Lliteratura

Llectures n’espacios públicos y regalos d’obres lliteraries y tamién de roses centren, xunta los descuentos nes ventes, los actos conmemorativos del Día Internacional del Llibru, que güei secunda Asturies pa cellebrar el 23 d’abril como la fecha convenida na que morrieron Miguel de Cervantes, autor d’El Quijote, y el gran dramaturgu inglés William Shakespeare.

Al carru del regalu de llibros apúntense, ente otros, la multinacional d’orixe asturianu Alsa, que tien previsto distribuyir güei ente los sos viaxeros un total de 90.000 exemplares de la colección de llibros de bolsiellu editada pola empresa, y l’Ayuntamientu de Xixón, que regalará 300 volúmenes del poemariu ‘Memoria para olvidar’ -de Manuel Paredes Tarod- a los primeros visitantes de la xornada nel Xardín Botánicu, nes biblioteques municipales y nes llibreríes Clarín, Central, Casa del Libro y Paradiso.

Col sofitu del Salón del Llibru Iberoamericanu, que se cellebra en Xixón ente’l 11 y el 15 de mayu, los llibros de regalu dirán acompañaos d’una rosa, na llinia del vezu enraigonáu en Cataluña pa festexar la xornada de güei como la de Sant Jordi.

Les llectures públiques sedrán otra de les actividaes centrales del 23 d’abril n’Asturies. Ente los conceyos qu’acoyerán esti tipu d’actos figuren Llaviana, cola llectura de ‘La aldea perdida’ -obra d’Armando Palacio Valdés- y Llangréu, onde ta prevista una llectura pública de ‘La Tía Tula’ -de Miguel d’Unamuno- y de ‘Relatos desde la muerte’, obra de José María Latorre.

Les llibreríes d’Asturies axúntense a les cellebraciones con un descuentu xeneral del diez por cientu nes obres que güei merquen los compradores.

Nel planu institucional, les dos máximes autoridaes del Principáu na estaya de Cultura, la conseyera Ana Rosa Migoya y el director xeneral Carlos Madera, tienen el llabor repartíu ente Barcelona y Asturies: Migoya asiste dende primer hora al puestu’l Principáu na Fira de la capital catalana, mientres que Madera entrega a mediudía en Xixón el premiu d’investigación ‘Padre Patac’ al ganador d’esta edición, Juan Díaz Álvarez.

La llende ta nel cientu. La producción editorial n’asturianu nun ye quien a superar la cifra de los 97 llibros que se catalogaron nel añu 2000, y que vien calteniéndose con variaciones a la baxa nel últimu trieniu. En 2003, les obres n’asturianu supunxeron pocu más del 0,1 por cientu sobre’l total de llibros espublizaos n’España en llingües propies del Estáu y n’otres ayenes.

Son datos de l’Axencia española del ISBN, l’organismu ensertáu nel Ministeriu d’Educación, Cultura y Deporte, que controla y sistematiza tola producción editorial estatal, asignándo-y un númberu a cada obra dientro d’un códigu d’aplicación mundial (l’International Standard Book Number, que da llugar al acrónimu ISBN).

Hai venti años, a lo llargo de 1984, el Ministeriu de Cultura catalogó sólo diez llibros escritos n’asturianu. Nuna década, la producción quintuplicóse hasta arruñar los cincuenta en 1994 y l’añu 2000 traxo con él un saltu cualitativu hasta los 97 títulos. D’ehí p’alantre, les cifres caltuviéronse en términos asemeyaos pero’l gremiu editorial nun foi quien a trascender esa llende (61 llibros en 2001, 93 en 2002 y 79 títulos en 2003).

Con esa tarxeta de presentación nel mercáu estatal, el sector editorial n’asturianu allúgase a una distancia abismal, en volume de títulos, de les lliteratures contemporánees de Galicia, Euskadi y Cataluña, que dende 1972 tienen espublizaos respectivamente 17.000, 18.000 y 90.000 llibros nes sos llingües propies. Asturies nun llega al millar: 996.

Magar que l’Axencia Española del ISBN esperimenta dacuando retrasos na catalogación de títulos por cuestiones burocrátiques, dase la circunstancia de que les cifres de publicación añal ufríes por esi organismu vienen a coincidir col númberu d’obres n’asturianu que s’espublicen con subvención del Principáu: En 2003, subvencionóse la edición de 74 llibros, d’ente los 165 proyectos presentaos.

La convocatoria de subvenciones amosó amás una radiografía de la vitalidá de les cases editoriales qu’espublicen n’asturianu: Les veteranes Trabe, Vtp y Llibros del Pexe aguanten el tirón, xunta la más reciente Ámbitu. Nel mercáu subvencionáu coláronse tamién en 2003 KRK Ediciones, con dos llibros pa neños, ya Iberautor Promociones Culturales, con un llibru sobre folclor del gaiteru José Ángel Hevia.

