Mundu

Asturies celebraba esti vienres pasáu’l Día de les Lletres Asturianes. Dempués de la manifestación pola oficialidá celebrada peles cais d’Uviéu, l’Academia de la Llingua Asturiana tenía prepara la so Xunta Estraordinaria añal, un actu solemne qu’esti añu, y por mor de la crisis, tuvo un aspectu menos engalanáu pol cambiu d’escenariu, del Campoamor al Filarmónica y formatu, del tradicional nomamientu d’académicos a les intervenciones de persones reconocíes de dellos sectores sociales. La xunta entamó con una añada al curdión de Xuan Nel Expósito y una tonada de Marisa Valle Roso, y siguió cola apaición de los trés máximos responsables de l’Academia, en llugar de la tradicional mesa con dellos miembros de la institución. Amás esti añu, Ana Cano, nun llució’l traxe’l país, como vien faciendo nes ocasiones últimes. Les intervenciones vinieron enantes del so discursu y nes voces de la periodista Pilar Rubiera, l’escritor Luis Arias, la vicerrectora Paz Rendueles, el director del Festival Intercélticu de Lorient Lisardo Lombardía, el músicu Ricardo Saavedra ye el matemáticu Pedro Suárez.

Toos ellos ficieron un repás, caún nel so ámbitu, a la presencia del asturianu y al futuru del idioma, nunos discursos enllenos de carga sentimental y rabia pola situación del asturianu, que pudo sentir un públicu que cuasi enllenaba’l teatru y ente’l que taba una de les representaciones polítiques más amplies de los años últimos, sobre manera de la formación Foru, anguaño nel Gobiernu d’Aturies. Hasta trés diputaos d’Izquierda Xunida, incluyendo a Jesús Iglesias, el senador de Foru, Isidro Martínez Oblanca, el conceyal de cultura de Xixón, del mesmu partíu, Carlos Rubiera, el conceyal en Noreña por Foru, Inaciu Iglesias, la secretaria xeneral d’esti partíu, la Conseyera d’Educación, y otros represantantes de distintes formaciones, sindicatos, asociaciones y movimientos sociales.

El discursu de la Presidenta de l’ALLA nel XXXIII Día de les Lletres Asturianes foi unu de los más curtios de los años caberos, centrándose más na llaceriosa situación del idioma asturianu y na falta de recursos que carez la institución. Y ye que Cano abría les sos pallabres afirmando que la celebración se facía “nuna situación d’esceicionalidᔠpola “crisis económica ensin precedentes na historia recién y, a nivel d’Asturies, por una crisis d’estabilidá política con perfondes implicaciones socio-económiques y culturales”.

Coles intervenciones previes, esplicó Ana Cano, “venimos de dar voz a distintos asturianos y asturianes, persones dueites toes elles, carauterizaes pol so compromisu con Asturies y pol so amor a esta tierra”.

Una de les peticiones de l’ALLA foi la fin de los retayos a la so institución, que recordó “baxa un 40% nel so presupuestu”, lo que dixo “nun paez razonable y lleva apareyao, amás, que la institución nun puea llevar alantre los sos cometíos fundacionales, venceyaos, ensin dulda, a la meyora de la vida social y cultural asturiana”. Por ello pidió “a los nuevos dirixentes políticos del Principáu que se rectifique una decisión presupuestaria dafechu inaceptable”, recordando les aportaciones estatales recibíes por otres academies de llingües, que l’ALLA nun recibe.

Cano reconoció qu’en dómines de crisis “la política cultural faise enforma más difícil dende’l puntu de vista de la so tresllación social, pero nun mos engañemos, nun hai crisis que xustifique la renuncia a los derechos culturales y llingüísticos, como nun hai crisis que xustifique la perda de los derechos humanos más elementales”, afirmó recordando que’l drechu al usu de la propia llingua “ye un drechu reconocíu pola Organización de les Naciones Xuníes como derechu humanu fonderu, lo mesmo que pola Declaración Internacional de los Drechos Llingüísticos”.

“Lo que nun se fixo nes époques de bonanza, porque nun supimos o nun quiximos (o nun quixeron), hai que facelo agora en materia de política llingüística, porque nun se pue aguardar muncho más: necesitamos racionalidá, planificación y xusticia”, esplicó Cano, que darréu reclamaba “racionalidá”, poniendo como exemplos la reconocencia de la especialidá de llingua asturiana pal profesoráu d’Educación Primaria y Secundaria, el diseñu d’un verdaderu procesu de recuperación llingüística n’Asturies y la reconocencia de la oficialidá de la llingua asturiana, ufriéndose a collaborar “nel llogru d’una sociedá asturiana abierta, non escluyente y dinámica culturalmente, lloñe de complexos y rocees pasaes”, porque p’Ana cano “tamos refiriéndonos al futuru d’Asturies como pueblu, futuru que nun ye dable sin un futuru pa la llingua asturiana”.

