Gastronomía

Redacción.

Especialistes del sector llecheru y criadores de races autóctones van aldericar en Cualloto sobre’l futuru d’estes especies. Les Sidreríes Tierra Astur, cola collaboración de Crivencar y de l’Asociación de Criadores de la Oveya Xalda (ACOXA) tán celebrando estos díes nos sos establecimientos d’Uvieu y Cualloto, hasta’l día 30 de xunu, les ‘I Xornaes Gastronómiques del Corderu Xaldu’.

A lo llargo de les Xornaes Sidreríes Tierra Astur van poner a disposición de los sos veceros un Menú Preba, que va poder disfutase de les estremaes formes de facer el corderu xaldu, una raza apocayá prácticamente desapaecida y que güei paez nel camín d’un prestosu procesu de recuperación.

Güei xueves, a les 19:30 hores na Sidrería Tierra Astur Aguila de Cualloto va desenrrollase una mesa embaxo’l títulu ‘L’aprovechamienu lacteu de les races autóctones orientáu al quesu’ na que van participar Antón Alvarez Sevilla, miembru de Slowfood Asturies y de la ACOXA, Victor Guerra, Presidente de l’asociación de Criadores de Cabra bermeya, Jesús Gutierrez, criador de cabres y productor del Quesu La Chivita y Marino Gonzále, Presidente de COASA. La mesa va tar moderada pol Director Gastronómicu de Crivencar, Lluis Nel Estrada.

Redacción.

El Conceyu de Cangues d’Onís organiza les xornaes gastronómiques de productos de La Vega’l Seya, que van tener llugar los díes 8, 9 y 10 de xunu, cola participación de restorante y sidreríes que yá confirmaron los sos menús pal eventu. Esta cita cola gastronomía de los Picos d’Europa afálase una añu más dende Incatur, que “quier asina promocionar los productos de calidá que se faen nesta comarca y que tienen una perfeuta preparación culinaria nos fogones de los chigres de la zona”.

En total van ser 18 los restoranes que van ufiertar lo meyor del so saber facer gastronómicu. Alimentos como les verdures, los quesos, les carnes, el pescáu, la caza o les llegumes, van completase con postres de tou tipu. Caún de los chigres va ufiertar menús con platos con precios estremaos, “pa que los clientres escueyan el que meyor s’adauta a los sos gustos” y claro ta, a les sos necesidaes.

Amás, aprovechando la celebración d’estes Xornaes y les fiestes de San Antón, dende’l Centru Comercial de los Picos d’Europa en Cangues d’Onís, ponse en marcha una promoción de productos estrella, “que van podese mercar a precios especiales rebaxaos”, ente’l vienres 8 y el domingu 17 de xunu. Los establecimientos van indicar nos escaparates los productos en promoción.

Redacción.

Los díes 7, 8 y 9 de xunu va celebrase la la I Amuesa de Vinos y Productos Ecolóxicos de Calidá, organizada por Pablo Sampedro, presidente d’ACG Enoarte y Serxu Solares, que va ser el direutor de la I Amuesa. La presentación del actu foi ayeri nel Xardín Botánicu y asistieron, amás de los organizadores, Ana Casino, direutora del Xardín Botánicu, Joaquin Miranda xerente de la Sociedá Mista de Turismu de Xixón y el cocineru Sergio Rama.

Na presentación pudieron prebase dellos vinos que van tar presentes nel certame. La seleición de bodegues, comentaron los organizadores, “foi cuidada cola intención d’ufrir namás dalgunes d’aquelles que meyores vinos faen”. Ente les denomaciones d’orixe van tar Jumilla, Bullas, Madrid, Navarra, Cava, Pened.

Na amuesa los visitantes van poder prebar toos estos productos y los ellaborados pol prestixosu cocineru asturianu Sergio Rama. Amás convoquen el Primer Concursu de vinos ecolóxicos ‘Botánicu de Xixón’, que va otorgar los premios ‘Texu d’Oru’ al meyor vinu tinto, blanco y rosao del certame.

Redaición

L’Asociación de Sidreríes de la Gascona d’Uvieu celebren esta fin de selmana la 8ª Preba de la Primer Sidra de la Temporada con una serie d’actos alredor de la cultura de la sidra. Esta tarde presenten estos actos con una espicha de baldre pa los asistentes a la presentación. Va ser a les ocho la tarde nel Club de Prensa de La Nueva España.

Y yá esti domingu 22, los actos van entamar a les once la mañana cola Preba Oficial, per parte d’espertos na materia y cola presidencia d’honor de la Conseyera de Mediu Rural y Pesca, Servanda García. La sidra va echala’l Campeón d’escanciadores d’Asturies 2006, Pablo Costales.

Ente les doce y les dos y media del meudía va celebrase la Preba Popular, onde va repartise sidra ente los asistentes, pa lo que ye necesario mercar un vasu y un pañuelu de la fiesta. D’ente los votos de la xente saldrá’l llagar ganador d’esti añu. La 8ª Preba va cuntar con un pregón de David Rivas, Profesor Titular d’Estructura Económica de la Universidá de Madrid y conocíu nos ambientes sidreros pol so llibru ‘La sidra asturiana’.

