Mundu

La editorial Trabe, dientro de la colección “Clásicos y contemporanios”, acaba de reeditar “El Norte”, de Vicente García Oliva (Xixón, 1944), más de cuarenta cuentos escritos ente 1975 y 2010 pol escritor xixonés, que foi premiáu con dalgunos de los más prestixosos gallardones, como’l Premiu Timón de l’Arribada.

El Norte, que rescata’l títulu del volume que García Oliva publicara en 1991 cola editorial Llibros del Pexe, recueye los cuentos escritos ente 1975 y 2010. Son más de 40 les pieces aquí reuníes que, al pesar del pasu del tiempu, de los cambeos qu’esti arrecostina, mesmo no social que no llingüístico y personal, y de la diversidá temática y d’estilu que presenten, caltienen la frescura d’entós y un filu que les xune: son histories que nacen del contactu ente lo fantástico y lo cotidiano.

La Fiesta ta declarada d’Interés Turísticu Rexonal. El desenvolvimientu del eventu tien llugar na playa de Pando o Poniente, na Plaza Mayor, El Campu Valdés, los Xardinos de la Reina y la Plaza’l Marqués.

Esti añu, como ye vezu, va facese concursu d’echadores de sidra el xueves 25 d’Agostu, na Plaza Mayor a les cinco la tarde. Amás, va facese o intentanse’l Récord d’escanciáu simultáneu, el vienres 26 d’Agostu, na playa de Pando a les 19:00 hores.

Amás, celébrase’l mercadín de la sidra y la mazana, 25, 26, 27 y 28 d’Agostu, nos Xardinos de la Reina. Pa la preba de sidra ye necasario mercar un vasu de sidra que se vende nos numberosos puestos.

Ente los actos, tamién, el II Alcuentru de Pareyes de Baille Tradicional Asturianu del Conceyu de Xixón, sábadu 27 d’Agostu na Plaza Mayor. Cancios de Chigre, sábadu 27 d’Agostu, na Plaza Mayor a les 21:00 h. y el Premiu Aponderamientu d’Oru a la meyor sidra de la Fiesta, el domingu 28 d’Agostu, en Plaza Mayor.

Los díes nos que’l tiempu nun permita bañase nes playes asturianes, pueden ser la oportunidá pa conocer cómo se bañaben los romanos va 2000 años. Conociendo les Termes Romanes de Xixón. El xacimientu-muséu de les Termes Romanes del Campu Valdés ye un muséu de sitiu creáu col fin de caltener, investigar y espublizar los restos d’unes termes públiques de dómina romana. L’adecuación pa la visita del xacimientu arqueolóxicu nel so contestu orixinal dexa que los visitantes conozan y entiendan meyor les sos característiques.

La presencia de la ruina condiciona los conteníos del muséu. Asina, la visita a los restos del edificiu termal ta precedida por delles unidaes informatives qu’espliquen el significáu de les termes nel mundu romanu, les sos funciones, les tipoloxíes, la distribución espacial y les actividaes propies de cada habitación. Amás de la información xeneral sobre les termes, falar del desenvolvimientu del Xixón romanu, la muria, les termes de Xixón y la so interpretación. Los restos materiales más significativos topaos mientres les escavaciones, espónense nuna vitrina corrida nel pasiellu que da pasu al xacimientu.

El visitante introducir na ruina al traviés d’una pasarela que reproduz el percorríu orixinal. Cada espaciu presentáse con una reconstrucción infográfica del interior. Asina mesmu, per aciu lluces de colores inténtase remembrar les zones fríes, les zones de baños templaos, los espacios calientes, los fornos, esplicando asina’l sistema de calefacción romanu.

Nel corazón xurásicu d’Asturies, nun sitiu privilexáu, sobre la Rasa de San Temo en Colunga, álzase’l Muséu del Xurásicu d’Asturies. Esti singular Muséu qu’adopta la forma d’una gran resclavu de dinosauriu, acueye una de les muestres más completes y didáctiques del mundu d’estos ablucantes reptiles. “Col tiempu” como filu conductor, amosamos la vida na Tierra dende’l so entamu hasta la llegada del home, ufiertando una amplia información sobre distintos aspectos de la vida de los dinosaurios.

La so identidá refléxase na sala del Xurásicu Asturianu que tien una interesante colección de rescalvos y fósiles alcontrada na costa xurásica asturiana, fiel reflexu de lo que podemos visitar “in situ” nos diez xacimientos que s’esparden pela costa. Perfectamente comunicáu al través de la A-8, el MUXA representa la vanguardia de los Museos del sieglu XXI. La so concepción espositiva, la bayura de los sos fondos y una potente llinia d’investigación tresfórmenlu nun referente internacional. Y tenémoslu bien cerca pa visitalu esti branu.

L’Academia de la Llingua Asturiana presenta un númberu nuevu de la colección «Cartafueyos Normativos». Una propuesta normativa de l’ALLA pal emplegu de la llingua asturiana nel ámbitu informativu y nel llinguax periodísticu. La presentación va tener llugar a les doce la mañana d’esti vienres 22 nel llar de l’ALLA, na cai L’Águila 10, Conventu de les Pelayes d’Uviéu.

Esti nuevu volume, que fai’l númberu 7, ta dedicáu al “Léxicu de los medios de comunicación: Prensa, Radio y TV” y con él l’Academia quier ufiertar una propuesta normativa pal léxicu y les espresiones llingüístiques de los medios de comunicación, cada vegada más numberosos y complexos, qu’empleguen la llingua asturiana.

