Cine

El Teatru Municipal acueye’l sábadu 20 d’avientu l’estrenu en Samartín del Rei Aurelio del curtiumetraxe ‘Al llau del pozu’, al cargu de la Asociación Cultural Avientu, dirixíu por Marín Franco González, sobre la dramática hestoria d’un mineru asesináu nos años 60, que’l so cuerpu ye refundiáu a una cuneta.

La proyección del curtiumetraxe va llevase a cabu nel marcu d’una gala nel Teatru Municipal, a partir de los ocho de la tarde, na que va actuar el grupu Stukas y el Coru San Andrés Sergio Domingo.

El curtiumetraxe, de nueve minutos de duración, grabóse na cuenca del Nalón, con localizaciones nel Pozu Sotón, el barriu d’El Bravial, en Blimea, o la redolada del Pozu Carrio, y cuntó cola participación d’un trenta de persones, ente actores y técnicos.

El guión y la dirección del curtiu foi obra de Marín Franco González; con música de Cesar Blanco y la participación de los intérpretes Ángel Héctor Sánchez, Nubia Baré y David Blanka.

Dientro del ciclu monográficu sobre la obra de Sam Peckinpah, programáu pol Aula de Cine de la Facultá de Filosofía y Lletres, güei martes, y mañana miércoles, van poder trate les películes Pat Garret y Billy El Neñu y La cruz de fierro, respectivamente. Va Ser a les 16 hores nel salón d’actos de la Biblioteca d’Humanidaes (Campus del Milán).

El Conceyu Samartín del Rei Aurelio va abellugar el pieslle esti sábadu 15 de payares del XVII Certame Nacional de Cortometraje Aula 18 nel intre d’una gala que se va celebrase nel Teatru Municipal, en L’Entregu. Mientres la ceremonia, que va escurrir envolubrada nun espectáculu musical inspiráu nel llargumetraxe “Billy Heliot”, van dase a conocer los galardonaos y van apurrise les correspondientes distinciones.

La gala va entamar cola proyección de los curtiumetraxes que más votos del públicu recibieron demientres la so proyección nel Teatru Municipal y distintes sales públiques na segunda quincena del pasáu mes d’ochobre. El votu del espectador, qu’exerze como xuráu, volvió bater record de participación, degolando la barrera de los 6.000 y superando la participación d’años anteriores.

El primer, segundu y tercer premiu, según el galardón al meyor curtiumetraxe empobináu o rodáu n’Asturies va salir d’ente los diez trabayos más votaos: Sájara, de Juanan Martínez (Madrid); Democracia, de Borja Cobeaga (San Sebastián);Cuerdes, de Pedro Solís (Madrid); El mio primer besu, d’Albert Manich (Barcelona); Sequence, de Josep Prim (Barcelona); Tupper, de Javier Pumar (Vigo);Eladio y la puerta interdimensional, de María Giraldez y Miguel Provencio (Madrid); Porsiemprejamón, de Ruth Díaz (Cantabria); El cascu de Xúpiter, de Diego Pérez y Chechu Llión (La Rioxa); y Bikini, d’Óscar Bernacer (Valencia).

Pela so parte, los nomaos a la Meyor Interpretación Masculina y Femenina son: Karra Elejalde y Ruth Díaz por El cascu de Xúpiter’; Beatriz Olivares por ‘Sajara’; Asier Etxaendía en ‘Porsiemprejamón’; Oscar Ladoire, por Democracia’; y Marta Larralde por Los Güesos del fríu’.

Na Sección Asturiana, los favoritos al premiu a la meyor dirección o producción na comunidá son: Hala la mio neña hala, de Pablo A. Quiroga (Candás); Safari, de Gerardo Herrero (Madrid); y ¿Quién ye Llibertá Lionetti?, de Juan Carlos Álvarez (Uviéu).

Tres la proyección de los curtiumetraxes premiaos y antes de la entrega de los galardones, la escuela de baille Dancia Asturies, de Llangréu, va poner n’escena una reinterpretación musical del llargumetraxe Billy Heliot, Stephen Daldry, que va concluyir cola representación de ‘El Baille de los cisnes’.

