.

La película ye americana y dura 94 minutos. Va poder vese, esta tarde, a les 17 hores na Sala 2 de los Cines Centro.

Estos díes va poder vese, tamién con sotítulos n’asturanu, el segundu pase de “La Vie Moderne”, el martes 25, a les 19.45 hores na Sala 3 de los Cines Centro.

Amás, y anque s’anunciare que diba doblase al asturianu, la película “La increíble aventura de los dos mosquitos” va echase a la fin con traducción simultanea al asturianu’l llunes 24 de payares, a les 12.15 hores nel Teatru de La Llaboral.

El ciclu de Curtiumetraxes y Documentales que tolos años entama ASBRU (Asturianos en Bruselas) en collaboración col Festival Internacional de Cine de Xixón va desendolcase na capital belga los díes 20 y 21 de Payares y va suponer l’estrenu en Bélxica del documental ‘El Astillero’, d’Alejandro Zapico.

Tres del gran ésitu de les dos ediciones anteriores, l’asociación ASBRU (Asturianos en Bruselas) presenta esti día una esbilla de los meyores curtios y documentales asturianos proyectaos nel certame xixonés en 2007.

Organizada nun programa doble que va tener llugar los díes 20 y 21 de payares nes instalaciones de la Casa d’Asturies, esta tercer edición va pesllase col estrenu en Bélxica del documental “El Astillero”, dirixida por Alejandro Zapico y producida pol Premiu Pulitzer de periodismu, l’asturianu, Javier Bauluz.