Mundu

L’Axencia Estatal de Meteoroloxía (AEMET) actualizó l’avisu emitíu pa esta fin de selmana en Asturies por fenómenos meteorolóxicos adversos por fuertes raches de vientos y costeros, que van vese yá güei, vienres 7 de febreru, y mañana, sábadu 8 de febreru, soplando raches de vientu que según les zones van tar ente 90 y 110 kilómetru per hora.

No que cinca a la mar, demientres la mañana del sábadu van soplar vientos de componente oeste de fuerza 8 ya inclusive 9 con mar del noroeste con foles de 5 a 8 metros. Pela tarde va haber mar d’esti noroeste con foles de 8 a 9 metros.

El domingu los fenómenos costeros van asitíase en mar del oeste noroeste de 5 a 7 metros, magar a primeres hores va ser de 7 a 8 metros.

El Ministeriu d’Educación, Cultura y Deporte va esixir a los 10.000 universitarios que quieran beneficiase d’una movilidá del Programa Erasmus Plus, financiada pol Gobiernu, un mayor rendimientu académicu, nivel d’inglés avanzáu -l’equivalente al B2 européu-, y tener aprobaos un mínimu de 60 creitos. Amás, estos estudiantes van cuntar con 350 euros mensuales de media, 100 euros más que’l restu.

Asina lo anunció la secretaria d’Estáu d’Educación, Formación Profesional y Universidaes, Montserrat Gomendio, mientres la presentación d’esti programa européu na Biblioteca Nacional, xuntu al director axuntu d’Educación y Cultura de la Comisión Europea, Jordi Curell, y el secretariu d’Estáu de Servicios Sociales ya Igualdá, Juan Manuel Moren.

El expresidente cubanu Fidel Castro aprovechó la presencia en L’Habana de los mandatarios de los países qu’integren la Comunidá d’Estaos Llatinoamericanos y Caribeños (CELAC) qu’asistñien al segundu cume de la organización, pa facer delles xuntes con ellos y analizar la situción en Latinoamerica.

En recibiendo la fin de selmana a la presidenta arxentina, Cristina Fernández de Kirchner, cola que xintó en familia, y caltener un “fraternal” alcuentru cola mandataria brasileña, Dilma Rousseff, el llunes recibió al secretariu xeneral de la ONU, Ban Ki Moon. Y, finalmente, el martes, Castro caltuvo un alcuentru colos presidentes de Nicaragua, Daniel Ortega, Bolivia, Evo Morales, y Ecuador, Rafael Correa.

El Premiu Nobel de Lliteratura, Günter Grass, de 86 años, dio por zarrada la so obra narrativa por cuenta de la so avanzada edá, en marcando más de mediu sieglu la vida cultural n’Alemaña. L’anuncia fízola nuna entrevista al diariu rexonal Passauer Neue Presse, de la que se dio a conocer un estractu esto día.

La causa del retiru ye l’estáu de salú del autor que nun lu dexa concebir proyectos de cinco o seis año, que sería la condición pal trabayu d’investigación pa una novela, sigún los sos cálculos.

L’autor de títulos como “El tambor de lata” y “El rodaballo”, dedicose tamién al dibuxu y a l’acuarela, “tres un periodu nel que taba bloquiáu por causa de frecuentes hospitalizaciones”.

Conocíu polos sos convencimientos polítiques social-demócrates, Günter Grass amenó una viva polémica con Israel nel añu 2012 al publicar un poema en prosa, nel cual afirmaba que l’Estáu hebréu amenaciaba la paz mundial al querer atacar a Irán.

L’anunciu de la simplificación de los contratos realizáu pol Gobiernu nun pasa de ser una mera campaña propagandística, a xuiciu del diputáu nacional d’IX, Gaspar Llamazares, quien aseguró que, llueñe d’ello, lo que ta faciendo’l Ministeriu d’Empléu ye, precisamente, faelos más complexos.

”Si unu va a la páxina web del Ministeriu, dase cuenta de qu’esa simplificación de los modelos de contratos nun ye tal, sinón que ye una complexización: los contratos llaborales n’España caltiénense; casi 40 contratos llaborales, podríamos dicir que la contratación n’España ye a la carta y atopamonos con que, llueñe d’esos modelos de simplificación que pretenden dexalo en cuatro o cinco grandes grupos de contratos, sicasí, lo que se produz ye una mayor dificultá y una mayor complexidá”.

Llamazares exemplificó esa mayor complexidá nos contratos eventuales por razones económiques de les empreses o por obra o serviciu.

Izquierda Xunida va esixir información sobre l’Alcuerdu Trasatlánticu sobre comerciu ya inversión ente Europa y EE UU, que se ta realizando con total opacidá, según denunció esta mañana n’Uviéu’l diputáu nacional d’IX, Gaspar Llamazares. Trátase, dixo, “d’un alcuerdu que se convirtió nel paradigma de la falta de tresparencia. Esti alcuerdu, qu’empezó a mediaos de 2013 y que se da un plazu de 2 años, foi declaráu per dambes partes secretu; esto ye, les negociaciones que tuvieron yá dos rondes, qu’afecten a temes tan importantes n’Asturies como l’agricultura, la industria o los servicios públicos, pos fueron dos rondes ensin nengún tipu d’información”.

Coles mires d’esclariar qué y quien tán axustando, Izquierda Xunida empezó a trabayar pa pidir los informes previos a la Unión Europea. “Queremos saber los lobbys que tán representaos nestes delegaciones y los alcuerdos y desalcuerdos que se tán produciendo”.