Nos actos organizaos pola Asociación de Sidreríes de la Gascona d’Uvieu participen Llagar Cortina, El Gobernador, Estrada, Orizón, Foncueva, Vallina, Herminio, La Nozala, L’Argayón, Menendez, Muñiz, Roza y Trabanco.

El Conseyu Regulador de la Denominación d’Orixe Protexida “Sidra d’Asturies, va amuesar les tres variedaes de sidra que s’acueyen a la denominación d’orixe. El Salón Alimentaria de Castilla y Lleón va cellebrase dende’l 11 hasta’l 15 de marzu acoyendo a profesionales del mundu agroalimentariu.
Les clases de sidra que tán embaxo la protección del Conseyu Regulador son la sidra natural (tradicional y de mesa) y la sidra de doble fermentación.

La sidrería Tierra Astur de Cualloto entama pa esti xueves, 1 de marzu a partir de les 21:30, la so Fiesta del Oriciu. Nesta fiesta los oricios van ser consumíos de la forma tradicional, con mazu, baberu y tabla de madera. Ente los platos d’esta fiesta gastronómica figuren dende les tortielles a les croquetes a base d’oricios. La fiesta tará amenizada pola actuación del Duo Astur.
El preciu únicu ye de 18€. La sidrería Tierra Astur va poner un autobús pa la xente que venga dende Xixón a esta fiesta del oriciu. P’apuntase al autobús hai qu’unviar un corréu a lasidrainfo@yahoo.es

Los tres grupos parlamentarios de la Xunta Xeneral apoyaron ayeri una proposición non de llei qu’insta al Conseyu de Gobiernu asturiana a posicionase “a favor de la protección activa de la sidra pa qu’esta reciba un tratau diferenciáu de les bebides alcohóliques conteníes nel artículu 2 del borrador de llei de Medíes Sanitaries pa la Protección de la Salú y la prevención del Consumu de Bebides Alcohóliques por menores”

La proposición incide na baxa graduación alcohólica de la sidra asina como la importancia cultural que tien la bebida na vida asturiana; asina mesmo nun escaez la importancia de los sectores productivos vinculaos a la mazana asturiana.

La Xerente del Conseyu Regulador de la Sidra, Reyes Ceñal, el presidente de l’Asociación de Sumilleres d’Asturies, Ceferino Cimadevilla y el presidente de l’Asociación Hostelera d’Asturies, Alfredo García ufrieron ayeri una rueda de prensa pa sorayar la gravedá que tienen les midíes sanitaries que’l Ministeriu de Sanidá quier implantar, alrodiu de la proteición al menor, pal sector sidreru d’Asturies.

Reyes Ceñal dio anuncia de que’l sector ya tien previsto aconceyar col Ministeriu de Sanidá pa negociar un borrador d’anteproyectu que podría suponer grandes perdides económiques pa los llagareros y el desaniciu de les tradiciones propies del país, anque la posición del Ministeriu ye la de nun dexar fuera de la llei a nenguna bebida alcohólica

El Gobiernu del Principáu ya tresmitió la so oposición frontal al testu por considerar que va totalmente a la escontra de la cultura tradicional asturiana. Na mesma dirección ta posicionáu’l Partíu Popular Asturianu.

La Feria de Muestres de Xixón acoyerá la feria “Sicer” na que productores de tou’l mundu aconceyarán pa presentar la sidra de los sos países. La feria, de la que yá diera anuncia Asturnews, enmarcaríase dientro del conveniu robláu énte’l Ministeriu d’Agricultura y el Gobiernu Asturianu pa la difusión y promoción de la bebida asturiana

Dende’l día 3 y hasta’l 7 de mayu la Feria de Muestres de Xixón convertiráse na capital mundial de la bebida fecha de la mazana.
Ente les delegaciones que van participar nesta Feria hailes de países tán llonxanos como’l Xapón, el Quebec, o los Estaos Xuníos; asina como representaciones europees y de la península ibérica.

Na feria participarán más de 60 productores qu’amuesarán la forma de facer los cerca de 300 tipos de sidra que se consumen nel mundu.

El Ministeriu d’Agricultura y el Gobiernu Asturianu roblen un conveniu pa promocionar la sidra

La sidrería Tierra Astur de Cualloto entama’l so Tercer Samartín del Gochu Astur Celta” a partir del día 17 de xineru y hasta’l día 21 de xineru. Durante estos díes la sidrería desendolcará actividaes venceyaes a la matanza del gochu astur-celta.

Estes xornaes busquen la revitalización del gochu’l país na sociedá asturiana, faciendo un apueste pola recuperación de la castra pol so interés etnográficu y cultural asina como poles sos cualidaes gastronómiques. Énte los actos que se van facer a lo llargo d’esti Samartín del Gochu Astur Celta destaquen la presentación del vídeu “La matanza”, l’amuesa de preseos que s’empobinaben al Samartín; l’actuación de la bandina “La Curuxa” y de Milio’l de Nido durante la espicha del xueves; o la presentación del Comvivium Asturias de Slowfood, en contraposición a la fastfood.

Sidrería Tierra Astur