Fiestes

El Conceyu de Bimenes celebra esti sábadu 2 la so IX Fiesta de la Oficialidá con una xornada corrompinada d’actividaes. Dende primeres hores de la mañana músicos populares, acompañaos polos Pauliteiros de Miranda do Douro, van facer los sos pasucais y al meudía será la hora del pregón oficial. El caderalgu de la Universidá del País Vascu y académicu de la Llingua Francisco Llera Ramos ye l’encargáu esti añu de pronunciar la parte reivindicativa y reflexiva de la Fiesta. Pela tarde amueses de deporte tradicional a cargu del Grupu Deportivu d’Entibadores Mineros del Caudal, un festival de tonada y pela nueche los grupos Xera y Los Berrones van poner la corona a la folixa.

La Fiesta de la Oficialidá llega mañana al so día grande después d’una selmana bayurosa n’actos culturales y debates alrodiu de la realidá llingüística actual. Na tarde d’esti viernes 1 entréguense los premios del concursu de cuentos entamáu pol conceyu yerbatu con motivu de la Fiesta. Xosé Ramón Martín Ardines va ser el que recueya’l primer premiu d’esti concursu, xunta a los finalistes Xosé Nel Riesgo y Carlos Montero. Una sesión de monólogos a cargu de Milio’l del Nido y Cellero piesllen la selmana d’actividaes darréu la entrega de premios.

El festival Derrame Rock, qu’esti añu se celebra nel llugar pravianu d’Agones, va complementar el cartelu de les sos actuaciones musicales con unes xornaes entamaes en colaboración cola Fundación Juan Muñiz Zapico y el Conseyu de la Mocedá dedicaes a remembrar la memoria de la resistencia antifranquista. Embaxo’l títulu de Derramidea van entamase alcuentros con supervivientes d’esi momentu hestóricu y proyectase diversos documentales sobre’l Maquis y los prisioneros republicanos nos campos nazis.

También se va debatir nestes xornaes alrodiu la piratería discográfica y la compañía Margen va poner n’escena el so espectáculu War. Derramidea ufierta al empar la posibilidá de visitar entrambes esposiciones fotográfiques: una sobre la estancia n’España del míticu Che Guevara y otra sobre los diez años d’esistencia del macrofestival.

Les xornaes culturales del Derrame Rock 2005 escomiencen el viernes 1 con una mesa redonda moderada por Francisco Prado Alberdi na que se van poder escuchar los testimonios de varios protagonistes directos de la guerrilla armada asturiana: Manolín el de Llorío, Francisco Martínez “Quico”, Felipe Matarranz y Jesús de Coya. Esi mesmu día va proyectase’l documental “Maquis” producíu por Canal Historia.

El sábadu 2 los protagonistes d’estos alcuentros cola memoria hestórica van ser los supervivientes de los campos d’esterminiu naci col testimoniu de Angelita Andrada, de Amical Mauthausen, nuna conferencia presentada pol periodista Xuan Cándamo. Darréu va proyectase’l documental “Esclavos vascos del III Reich”, una coproducción d’Euskal Telebista y Canal de Historia.

Tres l’homenaxe a la resistencia antifranquista el domingu 3 Derrameidea acueye una mesa redonda sobre “Música y piratería” cola presencia de Manuel de Benito (SGAE), el locutor Mariscal Romero, los músicos Rafa Kas y Jorge Martínez, Juan Villadangos de Tiendas Tipo, Sandra Serrano de Sol Música y Diego Martínez Pérez de Music for us.

Va ser el contrapuntu de discutiniu y reflexón a un festival que cumple la so década d’esistencia con un cartelu más diversu y completu que nunca. Dende’l viernes 1 al domingu 3 van desfilar pelos escenarios simultáneos del Derrame grupos y músicos como Dixebra, Banda Bassotti, Mago de Oz, La Mala Rodríguez y Orishas.

