Escéniques

La Cuenca’l Caudal vuelve a tener teatru. L’Ayuntamientu de L.lena quier especializar como espaciu de representaciones dramátiques el coliséu ‘Vital Aza’, peslláu dende hai una década y a puntu de reabrir agora les sos puertes, baxo tutela municipal, con un aforu pa 390 espectadores y depués d’una inversión de 2,7 millones d’euros n’obres de remocicamientu.

La reapertura’l teatru, allugáu nel centru urbanu de La Pola L.lena y que funcionó como sala de cine hasta 1995, produciráse’l prósimu 7 d’ochobre, nun actu concebíu p’abrir les fiestes patronales de Les Feries y que protagonizará’l xefe de la Casa Real, Alberto Aza, que pronunciará’l pregón de los festexos y recibirá’l títulu de Fíu Adoptivu del conceyu.

A partir d’ehí, too son futuribles. L’envís del Ayuntamientu ye mantener una programación cultural estable na sala y apostar pola programación de representaciones teatrales -nos díes inmediatos a la reinaguración, la compañía Margen pondrá n’escena la obra ‘Anfitrión’-, pero’l Consistoriu sigue entá pendiente de firmar un conveniu a tres bandes que garantice un funcionamientu ensin sobresaltos.

Según fontes del Ayuntamientu de L.lena, ésti permanez a la espera de que la Conseyería de Cultura, Comunicación Social y Turismu ellabore un proyectu de xestión acordies col compromisu verbal alquiríu en meses pasaos pol director xeneral de Promoción Cultural, Carlos Madera, d’entamar una xestión compartida ente’l Principáu, l’Ayuntamientu y una tercer entidá asturiana especializada en programación cultural, que según el propiu Consistoriu pue ser l’Institutu del Teatru y les Artes Escéniques (ITAE).

Depués del remocicamientu al que foi sometíu, el teatru ‘Vital Aza’ amosará una nueva cara esterior, con acabaos en maera y una gran cristalera, y pondrá a disposición del públicu dos grandes espacios: la sala principal, integrada por un patiu de butaques y un pisu superior, y un espaciu polivalente pa ensayos o conceyos.

Actores y empresarios piden más recursos y espacios pa evitar la “desapaición” del teatru profesional

Siguir suañando, pero con un güeyu mui pendiente de lo que faiga Corporación Dermoestética. Los responsables de la plataforma ‘Cultura pal Arango’ dirixéronse nesos términos a les al rodiu de 300 persones que secundaron la manifestación convocada nes cais de Xixón pa reclamar la reapertura’l teatru como espaciu cultural.

Depués d’una marcha que trescurrió ensin incidentes y finó ensin megafonía énte la negativa municipal a otorgar el permisu correspondiente, ún de los voceros del collectivu, Boni Ortiz, llamó a los asistentes a “suañar, non a enfadase, pesie a que lo malo de los suaños ye que tarde o temprano acabes despertando” y alvirtió que “queda munchu camín per delantre”.

Lo malo d’esa sienda inda por recorrer, apuntó Constantino Hevia, otru de los responsables de la plataforma, ye que l’Ayuntamientu sigue amosando na so opinión una patente “falta de voluntá” de recuperar realmente la sala, magar del reciente compromisu de l’alcaldesa de la ciudá, Paz Fernández Felgueroso, de ‘conxelar’ por dos meses la conversión del Arango en macroclínica d’estética y facilitar la fechura d’un estudiu alternativu de viabilidá.

Esa promesa, a xuiciu de ‘Cultura pal Arango’ ye más bien un “xestu” qu’habrá venir acompañáu de fechos tanxibles, nuna reivindicación que los miembros del collectivu entá prevén llarga y na qu’esperen movilizar a la ciudadanía de Xixón como factor clave p’algamar los sos oxetivos. La conclusión: “Tamos en manos de Corporación Dermoestética, polo que-y encamentamos que retire’l proyectu”.