Sigue en marcha l’actividá cultural pal mes de payares na Casa de los Alberti de Ciañ y dientro la programación de “Los xueves de castilletes y carbón” que vien desenvolviéndose nel mes de payares, esti xueves día 13 visita Ciañu Pablo Casanueva, director del primer llargometraxe n’asturianu “Bernabé”. Pablo Casanueva va lleer la ponencia El procesu creativu na producción cinematográfica.

Esta charra enmárcase dientru les xornaes culturales De Castilletes y carbón que per quintu añu consecutivu, organicen la Fundación Nuberu y l’Ayuntamientu de Llangréu. Trátase d’una actividá de dinamización cultural qu’estes dos entidaes ponen en marcha como consecuencia del conveniu de collaboración firmáu ente elles y xiren alredor de les interrellaciones ente cine, mina, música, lliteratura, economía, política, etc.

Los xueves de castilletes y carbón van siguir esti mes de payares en Ciañu cola intervención de la Conseyera d’Educación Cultura y Deporte del Principáu d’Asturies, Ana González Rodríguez, que va participar el miércoles 19 dando llectura a la ponencia Política cultural n’Asturies y col recital lliterariu Compañeru dame tira nel que, cola coordinación de Chechu García, van intervenir Miguel Allende, Milio Rodríguez Cueto y Solinca Turbón. L’actividá de De castilletes y carbón se complementa cola esposición La Mina y la Mar que pue visitase demientres esti mes de payares na Casa los Alberti de Ciañu y pa poner el ramu, el 4 d’avientu día de Sta. Bárbara, va tener llugar un conciertu del grupu Nuberu en Sobrescobiu.

El Festival Internacional de Cine de Xixón vieno acabante de facer l’anuncia esti día de que reconoz al actor Imanol Arias col Premiu Nacional de Cine Nacho Martínez. L’intérprete va tar presente na gala de clausura de la 52ª edición del certame, onde va recoyer el galardón qu’homenaxa tola so trayectoria profesional y humana. Un premiu con un venceyu especial una y bones Imanol Arias y Nachu Martínez coincidieron en 1990 na película A soles contigo, d’Eduardo Campoy. La presentación del FICX sirvió tamién pa adelantar tamién que Richard Lester visitará Xixón pa entregar el premiu Muyer de Cine a Yvonne Blake y conocer actuaciones como la de Marlango.

El Festival destaca los casi 40 años de carrera d’Imanol Arias, nomáu en cuatro vegaes a los premios Goya, ganador de la Concha de Plata al meyor actor y reconocíu cola Medaya d’Oru al Méritu nes Belles Artes, con una filmografía onde podríen destacar Llaberintu de pasiones, El Lute o Territoriu Comanche, ente munchos otros. Anguaño tien por estrenar dellos proyectos como l’adaptación del cómic Anacleto: Axente Secretu o la nueva temporada de Cúntame, una serie que-y valió innumberables reconocencies, ente ellos la fidelidá de millones d’espectadores cada selmana frente a les pantalles de televisión.

El Premiu Nacional de Cine Nachu Martínez nació nel añu 2002 pa homenaxar al sumíu actor asturianu y coles mires de reconocer una destacada trayectoria artística y humana nel cine. Dende esi añu otorgóse a referentes del cine español como Marisa Parés, Gonzalo Suárez, Maribel Verdú, Ángela Molina, Charo López, Juan Echanove o más apocayá, Carmelo Gómez.

Na presentación del festival que tivo llugar esti miércoles anuncióse tamién l’asistencia de Richard Lester a la gala d’inauguración. El director de cine va tornar a Xixón p’apurrir, xunta anteriores galardonaes, el premiu Muyer de Cine a Yvonne Blake. Lester tamién va acompañar la proyección del clásicu Robin y Marian, nel que dambos participaron.

El FICX, na so presentación oficial, tamién dio a conocer los xuraos de la 52ª edición. El xuráu de la Sección Oficial va tar compuestu polos directores Santiago Zannou y Cristóbal Arteaga, los actores Alberto Ammann y Natalia Verbeke y la programadora de los festivales de Palm Springs y Los Ánxeles Hebe Tabachnik.

