Plástiques

La pintora Elena Rato, nacida n’Uvieu en 1979 y afincada en Noreña, inaugura güei una amuesa de la so obra nel espaciu xixones d’arte Mediadvanced (C/Ezcurdia, 8). L’actu d’entamu de la esposición ye a les 19:30 hores na propia galería y la obra va poder vese hasta’l prósimu 17 d’avientu. Fragmentos de lienzu pintao cosíos a teles, colores vibrantes y aprovechamientu d’imáxenes de desechu son delles pautes a tener en cuenta na obra d’Elena Rato.

El fotógrafu bilbaíno Ricky Dávila Wood va dar una charla nos Alcuentros fotográficos Xixón 2007 a les 20:00 hores nel centru municipal integráu de La Arena. Dávila, que trabaya anguaño como fotógrafu freelance fuí fotógrafu de plantilla nel diariu El Sol, y na Agencia Cover. Cunta con ballura de reconocimientos como’l premiu Fotogranprix del 93 , el II Premiu de reportaxe de World Press Photo del 94 o el Fotopres 95 poles sos semeyes d’Irlanda.

Ricky Dávila ye conocíu por participar n’amueses nacionales ya internacionales como’l primer Festival Internacional de Fotografía PHotoEspaña, con un trabayu sobre fiestes relixoses; la de Fotografía española contemporánea na Alcobendas; o la del City Museum de Sheffield. Tamien tien espuesto nel Museu Nacional Centru d’Arte Reina Sofía, na Bienal de Venecia y nel Metropolitan Museum of Manila, en Filipines.

Esti llunes 19 de payares entama una amuesa de semeyes de la forógrafa ovetense Mercedes Blanco sobre la situación de la infancia en Colombia. La colección titúlase “El Niño de la Calle”, y podrá vese del Centru Municipal Integráu de El Coto hasta’l prósimu 6 d’avientu. Toles semeyes tan cedíes pola Obra Social y Cultural de Cajastur.

L’amuesa ta formada por una serie d’imáxenes feches pola artista ovetense na ciudá de Bucaramanga y la temática de les mesmes xira alredor de los neños colombianos que viven en condiciones d’estrama pobreza nuna cai onde viven y trabayen dende bien pequeños. Drogadicción, violencia, pandilles son dalgunos de los temes que se van poder ver nes semeyes de Mercedes Blanco.

Mercedes Blanco ta formada nla Escuela d’Arte d’Uvieu, nel International Center of Photography y Visual Arts of Desing de Nueva York y na École Nationale de la Photographie de Arles. Fuí ayudante del fotógrafu Alan Kaplan como profesora en Nueva York xunto a Richard Sandler.

La sala d’esposiciones del Ateneu de La Calzada recueye estos díes una esbilla de semeyes del barriu de La Calzada de Xixón. Embaxo’l títulu “El Callejón de La Calzada”la esposición fai un repasu en semeyes de a historia del popular grupu de viviendes de Gijón Fabril. La amuesa va tar disponible pa la visita hasta’l sábado, 15 d’avientu de nueve da la mañana a diez de la nueche.

Nel barriu de La Calzada taben les cases que les industries fuertes de la ciudá xixonesa habilitaben pa los sos trabayadores. Empreses como Gijón Fábril, La Algodonera y La Sombrerera ente otres ficieron cases nesta zona de la ciudá. Nestes viviendes de mala calidá y pequeñes la xente desenrrolló un fuerte sentimientu de pertenencia y de solidaridá.

Miguel Rojo Borbolla, fotografu asturianu natural del conceyu de Cabrales, espón estos díes una amuesa de la so producción fotográfica nel Museu del Pueblu d’Asturies. Embaxo’l nome “Fotografías de la vida campesina. Puertas de Cabrales, 1904-1913”, el fotógrafu recueye en 80 semeyes la vida de los llabradores y vecinos del pueblu natal del artista, Puertas de Cabrales, nes primeres decades del sieglu XX.

