Hestoria

Los actos del primer aniversariu del Archivu Hestóricu d’Asturies nel so allugamientu actual, na vieya prisión d’Uviéu abriéronse cola presentación del sellu y matasellos conmemorativos y l’inauguración de la esposición filatélica d’emisiones de los Conseyos Interprovincial y Soberanu d’Asturies y Lleón. L’amuesa ye una colección privada de Germán Baschwitz, que la cedió de baldre pa la conmemoración y va poder visita a los llargo de les próximes selmanes.

La esposición amuesa semeyes ensin asoleyar de los bombardeos que sufrió la ciudá na Guerra Civil. El salón d’actos de la Biblioteca Pública Xovellanos va acoyer esta asmuesa del 9 de marzu al 10 d’abril por cuenta del 75 aniversariu del entamu de la Guerra Civil y de los bombardeos que sufrió la población civil de Xixón. Col títulu “Xixón so les Bombes”, presenta una seleición d’imáxenes ensin espublizar y testimonios d’aquellos tráxicos momentos.

La esposición, organizada pola Conceyalía de Memoria Hestórica y Social del Ayuntamientu de Xixón, la Conseyería de Vivienda y Bientar Social d’Asturies y l’Atenéu Obreru de Xixón, ta dientro del proyeutu de Recuperación de la Hestoria Social de la ciudá nos sieglos XIX y XX, y va acompañada d’un llibru sobre los bombardeos que sufrió Xixón nesti conflictu.

Comisariada pol hestoriador Héctor Blanco, la esposición analiza esti acontecimientu concretu que desgraciadamente calistró la vida cotidiana de la ciudá ente xunetu de 1936 y ochobre de 1937, poniendo especial procuru amás nos sos protagonistes ensin querelo: la población civil.

Rescatar la memoria d’aquel Xixón que vivió quince meses so l’amenaza de les bombes, amás de facer por desanubrir esta parte del nuestru pasáu de recién hasta güei praúticamente tapecíu, quier valir pa conocer dalgo meyor la nuesa hestoria común, pa facer alcordanza de quien vivieron y sufrieron aquella circunstancia y pa reflexonar sobre los bombardeos n’otros puntos del planeta que por desgracia entá son parte del nuestru presente.

Poro, “Gijón bajo las bombas/Xixón so les bombes” fai por que l’horror d’aquella tierra, identificáu en condiciones, valoráu y conocíu, valga p’atalantar qu’un conflictu bélicu y que la guerra ye’l peor mal creáu pola humnaidá, al que siempres acompañen resultaos tan ermos como apavoriantes.

“Fábricas y Viviendas obreras en el primer Xixón industrial” ye la cuarta entrega del Programa “Recuperación de la Memoria Social de Xixón, sieglos XIX y XX” que desenvuelve la Conceyalía de Memoria Social de Xixón cola collaboración del investigador Luís Miguel Piñera. L’actu de presentación va facese esti vienres 25, nel Muséu del Ferrocarril d’Asturies a partir de les siete y media la tarde.

Nes páxines d’esti llibru atópense los pioneros de la industrialización xixonesa, polo xeneral estranxeros, el nome de munchos d’ellos entá perduren nes nueses cais, y les primeres industries como estelleros, fábriques de lloza, tabacu… o les infraestructures como la carretera Carbonera o’l ferrocarril de Llangréu. La segunda parte dedícase a les condiciones de vida de la clase obrera xixonesa, titulada “Vivir en tugurios” que yá de por sí ilustra estes condiciones.

El llibru asoléyenlu KRK Ediciones y el Conceyu de Xixón. Nel actu va actuar el músicu Helio Ruiz.

Manuel Fernández Arias finó’l día 14 de febreru de 2011, a los 91 años d’edá, en Bretaña (Francia), onde moraba. Yera Caballero de la Lexón d’Honor de la República Francesa. Taba en posesión de la Croix de Guerre, la Medaya de Plata del Principáu d’Asturies, la Medaya del Conceyu de París y de delles medayes, condecoraciones y nomamientos más, tantu de Francia como d’España. Yera Presidente d’Honor de l’Asociación Históricu-Cultural C. El Nueve y el centru escolar del so pueblu natal, Marentes nel conceyu de Ibias, lleva’l so nome.