Derramidea

Dixebra vuelve a Xixón pocos díes después del so pasu pela Nueche de San Xuan. La cita ye alrodiu la medianueche en Castiello de Bernueces y los avilesinos comparten escenariu con La Bandina. Tal como ficieron nel so conciertu de va unos díes na Playa de Poniente, esta nueche van presentar los temes del so nuevu discu “Nun hai novedá”, xunta a les sos canciones de siempre. El prósimu sábadu, Dixebra sigue la so xira veraniega con un nuevu conciertu en Pravia dientro’l festival Derrame Rock.

La Nueche de San Xuan llevó’l fueu máxicu de les sos llaparaes inmemoriales d’un cabu al otru d’Asturies ayer cuando’l reló marcó l’empiezu d’esta celebración de fondes reminiscencies paganes. Los puntos calientes de la fiesta tuvieron nes fogueres de Xixón y Uviéu, qu’allumaron les actuaciones de La Col.lá Propinde y Dixebra nun llugar y de Tejedor y el grupu Margen nel otru. Corvera, Mieres, La Pola Sieru, Grandas de Salime, foron otros de los llugares asturianos que vivieron esta nueche ente llaparaes y verbenes.

Miles d’asturianos fueron ayer fieles un añu más a la so cita con San Xuan, el patrón cristianu que recoyó’l testigu de la vieya celebración pagana de too Occidente en remembranza del solsticiu de veranu. Música folk, rock combativu astur o rock a seques, verbenes con orquesta o representaciones vives de la esencia más tradicional d’esta fiesta repartiéronse a lo llargo del país na primer romería del calandariu estival.

Pa los amigos de celebrar San Xuan abellugaos al calor de los sones de la música folk nun entornu propiciu a les eventualidaes máxiques,

Corvera volvió ser un añu más el so sitiu d’alcuentru, nuna nueche que tuvo como protagonistes a tres de los grupos más innovadores d’esti xéneru n’Asturies: Llangres, La Tarrancha y Batulax. Mieres festeyó con fidelidá al significáu orixinal d’esta folixa el so día grande cola tradicional Danza Prima de San Xuan alrodiu de la foguera. Los Berrones animaron la verbena de La Pola Siero y Grandas de Salime quiso caldiar la so foguera con un conciertu de dos grupos cabezaleros de la escena hard de la tierra: Mala Reputación y Aprieta el Kulo. Dixebra y primero La Col.lá Propinde fueron les estrelles de la nueche en Xixón y los Tejedor allumaron con lluz propio na plaza la Catedral d’Uviéu. Al empar, nun hubo llugar nin conceyu del nuestru país que nun quemara la so particular foguera nesta celebración que rescampla como nenguna otra’l sentimientu comunal de pertenencia a una tierra y a un mesmu enfotu de perpetuase nel tiempu al través del rellumor vivificador del fueu.

L’empiezu del calandariu festivu del veranu cola foguera de San Xuan sigue’l so aldu esti fin de selmana cola celebración de diversos festivales de música folk pa la nueche del sábadu 25. Asina el Parque del Oeste d’Uviéu acueye un añu más los Alcuentros de música tradicional, organizaos pola asociación Trebolgu; Nava sigue celebrando’l Gongresu Internacional sobre la gaita con un conciertu de bandes y una nueche folk; y La Pola Llaviana, entama un mercáu tradicional que remata coles actuaciones de Felpeyu y Los Ciquitrinos.

Nos Alcuentros de Trebolgu n’Uviéu escomiencen na mañana del sábadu 25 con un desfile de gaiteros peles cais del barriu L’Argañosa. Pela tarde a les 20.00 nel Parque de l’Oeste les bandes de gaites Esbardu d’Uviéu y Llariegu de Sariegu ufierten una actuación colo más significativo del so repertoriu. El platu fuerte d’estos alcuentros ye a les 22.00 hores, cola nueche folk na que van participar les pandereteres Dulkamara, los cántabros Manuel Luna y Brena La Música, pa detrás los riosellanos Corquiéu, que presentarán el so nueu discu Salia, acabante salir al mercáu, y los mierenses Skanda, col trabayu Sangre d’Ochobre.

