Plástiques

La Oficina Municipal de Participación Ciudadana del Conceyu d’Avilés entama un concursu de grafittis embaxo’l lema “¿Cómo vives la to ciudá?”. Nel concursu van poder participar mozos o grupos de xóvenes hasta los 35 años y el plazu de presentación termina’l día 9 de mayu.

L’oxetu del concursu ye la realización d’un grafitti nel Centru de Servicios Municipales El Foco, asitiáu na cai Santa Apolonia, 126.

La técnica del graffiti va ser llibre. El bocetu habrá de tener en cuenta que la dimensión de la parede onde se va pintar el graffiti ye de 3X3 metros aproximadamente.

Bases completes del concursu

La LlaBoral Centru d’Arte y Creación Industrial va celebrar unes xornaes de puertes abiertes los díes 18, 19 y 20 d’abril. Les xornaes celébrense por mor del primer aniversariu del centru d’arte contemporaneu. La hora d’entrada de baldre va ser ente les 12 y les 20 hores de los trés díes.

Esta iniciativa va celebrase conxuntamente cola Ciudá de la Cultura, de la que forma parte’l Centru. En marzu de 2007 l’antigua Universidá Llaboral de Xixón abrió tamién les puertes dempués de más de dos años d’obres, que güei tovía siguen en delles zones, como los xardinos, qu’entamaron a remodelase nes últimes selmanes.

Unes 5.000 persones tienen na Ciudá de la Cultura’l so llugar de trabayu o estudiu diariu y munches son les que n’estos meses s’averaron al edificiu pa conocer el so interior.

El Centru d’Arte de la Llaboral celebró, según anuncia nuna nota la institución, un total d’11 esposiciones nos ámbitos del arte tecnolóxicu y de la creación industrial, amás de numberosos talleres de creación.

La galería d’arte Gema Llamazares de Xixón, asitiada na cai L’Institutu 23, va acoyer la inauguración de la esposición “Caminábamos en silencio” qu’axunta’l trabayu del matrimoniu d’artistes plásticos María Jesús Rodríguez y Hugo O’Donnell.

La esposición va tar abierta hasta’l 24 de mayu y va inaugurase güei a les 19 hores cola presencia de los artistes.

Coincidiendo colos cien años del nacimientu de Simone de Beauvoir, el Centru Cultural Antiguu Institutu de Xixón ta organizando una amuesa sobre la escritora, “No se nace mujer, una llega a serlo” ye’l nome d’una esposición compuesta por paneles, semeyes y testos, que va poder visitase nel centru xixones hasta’l prósimu 30 d’abril.

Ayeri, martes 8 d’abril, presentóse nel Muséu de Belles Artes d’Asturies la obra de Miguel Galano “Retrato de Manolín, el gitano”, pintada nel añu 2005 y depositada temporalmente por una colección particular d’Uviéu.

Miguel Galano ñació en Tapia en 1956 y recibió abondos eloxos por saber espeyar l’alma d’esti personaxe uviedín, en definitiva, l’alma del pueblu xitanu, con un retratu psicolóxicu que dexa ver una introspección fonda nel carácter del retratáu.

Esti nuevu retratu ye una primer amuesa de la obra d’esti autor nel Muséu de Belles Artes d’Asturies, pero’l 22 d’esti mes, va estrenase la esposición “Corotiana. Paisajes de Miguel Galano”, onde va facese un repás a parte de la so obra.

Na Casa de Cultura de Colunga pue vese dende va delles selmanes y hasta’l 15 d’abril una amuesa de semeyes feches por Javier Martínez, autor ñacíu en Bilbao en 1959. El bilbaín entamó la carrera profesional en 1986 nel diariu DEIA.y trés años dempués pasó al diariu Gaur Express, collaborando amás cola Axencia Cover. Nos años 90 trabaya pa los diarios El Sol Diario 16 y El Mundo, onde sigue trabayando anguaño con reportaxes de toa mena, sobre manera semeyes deportives, culturales y polítiques, estayes sobre les que tamién se divide la esposición de Colunga..

La esposición ta organizada pola Conseyería de Cultura y Turismu del Principáu d’Asturies.

El fotógrafu Ernesto Coro Morán ta esponiendo la so obra durante tol mes d’abril na Sala Borrón d’Uvieu dientro del programa d’esposiciones d’artistes plásticos mozos organizáu pol Institutu Asturianu de la Mocedá. L’horariu de visites de “Ver para escuchar” ye de llunes a vienres, de 11:30 a 14:30 y de 18:00 a 21:00; y los sábados, de 11:30 a 14:30.

Coro Morán axunta música y fotografía. Según l’artista: “Caún de los soníos qu’espontáneamente ñáz nes corrientes vibratories de la naturaleza o na vida urbana ye parte d’una música xeneralmente non percibida”.

Hasta’l 19 d’esti mesmu mes d’abril ta disponible na galería Vertice, na cai Marques de Santa Cruz d’Uvieu, una amuesa del trabayu de Carlos Suarez. “Paraisos artificiales” axunta les últimes propuestes del artista avilesín no que ye “vuelta de tuerca más na so iconografía del límite de la suxetividá”. Carlos Suárez tien participao nes feries internacionales d’arte ARCO (Madrid) y MACO (Máxico) y foi’l ganador del premiu Cajastur nel Certame Nacional d’Arte de L.luarca. Esta ye la primer esposición del artista en Vertice y la primera en cuatro años.

La esposición “Danibio” de la fotógrafa Inge Morath va tar disponible nel Centru de Cultura Antiguu Institutu de Xixón hasta’l domingu 6 d’abril. L’austriaca Inge Morath, famosa polos sos trabayos en publicaciones como Life, Paris Match, Vogue o l’axencia Magnun de la mano de Robert Capa, propón una suerte de llibru fotográficu en semeyes que recueye la hestoria cultural europea. L’amuesa ta organizada pol Ateneu Obreru y l’Ayuntamientu de Xixón.

L’Ayuntamientu de Grau y el departamentu d’Historia del Arte de la UNED van cellebrar el cursu “Tendencias del arte actual” del 28 al 30 de marzu na Casa de Cultura de la capital moscona. Nel mesmu vanb tener llugar conferencies col oxetivu caberu d’averase al arte d’anguaño dende una perspectiva analítica. Los estudiantes universitarios que se matriculen van recibir, si lu soliciten, un certificáu d’asistencia que van poder canxear por un creditu de llibre configuración.

Amás, con motivo del cursín, la casa de cultura de Grau va acoyer una amuesa del trabayu de los artistes asturianos Álvarez Cabrero y Fermín Santos. Tambien ta prevista la proyección d’un curtiumetraxe del propiu Cabrero pal mesmu día de la inauguración.