Tecnoloxía

La última edición del nomáu como’l ‘zorru’ más rápidu del mundiu, la versión 1.0 de Firefox, qu’ayeri llanzó con calter mundial la Fundación Mozilla, ya pue descargase de baldre col asturianu como llingua operativa. El competidor cimeru del Internet Explorer de Microsoft ye un navegador cenciellu pero muncho más eficiente que l’Explorer, ensin los problemes de seguridá d’esti y que s’esparde como un regueru de pólvora por mor del boca-oreya ente los usuarios.

El 9 de payares foi la xornada elexida pala apaición d’esti FireFox 1.0, el navegador desendolcáu pola Fundación Mozilla, que ye una rede de programadores que crearon esta utilidá empobinada a competir col navegador de Microsoft, Internet Explorer, actualmente líder indiscutible del mercáu con una penetración penrriba’l 90%. Sigún los expertos, la versión definitiva del Firefox 1.0 nun s’estrema muncho de la “beta” que lleva dende setiembre circulando por Internet. Amás los cambios son malpenes apreciables polos usuarios.

Dende esti pasáu día 9 de payares el Mozilla Firefox 1.0 pue descargase en versiones estremaes palos sistemes operativos Windows, Linux y Mac OS X, depués de que nestos meses más de 7 millones de internautes ya descargaren la versión “beta”, noo que supón un dato gayoleru pala proliferación ente los usuarios de la Rede d’esti navegador llibremente distribuíu. D’alcuerdu con datos difundidos pola firma WebSideStory la selmana anterior al llanzamientu, la participación de Microsoft en el mercado de los buscadores maenorgó a un 92,9% dende’l 95,5% en xunu, y na mesma fastera de tiempu, la cuota de Firefox xorreción a un 6% dende’l 3,5%.

L’aliendu definitivu pa dar a conocer la versión 1.0 de Firefox ye la publicación d’un anunciu, a color y páxina completa, nel diariu The New York Times. Col obxetivu d’axuntar dólares abondos pa sufragar la publicidá, la compañía recurrió a les donaciones de los internautes y la campaña de captación de fondos, entamada dende la páxina de marketing de la compañía, Spread Firefox, algamó que 2.500 persones abonaran polo menos 30 dólares en diez díes. Sigún los datos ufiertaos por Bart Decrem, portavoz de la Fundación Mozilla, la so organización algamara 100.000 dólares, una cantidá abonda como pa espublizar dos anuncios nel Times. El dineru que sobre va destinase a financiar otros proyectos de la fundación.

Amás, nun cientu paises de tol mundu están promoviéndose, dende abaxo, folixes para cellebrar el llanzamientu de la primer versión estable de Firefox. Pue consultase la páxina mundial en http://www.openforce.at/mozparty2/ y la página d’inscripción nel festexu madrilanu en http://www.openforce.at/mozparty2/?party=237.

Direicion Oficial de Firefox en castellán

El conseyeru d’Educación y Ciencia, José Luis Iglesias Riopedre y el viceconseyeru de Presupuestos y Administración Pública, Luis Iturrioz Viñuela, presentaron ayer n’Uviéu el proyectu ‘Deprendizaxe Permanente en Rede’, col que se van ufiertar un total de 128 aules formatives pa favorecer l’accesu a la sociedá de la información de los asturianos. La rede d’aules va tar estructurada al través de los 85 telecentros esistentes n’Asturies y los Centros d’Educación de Persones Adultes (CEPAS). La campaña ta coordinada pola Fundación del Centru Tecnolóxicu pal Desarroullu de les Tecnoloxíes de la Información y la Comunicación (CTIC).