En Nava siguen el fin de selmana les actividaes del Congresu Internacional de la Gaita y na tarde del sábadu va celebrase un desfile de les bandes participantes nel eventu, que vuelven actuar pela nueche nun festival na Plaza de Manuel Uría. La capital del conceyu de Llaviana acueye tamién estos díes un mercáu tradicional nel que va haber amueses de xuegos populares asturianos y actuaciones teatrales a cargu de la compañía Yeppa y el grupu Retueyu. A les 12 la nueche na plaza l’Ayuntamientu de La Pola Llaviana va entamar un conciertu de Felpeyu y los Ciquitrinos.

El grupu Dixebra xunto a La Col.lá Propinde van ser los encargaos de calecer la Foguera de San Xuan na nueche d’esti xueves 23 na Playa de Poniente en Xixón. La programación de les otres folixes del San Xuan nesti añu ufierta les actuaciones de Llangres, La Tarrancha y Batulax na Foguera vera l’embalse de Tresona, en Corvera y un conciertu del grupu Tejedor na plaza la Catedral d’Uviéu. Mieres, que celebra el 24 al so patrón, apuesta polo tradicional y va festeyar la so Foguera con un conxuru a cargu de l’artista María Xesús Rodríguez y cola so Danza Prima de San Xuan.

Les ufiertes pa la nueche máxica de la primer gran folixa del veranu presenten una gran variedá, asina, La Pola Sieru acueye l’actuación del conxuntu Los Berrones y Grandas de Salime una nueche de rock duru con Mala Reputación y Aprieta el Kulo. Con verbenes o conciertos, van ser sicasí, prácticamente tolos llugares del mapa d’Asturies los que prendan

fogueres esa nueche y celebren d’estamiente una fiesta que tien los sos órixenes na membranza pagana del solsticiu de veranu.

Los puntos calientes del mapa de les fogueres de San Xuan, van tar, ensin dulda, na Playa de Poniente de Xixón, cola presencia de los al.leranos La Col.lá Propinde y el rock combativu y enerxéticu de Dixebra, un grupu que tien en Xixón una de les places con más puxu en siguidores de los avilesinos. La clásica Nueche Celta de Corvera remanez esti añu después d’una cierta incertidume respective a la so contuinidá y failo con tres de les bandes más significatives de la escena nueva de la música asturiana: Llangres, La Tarrancha y Batulax. Uviéu, a la postre, escueye una nueche más tranquila al son de los ritmos de Tejedor, nun conciertu que va tener como invitáu d’escepción al mánayer xeneral del Desfile de San Patriciu de Nueva York, John Dunleavy, de visita oficial n’Asturies convidáu pol gobiernu del Principáu. Enantes, na Plaza la Catedral, la compañía de teatru Margen va poner n’escena la so particular contribución al cuartu centenariu del Quixote con “Vida de Don Quijote y Sancho”.

Tolivia organiza esti fin de selmana’l I Mercáu tradicional. La iniciativa, sofitada pol Ayuntamientu de Llaviana y l’asociación cultural El Cascayu, inclúi un ampliu programa d’actividaes qu’entamen el sábadu 4, a les cuatro la tarde, y na que destaquen representaciones teatrales, actuaciones musicales y presentaciones de llibros. Asinamesmo va poder vese en directu’l trabayu de cesteros, filanderes, artesanos de la maera, del azabache, tiñiores y madreñeros; amás de cuntar colos tradicionales puestos de gastronomía típica asturiana.

Col envís de fomentar la vida social y cultural de la localidá llavianesa de Tolivia, les entidaes organizadores quieren tamién con esti mercáu favorecer el diálogu y la convivencia interxeneracional, recuperando y espardiendo ente los más mozos la cultura asturiana. Pa ello organicen un fin de selmana festivu con un programa enllenu d’actividaes pa toles edaes, anque especialmente pensáu nes nueves xeneraciones.

