Tecnoloxía

Les actividaes van tener llugar na Galería “El Arte de lo imposible”, onde van entamar, esti vienres, a les 19:00 hores cola presentación de La Videoteca de Xixón, y va proyectase la compilación de la obra del ceador suecu Anders Weberg que se va poner a la venta nuna edición llindada.

Darréu los actos van siguir nel Centru de Cultura Vieyu Institutu de Xixón, onde van facese Proyecciones de Vidioarte, y directos musicales, al cargu de Xelar y Overbit, con horariu de 20:45h a 23:30h. La entrada ye llibre y gratuita.

Más información sobre los actos

El Conseyu de la Mocedá de Xixón (CMX) pon a disposición de la xente mozo una sala de navegación per Interné a la que se pue dir llibremente de llunes a vienres de 10 a 14.45 hores y de 17 a 20.45 hores. El Conseyu de Mocedá de Xixón ta asitiáu na Avenida Manuel Llaneza númber 68, baxu. Más información nel teléfonu 985 155 072.

El Bloque por Asturies prefier el software llibre, pero mientres l’alministración asturiana use productos de Microsoft, esixen a esta empresa y al Gobiernu d’Asturies, que los sos productos incluyan l’usu del asturianu, como yá lo faen pal gallegu, catalán y vascu.

Recuerden que’l Gobiernu d’Asturies gasta “millones d’euros nos productos de Microsoft” y piden que se pongan en contactu colos responsables de la multinacional “pa que los asturianos tengan los mesmos derechos que los falantes de les demás llingues del Estáu español cuando se sienten delantre d’un ordenador”.

La emrpesa, según informen dende’l Bloque, comentó que “Naide del Gobiernu asturianu se punxo en contactu cola empresa. Tamos dispuestos a sentanos y falar del tema pa que l’asturianu pueda ser como cualquier otru idioma”, polo que paez que les torgues vienen namás del Gobiernu.

L’Asociación de Software Libre de la Escuela d’Inxeniería Informática d’Uviéu (E.I.I.), organiza xunto coles organizaciones Ubuntu-ast, Asturlinux, y Softastur, la “Linux Install Party”. Los interesaos n’instalar o conocer qué ye Ubuntu o otra distro GNU/Linux, pueden averase a la Escuela d’Inxeniería Informática d’Uviéu, el vienres 12 de payares, de 15:00 a 18:00 ó de 18:00 a 21:00, col so ordenador.

La iniciativa ye dafechu de baldre, cuntando col sofitu técnicu de les persones que collaboren nes cuatro asociaciones.

El segundu día de comunicaciones de les Xornaes Internacionales d’Estudiu, qu’organiza l’Academia de la Llingua Asturiana nel Campus d’Humanidaes, va tener por centru los estudios filolóxicos y el futuru del asturianu. A les 16:30 abre la xornada Xosé Lluis García Arias con un trabayu sobre les terminaciones asturianes en -uga, -úa. Darréu Xabiel Fernández García va comentar “Los llugares de pasu. Una aproximación antrópica cola toponimia”.

A les cinco la tarde Ángel Fernández Barredo y José Antonio Longo Marina van facer un averamientu hestóricu a la parroquia de Carda al traviés de la toponimia. Pela so parte, Cristina García Sampedro va falar na so comunicación sobre l’estudiu codicolóxicu d’El Libro del Prior. Celebrándose darréu un alderique sobres les cuestiones trataes.

A les seis y cuartu, dempués de la posa, Pablo Suárez García echa la so comunicación “Asturianu 2.0: l’asturianu énte la dómina dixital”, siguíu por Rubén Fernández Martínez con un estudiu sobres torgues y propuestes nel usu de la terminoloxía matemática na llingua asturiana. La xornada van pesllala María del Mar Martín Martín, cuntando la esperiencia de la Biblioteca virtual Mª Josefa Canellada: Lliteratura infantil y xuvenil (www.canellada.com); y Marta Mori d’Arriba que va estudiar na so intervención “La traducción nel sistema lliterariu asturianu”.

La biblioteca universitaria abrió estos díes páxina web nueva. Dientro del portal “nel que s’intentó modernizar y meyorar les prestaciones incorporando ferramientes y utilidaes nueves” atópense espacios pa la consulta en llinia, la busca de bibliografía y otres cuestiones, como un archivu dixital con más de 70.000 llibros en llinia.

Páxina web de la BUO

L’eventu, entamáu pola Fundación Cibervoluntarios, va celebrase los díes 20 y 21 de setiembre na Casa Cultura del Conceyu de Grau. La entrada ye gratuita y l’oxetivu final ye sensibilizar sobre les ventayes que supón tener anchu de banda na llocalidá y amosar les posibilidaes qu’ufierta l’usu de les Nueves Tecnoloxíes.