El xuráu de la Sección Oficial de Curtiumetraxes va cuntar col productor cinematográficu José Esteban Alenda, la directora Beatriz Sanchís y l’actor William Miller. Na sección AnimaFICX, los miembros del xuráu van ser el consultor de programación y coordinador de la sección d’animación del Festival de Sitges Jordi Sánchez-Navarro y el directores Tomás Lunak y Ricardo Ramón.

Tamién s’anunciaron güei los nomes de los padrinos” del Festival. L’actor Javier Ríos va encargar de presentar les películes de Sección Oficial y l’actriz María Cotiello amadrinará los filmes de Gran Angular Asturies.

Irene Visedo y Aura Garrido, maestres de ceremonies

Pa finar, el certame va cuntar tamién cola presencia de les actrices Irene Visedo y Aura Garrido como conductores de la Gala d’Inauguración que va tener llugar el 21 de payares nel Teatru Xovellanos. Irene Visedo cunta nel so currículum títulos como Cascabel, Los pasos perdíos o L’espinazu del diañu. Pela so parte, Aura Garrido ye una de les actrices más prometedores del cine español, nomada al Goya a la Meyor Actriz Revelación nel 2011 por Planes pa mañana y a Meyor Actriz Principal en 2014 por Stockholm.

Amás, Irene va impartir una serie de talleres mientres la selmana del Festival titulaos “L’actor frente a la cámara”, dirixíos a actores que deseyen formase na interpretación en cine y televisión. Los talleres van tener llugar dende’l llunes 24 hasta’l vienres 28 de payares nel teatru de la Escuela Cimera d’Arte Dramático de Xixón (ESAD) n’horariu de 10:00 a 13:00 hores, y les inscripciones yá tán abiertes na páxina web del festival. A lo último, tamién Irene Visedo va ser la encargada de conducir los programes de televisión del propiu Festival, onde toles tardes va charrar colos equipos protagonistes de les películes presentes nel FICX.

El Festival Internacional de Cine de Xixón (21-29 payares) ta entamáu pol Conceyu de Xixón, al traviés de Divertia, patrocináu pol Gobiernu del Principáu d’Asturies, l’Institutu de la Cinematografía y les Artes Audiovisuales del Ministeriu d’Educación, Cultura y Deporte y Liberbank-Cajastur y amás collabora la Televisión del Principáu d’Asturies.

El Festival de Cine de Xixón ye’l llugar escoyíu pa estrenar los primeros minutos del documental Cantábricu. Esi adelantu podrá vese nuna proyección que va tener llugar el domingu 23 de payares y que se va acompañar del anterior ésitu de los sos responsables, el documental nomáu al Goya Guadalquivir.

El director del Festival de Cine, Nacho Carballo, anunció nesti día tamién na presentación una serie d’actividaes que van tener llugar nos díes del festival. Per un sitiu, van instalase dos pantalles xigantes – na plaza del Parchís y nel paséu de Begoña- que van retresmitir les ruedes de prensa, los Cafés con…” y el programa d’Irene Visedo, amás d’otru material audiovisual, incluyendo una esposición inédita de trabayos fechos por fotógrafos del FICX que nunca antes fueron publicaos.

Tamién s’anunció la clase maxistral que va tener llugar el vienres 28 de payares y va ser impartida pol director y miembru del xuráu Santiago Zannou. La entrada, como nel casu de les enantes anunciaes, ye llibre y yá ta abiertu’l plazu d’inscripción a la mesma.

Bande de filles, una de les películes escoyíes en Gran Angular, ye tamién una de les finalistes al premiu LUX del Parlamentu Européu. La so actriz, Karidja Touré, va visitar Xixón pa participar nun alcuentru con responsables de les instituciones europees de cultura.

Amás, Javier Tolentino, reputáu periodista de Radiu 3 y unu de los críticos de cine qu’escueyen películes de la sección Converxencies, va presentar el so llibru El cine que m’importa, de recién publicación, nel marcu del festival.

