Mundu

El pasáu 9 d’abril nel Polu Norte xeográficu (90º llatitú Norte) y a una temperatura de – 32º C tuvo presente la petición de la oficialidá pa la lllingua asturiana, mediante un cartelu col llema “L’asturianu llingua oficial”. El deportista asturianu Fernando González foi quién quixo alcordase de reivindicar la oficialidá de la llingua asturiana en tan simbólicu llugar, aprovechando la so participación nel Maratón del Polu Norte, onde quedó nuna meritoria cuarta posición y tuvo a mui pocu de repetir victoria como ficiera nel Himalaya.

Dientro de los actos de la 32 Selmana de les Lletres Asturianes, n’homenaxe al escritor Manuel d’Andrés Fernández, Mánfer de la Llera (1918-2005) celébrase güei a les ocho la tarde na Casa la Cultura de Sama (Llangréu) un espectáculu dedicáu al autor de Les Cuestes. Habrá asturianada y monologuismu: conciertu n’alcordanza de Mánfer de la Llera; con José Manuel Reguero (El Maestru), Valentín Fuente, Juan Pablo Santos, Manolo Collado, Bibiana Sánchez y Carlos Ronderos.

Amás, a les 20 hores na Capiella de los Dolores de Grau fadráse un recital poéticu n’homenaxe a Mánfer de la Llera. Cola participación de los poetes Xuan Xosé Sánchez Vicente, Xuan Bello y Ana Vanessa Gutiérrez, en collaboración cola Fundación Aula de les Metáfores, de la que va inaugurase la Biblioteca Asturiana de Poesía.

Esti xueves 14 d’abril la Tertulia Enrique García Rendueles, organizada pola asociación N’ast y pol Atenéu Xuan María Acebal, va abrise cola intervención de la vicepresidenta de l’Asociación de Vecinos de Vega-La Camocha (Xixón), Sabel Tuñón, que va cuntar la so esperiencia nel movimientu vecinal nuna charra-alderique titulada “Movimientu vecinal, faciendo asturianismu dende los barrios”. Sedrá a les 8 la tarde, nel Llar L’Ayalga, nel 11 de la cai Prendes Pando de Xixón.

Sabel Tuñón vien participando del movimientu asturianista dende los años ochenta, tando n’asociaciones ciudadanes, culturales y polítiques, como Andecha Asturianista nos años ochenta o l’asociación El Garrapiellu anguaño. Ye autora de cuentos pa neños de 0 a 3 años y d’una guía sobre Andrés Solar y la parroquia de Deva.

Nel ámbitu políticu participó de la fundación del Partíu Asturianista y anguaño ye miembru de candidatura de la coalición Compromisu por Asturies (Bloque por Asturies-UNA) en Xixón.

Esti vienres viniente, 8 d’abril, de magar les ocho la tarde, Teatru Carbayín estrena la so obra última, “Alta suciedá”, una comedia ente l’humor y la intriga onde participen los actores Mª Emilia Rodríguez, Cecilia Teruel, Guillermo Suárez, Reyes Fernández, Nati Fernández y José Ramón Oliva. L’estrenu va facese nel Teatru Filarmónica d’Uviéu.

N’“Alta suciedᔠun matrimoniu n’apuros de perres va a casa de los caciques del pueblu a pidir un emprestu, pero estos aprovecharán pa restregar tola so riqueza pel focicu de los más necesitaos. Sicasí, hai munches coses ocultes que nun tardarán en salir a la lluz, enguedeyando la situación.

Los decoraos son d’Ángel Mario Ordiales y Nacho Villar, la sastrería de Conchina Montes, M.M. y M.T. Balmori, la peluquería de Mª Emilia Rodríguez, el soníu y l’allumáu son de Luis Angel Oliva, la voz na radio ye de Luis Angel Oliva, mientres que la música orixinal ta fecha ya interpretada por Luis Angel Oliva y José Ramón Oliva siendo director José Ramón Oliva.

La obra tien zarraes otres feches, el 28 d’abril la próxima, en La Pola Siero, el 6 de mayu en Mieres y el 9 n’Avilés, amás d’otres a partir de setiembre.

El pernomáu grupu Tricicle aporta al Teatru Xovellanos de Xixón con cinco funciones en trés díes de “Garrick”. Va ser ente los díes de 18 y 20 de marzu, con una obra basada na vida de David Garrick, un reconocíu actor inglés del sieglu XVIII tan estraordinariamente dotáu pa la comedia, que los médicos encamentaben les sos actuaciones como una especie de remediu máxicu, capaz de sanar cualesquier pena de l’alma. Con esa mesma filosofía entama Tricicle esti espectáculu, cuando lleven más de trenta años sobre los escenarios, faciendo rir ensin pallabres.

Tricicle ta formáu por Joan Gràcia, Carles Sans y Paco, y les funciones van tener llugar, el vienres 18 de marzu a les 20.30h, el sábadu 19 de marzu a les 18.30h y 21.30 hores, y el domingu 20, a les seis y les nueve la nueche.