Apurrió la so primer adolescencia a la llucha por unos ideales de llibertá, igualdá y fraternidá, que lu acompañaron hasta’l final de los sos díes. Depués, con apenes venti años, penó per un país afaráu, cumpliendo condena de trabayos forzaos, cola rémora de l’alcordanza del padre asesináu en prisión y, malpenes tuvo la oportunidá, fuxó a Francia, a la gueta de la supervivencia y la llibertá perdíes.

Ellí atoparía la disyuntiva del regresu obligáu y el castigu o la so incorporación a les files de la Lexón Estranxera. Destináu al norte d’África, xuntu con munchos compatriotes, el desembarco aliáu y la cayida de la Francia de Vichy favoreció que, tres duros combates, viera que la poderosa maquinaria bélica que conoció na so tierra, podía ser vencida si se cuntaba colos medios necesarios.

La creación de la 2ª División Blindada de la Francia Llibre, al mandu del xeneral Leclerc, supunxo, pa dellos cientos d’españoles exiliados, la oportunidá de siguir una llucha empecipiada años antes. Manuel, agora conocíu como “caporal Belmonte”, formó nes sos files, nel tercer batallón del Regiment de Cole du Tchad (“L’Español”). Con elli entrenóse en Marruecos ya Inglaterra y , llegáu’l momentu, desembarcó en Normandía. Nos duros combates camín de París, Manuel resultó gravemente mancáu unos díes primero que “El Nueve”, la unidá mayoritariamente española de la división, al mandu del capitán Dronne, llegara a les puertes del conceyu parisín.

La llarga convalecencia y la gravedá de les feríes recibíes torgaron que Manuel volviera al frente. Una vegada rematada la guerra, les sos esperances, como les d’otros munchos miles de compatriotes, de lliberar España, esmorecer pol cambéu del orde mundial establecíu. Una nueva y llarga campaña empecipió nesi momentu pa Manuel, que na so nueva tierra d’acoyida tuvo que reemprender la so vida. Afincáu en Francia, aprendió un oficiu y conoció a la que foi la so esposa, Paulette. Tornó, tres una autentica aventura diplomática, a la so Asturies natal a mediaos de los años cincuenta. Y yá nunca dexo de volver cada vez que pudo.

Elli y los sos compañeros recibieron la reconocencia oficial de la so xesta bien sero, yá nel añu 2004, anque los collacios franceses nunca escaecieron a aquellos curtidos veteranos españoles que-yos daben sabios conseyos en plenu campu de batalla. Manuel convirtióse darréu nel combatiente español más entrevistáu de la hestoria. Llibros, documentales, reportaxes de televisiones, actos oficiales n’España y en Francia. Pero él, cola so simpatía personal y la so saber faer y tar, pudo con tou.

El Círculu d’Estudios Pramarenses y la Conceyalía de Cultura del Conceyu de Grau organiza, nel marcu de les IV Xornaes d’Estudios Llocales, la presentación del llibru “El linaje de los Miranda (1050-1737) (Ocho siglos en la Historia de Asturias” d’Antonio Villabella Patallo.

L’actu va facese esti vienres 4 a les 20 hores na Sala Polivalente de la Casa de Cultura de Grau.

El llibru inclúi numberoses referencies y pasaxes relativos a Grau, que van ser repasaos pol autor demientres esti actu de presentación. “El linaje de los Miranda” ye un trabayu documentáu, qu’apurre munchos datos inéditos, la parte medieval realizóse consultando documentación de los Monesterios de Corias, Belmonte y Corniana, y pa la Edá Moderna, l’archivu de la familia y otros archivos hestóricos tanto a nivel asturianos y estatales, xunto a una bayurosa bibliografía.

Esti vienres, 21 de xineru, de magar les siete la tarde, la FNAC de Parque Principáu acueye la presentación del númberu 3 de la revista “Erada”. Nel actu van participar el so director, Rafael Rodríguez Valdés y dos autores qu’apaecen nesti númberu, Armando Magadán y Cristobal Ruitiña.

Nesti númberu, nel que pasa la editorial Suburbia a responsabilizase d ela edición, cúntase con collaboraciones que fain un analís de “La campaña autonomista de 1897”, por Faustino Zapico, o de “La reaparición d’Asturies nos entamos d’opinión pública democrática nel tardofranquismu”. El númberu complétase con un artículu sobre “La salida d’Asturias Semanal (1969)” de Cristobal Ruitiña y otru sobre “El Partíu asturianista (PAS) (Asturianismu y interclasismu como estratexa)” d’Armando magadán.