Los VI Alcuentros ‘Les otres cares del planeta’, que van cellebrase en Xixón na última selmana d’abril, arrancarán el vienres prósimu con un intercambiu de llibros na cai: Cada ciudadanu podrá llevar ún a condición de dexar otru nes meses allugaes en distintos puntos de la ciudá, como actu d’espardimientu de la lliteratura en conmemoración del Día del Llibru, qu’España cellebra’l 23 d’abril.

Sedrá’l puntu de partida de siete díes atarraquitaos de cites, de la proyección de documentales a los alderiques públicos, les acciones na cai o los conciertos, too ello nun envoltoriu de denuncia social y de pensamientu alternativu que quier facer de Xixón l’epicentru del debate ciudadanu sobro otru mundu posible.

Nel programa destaquen un alderique al rodiu de la propiedá intelectual que tendrá llugar na xornada inagural nel Antiguu Institutu de Xixón; una charra sobro esperiencies de presupuestos municipales participativos na llocalidá sevillana de Las Cabezas de San Juan (vienres 30); una nueche de música y cuentacuentos (sábadu 24); y la proyección del documental collectivu ‘Hay motivo’, el domingu 25.

Los VI Alcuentros ‘Les otres cares del planeta’, entamaos en comuña por Acsur-Las Segovias, Ecoloxistes n’Aición, Lliberación, Radio KRAS ya Inxeniería Sin Fronteres, cellebraránse col propósitu central, según los organizadores, d’impulsar la imaxinación y la creatividá pa tresformar un mundu “que cada día se fai más irrespirable”.

Cuatrocientes páxines y 39 capítulos pa facer una crónica de los presuntos escándalos del ‘felipismu’, de Cajastur a la minería’l carbón. Antón Saavedra, que fora cabezaleru sindical nes mines, socialista, diputáu na Xunta Xeneral del Principáu por Izquierda Xunida y tránsfuga depués n’apoyu del PP, presenta n’Uviéu ‘Secuestro del socialismo’, una denuncia feroz de les males práctiques del PSOE na dómina del ex presidente Felipe González.

A partir d’apuntes almacenaos con meticulosidá y procedentes de conversaciones o revelaciones, Saavedra rentabilizó la so nueva condición de prexubiláu pa ordenar sobro’l papel la so visión crítica de les élites ‘felipistes’. A elles -yos atribúi l’ex diputáu asturianu l’apoyu a los poderes fácticos internacionales, l’arriquecimientu esaxeráu de los sos afines ya incluso la lliquidación del Partíu Comunista d’España por intereses foriatos.

No que cinca a Asturies, la pluma de Saavedra pósase enriba de dos presuntos grandes escándalos: Les supuestes práctiques irregulares de directivos de Caxastur, con mención expresa a la venta de les participaciones que la Caxa tenía n’Airtel, y mui n’especial la corrupción na minería, con mediaciones d’homes del ‘felipismu’ a favor de ciertos empresarios particulares.

L’escenariu de presentación de ‘Secuestro del socialismo’, editáu por Libros Libres – Spiritu Media, sedrá la Sala de Cámara del Auditoriu Príncipe Felipe d’Uviéu, a partir de les 20 hores de güei, xueves 15 d’abril. Nel actu intervendrán el caderalgu d’Hestoria Francisco Palacios, l’escritor Ignacio Gracia Noriega y el director de la editora’l llibru, Álex Rosal.

D’un eruditu periodista republicanu a un de los símbolos del Surdimientu. La Selmana de les Lletres Asturianes, que l’añu pasáu dedicóse a Antonio García Oliveros, centraráse na so edición de 2004 na figura y la obra d’Andrés Solar Santurio, emblemáticu autor desapaecíu hai agora venti años que resumió en so persona la tipoloxía del autodidacta enraigonáu nel mediu rural.

Colos actos centrales fixaos pal vienres 7 de mayu nel auditoriu de la Casa Cultura d’Avilés, el Principáu glosará a Solar nuna Selmana de les Lletres qu’algama los venticincu años d’esistencia y qu’otra vuelta va cellebrase a primeros del mes de mayu. Pa remembrar al autor xixonés, editaráse una publicación monográfica especial al rodiu de so vida, obra y tiempu, como davezu se fai colos escritores que protagonicen la más señalada cita añal de la lliteratura n’asturiano.

Fíu de xentes del campu, Andrés Solar ñació na llocalidá xixonesa del Fondón de Deva nel añu 1955. Alpenes s’anició la transición hacia la democracia, empezó a militar na asociación de defensa de la llingua Conceyu Bable, y entamó una presencia regular na sección na veterana sección ‘Alitar Asturies’ del diariu El Comercio, onde espublizó testos con cierta periodicidá.