Los presentadores del actu, Sonia Avellaneda y Próspero Morán, pesllaron la Xunta Estraordinaria cola llectura de poemes de Lletres Lliterariu 4, asoleyado por mor d’esta xornada, poniendo fin al mesmu la Banda de Gaites de Villaviciosa, qu’incluyó ente los sos temes una versión de Dixebra como homenaxe a los sos venticinco años como banda.

Semeyes del actu nel Filarmónica d’Uviéu

Siguen los actos de la Selmana de les Lletres Asturianes. Esti xueves, 3 de mayu, los actos treslládense a Sariegu. A les siete la tarde, en La Casa Riba (Valvidares), va descubrise una placa dedicada a Antón Balvidares na so casa natal. A les 20,00 hores, na Casa Cultura de Vega, nel mesmu conceyu, conſerencia «Antón Balvidares Argüelles: un poeta sareganu de la Ilustración asturiana» por Florencio Friera Suárez (RIDEA).

La 33 Selmana de les Lletres Asturianes céntrase, al abellugu del bicentenariu de la muerte de Gaspar de Xovellanos y de la promulgación de la Constitución de Cádiz, na recuperación de dos poetes coetanios, Antón Balvidares y el presbíteru Benito de l’Auxa.

Mañana vienres, 4 de mayu, últimu día d’actos y Día de les Lletres Asturianes. L’actu escolar de la Selmana va entamar a les 12 hores, nel Colexu Públicu Salvador Vega Berros (Vega), incluyendo la inauguración de la esposición «La llingua na historia», intervención d’autoridaes, actuaciones y entrega de premios del XVII Certame de Poesía y Dibuxu, del IX Certame de Cartelismu y del I Certame de Creación Audiovisual.

En Santalla d’Ozcos, a les siete y media, la Casa Cultura acueye la conſerencia «Delas señas da Ilutración na Asturias occidental» por José Antonio Álvarez Catrrillón, profesor de la Universidá d’Uviéu.

A lo llargo de tola xornada va celebrase’l Día del llibru n’asturianu, en collaboración coles llibreríes, tiendes de discos, editoriales y ditribuidores del país, que van ufrir un 10 % de descuentu na compra de llibros y música n’aurianu y regalu, hasta la fin d’esistencies, del llibru “Al rodiu de la poesía ilustrada”.

Participen nesta promoción:

Llibreríes y tiendes participantes Uviéu: Llibrería Antares, Llibrería Aldebarán, Llibrería Cervantes, El Corte Inglés, Llibrería Diocesana, Llibrería Garluc, Llibrería Maribel, Llibrería Ojanguren, Llibrería La Palma, Llibrería II Milenio, Llibrería Pintar-Pintar, Llibrería Polledo, Llibrería Puntos, Llibrería Reconquista, Llibrería Santa Teresa, Llibrería Servitec.

Xixón: Llibrería Bardos, Llibrería Casa del Libro, Llibrería Central, Llibrería Cornión, El Corte Inglés, Llibrería English Book Shop, Llibrería Hernández, Llibrería Paradiso, Mundo Sonoro, Llibrería Roy, Llibrería Ziſar.

Avilés: Llibrería Azucel, Llibrería Casona, Llibrería Clarín, El Corte Inglés, Llibrería Vícor Núñez, Llibrería La Vieja Atalaya, Tienda Elepé Producions.

Mieres del Camín: Disco 55, Llibrería Mercantil, Llibrería La Pilarica, Llibrería La Torre.

Siero: Llibrería Eroski (Parque Principáu-Paredes), Llibrería Naredo (La Pola), FNAC (Parque PrincipáuParedes), Llibrería San Vicente (La Pola).

Cangas del Narcea: Llibrería Treito. Cangues d’Onís: Llibrería Imagen.Corvera: Llibrería Mario (Cancienes). L’Entregu: Llibrería Sol. L’Infiestu: Llibrería Rima. Llanes: Llibrería Clarín. Llangréu: Llibrería A. Pantiga (Ciañu). Llaviana: Llibrería Arvín. L.luarca: Llibrería Helas. Les Arriondes: Llibrería Gestión. Nava: Muséu de la Sidra.

El Serviciu de Normalización Llingüística de Man.Co.Si, en xunto cola asociación “La Compaña del Ronchel”, de Villaviciosa, va entamar otra vuelta’l repartu de lletres de pan pa conmemorar el Día de les Lletres Asturianes.

Esta iniciativa entamóla nel añu 2004 l’asociación maliaya “La Compaña del Ronchel”, pal ámbitu del conceyu de Villaviciosa, y dende va tiempu encárgase d’ella’l Serviciu de Normalización llingüística de la Comarca de la Sidra, ampliandola a los seis conceyos que formen la Mancomunidá y cola ayuda de la conseyería de Cultura y Turismu.