Esi sofitu espresu, cifráu hasta agora nes 6.000 firmes d’apoyu qu’acumula la plataforma, quedó reducíu esta tarde na cai a tres cientos de persones, cifra que los responsables de la plataforma xustificaron pola “dificultá” de movilizar a los ciudadanos y de la que faen una llectura positiva: La ‘batalla’ del Arango fue quien a articular un frente de profesionales de les artes escéniques qu’antes nun esistía como talu en Xixón.

Web de ‘Cultura pal Arango’

Nun taba nel guión, pero una afable rueda de prensa acabó n’encendíu debate énte les cámares. Representantes de los actores y la patronal de les artes escéniques reclamaron esta mañana n’Uviéu más recursos y sales de xestión mista pa evitar la “desapaición” del teatru profesional asturianu, a lo que’l director xeneral de Promoción Cultura, Carlos Madera, retrucó ensalzando la “grandísima” inversión del Principáu nesa estaya y asegurando que la ufierta escénica privada “ye cero”.

Con una vehemencia dafechu inusual nes sos comparecencies públiques, Madera replicó-yos a actores ya empresarios que’l Principáu y Caxastur son los únicos promotores de teatru en llocalidaes menores de 50.000 habitantes y precisó que la recuperación d’espacios culturales “va poco a poco y requier una grandísima inversión”.

Nesti sen, el director xeneral de Promoción Cultural reivindicó l’esfuerzu “sosteníu” del Gobiernu autonómicu nel reflotamientu de sales en desusu y citó como amuesa d’esi llabor la recuperación de los teatros Alejandro Casona, en Cangas; Clarín, en Sotu’l Barcu, y Vital Aza, en La Pola L.lena. Madera reaccionó con datos -400 representaciones promovíes pol Principáu esti añu, 24 compañíes movilizaes, 450.000 euros invertíos- a la petición de los representantes de la escena asturiana pa que se mitigue la “crisis d’apoyu” del teatru Colón, en Cangues d’Onís.

Llanzó esa demanda el representante de la Unión d’Actores d’Asturies, José Miguel Díaz, depués de sostener que’l teatru asturianu pasa por un “momentu críticu” nel que faen falta con urxencia, reclamó, un aumentu de los recursos por parte de l’Alministración -“que lleven más o menos conxelaos varios años”- y un públicu más críticu colos espectáculos pa desaniciar “la cultura gratuita porque sí”.

Pol so llau, Luis Vigil, representante de l’Asociación de Compañíes Profesionales de Teatru d’Asturies, contribuyó tamién a provocar l’airada rempuesta del director de Promoción Cultural, al argumentar que’l teatru “necesita munchu dineru públicu” pa superar la crisis y suxerir que les artes escéniques tengan un llugar específicu y singular nos Presupuestos Xenerales d’Asturies.

L’escenariu de la batalla verbal foi la sé de la Sociedá Xeneral d’Autores y Editores, onde Carlos Madera presidió la presentación de la quinta convocatoria de los Premios ‘Asturias’ de les Artes Escéniques. Los promotores de los galardones -que premiarán en nueve categoríes a los meyores autores, intérpretes y montaxes del añu- mantienen activa una páxina web pa facilitar la nominación de candidatos previa a la gala na que s’entregarán los premios, que se cellebrará’l prósimu 17 d’avientu nel Nuevu Teatru de La Felguera.

‘Cultura pal Arango’ llama a “suañar” cola reapertura’l teatru, pero declárase en manos de Dermoestética

‘Cultura pal Arango’ afronta una preba de sobrevivencia. La plataforma, que reclama la recuperación del teatru xixonés como espaciu cultural, plantega pa güei una manifestación na que los responsables del collectivu quieren midir el sofitu ciudadanu a la so reclamación. La marcha defenderá la participación popular na cultura de la ciudá, lloñe del “unos faen, el restu agüeyamos”.

Asina lo precisa’l cartafueyu col que ‘Cultura pal Arango’ convoca la manifestación, que saldrá a les 19 hores dende’l teatru y pidirá poles cais de Xixón la reapertura de la sala como espaciu cultural “dientru d’un proyectu xeneral d’afitamientu, espardimientu y esporpolle de les artes escéniques y musicales n’Asturies”.