L’alcuerdu de llibre comerciu inclúi muncho más que la llibertá aduanera que va ser, a xuiciu de Llamazares prácticamente total, sinón d’otres regulaciones que pueden suponer la puntilla definitiva pa polítiques, servicios y derechos consolidaos n’España y l’Unión Europea. “En concencia nun tán falando namá de llibertá aduanera. Tán falando d’acabar con regulaciones estatales.

El parllamentariu diz albidrar que “nesi alcuerdu los ciudadanos tamos nel camarote de tercera y de xuru vamos tener bastantes sorpreses y bien desagradables. Pueden faer papel moyáu de Política Agraria común, de la política industrial o de los servicios públicos, que n’el nuesu país tán debilitaos pero qu’esisten”.

La economía británica va convertiste nel intre de los dos próximes décades na mayor del Vieyu Continente, desbancando asina a Alemaña como principal motor económicu d’Europa, arriendes de la so menor esposición a los problemes de la eurozona, el puxu demográficu del Reinu Xuníu pola llegada d’inmigrantes y los sos baxos impuestos en comparanza cola redolada europea, según reflexa la última edición de la Lliga económica mundial’, ellaboráu pel Centru d’Investigaciones Económiques y Empresariales (CEBR).

Lo que prevé l’estudiu ye que’l Reinu Xuníu sía tres los EEXX la segunda economía occidental de mayor ésitu destacando “los enclinos demográficos positivos pola continua inmigración, la menor esposición a los problemes de la eurozona y les sos relativamente baxos impuestos en comparanza colos estándares europeos”.

D’esta miente, la economía británica, que va concluyir 2013 en sesta posición mundial y tercera europea, va pasar a ocupar el séptimu llugar en 2028, darréu por detrás d’Alemaña, pa “alredor de 2030 superar a Alemaña como la mayor economía occidental”.

Esti próximu miércoles día 18, a les 20 hores, nel Salón d’actos del Centru de Cultura Antiguu Institutu, CCAI, na cai Xovellanos 21, en Xixón, Asturies, celebraráse un conciertu de villancicos, aguilandos y cantares ñavidiegos recoyíos de la tradición asturiana y acompañaos con instrumentos como panderos, vigulín, bandurria asturiana, gaita rabil, sonaxes, xiblates y voces.

Nesti actu, amás, presentaráse la recuperación d’un villancicu asturianu del añu 1721, venceyáu al perlindangu de Cuideiru, y podremos ver imáxenes de delles mazcaraes d’iviernu. Pa ello, contarase cola presencia de tres músicos asturianos, Pedro P. Sanjurjo, Laura Fernández y Dani García de la Cuesta, que tienen esperiencia abondo na recuperación del patrimoniu astur y que trabayen en diferentes formaciones o escueles de música. Esperámosvos.

El máximu responsable de la formación griega Syriza, Alexis Tsipras, señaló güei que la so elección como candidatu a la presidencia de la Comisión Europea nel IV Congresu del Partíu de la Izquierda Europea (PIE), que se clausuró güei, constitúi “una oportunidá histórica” pa la izquierda del continente de presentar la so propuesta “frente a aquellos que construyeron esti modelu d’Europa”.

Sobre esta cuestión, el francés Pierre Laurent, qu’encara dende güei un nuevu mandatu de tres años al frente del PIE, defendió que la candidatura de Tsipras “va ser un preséu p’aprucir nel alderique européu de manera combativa”.

Dambos dirixentes realizaron estes declaraciones xuntu al coordinador federal d’Izquierda Xunida, Cayo Lara, demientres la rueda de prensa ufiertada con anterioridá a les votaciones de la clausura del congresu, desenvueltu dende’l pasáu vienres nel Hotel Auditórium de Madrid.

Tsipras sorrayó que la so candidatura “nun ye namái simbólica pal pueblu griegu”, que se convirtió “na cobaya del continente”, nin ye una candidatura “que represente a los pueblos del sur, sinón a tolos pueblos”. Al so xuiciu, n’Europa “nun hai llendes xeográfiques, pero sí llendes ideolóxiques y programátiques”, polo que la so candidatura “representa a toles fuerces d’izquierdes del continente”.

Alexis Tsipras, que recibió’l sofitu como candidatu a presidir la Comisión Europea de daqué más del 84% de los delegaos del congresu, agoró que les próximes Elecciones Europees de mayu de 2014 “van decidir l’aldu y el camín de la Europa que se ta construyendo” y que, por ello, “son unes elecciones crítiques ya importantes” pa la izquierda europea.

El primer Festival de cine pa Estudiantes de la Casa Blanca que se llanzó nos caberos díes de Payares ye la primer esperiencia participativa que fai’l Gobiernu Obama pa alitar la participación cola institución, nesti casu ente los neños de guardería a la ESO. Los estudiantes tán animaos p’apurrir vídeosde trés minutos (y más curtios entá) que falen del poder de la tecnoloxía nes sos escueles.

Un garapiellu de miembros del staff de la Casa Blanca va sirvir de xuráu y va escoyer finalistes y ganadores preliminares. Los trabayos van ser puntuaos en creatividá, orixinalidá y calidá técnica.

Los finalistes van ser convidaos a esponer los sos trabayos na Casa Blanca, y les sos entraes van ser posteaes nel so sitiu web. Los organizadores de festival ufiertaron dellos temes que les películes y los vídeos podríen entamar, incluyendo’l papel que la tecnoloxía va xugar na educación nel futuru, y la creatividá de la tecnoloxía, realzar el pensamientu críticu, etc..

La participación ta abierta hasta’l 29 de Xineru de 2014 y pídese-yos a los neños y neñes que col sofitu del profesoráu preparen ún sólo vídeu por caún y que lu suban a la web de la Casa Blanca.