Turismu

El Muséu d’Ancles Philippe Cousteau alzáse en forma de talaya na península de La Peñona, un puexu de la naturaleza arrodiáu de mar, n’unu de los estremos de la sablera de Salinas, llocalidá asitiada nel Conceyu de Castrillón.

Esti Muséu ta concebíu como un conxuntu monumental albentestante, onde se resalta la guapura de les ancles, que xunto col Templu de los Océanos, o’l bustu de Philippe Cousteau, apurren un interés añadíu a una “Peñona” que siempres tuvo un calter míticu pa los castrillonenses.

Ye una creación orixinal pa rindir un homenaxe amás d’amor a la mar y a les sos xentes, a tola cultura que representa. El mesmu nome escoyíu pa la denominación del Muséu, ye la síntesis del orixe vital y universalidá cola que’l mesmu Philippe Cousteau se refirió siempres a la mar.

La Confrería Bona Mesa de la Mar cuando decidió crear esti Muséu, pensó que Philippe Cousteau, fíu del gran oceanógrafu Jacques I. Cousteau, podía ser quien representara col so exemplu de mocedá y dedicación a la mar hasta l’últimu sollutu de la so vida, esi homenaxe eternu a la mar y a les sos xentes.

Ye un Muséu singular, ta al aire llibre y cualquier persona puede aportar a él en cualquier momentu, les sos “puertes”, siempres tán abiertes pa la so visita, día y nueche.

El númberu 38 de la revista “Siete Leguas” recueye reportaxes de viaxes a Machu Picchu, Sri Lanka, Sudán del Sur, Pompeya, les geishes de Kioto y l’Antartida, amás d’Asturies, al traviés d’un reportaxe de Pablo Antón Marín Estrada sobre los vaqueiros d’alzada, l’últimu grupu peninsular que practica’l nomadismu. El reportaxe inclúi semeyes del fotógrafu Navia.

Siete Leguas ye una revista de periodicidá trimestral del grupu de comunicación del diariu El Mundo.

Pablo Antón Marín Estrada, ún de los narradores con más prestixu na lliteratura asturiana, fízose col Premiu Xosefa Xovellanos en delles ocasiones, la última en 2009, pola novela “Mientres cai la nueche”.

Páxina de la revista

El territoriu d’Asturies recibió a lo llargo de 2010 más d’1.825.000 turistes, una cifra que supera nun 1,2% la rexistrada en 2009 y que pon al país en valores mui asemeyaos, llixeramente superiores, a los de 2008, dempués de la baxada de 2009. Estos son los datos algamaos nel piesllu del añu turísticu, dempués de que l’Institutu Nacional d’Estadística ficiera públicos los datos d’establecimientos estrahoteleros del mes d’avientu.

Según esti estudiu estadísticu, nun solo medró’l númberu de turistes sinón que les pernoctaciones en tolos establecimientos asturianos superaron les 4.575.000, con un incrementu del 2% en rellación a 2009 y del 1,2% en comparanza col añu 2008. La estancia media tamién aumenta llixeramente y supera los 2,5 díes por visitante, siempre falando del global d’establecimientos (hoteles, turismu rural, cámpines y apartamentos).

Ensin dulda, el gran obleru del añu foi’l crecimientu del turismu internacional, ún de los principales retos que tien el sector n’Asturies. Nesti sen, los datos del INE señalen que’l númberu de visitantes foriatos aumentó en 2010 cerca d’un 18% en rellación a 2009, el mayor incrementu rexistráu ente les comunidaes autónomes del norte peninsular.

Amás, les pernoctaciones internacionales nel añu 2010 tamién amuesen un crecimientu del 17%. Tanto l’incrementu del númberu de turistes como’l de les pernoctaciones de los viaxeros internacionales asitien a Asturies a la cabeza no que cinca a crecimientu del añu 2010, hasta per delantre de Galicia en plenu añu Xacobéu.

Por procedencia, hai que señalar que’l turismu internacional supón yá’l 12,3% del total del turismu n’Asturies. Amás, cerca d’un 20% de los visitantes lleguen de Madrid, un 10% de Castiella y Lleón, un 8% del País Vascu, una cifra igual a la de Galicia, y cerca d’un 6% de Cataluña.

Llideralgu en turismu rural

Amás de la situación global positiva, los datos fechos públicos güei pela mañana pol INE espeyen la importancia del turismu rural pal sector n’Asturies. Nesti sen, destaca que la cuota de pernoctaciones del turismu rural d’Asturies dientro de les comunidaes de la cornisa cantábrica s’afíta perriba del 36% y caltiénse en posición de llideralgu al final del 2010. Asturies, en turismu rural, ye la comunidá que más crecimientu esperimenta dientro d’esta fastera en rellación a los dos años últimos, con un 18,23%. El númberu de turistes pel 2010 tamién se vio reforciáu con un incrementu de cerca del 20% en rellación al 2008.