El Festival Internacional de Cine de Xixón consolidóse nel panorama nacional ya internacional como un festival de referencia con personalidá propia nel que podrán esfrutase más de 280 títulos, ente los que s’atopa’l meyor cine independiente y d’autor. Les entraes van costar 3,50 euros y los abonos de 10 películes, 30 euros. Coles mesmes, el preciu de les entraes pa los más pequenos caltener en 1,50 euros y el pase de públicu, pa esfrutar de tola programación, va ser de 50 euros.

El Festival Internacional de Cine de Xixón (21-29 payares) ta entamáu pol Conceyu de Xixón, al traviés de Divertia, patrocináu pol Gobiernu del Principáu d’Asturies, l’Institutu de la Cinematografía y les Artes Audiovisuales del Ministeriu d’Educación, Cultura y Deporte y Liberbank-Cajastur. Collabora la Televisión del Principáu d’Asturies.

El pernomáu humorista y director de cine terry Gillian, miembru de los populares Monty Python, va allegase a Xixón a recoyer el galardón que vieno acabante de concede-y el Festival de Cine de Xixión ya impartir una clase maxistral nes mañanes del Festival de Cine, xuntu con Bill Plympton y Brillosu Mendoza. Gilliam, nacíu n’Estaos Xuníos pero nacionalizado británicu nos años 60, foi parte orixinal del Circu Ambulante de los Monty Python, con quien empezó trabayando como animador.

L’actor y director Terry Gilliam, figura llexendaria del cine de los últimos cincuenta años y miembru del famosu grupu humorísticu británicu Monty Python, va ser galardonáu col Premiu d’Honor de la 52 edición del Festival Internacional de Cine de Xixón.

Gilliam, nacíu n’Estaos Xuníos pero nacionalizado británicu nos años 60, foi parte orixinal del Circu Ambulante de los Monty Python, con quien empezó trabayando como animador. Suyes son les imaxes característiques qu’enllazaben sketch tres sketch, amás de los títulos de creitu y el llinguaxe visual nes cubiertes de discos y llibros. Magar el so papel delantre de les cámares nunca foi tan llamativu como’l de los sos compañeros, Gilliam actuó en Los caballeros de la mesa cuadrada y los sos llocos siguidores, La vida de Brian y El sentíu de la vida, ente otres.

Apocayá formó parte de One Down, Five to Go, l’espectáculu qu’axuntó al grupu tres años separaos y qu’enllenó l’estadiu O2 de Londres mientres diez noche.

Tres los curtiumetraxes Storytime (1968) y Miracle of Flight (1974), Gilliam codirigió al pie de el so compañeru “Python” Terry Jones el so primer llargumetraxe, Los caballeros de la mesa cuadrada (1975); tándem que repitiríen en 1983 n’El sentíu de la vida. Ente dambes, Gilliam llanzose en solitariu con La bestia del reinu (1977) y Los héroes del tiempu (1981).

Dueñu d’un estilu visual personalísimo y un mundu propiu definíu pol críticu cinematográficu Roger Ebert como “alucinatoriu gracies a la riqueza del detalle”, Gilliam llogró reconocencia total de la crítica con Brazil (1985), una distopía satírica nomada en dos categoríes de los Oscar, incluyida la de Meyor Guión Orixinal pa’l mesmu Gilliam.

Tres Brazil y Los héroes del tiempu, Gilliam cerró la llamada ‘Triloxía de la imaxinación’ con Les aventures del Barón Munchausen (1988), una película que nun tuvo demasiao ésitu comercial pero que foi un gran ésitu de crítica y consiguió cuatro nominaciones a los Oscar. Tres ella, Gilliam empareyó a Jeff Bridges y Robin Williams n’El Rei Pescador (1991), pola que llogró’l Llión de Plata nel Festival de Cine de Venecia.

En 1995, ya inspirándose nel curtiumetraxe La Jetée de Chris Marker, rodó 12 Monos con Bruce Willis, Madeleine Stowe y Brad Pitt, que-y dio a ésti últimu la so primer nominación al Oscar y la so reconocencia como actor dramáticu. El filme tamién dio pie a la creación d’una serie de televisión, del mesmu títulu, que se va estrenar n’Estaos Xuníos en xineru de 2015.