El director de proyectos de la Fundación CTIC, Francisco Prieto Díez, acompañó a los representantes del gobiernu autonómicu na presentación de la campaña ‘Deprendizaxe Permantente en Rede’ y señaló que la mesma básase “nel afitamientu de los recursos que tán funcionando” con tres aspectos fundamentales: l’ampliación de la ufierta formativa al unificar los recursos disponibles de los Telecentros y los CEPAS; l’usu de la rede de Telecentros como soporte pal alumnáu de les Aules Mentor y la difusión del proyectu n’entrambes redes.

El conseyeru d’Educación, José Luis Iglesias Riopedre calificó de “hestóricu” l’alcuerdu entamáu cola Fundación CTIC, que permite poner en marcha el proyectu divulgativu “dao que se multipliquen les posibilidaes de tolos ciudadanos d’Asturies p’acceder la sociedá de la información y el conocimientu” al xuntar los recursos de los Telecentros y los Centros d’Adultos. Pela so banda el viceconceyeru Iturrioz amosó el so contentu por esti proyectu y adelantró que “l’ésitu ta aseguráu porque los Centros d’Asultos ya disponíen de conteníos informativos y agora van contar con una mayor difusión al unificar los medios colos Telecentros, qu’a la so vez van ufiertar un valor añadíu, como ye’l de prestar estos servicios”.

La rede agora unificada cuenta con 85 telecentros y les 18 aules d’informática y 25 aules mentor o de formación a distancia de los CEPAS.

Xixón acueye los díes 21, 22 y 23 d’ochobre la celebración de Visiónica 0.4, una cita coles últimes tendencies de la creación artística na cultura contemporánea. Ente les actividaes programaes hai un ciclu de conferencies , actuaciones en directu de Djs, entrambes esposiciones de diseñu gráficu y d’obxetos robóticos, montaxes tecnolóxicos y una amuesa de paisaxes dixitales. L’Antigu Institutu, el salón del Monte de Piedá, el Muséu Barjola y la sala Astragal son los escenarios d’esti alcuentru cola creación artística más actual.

Visionica 0.4 ye’l primer eventu dedicáu al arte y a la cultura avanzada qu’entama Kinetik, un colectivu surdíu a finales de 2003 col obxetivu de difundir les nueves tendencies de la cultura contemporánea. Nel alcuentru, organizáu en colaboración cola Obra social y cultural de Cajastur, va haber una serie de conferencies nes que participen Pedro Jiménez, José Cervera y Sergi Sánchez; una amuesa de diseñu gráficu con representación de Vasava Artworks, Xnographics, Gee.Oh.Dee, Ipsum Planet, Majid Abassi, Reza Abedini, Kostas Stratigos, Pablo Nanclares y Jorge Lorenzo; una esposición d’obxetos robóticos y montaxes tecnolóxicos con obres de Cuco Suárez, Oscar Gómez y David Cabellos, y Íñigo Bilabao; y una esposición de paisaxes dixitales de Ben Sheppe, Patrick Ehrlund, Sixis Motiongraphics, Rob LOren, Jesse Braun y Roberto Tuñón.

El programa de proyecciones cuenta con dellos cortos, pieces esperimentales y creaciones dixitales de Tampere School of Art and Media, Actop, Especial Zemos 98_6, Solu, Eduardo Acosta, Ben Sheppe, Patrick Ehrlund y Sixis Motiongraphics. A lo llargo de les proyecciones van desenvolvese actuaciones en directu de los djs Muerto+Íñigo Bilbao, Tommy Vicananza, Eulogio+Rob Loren y Eduardo Acosta.

La viceconseyería de Presupuestos y Administración Pública del Gobiernu’l Principáu en collaboración col Ministeriu d’Industria van poner en marcha una campaña pa esparder l’usu d’Internet ente la población qu’inda nun ta conectada a la rede. La campaña va percorrer mediu cientu de llugares d’Asturies dando a conocer les posibilidaes y servicios qu’ufierta Internet al través de dos aules móviles.