El martes 21 a les siete y media, nel Vieyu Institu de Xixón va presentase’l llibru “Asturias que perdimos, no nos pierdas. Cartas de emigrantes asturianos en América”, de Laura Martínez Martín. El llibru recueye cartes unviaaes polo munchos asturianos qu’ente 1850 y 1950 se vieron obligaos a emigrar a América cola esperanza d’asegurase un futuru más prometedor lloñe de la so Asturies natal.

Los sos suaños, deseos, ilusiones, decepciones, allegríes o murnies quedaron rexistraos nes cartes qu’unviaron a familiares y amigos. Estos homes y muyeres nunca imaxinaren qu’estes correspondencies caltener hasta los nuesos díes.

L’autora ye Llicenciada n’Humanidaes (2001) y Hestoria (2003) pola Universidá de Alcalá, onde na actualidá ye investigadora y realiza la so Tesis Doctoral alredor de les correspondencies escrites polos emigrantes asturianos na dómina contemporanea, tema sobre’l que yá espublizó dellos trabayos.

El miércoles, 24 de payares, la Sociedá Cultural Xixonesa tien programada la charra “Proyecto Recuperación de la Historia Social de Xixon de los Siglos XIX y XX”, na que l’hestoriador Luis Miguel Piñera (Xixón, 1951) va presentar los llibros “Posguerra incivil. Vencedores y vencidos en Gijón entre 1937 y 1940” (KRK, 2008), “Jovenes de izquierda en Xixón” (KRK, 2009) y “Raros y heterodoxos. Personajes de Xixón entre 1850 y 1950″ (KRK, 2010).

Amás d’estes obres, Piñera va presentar tamién “Alcordanza la Memoria” publicación bimensual de la Conceyalía de Memoria Histórica y Social de Xixón, que lleva dellos meses espublizándose regularmente.

L’actu va tener llugar nel llar de la Sociedá Cultural Xixonesa, asitiáu na cai Belmonte de Mirando, númberu 4, entesuelu derecha a les 20:00 hores.

Esti vienres 12 de Payares, a les 20 hores y na Casa de la Cultura de La Felguera (Llangréu) Suburbia Ediciones el tercer númeru de la Revista d’Historia Contemporánea Erada. Esta revista, dirixida pol historiador Rafael Rodríguez Valdés a pesar de llevar pocos númberos, yá ye un de los referentes ente les publicaciones especializaes publicaes n’Asturies y ye conocía pol so rigurosidá y la calidá de los collabororadores.

Nesti númberu, nel que pasa la editorial Suburbia a responsabilizase d ela edición, cúntase con collaboraciones que fain un analís de “La campaña autonomista de 1897”, por Faustino Zapico, o de “La reaparición d’Asturies nos entamos d’opinión pública democrática nel tardofranquismu”. El númberu complétase con un artículu sobre “La salida d’Asturias Semanal (1969)” de Cristobal Ruitiña y otru sobre “El Partíu asturianista (PAS) (Asturianismu y interclasismu como estratexa)” d’Armando magadán.

Ta abiertu’l plazu pa inscribise nes VII Xornaes d’Espacios de Creación Contemporánea d’Avilés, qu’entamen el Conceyu d’Avilés y la Universidá d’Uviéu. Esti añu organízase un Alcuentru Internacional sobre Patrimoniu Funerariu. Los actos van cuntar cola presencia d’espertos na materia de les universidaes más importantes d’Europa y de cementerios de referencia, como ye’l casu de Pascal-Hervé Daniel, director de los cementerios parisinos.

Les VII Xornaes desarrollaránse nos díes 17, 18 y 19 de payares, n’horariu de 16:00 a 20:30 nel CMAE d’Avilés. La inscripción ye de baldre y puede facese llamando per teléfonu al númberu 985 54 55 08, per corréu electrónicu a la direición: estayallingua@ayto-aviles.es o presencial, na Casa Municipal de Cultura d’Avilés, cai Domingo Álvarez Acebal, nu 2. Daráse diploma d’asistencia.

Programa completu de les Xornaes