Inspirándose nel llibru de Hunter S. Thompson, Mieu y ascu en Les Vegues, Gilliam rodó la película homónima (1998), protagonizada por Benicio del Toru y Johnny Depp, unu de los filmes de cultu de finales del sieglu XX y unu de los esponentes del so estilu visual más estremáu.

Los siete años que trescurren dempués d’esti filme tán dedicaos al desenvolvimientu y rodaxe de The Man Who Killed Don Quixote, una revisión de Gilliam del Quixote de Cervantes. Problemes de rodaxe y presupuestu desaguaron na cancelación del proyectu y l’estrenu del documental Lost in La Mancha (2002), que narraba les aventures vivíes pol equipu. Tres el parón, en 2005 Gilliam presentó dos películes: El secretu de los Hermanos Grimm y Tideland.

L’imaxinariu del doctor Parnassus, la so siguiente película, tampoco tuvo exenta de dificultaes. El rodaxe viose atayáu pola muerte de Heath Ledger, y namá siguió cuando Johnny Depp, Colin Farrell y Jude Law ufiertar pa interpretar el papel, desdoblándolo asina en cuatro personaje qu’habitaben el mundu fantásticu del filme.

El so últimu filme, The Zero Theorem, presentáu en Venecia en 2013, cierra otra de les sos triloxíes, la de les ‘distopías satíriques’ (xuntu con Brazil y 12 Monos). Anguaño atópase, una vegada más, intentando arrincar el rodaxe de The Man Who Killed Don Quixote nes Isles Canaries, producida pol español Adrián Guerra (Lluces Coloraes, Gran Pianu).

Un premiu bien merecíu

La obra de Andrei Tarkovski (1932-1986), ún de los más nomaos directores rusos de cine acaba aportar al dominiu públicu de la man de la so productora cinematográfica, Mosfilm, que nuna decisión ensin precedentes ufre a la humanidá la posibilidá de manipular, versionear y trabayar con un material cinematográficu tan curiosu como estraordinariu. Les sos películes son visionaries pero tamién llargues y, dacuando, difíciles y pónense agora al algame d’escueles de cine y audiovisuales, televisiones ciudadanes o en llingües minoritaries. En total son trés les películes más nomaes del director rusu: Stalker, Andrei Rublev y Solaris.

Tarkovski foi un director de grandes directores como Ingmar Bergman, el so meyor alumnu, que considerábalu’l meyor director de tolos tiempos. Akira Kurosawa y Roberto Rosellini adorábenlu percima de toles coses. Ente’l públicu, la valoración de les sos obres bazcuya -dependiendo de la edá, humor y preferencies del espectador- de fascinantes a insoportables.

Pero la llegada unu de los meyores directores de la hestoria del cine al dominiu públicu, daqué qu’asocede cuando prescribe la so llicencia de copyright, ye siempres una mui bona noticia.

Pa les obres protexíes por llicencies de propiedá intelectual, entrar nel dominiu públicu non solo significa que puede vese ensin pasar por caxa, sinón tamién que pueden espublizase, estudiar, reinterpretar y hasta remezclar ensin arriesgase a una persecución llegal. La obra de Tarkovski fueron lliberaes por Mosfilm, la mayor y más antigua productora de Rusia. Como indiquen nos comentarios, na so páxina pueden atopase grabaciones dende los años 20 hasta’l nuesu sieglu.

La película Desire Street (Cai del Deséu), dirixida pol asturianu Roberto F. Canutu y el cineasta d’orixe chinu Xu Xiaoxi, estrenase n’España nel marcu del IX Festival de Cine Asturianu en Xixón. Rodáu en California, el llargumetraxe alzose col premiu a la Meyor Película na gala del Festival celebrada nel Atenéu de Madrid el pasáu xunu.

La proyección tuvo llugar esti sábadu, día 13, a les 18.00 hores, en Xixón, xunta los curtiumetraxes galardonaos nel citáu Festival. El xuráu del IX Festival de Cine Asturianu, dirixíu por Xavi Vilareyo, destacó la orixinalidá del guión y la maestría técnica de “Desire Street”, que los sos directores tamién resultaron premiaos col so curtiumetraxe “Nin Jing: Nun Vas Robar”. Esti postreru filme alzose con un segundu premiu al meyor curtiumetraxe y so protagonista, Sherry Xia Ruihong, de nacionalidá china, tamién resultó galardonada como meyor actriz.