Según los datos que remana’l Ministeriu d’Industria, Asturies y el restu l’estáu, tán venti puntos per embaxo la media europea nel usu de la rede mientres l’emplegu de la telefonía móvil asítianos ente los primeros puestos del ránking comunitariu, ente’l cuartu y el quintu sitiu. Col oxetivu de superar esta situación y esparder ente los ciudadanos la necesidá d’avezase al manexu de los recursos y servicios qu’ofrez la rede, el Ministeriu d’Industria y el Principáu van desenvolver dende esti mes hasta xineru de 2006 una campaña de divulgación per toa Asturies. Según afirmó Aquilino Antuña, coordinador de la campaña,”los asturianos nun pueden tar fuera de la rede por más tiempu”. Pal director de ‘Toos n’Internet’, l’accesu a la rede ye “dalgo necesario pa les persones a fin de poder entrar na sociedá de la información”. La campaña, señaló Antuña, va empobinada a dar a conocer l’usu d’Internet “a los colectivos que tienen accesu más difícil, como les persones de les zones rurales, les ames de casa, los vieyos, los inmigrantes o el colectivu de discapacitaos”.

El proyectu puestu en marcha pol ministeriu d’Industria y abellugáu n’Asturies pol gobiernu del Principaú va llevar per cincuenta llugares de la xeografía asturiana dos autobuses con entrambes aules itinerantes dotaes d’ordenadores, una fixa y otra móvil. La fixa a tar istalada una selmana en distintes deches nos conceyos d’Uviéu, Mieres, Llangréu, La Pola Siero, Castrillón, Avilés y Xixón. Pel so llau, l’aula móvil va visitar en xornaes diaries los conceyos d’Uviéu, Llanera, Grao, Salas, Tinéu, Cangas, Castrillón, A Veiga, Tapia, Coaña, Valdés, Pravia, Cuideiru, Sotu’l Barcu, Corvera, Avilés, Gozón, Carreñu, Xixón, Villaviciosa, Ribesella y Llanes.

Asturnews da un pasu alantre na innovación tecnolóxica de la información. El diariu cultural ta acabante d’activar un serviciu gratuitu y pioneru n’Asturies pa incorporar, de forma automática, los principales titulares de l’actualidá cultural asturiana a cualquier páxina web cuyu responsable lo deseye.

Emplegando’l sistema denomináu RSS, Asturnews permíte-yos a los sos llectores ‘chupar’ los principales titulares que figuren na portada’l diariu y amosalos de forma permanente -col formatu yá preestablecíu- nel llugar de la páxina web que l’alministrador d’esa páxina considere más afayadizu. Los titulares van actualizándose automáticamente.

Amás, los usuarios del innovador serviciu tienen una segunda posibilidá: Sindicar directamente tolos datos y camudar el formatu’l serviciu de noticies como-yos pete, o lo que ye lo mesmo, ‘baxar’ la información completa correspondiente a cada titular -fecha, autor, resume y comentarios de la noticia- pa depués formatear esa información al gustu propiu.

Cola puesta en marcha d’esti serviciu, Asturnews quier afondar na so intención declarada d’afitar l’espardimientu y normalización de la llingua asturiana nel ámbitu de la comunicación periodística y proporcionar una información cada vez más cercana al llector de l’actualidá cultural d’Asturies.

Más velocidá pol mesmu preciu. La operadora de telecomunicaciones asturiana Telecable aplicará a partir de la selmana qu’entra una meyora nos sos servicios de conexón a internet que va duplicar el caudal nel serviciu de velocidá nominal máxima 320/160 kilobits por segundu y que nun va suponer aumentu dalu na cuota mensual que paguen los usuarios.

Asina, esa mayor rapidez pa consultar internet notaráse especialmente nel serviciu qu’agora establez como velocidaes máximes contrataes los 160 kilobits por segundu al pedir información a la rede y 320 pa recibir esa información: Los veceros que cuenten con esti serviciu podrán movese a partir d’agostu a 320 kilobits por segundu al cursar peticiones a la rede -por exemplu, teclear la dirección d’una páxina web na barra de direcciones- y algamarán los 640 kilobits nel procesu recíprocu, la carga d’esa páxina.