La manifestación, con fecha prevista hai yá varies selmanes, cellebraráse nun momentu nel que Corporación Dermoestética asegura tener yá peslláu l’alcuerdu colos propietarios del inmueble pa xestionalu nos prósimos venti años como clínica d’estética, mientres l’alcaldesa de la ciudá, la socialista Paz Fernández Felgueroso, insiste en descartar una inyección de fondos municipales na recuperación del teatru.

Pol so llau, los miembros de ‘Cultura pal Arango’ enfótense entá en poder acceder al edificiu -pa lo que necesiten el preste de los dueños del inmueble-, pasu imprescindible pa sacar alantre el proyectu técnicu de viabilidá que’l collectivu yá tien en marcha pa valorar y tasar el remocicamientu del teatru como espaciu cultural.

Miembros de la plataforma entamaron ayeri un itinerariu guiáu por Héctor Blanco nel que recorrieron los llugares onde tuvieron asitiaes les primeres sales cinematográfiques de la ciudá, ente elles el primitivu teatru Xovellanos -onde se rexistró la primer proyección de cine, en 1896-, el María Cristina, el Roma, l’Albéniz, el Robledo y el cine Hernán Cortés.

Web de ‘Cultura pal Arango’

“Que nadie nun crea que’l teatru Arango va dinamitase; puen quitase les butaques, pero va conservase’l conxuntu”. L’alcaldesa de Xixón, Paz Fernández Felgueroso, écha-y con eses pallabres una nueva palada al distutiniu sobro’l futuru del céntricu teatru xixonés y descarta otra vuelta la inyección de perres municipales pa recuperar la sala, mientres la plataforma ‘Cultura pal Arango’ interpreta nes declaraciones de la rexidora “un guiñu pa siguir negociando”.

Asina lo manifestaron güei voceros del collectivu, que pesie al aparente pieslle del alcuerdu d’alquiler del teatru por venti años a Corporación Dermoestética insisten n’acceder al inmueble pa poder ellaborar el plan alternativu de viabilidá que yá tienen comprometíu.

“La pelota ta nel teyáu de l’alcaldesa”, aseguren los responsables de la plataforma, que s’enfoten na capacidá de Felgueroso pa paralizar la conversión del teatru nuna macroclínica estética. En respuesta a les pallabres de la rexidora municipal, los miembros de ‘Cultura pal Arango’ entienden que “Dermoestética ye la meyor dinamita pa cargase’l teatru”.

Poro, el collectivu volverá concentrase mañana a les puertes de la sala xixonesa y mantién la convocatoria d’una manifestación pal xueves 16 de setiembre, movilización na que los responsables de la plataforma esperen sondear el grau esactu d’apoyu ciudadanu col que cuenten pa siguir reclamando la recuperación del Arango como sala cultural.

Nun habrá nueva fecha, a lo menos a curtiu plazu. El recital que’l conxuntu arxentín Les Luthiers tuvo que suspender anueche n’Uviéu por mor d’una gran tormenta previa al espectáculu nun podrá ser treslladáu a feches prósimes tanto pola singularidá’l montaxe -que moviliza a una orquesta sinfónica- como pol calendariu de los artistes, que rematen mañana la so xira en cursu y prevén regresar a España en payares, pero con un espectáculu distintu.

Asina, Les Luthiers tien fixáu un ritmu de trabayu de casi una función diaria en Salamanca, Granada y Madrid -sucesivamente- ente los prósimos 14 de payares y 3 d’avientu, pa poner n’escena ‘Todo por que rías’, un montaxe que yá foi representáu nel teatru Xovellanos de Xixón y que traerá otra vuelta a los cómicos arxentinos a España p’actuar, como ye habitual nellos, n’espacios pesllaos.

Lo contrario, la decisión municipal d’allugar el recital previstu p’ayeri nel recintu esterior de les pistes de San Llázaru, obligó al Ayuntamientu y a la promotora de los artistes a suspender l’espectáculu momentos antes de la hora prevista d’aniciu, les 10 de la nueche, énte la gran torbonada d’agua, troníos y aparatu elléctricu que descargó enriba Uviéu a partir de les 21,30 hores.