Ye una actuación que vien contando con gran aceptación desde’l so entamu y a la que se pretende da-y continuidá, como forma de promoción del día de les lletres asturianes a nivel comarcal, y de revalorización de la nuestra historia lliteraria.

Esti añu, les lletres van a homenaxar a Antón Balvidares Argüelles, autor ilustráu nacíu nel conceyu de Sariegu, al que la Conseyería dedica esti añu la Selmana de les Lletres Asturianes.

Les lletres de pan, acompañaes por un poema y una breve reseña biográfica de de Balvidares, repartiránse per escueles, institutos, cases de cultura, ayuntamientos y chigres de los seis conceyos qu’integren la comarca, polo que l’acción tendrá un impactu social apreciable y la nuestra lliteratura tendrá un nivel de difusión nesti día muncho más altu del acostumáu.

La organización política Compromisu por Avilés anunció la celebración d’un cursu d’asturianu na cai, que tendrá llugar esti xueves 3 de Mayu de magar les 19:30 hores na Plaza’l Parche de la ciudá avilesina coincidiendo cola Selmana de les Lletres Asturianes.

Dende Compromisu por Avilés califiquen la Selmana de les Lletres como “una selmana que les hipócrites instituciones asturianes dediquen al nuestru idioma”, polo qu’aprovecharán esta aición na cai pa “denunciar la situación llaceriosa na que s’atopa l’idioma”.

La Xunta pola Defensa de la Llingua Asturiana organiza esti vienres una manifestación pa reivindicar la oficialidá del asturianu n’Uviéu. La marcha va entamar a les 19.30 hores de la estación de Renfe d’Uviéu. Darréu va percorrer les cais d’Uría y San Francisco hasta la plaza de Porlier, frente al Teatru Filarmónica, onde va lleese un discursu p’analizar la situación del asturianu, na voz de los representantes de la Xunta y de la Xunta Moza, Carlos Pulgar y Llucía Menéndez. Na manifestación participarán organizaciones sociales y polítiques, amás de dellos grupos de pandereteres, gaiteros, ente otros.

Darréu va celebrase l’actu académicu nel Teatru Filarmónica. La xunta va celebrar el xxxiii Día de les Lletres Asturianes a les 20,30 hores. L’Academia de la Llingua Asturiana, entidá organizadora, anunció la participación nel actu de Paz Rendueles (Vicerrectora d’Investigación de la Universidá d’Uviéu), Lisardo Lombardía (Direutor del Festival Interceltique de Lorient-France), Pedro Suárez (matemáticu y profesor), Pilar Rubiera (periodista, especialista en temes culturales), Ricardo Saavedra (músicu y escritor) y Luis Arias Argüelles-Meres (Caderalgu d’Enseñances Medies). Les sos intervenciones xirarán al rodiu de les posibilidaes de futuru de la llingua asturiana.

Presentáu por Sonia Avellaneda y Próspero Morán, director d’Asturnews, l’actu cuntará con un entamu musical a cargu del acordionista Xuan Nel Expósito y de la cantante Marisa Valle Roso y tendrá como pieslle l’actuación de la Banda Gaites Villaviciosa.

El sábadu 28 d’abril, de magar les siete la tarde, El Parque Inglés de Xixón va acoyer la edición númberu 24 del Conciertu pola Oficialidá, entamáu pola Xunta pola Defensa de la Llingua Asturiana. Nel cartelu d’esti añu tán los grupos Dixebra, Fala non Caduca, Tuenda, Macadamia y La Bandina, xunto al cantautor Alfredo González y el tríu formáu por Michael Lee Wolfe, Mapi Quintana y Jacobo de Miguel. L’actu va celebrase nuna carpa xigante con dos escenarios, onde van poder sentise más de 8 hores de música ininterrumpida n’asturianu.

Amás, ente los asistentes va rifase una fin de selmana pa dos persones n’Asiegu (Cabrales) qu’inclúi la Ruta del Quesu y la Sidra (Premiu Andrés Solar 2009) y agospiu, amás d’una caxa de sidra de Pamirandi.

Les entraes son a 8 euros n’anticipao y 10 euros na puerta.

L’”Ateneo de Cultura y Lengua Guaraní” vien d’unviar una comunicación oficial a Iniciativa pol Asturianu na qu’afirma al traviés del so Director Xeneral, David Galeano Olivera, que la institución paraguaya “quier espresar el so incondicional y permanente sofitu y solidaridá na campaña de defensa de la llingua asturiana” que la organización ta faciendo col so llabor. Amás, l’Atenéu afirma na so carta a l’asociación qu’altiende que l’asturianu ye una “valiosa, xenuina y hestórica manifestación de la cultura” d’Asturies y que los sos falantes, responsables del so caltenimientu y tresmisión, “tienen tol drechu del mundu –como drechu humanu y llingüísticu- d’espresase na so llingua llariega”, yá que esta llingua resume la “hestoria y manera de ser de la xente asturiano”.