Amás d’esa meyora, Telecable anuncia l’aumentu de les actuales conexones de 640 hasta 1 megabit, y una xubida de les de 128 kilobits por segundu hasta los 160, una meyora xeneralizada que, según destaca la operadora nuna nota de prensa, produzse tres meses depués de que Telecable meyorara nun 25 por cientu les sos conexones a internet.

El cambiu previstu p’agostu, informa la compañía de comunicaciones, nun va requerir nenguna actuación por parte l’usuariu, yá que la compañía activará la meyora de mou remotu.

La noticia vien recoyéndose a lo llargo de la fin de selmana en cásique tolos foros teunolóxicos que-y presten atención a la conectividá n’españa. Ún de los foros davezu más críticos cola actividá de les operadores, elotrolado.net, afalagaba l’anuncia de Telecable y dexaba a les clares la importancia de la midía adoptada pol operador de cable asturianu, que se separta abondo d’otres operadores como Supercable o la vecina Retecal, de Lleón, ameyorando enforma’l serviciu d’Internet na so granible ufierta.

La única operadora que sigue darréu los pasos de Telecable ye pol momentu Euskaltel, sigún anuncia’l portal Banda Ancha, la operadora vasca que namái ufierta los sos servicios n’Euskadi y qu’ufierta pasar a tolos sos usuarios de 300/300 a 1024/600, un Mega de baxada y 600 Kbits de baxada.
Portal del operador asturianu Telecable

Nun momentu en que taba xorreciendo l’emplegu de Mozilla en llugar del Internet Explorer, que perdió nel caberu mes un ún por cientu de cuota de mercáu, un bug -fallu de seguridá- afectaba al Navegador Mozilla pa Windows, polo que ye recomendable que los usuarios qu’empleguen esti navegador de software llibre, qu’inclúi una versión n’asturianu, igüen esa versión o s’actualicen a otra más reciente.

Dende’l 7 de xunetu, una vulnerabilidá de la seguridá qu’afectaba los navegadores Mozilla pal sistema operativu de Windows foi divulgada a mozilla.org por Keith McCanless. Nel mesmu día, l’equipu de seguridá de Mozilla confirmó l’informe qu’afectaba al emplegu de los navegadores de códigu abiertu y usu gratuitu Mozilla, Firefox, y Thunderbird y desendolcó la igua pal problema. El bug descubiertu afecta namái qu’a la versión de Mozilla pal sistema operativu de Microsoft Windows y nun cinca a los usuarios de Linux o de Macintosh, polo que namái tien peligru pa los qu’empleguen dalguna de les versiones de Windows, de la 9x a la reciente XP.

Los usuarios de Mozilla, Firefox y Thunderbird puen instalar el parche de seguridá descargándolu de la rede y faciendo click nel botón que diz “Install Now”. Darréu nun ye preciso namái que reiniciar l’ordenador y comprobar que l’actualización se fizo correutamente, teniendo en cuenta qu’esi procesu pue nun conservar l’idioma orixinal nel que cada usuariu tien personalizáu el navegador, incluyíu l’asturianu. Los pasos a siguir descríbense perdafechu na dirección http://mozilla.org/security/shell.html

Alternativu a otros navegadores como’l que proporciona Microsoft, el Mozilla incorpora un llector de corréu ellectrónicu y de noticies basáu nel motor Gecko, el mesmu qu’emplega el navegador de Macintosh, y ufierta avances talos como una mayor seguridá énte posibles fallos, bloquéu de ventanes qu’apaecen automáticamente en pantalla y una gran proyección de futuru, gracies en gran parte a la so independencia respecto a la evolución d’empreses determinaes y a l’andecha con que ye desendolcáu por parte de voluntarios con conocimientos d’informática.