El Conceyu Universitariu pol Asturianu (CUPA) aconceyó na tarde del vienres con Vicente Gotor, Rector de la Universidá d’Uviéu, col envís de buscar una solución pal conflictu denunciáu pol CUPA y pol que nel nuevu Reglamentu d’Estudios de Doctoráu nun se permitía la presentación de tesis n’asturianu. Dende’l CUPA anuncien “salimos con compromisu de redacción que permite presentar tesis n’asturianu y que va aprovase esti xueves en Conseyu de Gobiernu”.

Javier Cubero ya Inaciu Galán, miembros del CUPA, tuvieron nel conceyu nel que Vicente Gotor prometió aprobar una nueva redacción del Reglamentu, nel Conseyu de Gobiernu de la Universidá, del próximu xueves 21 de xunetu. El nuevu borrador, queda de la siguiente manera no que cinca al usu del asturianu:

Artículu 25, 2.a) La memoria que recueye’l llabor fechu na tesis doctoral redactaráse n’español. Sicasí, la Comisión de Docotoráu va poder autorizar la so redacción n’otru idioma oficial de la Unión Europea, previu informe de la Comsión Académica del Programa de Doctoráu, y siemprres que se garantice que los miembros del Tribunal tán en condiciones de xulgala. N’esti casu, la memoria ha contener el resume y les conclusiones n’español. Coles meses condiciones, y d’alcuerdu col artículu 6.2 de los Estatutos de la Universidá d’Uviéu, la redacción podrá facese en llingua asturiana.

Pal CUPA “d’esta manera dase solución a un problema hestóricu” na Universidá d’Uviéu yá que van poder presentase tesis n’asturianu “ensin torgues de tipu llegal pesie al deficiente estatus del asturianu”, que dende’l CUPA creen necesario “declarar oficial p’acabar con toes estes torgues d’una vez”.

El CUPA quixo agradecer el sofitu nesta iniciativa de los ciudadanos que presentaron la protesta propuesta por esta organización a la Universidá d’Uviéu, “que recibió cientos d’apoyos particulares”, afirmen. Amás reconocen “el llabor de l’Academia de la Llingua Asturiana nesti procesu y de profesores y estudiantes de la propia Universidá, coles sos valioses aportaciones”.

Agradecen al Rector “ la solución d’esti conflictu” y celebren “la fin d’esta situación de marxinalidá qu’esistía pa la llingua asturiana dende va más de 400 años y que vien causando dellos casos qu’enfrentaron a la Universidá d’Uviéu colos sos alumnos nos xulgaos”. Una norma qu’hasta agora venía contradiciendo a los propios estatutos de la Universidá y la Llei d’Usu del Asturianu de 1998 que, recuerden, diz que “Tolos ciudadanos tienen derechu a emplegar el bable/asturianu y a espresase nél, de pallabra y por escrito”.

Dende’l CUPA afirmen que tará, de magar esti momentu, “sollertes al cumplimientu d’esti Reglamentu” y animen “a tolos doctorando a facer y presentar la so tesis n’asturianu”, agora que, recuerden “van cuntar col sofitu llegal algamáu gracies a esta redacción nueva del Reglamentu de Doctoráu”.

El CUPA amuesa nel comunicáu unviáu poco dempués del conceyu’l so contentu polo que consideren “una bona noticia pa la llingua asturiana y pa la Universidá d’Uviéu y amás, el cumplimientu d’unu de los oxetivos principales del CUPA dientro del procesu de normalización del asturianu na Universidá”.

El Centru Niemeyer d’Avilés acueye esti sábadu 25, en collaboración cola Fundación Xapón, l’actuación de la pianista xaponesa Shanti, una de les artistes revelación del 2010 nel so país. Esti conciertu va ser totalmente gratuitu hasta completar l’aforu. L’artista del país nipón va presentar “Share my Air”, na que ye la so primer xira europea. Nel so repertoriu perampliu conviven clásicos del soul, de la canción xaponesa, y del pop más íntimu y personal.

Güei, vienres 24 de xunu, a les 18:00h va tener llugar la inauguración de la 7ª Amuesa de l’Asociación Profesional de Fotoperiodistes Asturianos MIRAES 2011. Va facese nel Muséu Barjola, nel 17 de la cai Trinidá de Xixón, cola presencia del Presidente d’Asturies, Vicente Álvarez Areces, y el presidente d’APFA, Marcos León Jiménez. La esposición va tar abierta hasta’l 24 de xunetu.

El Conceyu de Navia convoca’l XIII Certame Lliterariu Villa de Navia y el X Certame de Poesía Ramón de Campoamor. En dambos casos la dotación ye de 2.000 euros y el plazu d’entrega pal 30 de xunu. Al Certame Lliterariu puedes presentar rellatos curtios de non más de 30 llínies, sobre la modalidá de narrativa llibre, cuentu o reseña hestórica. Al Certame de Poesía pueden presentase poemarios de 200 versos. En dambos casos les obres han ser en castellán.

El grupu teatru Telón de Fondo actuará, col so caberu estrenu “Squash” nel Centru Municipal “Los Canapés”, n’Avilés, güei llunes 20 de xunu de magar les 19 hores. “Squash” ye una obra d’Ernesto Caballero, dirixida por Sara G.R., na que se cunta la hestoria de dos muyeres desesperaes, que s’enfrenten por un puestu de trabayu.

Interpretada por Marilú Casas, Carmen Suarez Trapiello y Lluis Antón González. Les lluces y la escenografía son de Beni García y la producción de Xulio Vigil.