Gastronomía

El gochu d’oreya l.larga o tebergán va ser el protagonista esti sábadu, 2 d’ochobre, en Santolaya de Morcín. Arriendes de poder conocer los meyores exemplares de la raza autóctona, de doce a una habrá una preba gratuita de picadillu con tortos. L’actu va celebrase nel recintu de l’Asociación de Muyeres de Morcín “So La Malena” que servirá un menú de xinta.

El númberu dedícase al Festival de la Sidra Natural de Xixón, el mes de la sidra en Villaviciosa o’l centenariu de Sidra Roza en Xixón, ente otros temes. La revista pue lleese en papel o descargase de baldre.

La edición diecinueve de la fiesta xixonesa de la sidra dio esta fin de selmana los sos premios añales. El merecedor del “Premiu Eloxu d’Oru” a la meyor sidra echao nel certame foi pa Camín, de Llagar Trabanco.

El “Premiu del Públicu” llevólu la sidra del llagar J.R. Alto Infanzón.

Esti añu, per primer vegada, entregábase un premiu ”a la etiqueta más guapina de la fiesta”, que da’l Grupu Sidrastur de Coleccionismu Sidreru. Estrenó’l palmarés Sidra Angones.

Nel mercadín que se celebra alredor de la fiesta tamién hai premios cada añu. El puestu ”más prestosu” foi esti añu Oleum, mientres que ”les mercancíes meyor presentaes” taben en Viandas y Saberes.

El premiu al productu más novedosu foi pa Nemoralia, pola so bisutería de madera de pumar.

Alumnos y profesores de la Universidá Asturiana de Branu van poder prebar esta tarde, de magar les 20:30 hores, el primer vinu etiquetáu n’asturianu, “L.lumés”, que se produz, amás, nel mesmu conceyu onde se celebren los cursos de l’Academia de la Llingua Asturiana y la Universidá d’Uviéu. Responsables de Bodegas Oubanca van averase hasta’l cursu pa probar la primer añada d’esti vinu que fala na nuesa llingua.

Yá pue descarse de baldre la revista “La Sidra”, nel so númberu 79, que pertenez al mes de xunetu. Nesta nueva edición de la publicación recuéyense reportaxes sobre’l Festival de Nava, la sidra en Llaviana o’l Llagar Orizón.

La Casa Posafueles, chigre de la Xunta pola Defensa de la Llingua Asturiana, va acoyer esti xueves, a partir de les nueve la nueche, la presentación del primer vinu etiquetáu n’asturianu, L.lumés. Un caldu de Cangas que va poder prebase acompañándolu con choscu, empanada, quesu y sintiendo los sones de la sesión folk de los xueves.

El yá tradicional ‘Tour del Llagar’ qu’entama la revista La Sidra va celebrase esti añu’l 26 de xunu. Nesta sesta edición van visitase con guíes los llagares Canal (Xixón), Frutos (Villaviciosa), Orizón (Nava), Alonso (Nava) y El Piloñu (Nava). Na escursión va celebrase espicha nos llagares Canal y El Piloñu. El preciu de Tour, qu’inclúi autobús, sidra, espiches, musica… ye de 45 euros.

El Tour del Llagar entama a les 13:00 hores y acabará a les 23 hores. Pa inscribise hai qu’ingresar los 45 € na cuenta 2100 1452 82 0200055220 poniendo nome y telefonu de contactu. Les places son llimitaes per rigurosu orde d’inscripción. Pa más información pues escribise al corréu lletrónicu infolasidra@gmail.com o llamar al teléfonu 652 594 983.

La Sociedá Rexonal de Turismu (SRT), en collaboración cola Oficina Española de Turismu n’Estocolmo, programó, dientro del plan d’aiciones de promoción del Turismu Gastronómicu, la publicación de dellos reportaxes sobre gastronomía asturiana nel diariu nacional suecu “Svenska Dagbladet”. Pa ello, el periodista Lars Collin y el fotógrafu Mauro Rongione entamaron una visita de cinco díes de duración pel Principáu d’Asturies.

Nel trescursu de la selmana, dambos van tener la oportunidá de descubrir la riqueza gastronómica de la nuesa tierra y participar n’estremaes actividaes encaminaes a afondar na cultura asturiana venceyada a la producción de productos agroalimentarios. Asina, ta previsto que participen en dos de los talleres gastronómicos “Saborgando’l Paraísu” qu’organiza’l Centru de Formación Agroalimentaria de Gozón, o que visiten empreses de distribución y producción agroalimentaria, como ye’l casu de COASA o la quesería Redes. Les mentaes actividaes van compatibilizase con un ampliu programa de visites ente les que s’inclúi un día nel Transcantábrico o visites a los principales recursos turísticos y culturales d’Uviéu y Xixón.

Los resultaos d’esti programa de viaxe van poder vese enantes del branu cola publicación de tres reportaxes nel diariu suecu “Svenska Dagbladet”. Con 350.000 llectores diarios, “Svenska Dagbladet” ye’l segundu diariu suecu más espardíu, lo que posibilita garantizar el máximu espardimientu de los nuesos productos y de la nuesa tradición culinaria nesti mercáu de perfil medio-altu.

El proyectu Eye, de La Llaboral y el Xardín Botánicu Atlánticu de Xixón, tien previstu’l taller “Vamos facer Sushis”, empobináu a mozos de 8 a 16 años, y al preciu d’8 euros. El taller va facese’l domingu 9 de mayu de 10:30 a 13:30 nes instalaciones de l’asociación.

Nel cursu enséñase a facer el sushi llamáu maki, ensin usar alimentos crudos. A la fin del taller cómese lo guisao. Imparten el taller Javier Gaspar Castro y José Joaquín Sánchez Escayu de l’Asociación d’amigos del Xapón.

P’apuntase ha llamase al teléfonu 902 306 600 o entrar na web www.laboralciudaddelacultura.com

Esti sábadu, 30 de xineru, a partir de les 10 de la mañana, Proaza va acoyer un mercáu agroalimentariu dientro de les Xornaes Gastronómiques de los Nabos y el Quesu de Fuente. Dientro del actu van vendese productos del conceyu, tando abiertu’l mercáu, hasta les ocho, del domingu 31.