“Desire Street”, producida por Almost Rede Productions, ta protagonizada por Alexandra Smothers, al pie d’un repartucoral nel qu’atopamos a la mexicana Alejandra Walker (tamién nomada nel Festival), Ellen Clifford, Javier López, Kjord Davis y Jesús Guevara.

Rodada en Los Ánxeles, nel conflictivu distritu Koreatown, el llargumetraxe supunxo’l trabayu de graduación de el directores nel Master en Dirección de Cine de la New York Filme Academy de Los Estudios Universal de Hollywood. La película ta grabada en celuloide de 16mm y mientres el so rodaxe l’equipu sufrió dellos contratiempos, ente ellos dellos robos, como’l d’un enorme xenerador de corriente.

Al pie de Desire Street, l’IX Festival de Cine Asturianu premió a Fernando Martínez como meyor actor por Bernabé, de Pablo Casanueva, primer película rodada n’asturianu.

Coles mesmes, de los 18 curtiumetraxes nomaos, Deil, de David Rodríguez, alzar col primer premiu; Nin Jing: Nun Vas Robar, de Roberto F. Canutu y Xu Xiaoxi, col segundu; y La Paciencia del Cazador, de Kiko y Javier Prada, col terceru; ente que Peonos, de Javier Villaverde, y Anita, d’Alicia Guardo, recibieron el cuartu y quintu galardón, respectivamente. Amás, mientres el Festival rindió homenaxe al director y escritor Javier Maqua, que recibió’l Premiu d’Honor a la so carrera.

Gonzali Producciones vieno acabante d’entamar el doblaxe al asturianu de los 9 capítulos primeros de la serie clásica d’animación Supermán, realizaos nos Fleischer Studios. La productora quier continuar col doblaxe de películes d’animación, entendiendo’l so especial valir nel procesu de normalización llingüística en cuanto suponen unos productos mui apreciaos polos neños. Nesi camín afáyase esti proyectu que cunta con una subvención del Ayuntamientu de Xixón.

Dempués de la so apaición primera nel añu 1938, nel Action Comics #1, la popularidá de Superman nun paró de crecer. P’aprovechar el tirón del personaxe la productora Paramount encargó a los estudios de los hermanos Max y Dave Fleischer que ficieren una serie de curtiumetraxes d’animación, con una duración ente 7,5 y 9 minutos, con Superman como protagonista. Los Fleischer aceptaron l’encargu tres d’aprobase un presupuestu mui altu p’aquel tiempu pa unes hestories animaes, 50.000 dólares por episodiu.

Realizaron la serie, en total 17 curtios, d’una calidá impresionante. L’animación yera fluida y dinámica, y el dibuxu mui asemeyáu al de Joe Shuster nel cómic. Cada episodiu tenía una estructura cuasi igual: primero la introducción, cola música xenial de Sammy Timberg; llueu presentábase a los villanos, colos que Clark y Lois siempres acababen involucraos, y Lois les más de les veces atrapada o secuestrada, hasta que Superman diba al rescate cola frase “esto paez un trabayu nuevu pa Superman”. L’episodiu terminaba davezu col titular del Daily Planet onde se lleía cómo Superman iguara la situación, y con una conversa ente Lois y Clark sobre Superman.

El capítulu primeru de la serie foi nomáu al Oscar al meyor curtiumetraxe d’animación en 1941. Los títulos de los episodios que van ser doblaos son Superman, Los monstruos mecánicos, El tren d’un billón de dólares, El xigante del Árticu, Los homes bala, El telescopi magnéticu, Terremotu eléctricu, El volcán y Apavoriu nel bulevar.

Gonzali Producciones ye la productora responsable del doblaxe profesional n’asturianu dende 2010. Dende entós tien fecho dellos versionaos, de los que cuatro editáronse en DVD, Los viaxes de Gulliver (2010), El tercer home (2011), McLintock (2011) y La nueche de los muertos vivientes (2012). El rostru impenetrable (2013) emtióse dos vegaes pela televisión autonómica.