La Entrevista de la Selmana avérase esta selmana hasta L.laciana, onde’l Club Xeitu trabaya pola cultura del llugar y pol pal.luezu, la variedá del asturianu del suroccidente asturlleonés. Dende Vil.lablinu atiéndenos Eduardo Carbajo Álvarez, que lleva los temes de llingua na asociación. Ye fíu d’Isabel Álvarez Álvarez, de la que tán acabante publicar la so obra n’asturianu y aprovechamos pa falar con él del futuru de la variedá pal.lueza y de les actividaes que desendolquen pa la so promoción. Reproducimos les respuestes de Carbajo na so variedá del asturianu.

-¿Cuándo surde la iniciativa del Club Xeitu y con qué fines?.

-El 19 de febreiru del 2009, cunstituyóuse’l Club Xeitu. Ía presidenta d’hunor la siñoura María Luisa Jorissen García, que yera ficha del inxenieru de minas Marcelo Jorissen Braecke, que foi direutor de la Minero Suderúrgica de Ponferrada, S.A. (minas de carbón) muitus anus. Tucóutse la vicepresidencia a Manuel Gancedo Fernández, autor del “Diccionario de Patsuezu, El Habla de Laciana”, publicáu pula primaveira, agotóuse yá. Tien secretariu, Víctor del Reguero Prieto ya outru vucal Juan Carlos Gómez-Barte.

Fíxuse’l Club pa recuperar ya difundir lus valores del Val.le de L.laciana , ya de la montaña ucidental Astur-L.liunesa en xeneral ya pa prutexer ya revalurizar la historia ya’l patrimoniu. Publícase un boletín al anu, gratis pa lus socius ya tamién véndese a l’outra xente.

¿Nestos dos años d’actividá llevaron alantre importantes iniciatives, publicaciones…?

-Nos dous anus pasaus, fixénunse varias cousas, varius l.librus , ya también cuncursus de Pal.luezu, en versu ya en prosa. Outra cousa ya un premiu de “L.lacianiegu del anu”, pa una persona que destacóu nu val.le.

-Unu de los temes que cuiden más ye’l de la promición de la variedá del asturlleonés de la so zona, el pal.luezu

Xeitu, tien muitu interés pulas cousas del Pal.luezu, ya urganizan, cumu dixe antias, cuncursus na l.lingua d’aiquí, ya la acuxida ía buena, peru lu que pasa ía que queda mui pouca xente que tenga cunucimientus d’el.la, ya cumu nun hai escritus, ía todu tradición ural, alcuntrámusnus cun un problema, que muitas veces, sigún quién escriba, failu duna maneira ya outru d’outra, ya entámase un guirigai que nun se sabe qu’ía.

Roberto González Quevedo, secretariu de l’Academia de la Llingua Asturiana, trata d’unificar criterios sobre la escritura, nun sé lo que conseguirá. You cunucí la sua madre, ya lu qu’escribía nun se parez muitu a lu que’l sou fichu quier faer agora. Nun sei, Nun sei. You tengu cun él unus buenus estaramaus cuandu escribimus pur exemplu “Tseite”, en castel.lanu “leche”. El quier cambiar la “TS” pur “L.L”, ya entos al.liamusnus, ya you nun tragu. La sua madre faíalu cun “TS”. Esta TS, ía la ch vaqueira, que prunúnciase cuna punta la l.lingua fitada nu velu del paladar, ya tien outru sunido diferente de la ch castel.lana.

-¿La so madre, Isabel Alvarez Alvarez (1910-2000) yera escritora nesta variedá y l’añu pasáu recoyeron la so obra nun volume?.

-La mía madre nun yera esritora, yera una mucher que tuviere una buena formación. Asistiu na sua xuventú al Culexu de Sierra y Pambley, Institución L.libre d’Enseñanza, en Vil.lablinu, ya siempres curservóu aquel.lus principius que-l.le infundienun nesa institución.

Pur outru l.lau, tuvu muita amistá, ya muita relación cun aquel.las xentes que falaban el pal.luezu, ya que L.laciana, d’aquetsa, yera un l.lugar aisláu, onde nun l.legaba la cultura cumu noutrus sitius mexor cumunicaus. Al.lá pul 1890, nun sei bien l’anu, escumenzóu Sierra y Pambley a enseñar muitu a la xente, ya cambióu todu. Tamién influiu que nel 1919, vienu la minería del carbón, ya entoncias, cambióu todu. Peru L.laciana tinía escuelas de primaria, cumu dizse agora, ya cumu la xente tinía qu’emigrar, presumián de que todus sabían l.leer ya escribir.

Descubrir, lu que se diz descubrir del pal.luezu, peme que nun hai nada. Cumu ya te dixe, ía tradición oral, ya cada quíen fai lu que puede, u lu que ricuerda, ya muitas veces, cuandu endilgas qu’en tal sitiu hai un home u una mucher que fala algu, vas a galpe a velu, ya a escuitar. L.luego hai que pasa-l.le un filtru a todu, primeiru de cumu lu prununcian, sigundu de cumu lu interpreta’l que lu oi, ya terceiru de cumu lu escribe, así qu’ía un poucu l.liousu.

