Galerías 2008/2014

A les 11 la mañana d’esti llunes, tenía llugar la inauguración del I Congresu de Cultura Xaponesa, que ta dedicáu esti añu a la fusión de cultures ente esti país asiáticu y Asturies. A la mesma asistieron, el rector de la Universidá d’Uviéu, Vicente Gotor; el conceyal de cultura d’Uviéu, José Suárez Arias-Cachero “Felechosa”; l’agregáu cultural de la Embaxa del Xapón n’España, Naoki Yokobayashi; Etsuro Sotoo, artista responsable de les obres escultóriques de la Sagrada Familia de Barcelona y Javier López Espinosa, presidente de l’asociación organizadora.

López Espinosa recordó na so intervención “la importancia del intercambiu cultural y de la conocencia ente países estremaos, anque cada vegada menos” y dio les gracies a los collaboradores y patrocinadores d’esti alcuentru. Pela so parte, el conceyal de cultura destacó “la especial sensibilidá pa colos raigaños asturianos de la organización” y “la importante presencia de la llingua asturiana y de los escritores y estudiosos llocales, como la presentación del llibru d’haikus n’asturianu d’Esther García”.

La representación xaponesa de la mesa, formada por : Sotoo y Yokobayashi , destacó la importancia de dar a conocer la cultura de Xapón, “la segunda potencia mundial” recalcó l’agregáu cultural de la embaxada, que presentó la conferencia inaugural, onde fizo un averamientu a la hestoria de les rellaciones ente l’estáu español y el xaponés.

Vicente Gotor pesllaba l’actu recordando la importancia que-y da la Universidá “a la promoción de les llingües”, que pal Rector suponen “una ventaya importancia p’atopar trabayu nel mercáu llaboral d’anguaño”.

Miembros xaponeses y asturianos de la mesa pesllaron l’actu col intercambiu de dellos llibros. Asturnews ufre imáxenes de la primer xornada d’esti Congresu de Cultura Xaponesa.

El recital de Pianu de la prestixosa pianista Hisako Hiseki, especialista en música española, terminó cola interpretación del Asturies patria querida, himnu d’Asturies. Asturnews ufre les imáxenes del recital, en vidiu y semeyes.

La manifestación convocada pola Xunta pola Defensa de la Llingua Asturiana salió pocos minutos dempués de les cinco de la Estación del Norte d’Uviéu percorriendo la cai Uría p’acabar na Plaza d’España, cabo la sede de la Conseyería de Educación y Ciencia. Yá ellí, y frente a les alredor de 600 persones participantes, Paula Cristobal, lleó’l discursu de la organización nel que se denunció la situación de la llingua asturiana nel sistema educativu, que pal colectivu convocante “dexa ver a les clares que la política de promoción llingüística que nos quieren vender ye un fraude”.

Na marcha, abanderada pol gaiteru Llorián García, pudo vese a nomes propios de la política asturiana, como’l diputáu d’IX, Francisco Javier García, el director xeneral de l’Axencia Asturiana de Cooperación al Desenrollu, Rafael Palacios, de Bloque por Asturies, Faustino Zapico, voceru d’Unidá Nacionalista Asturiana y Daniel Cueli, secretariu xeneral d’Andecha Astur, ente otros.

Na Plaza d’España, los convocantes aseguraron que la formación del profesoráu “ta en peligru” y pidieron, pa evitar esti problema “la creación d’una Mención de Llingua Asturiana que permita la formación de los futuros mayestros y mayestres de Llingua Asturiana y la presencia d’asignatures de Llingua Asturiana nos estudios comunes d’Educación Infantil y Primaria en Maxisteriu, que permita la formación mínima necesaria pa que cualquier futuru mayestru o mayestra pueda desarrollar la so actividá docente na realidá sociollingüística d’Asturies, garantizando la igualdá de derechos llingüísticos y educativos de los neños y neñes falantes d’asturianu”.

Asturnews ufre una galería coles semeyes de la manifestación.

Semeyes de la manifestación d’esti sábadu n’Uviéu

Asturnews ufre la galería más completa de la rede, con más de 100 semeyes de la gala d’esti sábadu en Mieres, onde Alfredo González resultó ganador del Premiu al Meyor Cantar en Llingua Asturiana.

Galería de semeye de la gala “Premiu al Meyor Cantar 2009”