L’Atenéu, amás, quixo dexar nidio na so carta a Iniciativa pol Asturianu que, “tres facer un siguimientu de la nuestra actividá al traviés de la rede y d’informase de la situación de la llingua”, la resolución de sumase a esta “gran cruzada” foi “unánime” per parte la institución.

Dende Iniciativa pol Asturianu amuesen el “fondu respetu y almiración haza esta entidá, que defende y promueve la cultura y la llingua guaraní”, falada por un 90% la población de Paraguái, amás de ser falada tamien en Brasil, Bolivia y Arxentina. Dende la organización ficieron pública la so “más fonda simpatía pa con esta llingua y cultura, símbolu d’un país tan próximu al de nueso por razones hestóriques y sociales, ya que, d’igual mena qu’asocede col asturianu, nun dexa de ser patrimoniu de toos y toes, y nuestra ye la responsabilidá de nun la dexar desapaecer”.

L’”Ateneo de Lengua y Cultura Guaraní” ye una entidá autónoma con carácter científicu-cultural y que foi creada como una institución d’educación superior, con rangu universitariu pa “cultivar y esparder la Llingua y Cultura Guaraní”. Foi declarada d’interés cultural educativu pol Viceministeriu de Cultura de Paraguái y desendolca cursos de guaraní y actividaes de promoción cultural en Paraguái en dellos países.

ATENEO DE LENGUA Y CULTURA GUARANI

El Centru Español de Manhattan, asitiáu na célebre islla de Nueva York, foi’l llugar escoyíu pa la celebración d’unes xornaes de cultura asturiana curties pero intenses el domingu 18 de marzu, dende les seis y media la tarde hasta les once la nueche. Los actos aprovecharon la presencia en Nueva York de la Banda de Gaites de Corvera, dirixida por Bras Rodrigo, por cuenta del desfile de San Patriciu, la escritora y profesora asturiana Paquita Suárez-Coalla, asentada en Nueva York va diecisiete años, y Marta Zapardiel, del Centru Español, organizaron esti alcuentru cultural con acentu asturianu.

La xornada fizo un percorríu pela hestoria, cola charra de Chema Vega sobre’l “Camín Primixeniu del Camín de Santiagu”, l’asturianu, cola llectura del llibru de Paquita Suárez Coalla, “Camín de Lletres”, ganador del último premiu María Xosefa Canellada, y de la música asturiana, cola actuación de Bras Rodrigo a la gaita, cola que se peslló un actu qu’algamó a xuntar un centenar de persones.

L’actuación enforma espectacular de Kristina Varade, del Niall O’Leary School of Irish Dance, de Nueva York, contribuyó a que n’esta xornada astur-neoyorquina, y gracies al contestu mesmu d’esta ciudá, s’estrecharan fácilmente llazos ente estes dos cultures –l’asturiana y la irlandesa– que tantes coses tienen en común. Pa celebrar l’alcuentru, y gracies al sofitu de la Xunta Xeneral del Principáu, de Caxastur y de la tienda gourmet de productos asturianos de Nueva York, Despaña, tolos asistentes a l’actividá foron convidaos a una espicha nel mesmu Centru Español.

La LLABoral, Centru d’Arte y Creación Industrial, presenta güei xueves a les 8 la tarde, “Ende” una serie documental de Luis Argeo y Ramón Lluís Bande, que va poder vese del 22 de marzu al 30 d’abril nes sos intalaciones. Esti proyectu audiovisual naz d’un viaxe, d’un mapa de carreteres. El documental ta integráu por una colección de semeyes cinematográfiques de distintes persones escoyíes al azar nel intre d’aquel viaxe- que viven en zones que de dalguna manera representen una llende, marquen una frontera.

“Foru Asturies va normalizar y fortalecer les instituciones culturales d’Asturies y va conceder mayor protagonismu a la sociedá civil” nel ámbitu de la política cultural, sigún quiso dexar afitao’l conseyeru de Cultura y Deporte, Emilio Marcos Vallaure, que participara xunta’l director xeneral de Política Deportiva, Marcos Niño, esti llunes na presentación del capítulu del programa electoral del partíu.

Xunta’l númberu dos de la llista de Foru pola circunscripción central, Cristina Coto, y el tamién integrante de la candidatura Sancho Michel, Vallaure amosó’l programa del partíu en política cultural, que nun recueye cambios “sustanciales”, según afitó tamién Michel.

Foru Asturies plantega reorientar la política cultural que nesti momentu albidren s’alcuentra “en coma” pa recuperar darréu ya íntegramente los valores d’Asturies.