Per otru llau, el turismu rural d’Asturies presenta una estancia media de cuasi cuatro nueches (3,8), siendo la comunidá que más crez nesti aspeutu. Too esto supunxo que se superen nel acumuláu añal les cifres del 2007, calificáu como históricu pol sector. Amás, Asturies colócase en turismu rural en valores de crecimientu mui positivos, yá que crez un 9,2% en turistes y un 5% en pernoctaciones.

La Conseyería de Mediu Rural y Pesca llanza la campaña de promoción de productos asturianos “Soi lo que como, como lo que soi”. La campaña publicitaria cuenta con un presupuestu de 130.000 euros y va tar presente nos medios de comunicación dende’l día 1 al 24 d’avientu. L’oxetivu ye facer medrar el consumu de los productos agroalimentarios asturianos na dómina navidiega.

La Conseyería de Mediu Rural y Pesca llanza esta campaña per segundu añu consecutivu. Amás de favorecer el consumu d’estos productos, la campaña tien como oxetivu presentalos como un elementu más de la cultura y l’autenticidá asturiana destacando la so escelente calidá y sabor.

Coles mesmes, busca informar sobre la variedá de los productos agroalimentarios asturianos y, cuantimás, sobre aquellos que cunten con dalgún sellu de calidá européu: los quesos Cabrales, Casín, Gamonéu, Los Beyos y Afuega’l pitu; la Sidra; la Faba; el vinu de Cangas; el Choscu de Tinéu; la Escanda, o los productos de l’agricultura y la ganadería ecolóxica.

Pa consiguir estos oxetivos y llegar a toos de la forma más directa posible, l’axencia Eteria, responsable de la campaña, parte d’una frase fecha bien conocida: “Yes lo que comes”, que se tresforma al xunila con una fibra bien sensible pa cualquier asturianu: el so arguyu de selo.

Asina, crea’l conceutu, ‘Soi lo que como, como lo que soi’, qu’añede a la campaña un sentimientu reivindicativu de pertenencia a un grupu: “Siéntome asturianu”.

El Festival de la Sidra de Nava llega a la so edición XXXIII esta fin de selmana. Ente les actividaes, el ciclu Cancios de chigre, un conciertu de Los Berrones, güei vienres, mercáu d’artesanía, entrega del premiu a la meyor sidra natural del añu, llectura del pregón, llanzamientu del chupinazu, concursu d’echadores de sidra, verbenes y festival infantil.

Consulta’l programa completu de les fiestes

Mañana vienres termina’l plazu d’esta convocatoria na que pueden participar toles persones que s’atopen en posesión de dalguna de les siguientes titulaciones: técnicu superior n’información y Comercialización turística, o n’axencies de Viaxes (FP3), Técnicu n’empreses y actividaes turístiques, Diplomáu en turismu o cualesquier diplomatura universitaria o titulo superior universitariu o Títulu estranxeru homologado a dalgún de los anteriores pola autoridá competente nesta materia.

El plazu de solicitú remata’l próximu 9 d’abril y les bases tán nel BOPA de 26 de marzu.

Bases de la convocatoria nel BOPA

La Tertulia Cultural El Garrapiellu presentó estos díes un cartafueyu nuevu pa la promoción de la “Travesía andariega de Xixón a Cuadonga”. Del folletu fízose una tirada de 2.500 exemplares y la organización tien la intención de facer una nueva tirada pal añu viniente.

Dende 1993, esti camín hestóricu ta señalizau coles “garrapielles” (fleches marielles y un trisquel, símbolu solar celta), coles qu’El Garrapiellu quixo facilitar el camín a los pelegrinos, que según comenten dende la organización pueden esfrutar “de paisaxes de plasmu”.

El cartafueyu inclúi un mapa onde se señalen los finxos más importantes de la ruta, como ye’l Güeyu (onde ñaz el ríu Peñafrancia), na xixonesa parroquia de Deva, o los horros del conocíu pueblu maliayu de Sietes. Hai tamién, nesti cartafueyu, una llista de pueblos cola desplicación de qué edificios y llugares puen vese, amás d’onde tán los chigres que “van facer esfrutar cola gastronomía del país”.

La publicación va distribuyise peles Oficines de Turismu y establecimientos hosteleros de los conceyos pelos que pasa esti camín.

Según cálculos d’El Garrapiellu son al rodiu de 15.000, les persones que faen los setenta kilómetros que tien esta travesía cada añu, “dellos en dos díes, otros en trés y los mas echaos p’alantre y bonos andariegos nun día namás”. Dende El Garrapiellu recomiéndase facela en trés, “p’asina parase en llugares como’l Monesteriu de San Pedru de Villanueva, del sieglu XIII o na ilesia románica de San Xuan, n’Amandi, fecha nel sieglu XII”.

Esti cartafueyu ta fechu col sofitu de la Conseyería de Cultura y Turismu d’Asturies.