-¿Qué vitalidá tien el pal.luezu?

-¡Chachu de l’alma! (rises). Vitalidá, lu que se diz vitalidá, cuasi m’atrevu a dicite que mui pouca. Úsanse pal.labras na conversación nurmal que son pal.luezas, peru muita xente nin lu sabe, peru mantener una conversación ía muitu difícil, nun queda cuasi nadie ya pa puder faelu. Nun siendo unus poucus que resistímunus a que desapareza estu, cuasi nun hai nadie.

-¿Faise dalgo dende les instituciones pal so caltenimientu?

-Uficialmente, poucu u cuasi nada, van cunsiguiénduse algunus cuartus pa faer cousas mui especiales, pero oficialmente poucu u nada.

-¿Qué otres actividades tienen pensaes pa la promoción del pal.luezu?

-Nós, pulu d’agora, faemus namás el cuncursu de pal.luezu, ya na revista El Mixto que se publica aiquí, tamién salen unas cousas na nuesa l.lingua, pero atópase unu cun muitas peñas nu sendeiru. La xente xoven nun-l.les interesa pa nada estu, dícennus qu’ía cousa de lus d’anantias, ya que nun val la pena perder tiempu cun esas “tuntadas”.

El nuesu amigu Roberto González Quevedo, fixu unus cuantus cursiel.lus nu l.lugar, pero you cavilu qu’anda algu influenciáu pula l.lingua asturiana, ya también pula de L.león. Prueba d’etsu ía el puner “l.l” en vez de “ts”. Nos aiquí siempres punemus ts, ya dalgunus solu ch, peru enxamás l.l

Pur últimu you creu qu’había que nurmalizar un poucu la maneira d’escribir el pal.luezu, ya que cumu dixe anantias, parez cousa diferente sigún quién lu faiga.

El Conceyu d’Ayer convoca’l Concursu de Cuentos Curtios Antonio Robles, pa mozos ente 14 y 30 años. La obra presentada va tener una estensión máxima de cuatro fueyes y va ser de tema llibre, pudiendo tar escrita n’asturianu o en castellán. El plazu d’entrega remata’l 15 de febreru.

Les obres han apurrise en mano o unviase per corréu certificáu al Centru Municipal de Cultura del Conceyu d’Ayer, na cai Eloy Martino e/n, 33670 Morea.

Los premios son de 500 euros pa dambes modalidaes.

Bases completes

El llibru pa neños “La llegada”, de la escritora y directora de la biblioteca virtual María Josefa Canellada, Mar Martín, con ilustraciones d’Ánxelu González y espublizáu pola editorial Pintar Pintar, va presentase’l día 10 de mayu a les 19 hores nel Atenéu Obreru de Xixón na cai Cuadonga, 7.

Mar Martín faló del so llibru na TPA:

Angela Vallina pedía esti día en Benavente, dientro de los actos de precamapaña europea, un nuevu modelu de BCE, controláu pol Parlamentu Européu y una auditoría de la delda y la condonación de la ilexítima, según un plan industrial xenerador d’emplegu.

La candidata d’IX Asturies al Parlamentu Européu, Ángela Vallina, reclamó güei en Benevante un cambéu radical nel funcionamientu del Bancu Central Européu (BCE), dientro d’un programa de democratización real de les instituciones que rixen na Unión. Vallina criticó que la institución monetaria europea tenga prohibida, por llei, el financiamientu de los Estaos, a pesar de que son éstos los qu’aproven a esta institución de los sos fondos. Precisamente esti cambéu va ser unu de los oxetivos del Grupu de la Esquierda Europea, un nuevu modelu operativu pa que’l BCE sía, realmente, un bancu central.

“Tenemos qu’empezar per democratizar eses instituciones -en relación a el treme européu de poder- y faceles tresparentes. Tenemos qu’empezar porque haya un BCE que nun sía la estafa del sieglu, como ye agora: ye un bancu que se nutre de fondos públicos de los Estaos, sicasí nun puede emprestar dineru a los Estaos. Tener prohibíu por llei, solo puede emprestar dineru a la banca privada y a los grandes grupos. Curiosamente, emprestar a un interés del 1%. Esos mesmos bancos emprestar dempués a los Estaos pa mercar delda al 6%”.

Vallina reclamó que sía’l Parlamentu quien controle l’actividá del BCE, según el nomamientu del so presidente. “Con eso, avanzamos enforma”. Y esta sería’l primeru de los cambeos nel modelu financieru européu. Asina, pidió una auditoría de la delda qu’anguaño imputa como pública, de forma que pueda refugase’l pagu de la que s’asumió y que respuende a delda privada.

Angela Vallina participaba esta tarde nun actu públicu na casa de Cultura de Benavente, al pie de los coordinadores de la formación na localidá, Manuel Burón y el de Burgos,Pedro María de Palacios, nel qu’esplicaron la propuesta europea d’Izquierda Xunida.

La candidata asturiana afitó la necesidá de poner en marcha polítiques industriales y de reactivación económica que pongan frenu al cayente de texíu nacional, supeditáu, dixo, a los intereses d’Alemaña.