Asina, el sábadu día 4, entamará’l mercáu con un percorríu oficial acompañáu pola gaita y el tambor. A les seis y media’l Grupu Teatru “La Salle” representará les obres “La bruxa Lolina lléete la manina” y “Cuentinos políticamente correctos” na plaza La Peruyera. Mentestanto, en Campu La Iglesia va haber una esposición d’asturcones, con paseos pa los nenos. Una muestra de baille tradicional y la obra “Danza del solsticio de verano”, precederán l’actuación d’una bandina tradicional asturiana y la muestra d’ellaboración de cerámica cola que terminará’l primer día del mercáu.

El domingu 5 de xunu entamará a les doce la mañana col tradicional pasacais de gaita y tambor. A les doce y media’l Grupu Teatru “La Salle” será l’encargáu de representar “Aventures colos tirititeros”, mentes que nel llagar de La Pipa, a la una la tarde, va poder sentise tonada asturiana. A la una y media, Juan Fernández y Tante Blanco, presentarán y charrarán sobre’l proyectu de dibuxos animaos basaos na novela “Hestories piquiñines” del cantante Los Berrones. De tarde va repitise la muestra de baille tradicional, la esposición y paséu colos asturcones, y el Grupu Teatru “La Salle” representará varies obres pel recintu la feria.

Nos puestos va poder saborguiase y mercar productos típicos del país como panes, tortos, quesos, fayuelos o miel. Ellí mesmo va facese demostración de les llabores de cesteru, madreñeru, tiñior, talla de maera, filanderes, etc. asina como l’actuación d’un monologuista qu’animará un fin de selmana con claru sabor asturianu.

Próspero Morán, director d’Asturnews, foi esti vienres 15 d’abril l’encargáu de saludar a los mierenses nel empiezu de la celebración de la Folixa de la Primavera que se celebra a lo llargo de tol fin de selmana. El pregón tuvo protagonizáu por un tiempu dafechamente ivernal, que-y sirvió a Morán pa facer una comparanza col momentu ivernal qu’enta viven la cultura tradicional y la llingua asturiana, pa les que entá nun entamó la primavera.

La villa’l Camín conviertese nestos díes na capital d’Asturies de la cultura y el xolgoriu a lo llargo de tres díes corrompinaos d’actividaes múltiples y empobinaes a la participación de la xente nelles. Espiches de sidra, degustación de gastronomía del país, teatru, música y baile tradicionales, constitúin el programa de la Folixa d’esti añu, que cunta tamién coles ya tradicionales nueches de conciertos folk, qu’entamaron el vienres cola banda irlandesa Solas como grupu estrella al llau de N’Arba, Skanda y Mugar.

Mieres acueye estos díes una de les fiestes más singulares y atractives del calandariu de celebraciones que s’abre n’Asturies cola llegada del tiempu bonu, anque nesti añu’l tiempu bonu nun quiso acompangar la celebración. Costumes tradicionales como la espicha de primavera recobren el so significáu orixinal como manifestaciones de la identidá asturiana nel contestu d’esta celebración na que s’ufierta una bayurosa gama de propuestes lúdiques y culturares empobinaes a la participación nelles de tolos públicos. Esi ye’l distingu singular que fai de la Folixa de Mieres una celebración única n’Asturies y una de les meyor planificaes en cuantes programación d’actividaes.

Nesta edición sfoi Próspero Morán, director d’Asturnews, el que recueya’l testigu de los pregoneros d’años anteriores: el periodista José Luis Argüelles, en 2003 y l’escritor Xuan Bello na edición del añu pasáu. El so pregón animó a los mierenses nun dia dafechamente ivernal a cumplir col oxetivu fundamental de la Folixa: la participación activa de la xente nes actividaes propuestes pa convertir a la villa’l camín nel llugar más vivu del país a lo llargo de tres díes.