Les más de 5.500 persones que mercaren yá la so entrada y agotaren l’aforu previstu nun llegaron siquiera a acceder al recintu y recibieron la noticia oficiosa de la cancelación mientres esperaben nuna llarga fila. Dase la circunstancia de que Les Luthiers taben acabante suspender tamién la so actuación previa, prevista en Ponferrada na nueche’l sábadu, por mor de les tormentes.

Los espectadores que diben asistir al espectáculu n’Uviéu podrán recuperar a partir de güei les perres de les sos llocalidaes nos hipermercaos d’El Corte Inglés y na oficina municipal de turismu L’Escorialín, asitiada nel Campu San Franciscu.

La plataforma ‘Cultura pal Arango’, que reclama la reapertura d’esi teatru xixonés como espaciu cultural baxo aval municipal, prepara un informe pal Ministeriu de Cultura con planos y detalles de la sala. Depués de censurar ayeri la inacción del Ayuntamientu, los integrantes del collectivu cellebrarán güei una nueva asamblea baxo la “escura” solombra de la cada vez más factible conversión del Arango nuna gran clínica de Corporación Dermoestética.

Nel enésimu episodiu del tortuosu cruce d’informaciones que vien arrodiando la reapertura al públicu del inmueble xixonés, los voceros de ‘Cultura pal Arango’ acusaron ayeri a l’alcaldesa, la socialista Paz Fernández Felgueroso, de mentir hai agora dos selmanes, cuando se comprometió a ‘conxelar’ la negociación de los propietarios del teatru con Corporación dermoestética pa busca-y un usu cultural a la sala.

Pesie a que poques hores depués d’esi compromisu, según ún de los integrantes de la plataforma, Boni Ortiz, los dueños del teatru dixeron tar dispuestos a facilitar l’accesu al Arango de los miembros del collectivu, siempre que la prensa nun tuviera presente, ‘Cultura pal Arango’ nun recibió dende entós “nin una llamada”, lo que lleva a pensar a los miembros de la plataforma que “tán tomándonos el pelu”.

Colos güeyos puestos na manifestación convocada pal prósimu 16 de setiembre en demanda d’un usu cultural pal teatru, el collectivu sigue reclamando la intervención del Ayuntamientu “al coste que seya”, magar que los responsables de Corporación dermoestética dicen tener peslláu l’alcuerdu p’alquilar la sala durante los prósimos 20 años y prevén entregar en cuestión de díes el proyectu técnicu pa remocicar l’edificiu y convertilu en clínica estética.

Web de la plataforma ‘Cultura pal Arango’

Los cursos de veranu que L’Academia de la Llingua desendolcó en Santantolín d’Ibias na primer quincena d’agostu dan a lluz un nuevu grupu de teatru n’asturianu. Depués del estrenu nesa llocalidá de la obra ‘Camín a Santiago, pasu ente pasu per Asturies’, interpretada por participantes nos cursos, el collectivu d’actores y actrices noveles busca la so continuidá y planea realizar funciones del espectáculu en diverses llocalidaes d’Asturies.

La primera d’elles sedrá Xixón. Los miembros de la compañía fundada n’Ibias, que s’autodenomina L’Ayalga Producciones, llevará a escena mañana, xueves, una adaptación pa neños del so montaxe fundacional nel parque de Les Palmeres, allugáu nel barriu de Contrueces. Depués, los integrantes del grupu enfótense n’actuar n’otros conceyos.

‘Camín a Santiago, pasu ente pasu per Asturies’ narra les peripecies propies de los pelegrinos que crucen tierres asturianes nel so itinerariu a Compostela, y represéntase a cuatro meses del final d’un Añu Santu Xacobéu que, según les primeres estimaciones, afita la emerxencia de los caminos llamaos del Norte como alternatives a otres rutes yá masificaes p’hacia la catedral de Santiago.