La versión disponible de Mozilla n’asturianu, que pue descargase gratis, ye la 1.4, cuando nel restu d’idiomes la versión yá aportó a la 1.7.1, razón pola cuala ye perimportante que se faiga l’actualización si se ta emplegando davezu como navegador la versión n’asturianu.

Ente les ventayes que sorrayen los partidarios del usu’l códigu abiertu tán la posibilidá de que cualquier persona puea intervenir p’ameyorar el navegador y que queda abierta la puerta a posibles revisiones del códigu, fechu inviable n’otros navegadores comerciales y que permite atopar y pesllar ‘puertes traseres’ poles que los virus puen entrar nos equipos informáticos.

Esti mes súpose por mediu del prestixosu mediu The Inquirer, que por primera vegada dende 1999 disminuyera l’usu del Internet Explorer, perdiendo un 1 por cientu’l mercáu nun solu mes. Munchos usuarios migraren a Mozilla y Mozilla Firefox por mor de los últimos problemes de seguridá del Explorer. Poro, l’usu del Internet Explorer asítiase al rodiu’l 95 por cientu, con un 4 por cientu pa Mozilla.

Acuta-y un llugar “punteru” a Asturies na era del conocimientu y les nueves tecnoloxíes de la información. Esi ye l’envís central del documentu ‘e-Asturias 2007’, que planifica hasta esa fecha el desendolcu de la sociedá de la información nel Principáu a partir de 90 proyectos concretos y cuyu borrador final presentóse esti mediudía en Xixón, nel enfotu de que’l testu definitivu tea llistu na seronda.

Nun actu públicu cellebráu nel Parque Científicu y Tecnolóxicu, el presidente de la Fundación Centru Tecnolóxicu de la Información y la Comunicación (CTIC), Roberto Paraja, entregó-y al conseyeru d’Economía, Jaime Rabanal, un estensu testu “qu’agora tien que ser dixeríu y asimiláu” y cuyu espíritu resúmese nuna frase: “Una propuesta abierta pa responder a cambios estructurales nesta nueva era na qu’importen les infoestructures”.

Pa llevar a la práctica esa definición, el documentu qu’organiza y concreta les acciones del Principáu en tecnoloxíes de la información hasta’l fin del presente mandatu autonómicu, en 2007, pretende espardir l’usu de la banda ancha, incorporar dafechu internet a les empreses tradicionales, mirar por que Asturies nun quede atrasada n’aplicación de nueves tecnoloxíes y, mui especialmente, aumentar los servicios públicos a los que’l ciudadanu pue acceder vía web.

De fechu, de los 90 proyectos que plantega’l documentu avanzáu güei, más de la mitá (50) tán pensaos p’averar l’Alministración a los asturianos, daqué no qu’insistió Jaime Rabanal, pa quien les nueves teconoloxíes de la información resulten claves na meyora de la productividá.

Usu d’internet

Y según Rabanal, na carrera qu’agora entama, Asturies ocupa una bona posición de salida qu’ha aprovechar pa nun perder el tren del avance tecnolóxicu. Amuesa d’ello, destacó’l conseyeru d’Economía, ye que l’accesu particular a internet triplicóse n’Asturies nos últimos cinco años -agora supón un 25,6 por cientu-, que casi’l 93 por cientu de les empreses con más de diez trabayadores usen la rede con asiduidá -mui penriba de la media estatal, que ye del 81 por cientu- y que los internautes asturianos son los que más acceden a internet por banda ancha, más d’un 55 por cientu sobro una media estatal del 34 por cientu.

Nesti sen, Rabanal recordó que’l Conseyu de Gobiernu tien previsto aprobar na so xuntanza de mañana el pliegu de condiciones pa llevar la banda ancha a les cuenques mineres, qu’habría tar disponible na seronda de 2005.