Grau va ser estos díes exemplu de vanguardia y tecnoloxía pa los ciudadanos de la zona gracies a Cibermix, que cunta col sofitu de Ministeriu d’Industria, Turismu y Comerciu, dientro del Plan Avanza y la collaboración de Telefónica y el Conceyu de Grau.

La celebración de Cibermix va ser la oportunidá por que los vecinos de Grau, con independencia de la so edá o formación, comprueben de primera mano la utilidá de la rede al traviés de distintes actividaes amenes y participatives.

Cibervoluntarios van poner a los ciudadanos talleres d’iniciación a Internet ayudando a afayar les posibilidaes de la tecnoloxía aplicada a la busca d’empléu, el comerciu lletrónicu, les redes sociales, los blogues o l’Alministración Lletrónica.

D’esta miente, los talleres van convivir coles zona llibre, la área d’ociu en familia o l’apartáu de videoxuegos n’horariu de 10:00 a 14.00 hores y de 17.00 a 20.00 hores.

Mozilla acaba d’espublizar el restolador web Firefox n’asturianu. La versión 3.6.9 yá ta disponible de baldre pa cualesquier sistema operativu dende la páxina web oficial http://mozilla.com/ast.

Mozilla ye una organización ensin ánimu de llucru que foi una revolución al promover l’apertura, la innovación y la oportunidá na Web. El so proyeutu más relevante ye Firefox, famosu por ser software llibre, cenciellu, rápidu, seguru, el más usáu n’Europa y qu’acumula más de mil millones de descargues en más de 70 llingües en tol mundu.

Na so versión n’asturianu, Firefox inclúi preinstalaos los motores de gueta pal diccionariu de l’Academia de la Llingua Asturiana, la Uiquipedia asturiana, Ebay, Yahoo y Google. La torna ya implementación d’esos motores ye un trabayu fechu por Softastur pa Mozilla, durante más d’un añu.

El conceyu portugués de Miranda del Douro, onde l’asturianu ye llingua oficial embaxo’l nome llocal de mirandés, va acoyer una sesión más de les “Cumbersas an Mirandés”, inxerto dientro del III Alcuentru de blogueros mirandeses. Nesti alcuentru va falase, cola presencia de decenes d’estudiosos de la llingua asturiana de la fastera, de les nueves tecnoloxíes y la presencia del mirandés na era dixital.

Profesores y investigadores lligaos al Grupu d’Investigación Seminariu de Filoloxía Asturiana, de la Universidá d’Uviéu, van participar nel IX Congresu Internacional de Llingüística Xeneral, que se va celebrar na Universidá de Valladolid del 21 al 23 de xunu. Nesi àmbitu ye onde Fernando Álvarez-Balbuena García, Ramón de Andrés Díaz, Xosé Miguel Suárez Fernández y María Cueto Fernández van intervenir col tema «La horiometría o dialectometría de frontera».

Esta intervención relaciónase col proyectu d’investigación ETLEN, sigles d’«Estudiu de la Transición Llingüística na Zona Eo-Navia, Asturies», que lleva a cabu un equipu interdisciplinar de filólogos y informáticos de la Universidá d’Uviéu, y que busca facer una aportación sustancial “a la conocencia de la frontera ente los dominios llingüísticos gallego-portugués y asturlleonés nes zones más occidentales d’Asturies y limítrofes de Galicia”.

Los mentaos investigadores van presentar en primicia’l novedosu programa informáticu CartoDial (Cartografía Dialectal), creáu pol equipu del ETLEN. Esti programa ye capaz de xenerar automáticamente ―gracies a la enorme cantidá de datos llingüísticos del proyectu― dos tipos de mapes: mapes dialectográficos de la zona d’estudiu, nuna cantidá superior a dos mil; y, como aportación esclusivamente orixinal, más de quinientos mapes horiométricos, esto ye, mapes que muestren la configuración llingüístico-estadística de les diverses fales de la zona Eo-Navia, tipificaes según la proporción de trazos gallego-portugueses, asturlleoneses y específicamente eonaviegos. Mostraráse un adelantu de lo que nun futuru próximu va ser l’Atles de la Transición Llingüística na Zona Eo-Navia, que será dialectográficu, horiométricu y dialectométricu.

El programa CartoDial, nacíu d’una investigación fecha na Universidá d’Uviéu, aspira a convertise nuna ferramienta amañosa pal estudiu horiométricu d’otres conocíes fronteres llingüístiques de la Península Ibérica y d’otres zones d’Europa.

Tamién se mostrarán datos matemático-estadísticos de la zona Eo-Navia procesaos d’acordies col programa informáticu VDM (VisualDialectometry), concebíu, desarrolláu y adaptáu al proyectu ETLEN según los principios de la dialectometría, pol equipu del profesor Hans Goebl, de la Universidá de Salzburgo (Austria).