Teatru, danza y música clásica. Eses son les tres apuestes de los programadores culturales del Ayuntamientu de Xixón pal últimu trimestre del añu, nel que los ciudadanos podrán asistir a cuarenta espectáculos estremaos. El conseyu d’alministración de la Sociedá Teatru Xovellanos aprobó ayeri por unanimidá la programación pa ochobre, payares y avientu, qu’ufrirá abonos d’ente 18 y 43 euros.

Asina, los espectadores que quieran asistir a les funciones de danza de les compañíes Dani Panullo (3 d’ochobre), Cienfuegos U6-DT (6 d’ochobre) y Teresa Nieto (día 9) veránse beneficiaos pola tarifa más baxa d’abonos, y podrán acceder a les tres representaciones por un total de 18 euros.

Esa tarifa increméntase sustancialmente, hasta los 38 euros en patiu de butaques, pa otra triada d’espectáculos de danza: ‘El amor brujo’, pola Compañía de Blanca Li (23 d’ochobre); ‘Nicolais Dance Theatre’ (28 d’ochobre); y Don Juan y Molière, a cargu d’Eifman Ballet (10 de payares).

No que cinca al teatru, Xixón acoyerá nos meses d’ochobre, payares y avientu funciones de títulos renomaos como ‘Cinco horas con Mario’, que Focus Producciones pondrá n’escena el 24 d’ochobre; ‘Mi querido embustero’, representáu por Norma Leandro y Sergio Renán el 14 d’ochobre sobro la recreación de la correspondencia pasional ente l’escritor Bernard Shaw y l’actriz Stella Campbell; ‘El retrato de Dorian Gray’, el 16 d’avientu; y ‘Algún amor que no mate’, obra concebida por Dulce Chacón.

En mitá de tanta dramaturxa -pa la que los abonos cuesten ente 20 y 39 euros-, irrumpirán con fuercia la música clásica, que llevará al escenariu’l Xovellanos una decena de conciertos; el jazz, que tendrá un festival propiu a mediaos de payares coles bandes de Nnenna Freelon, Bill Bruford y Terence Blanchard; y la ópera, que va facese un furacu el 6 de payares cola representación de ‘Cossí fan tutte’, de Mozart.

La ufierta cultural pública de Xixón pal cuatru trimestre de 2004 inclúi amás la cellebración d’un festival de gospel n’avientu y la puesta n’escena durante cinco xornaes d’esi mesmu mes del musical ‘Mayumaná’, que vien de collechar destacaes bones crítiques nel ábitu internacional.

Alcuerdu peslláu pa que l’Arango funcione como una macroclínica d’estética a lo menos pa los prósimos venti años. Asina lo sostién na edición de güei del diariu ‘El Comercio’ Manuel Fernández-Arango, voceru de los propietarios, según el cual el propósitu de l’alcaldesa de Xixón de mediar na negociación entre los dueños del teatru y Corporación Dermoestética precipitó la firma de los últimos propietarios que yeren reticentes a esti alcuerdu.

De ser asina, el compromisu de la rexidora xixonesa, la socialista Paz Fernández Felgueroso, qu’hai agora una selmana anunció que ‘conxelaría’ la negociación con Dermoestética pa ganar tiempu y busca-y al Arango un usu cultural, tendría valío pa lo contrario que pretendía: Animar a los dueños del céntricu coliséu a entainar la firma del alcuerdu con Corporación Dermoestética.

Siempre según les declaraciones de Fernández-Arango a ‘El Comercio’, el contratu pactáu cola multinacional d’estética prevé que’l teatru se-y alquile a Dermoestética por un tiempu de venti años, ya inclúi una cláusula na que s’afita que l’alcuerdu tará en vigor de sutaque se faiga la obra necesaria pa reconvertir la sala en clínica privada.

Pol so llau, la plataforma ‘Cultura pal Arango’, que defende la recuperación del inmueble como espaciu cultural con aval municipal, realizó ayeri una nueva concentración énte’l teatru y anuncia que mantién la convocatoria de la manifestación que tien prevista pal xueves 16 de setiembre.