El documentu ‘e-Asturias 2007’, en cuya presentación participaron tamién el director de la Fundación CTIC, Pablo Priesca, y el viceconseyeru d’Alministraciones Públiques, Luis Iturrioz, sedrá revisáu agora por un grupu d’espertos ente los que figuren los directivos de telefonía móvil Luis Lada y Belarmino García, y los profesores rellacionaos cola estaya de la Comunicación Bernardo Díaz-Nosty y Emilio Fernández Peña. Según la previsión de Rabanal, el testu definitivu presentaráse a primeros de 2005.

Web oficial de la Fundación CTIC

Portada clara y esquemática, poca información útil pal ciudadanu y abonda imaxen alministrativa. Esi ye’l diagnósticu que la publicación ‘Ciberpaís’ fai de la páxina web del Principáu, dientro d’una estadística na que’l serviciu on-line de l’Alministración asturiana allúgase’l primeru según un baremu de diez criterios.

D’ellos, cuatro son oxetivos: Pa midir la calidá de les páxines web de les comunidaes autónomes, l’estudiu valoró l’accesibilidá, la velocidá de descarga, los errores de validación de llinguaxe html y l’atención al usuariu, conceptu esti caberu que se cuantificó unviando un mail dende una dirección particular pa consultar l’usu del escudu y bandera institucionales pa un negociu de productos del país. Nel casu d’Asturies, la rempuesta llegó al remitente en dos díes.

Otros criterios de valoración de la estadística, que-y otorga a la web del Principáu la puntuación más alta -84,6 puntos-, cinquen al diseñu de la páxina y ponen atención en cuestiones como la presencia d’un buscador, de teléfonos d’emerxencia y del Boletín Oficial en portada (la web asturiana ‘princast.es’ inclúi esos tres aspectos), o la resolución de pantalla.

L’informe de ‘Ciberpaís’, suplementu especializáu n’internet del diariu El País, completa la so evaluación de la web del Principáu d’Asturies con una crítica a la falta d’otros idiomas alternativos al castellán na páxina, mesmo qu’ocurre colos otros dos servicios on-line que figuren en cabeza de la estadística, les páxines n’internet de les comunidaes d’Estremadura y Andalucía.

Recorte en papel del estudiu, en formatu pdf

Dos vegaes al añu. Esa ye la frecuencia que l’Academia de la Llingua Asturiana se marca a sigo mesma p’actualizar l’Iguador, el primer corrector informáticu pa llingua asturiana que la institución llanció el pasáu mes de xineru en comuña cola empresa Araz y qu’agora quier arriquecer coles suxerencies de los usuarios.

A puntu de cumplir seis meses nel mercáu, l’Academia acumula más d’una decena d’indicaciones sobro’l preséu informáticu recoyíes nel apartáu específicu que la institución llingüística dedica na so web al Iguador, nel qu’invita a los usuarios a formular consultes, comentarios y suxerencies al rodiu’l corrector, o bien a comunicar eventuales errores detectaos nél.

Por internet pasará precisamente cada procesu d’actualización del Iguador, yá que l’Academia de la Llingua plantégase facer les dos meyores añales previstes incluyendo nueves entraes na base de datos del instrumentu -qu’agora inclúi más de cuatro millones de pallabres- pa que los veceros descarguen gratis esa actualización vía web.

Con más de 50.000 entraes, que se correspuenden coles del diccionariu normativu de L’Academia, 6.000 verbos conxugaos y 300 normes ortográfiques, el primer iguador informáticu de llingua asturiana viéndese a un preciu de 6 euros y corrixe les faltes ortográfiques y léxiques más comunes na escritura, amás d’iguar les pertitentes errates.

Na parte técnica, el preséu informáticu funciona baxo plataforma PC col procesador de testos más común, el Word de Microsoft, y ye compatible colos sistemes operativos Windows 98, XP y 2.000 y coles versiones de Word 97, 2.000 y XP.