D’un interes escepcional pola calidá de les semeyes y lo poco documentao que ta esi tiempu de la historia d’asturies nel ámbitu rural, el trabayu de Rojo Borbolla cobra una importancia clave como documentu históricu. L’amuesa pue visitase nel Museu del Pueblu d’Asturies de Xixón hasta’l 15 de mayu.

La galería ovetense d’arte Vertice ta participando dende’l miercoles 7 de payares y hasta güei llunes 12 n’Artelisboa 2007: setima edición d’esta feria d’arte contemporáneu con esbilla de la que va ser la so propuesta artística pa la prósima temporada. Vertice ufre nel stand A36 del Parque de les Naciones, llugar decellebración del eventu, obres de Jordi Alcaraz, Julián Aragoneses, Agustín Bayón, Soledad Córdoba, Kely, Lisardo. Rui Macedo, Marrodán, Matarranz, Millares y Max Neumann.

Con trabayos que van del debuxu y la fotografía a les pintures, escultures y grabaos Vertice quier amosar en Lisboa obres diverses pa mostrar el so sofitu a los artistes asturianos de mayor proyección y a dellos artistes nacionales e internacionales.

Cola amuesa “Bodegones y plantas” de la fotografa Pilar Pequeño entama esta edición, la cuarta ya, de los Alcuentros Fotográficos de Xixón, que van traer a la villa xixonesa un ciclu de conferencies de profesionalescomo Ricky Dávila o Jose Manuel Navia alredor del mundiu de la fotografía nel Centru Municipal de La Arena. La esposición de Pilar Pequeño va tar disponible hasta’l 28 d’avientu.

Amás d’esta amuesa y de les propies conferencies el programa incluí un taller de creación artística que se va desendolcar dende’l 15 al 18 de payares embaxo’l títulu “Tres de la cámara: hacia un proyectu personal”. Justo Vilabrille, Conceyel de Cultura del Ayuntamientu de Xixón fui l’encargáu de dar a conocer a los medios el programa d’actos de los alcuentros.

L’artista mallorquín Fernando Rojo ta esponiendo dende’l pasáu 1 de payares una amuesa de la so obra más reciente nel Auditoriu Príncipe Felipe d’Uvieu. La esposición, que va tar visible hasta´l llunes 12 de payares, propón un repasu a la producción pictórica del mallorquín, asemeyada a la de Miquel Barceló, que destaca pol usu d’una gran intensidá cromática. L’amuesa ta disponible al públicu n’horariu de 10.00 a 14.00 hores y de 16.00 a 20.00 hores

Una esbilla de la obra de l’artista Luis Suárez Lanzas pue vese na Galería Dasto d’Uvieu (C/San Vicente) hasta’l prósimu día 1 d’avientu. L’amuesa que’entamó el pasáu martes 31 d’ochobre recueye la última producción d’esti artista avilesín, marcada pol tratamientu dixital que fai d’imáxenes sobre arquitectura urbana.

L’artista entamó a usar les tecniques dixitales va siete años y dende entos afonda n’esta tecnica de trabayu. L’amuesa ta formada por 13 obres d’impresión dixital y dos escultures y ta disponible de martes a sábadu n’horariu de 17:30 a 21:00 hores.

El fotógrafu Enrique Granell espón dende’l pasáu miercoles 31 d’ochobre un amuesa de semeyes sobre Praga embaxo’l nome “Praga en la voz de Holan”. La colección, que quedá inaugurada na cátedra Xovellanos d’Estensión Universitaria, recueye nuna veintena de retratos en blancu y negru l’aspectu y evolución de la ciudá nos últimos seis años. A la inauguración de la esibición asistieron el propiu autor y del rector de la Universidá d’Uvieu, Juan Vázquez.

L’amuesa, que va poder visitase hasta’l hasta el 19 d’avientu, na nueva sede de la cátedra na cai Tomás y Valiente de Xixón, ya recorrió dellos escenarios como l’Institutu Cervantes y la propia ciudá de Praga. L’horario de visites ye de 10.00 a 20.30 hores.