La música popular y el folklor tienen un papel destacáu na Folixa de la Primavera y dende la tarde del viernes 15 d’abril hasta la madrugada del domingu 17, percorren la villa del Caudal, pasucais de gaiteros y de la banda de música del conceyu; celebrase un festival de tonada de la mina, unos alcuentros de folklor y el Troféu de Gaita Asturiana “Memorial Chema Castañón”. Les nueches del viernes y el sábadu acoyeron los ya célebres conciertos de folk asturianu y internacional, cola actuación el viernes 15 de Skanda y el conxuntu irlandés Solas, y al día siguiente N’Arba y Mugar.

Amueses de baile tradicional enriba un escenariu y na cai, invitando a la participación nellos de la xente; y espectáculos de teatru concebíos pa la so representación n’espacios esteriores públicos, con un amuesa dedicada al teatru costumista asturianu, son otres de les propuestes de la Folixa. Nella resérvase un sitiu cimeru como espresión cultural propia del país a la sidra y a la gastronomía de raigón autóctonu, probablemente tamién pa que naide pueda dicir al final que la Folixa de la Primavera de Mieres-y supo a poco

Próspero Morán, director d’Asturnews, va ser l’encargáu de saludar a los mierenses nel empiezu de la celebración de la Folixa de la Primavera que se celebra’l prósimu fin de selmana. La villa’l Camín convertirase na capital d’Asturies de la cultura y el xolgoriu a lo llargo de tres díes corrompinaos d’actividaes múltiples y empobinaes a la participación de la xente nelles. Espiches de sidra, degustación de gastronomía del país, teatru, música y baile tradicionales, constitúin el programa de la Folixa d’esti añu, que va cuntar tamién coles ya tradicionales nueches de conciertos folk, nesta ocasión cola banda irlandesa Solas como grupu estrella al llau de N’Arba, Skanda y Mugar.

Mieres acueye’l prósimu fin de selmana una de les fiestes más singulares y atractives del calandariu de celebraciones que s’abre n’Asturies cola llegada del tiempu bonu. Costumes tradicionales como la espicha de primavera recobren el so significáu orixinal como manifestaciones de la identidá asturiana nel contestu d’esta celebración na que s’ufierta una bayurosa gama de propuestes lúdiques y culturares empobinaes a la participación nelles de tolos públicos. Esi ye’l distingu singular que fai de la Folixa de Mieres una celebración única n’Asturies y una de les meyor planificaes en cuantes programación d’actividaes.

Nesta edición será Próspero Morán, director d’Asturnews, el que recueya’l testigu de los pregoneros d’años anteriores: el periodista José Luis Argüelles, en 2003 y l’escritor Xuan Bello na edición del añu pasáu. El so pregón animará a los mierenses a cumplir col oxetivu fundamental de la Folixa: la participación activa de la xente nes actividaes propuestes pa convertir a la villa’l camín nel llugar más vivu del país a lo llargo de tres díes.

La música popular y el folklor tienen un papel destacáu na Folixa de la Primavera, asina dende la tarde del prósimu viernes 15 d’abril hasta la madrugada del domingu 17, percorrerán la villa del Caudal, pasucais de gaiteros y de la banda de música del conceyu; celebraráse un festival de tonada de la mina, unos alcuentros de folklor y el Troféu de Gaita Asturiana “Memorial Chema Castañón”. Les nueches del viernes y el sábadu van acoyer los ya célebres conciertos de folk asturianu y internacional, cola actuación el viernes 15 de Skanda y el conxuntu irlandés Solas, y al día siguiente N’Arba y Mugar.

Amueses de baile tradicional enriba un escenariu y na cai, invitando a la participación nellos de la xente; y espectáculos de teatru concebíos pa la so representación n’espacios esteriores públicos, con un amuesa dedicada al teatru costumista asturianu, son otres de les propuestes de la Folixa. Nella resérvase un sitiu cimeru como espresión cultural propia del país a la sidra y a la gastronomía de raigón autóctonu, probablemente tamién pa que naide pueda dicir al final que la Folixa de la Primavera de Mieres-y supo a poco