Ganador de varios certames de narraciones curties, Solar dedicóse tamién al teatru, estaya na que fexo varios montaxes como miembru del grupu ‘Xaréu’, en compaña del actor Xulio Ramos y con un repertoriu d’obres empobinaes tanto al públicu infantil como al adultu.

Solar Santurio falleció nun accidente de tráficu en 1984, dexando tres d’él la güelga d’una granible producción lliteraria centrada na tensión entre los mundos rural y urbanu y en quienes la padecen o esfruten d’ella na infancia y na mocedá.

El ‘Salón del Libro Iberoamericano’ rendirá-yos especial homenaxe na so edición de 2004 a los escritores Manuel Vázquez Montalbán y Dulce Chacón, fallecíos dambos l’añu pasáu y autores d’un granible heriedu lliterariu.

El reconocimientu públicu a Chacón y Montalbán, n’actos inda por concretar, tará ensertáu nel programa xeneral del Salón, qu’esti añu algama los siete años d’edá y cellebraráse nel so habitual allugamientu de la vera’l ríu Piles (Xixón) ente los díes 11 y 15 de mayu, aconceyando a un importante númberu d’autores, editores y traductores de les dos orielles del océanu Atlánticu.

Según avanzó el responsable del certame, l’escritor chilenu afincáu en Xixón Luis Sepúlveda, la sétima edición del ‘Salón del Libro Iberoamericano’ va da-y atención especial al papel d’América Llatina nel contestu mundial d’anguañu, vista la emerxencia social de los gobiernos de Néstor Kirschner n’Arxentina y de Luiz Inazio Lula da Silva en Brasil.

Hasta’l 30 d’abril. Esi ye’l plazu de presentación d’orixinales que’l Conceyu de Xixón establez p’atropar les noveles inédites, en castellán y non premiaes con anterioridá que quieran optar al prestixosu premiu ‘Café Gijón’, dotáu con 18.000 euros y l’espublizamientu -a cargu de Cajastur- de la obra ganadora.

Según afiten les bases del certame, los trabayos han tener un llargor mínimu de 150 páxines en formatu A4 mecanografiaes a doble espaciu per una sola cara, y nellos tienen que figurar los datos personales del autor. Tamién pue firmase con seudónimu la obra a concursu, en cuyu casu tendrá que dir acompañada d’una plica colos datos del autor.

Los orixinales tienen que presentase, por duplicao, nun paquete postal empobináu a la Fundación Municipal de Cultura, Educación y Universidá Popular del Ayuntamientu de Xixón, na cai Jovellanos, 21-33205, Xixón. Nel esterior del sobre tien que s’escribir en lletres clares: “Premio de novela Café Gijón”.

L’emblemáticu certame nació en 1949 nel Café Gijón del madrilanu paséu de Recoletos, alitáu por un grupu d’intelectuales encabezaos por Fernando Fernán-Gómez, Eduardo Haro-Tecglen, Manuel Aleixandre y el premiu Nobel Camilo José Cela. Desde 1989, el Conceyu de Xixón revitalizó’l concursu asumiendo la dotación y promoción del premiu.

L’últimu ganador del ‘Café Gijón’ foi l’ayerán Fulgencio Argüelles, cola novela “El palacio azul de los ingenieros belgas”.

Esti xueves 22 de mayu a les 18:30 h. la Casona del Bravial de Blimea acueye la presentación de les últimes novedaes de la editorial Asturtoons, los títulos “Una mascota pa Carola” d’Enrique Carballeira, “El misteriu del Vassilius Destounis” de Jorge Fernández” y “El misteriu de les histories que s’escribíen soles” de Xavier Frías Conde. Nel actu de presentación van participar los escritores Enrique Carballeira y Jorge Fernández, que van tar acompañaos pola conceyal de Cultura de Samartín del Rei Aurelio, Gema Suárez Torre, y por Hugo Cortina, el responsable de la Oficina de Normalización Llingüística.

Carballeira, periodista, ilustrador y escritor de L’Infiestu ye autor d’otros llibros infantiles como “El cuélebre y el principín medranosu” o “El día de los charcos”, ente otros munchos. Pela so parte, Jorge Fernández ye maestru y pedagogu, autor de narrativa curtia, testos teatrales y lliteratura infantil, con títulos como “El lladrón de galletes” o “Einstein y la relatividá”, ente otros.

Con esti actu ponse el ramu a la esposición “Asturtoons y les Lletres Asturianes”, que pudo visitase nesti centru cultural dende’l pasáu 5 de mayu, y na que se fai un repasu del llabor d’esta empresa dedicada a la lliteratura infantil asturiana que ta a puntu de cumplir 10 años. Alredor d’esta esposición tamién se llevaron a cabu actividaes con varios centros escolares del conceyu, onde los escolinos pudieron charrar colos autores sobre estos nuevos libros.