Escéniques

Una sala teatral de 350 butaques na planta baxa y tres opciones nel primer pisu: Un gran centru d’ociu con cafetería y tienda; sales pa esposiciones, congresos y cenes de gala; o les propies instalaciones de Corporación Dermoestética. La plataforma Cultura pal Arango plantega, nel so plan de viabilidá pa recuperar la sala como espaciu cultural, una intervención total sobro 13.300 metros cúbicos y una inversión de 1,6 millones d’euros.

Nel estudiu ellaboráu pol collectivu cultural, que recibió l’Ayuntamientu a finales de payares y que va presentase formalmente en públicu el prósimu miércoles, plantéguense siete grandes cifres pa sufragar el ‘rescate’ cultural del teatru xixonés: 900.000 euros p’acondicionamientu del teatru, 240.000 pa la estructura del edificiu, otros 180.000 pa igües nel contiguu cine Albéniz, 160.000 pa equipamientu escénicu y 126.000 euros más empobinaos a mobiliariu.

Otres dos partíes menores completen les cantidaes suxeríes pa remocicar el céntricu edificiu de Xixón: 48.000 euros baxo’l conceptu d’instalaciones en xeneral y 14.000 euros más destinaos a valtiamientos y llimpieza. En total, 1.668.000 euros, que los representantes de la plataforma cultural proponen financiar creando una nueva fundación d’investigación, promoción y difusión de la cultura asturiana, liderada pola propia Corporación Dermoestética, qu’asumiría el pagu de 1,2 millones (tola inversión prevista, menos los 434.000 euros necesarios pa dividir horizontalmente el teatru, que pagaría directamente Dermoestética).

Pa dotar de recursos a la hipotética fundación, Cultura pal Arango plantega la entrada nel proyectu de “mecenes ya entidaes protectores”, o bien repartir tolos gastos ente les principales instituciones y corporaciones de Xixón: Un 40 por cientu a cargu d’Ayuntamientu y Principáu, a partes iguales; un 30 por cientu, tamién a partes iguales, ente Autoridá Portuaria, Cámara de Comerciu y Caxastur; y participaciones cercanes al 5 por cientu de los sectores hoteleru, hosteleru y del comerciu.

El collectivu pola recuperación cultural del teatru Arango mantiénse a la espera de que l’Ayuntamientu decida si l’estudiu de viabilidá pal coliséu ye o non asumible, y en casu afirmativu, propicie’l pactu propuestu con Corporación Dermoestética, que yá ultima la so instalación nel Arango pa convertilu nuna gran clínica de tratamientos estéticos.

“Ye una propuesta viable y más que razonable”, defendió güei Boni Ortiz, representante de Cultura pal Arango, en declaraciones a Asturnews. Según Ortiz, la plataforma espera una respuesta inminente de l’Alcaldía nos prósimos díes pa evitar el propósitu de Dermoestética: “que pase’l tiempu y nos aburramos”, señaló.

Dorian Gray, nos güeyos de Fernando Savater. Una adaptación del clásicu d’Óscar Wilde pieslla l’añu escénicu del teatru Xovellanos de Xixón, con una representación única a cargu de la compañía producida por Juanjo Seoane. El repartu’l montaxe, dirixíu por María Ruiz, ta encabezáu polos intérpretes José Luis Pellicena, Juan Carlos Naya y Eloy Azorín.

Xunta ellos, pisarán les tables del coliséu xixonés los tamién actores David Naya, Lola Codón y Pilar San José, participantes nun espectáculu que cuenta con música orixinal de José Nieto. La representación entamará a les 20,30 hores d’esta tarde.

En pallabres del adaptador de la obra, Fernando Savater, la creación dramática de Wilde ye una hestoria fantástica al rodiu de la culpa y la inocencia que trai a l’alcordanza el popular desdoblamientu retratáu en ‘L’estrañu casu del Doctor Jekyll y Míster Hide’, asoleyada cinco años antes de la obra de Wilde qu’agora aporta a Xixón.

A partir del vienres, el Xovellanos apartará’l teatru y centraráse na música gospel, con un festival monográficu que s’estenderá hasta’l domingu en tres conciertos corales sucesivos.

Web de la productora del espectáculu

Cuatrocientos votos pa designar a los meyores. Dos decenes d’autores, compañíes, directores ya intérpretes opten, en calidá de finalistes, a algamar dalgún de los Premios de les Artes Escéniques, que s’entregarán en La Felguera el 17 d’avientu colos grupos Margen, Higiénico Papel y Barataria como aspirantes al galardón al meyor montaxe escénicu polos espectáculos ‘Anfitrión’, ‘Con P de piano’ y ‘Hasta que la boda nos separe’, respectivamente.

Un censu duplicáu en númberu d’integrantes respecto al del añu pasáu decidirá, poro, quiénes obtendrán los premios nes sos ocho categoríes, ente les que destaquen les de meyor dirección -a la qu’opten Arturo Castro, Jorge Moreno, Laura Iglesia y Roberto Corte- y meyor autor, na que son finalistes Estrella García, Fernando Hurtado, Jorge Moreno y Laura Iglesia.

No que cinca a la interpretación, la modalidá de meyor actor premiará a Alberto Rodríguez, Félix Corcuera o Jorge Moreno, mientres que’l premiu a meyor intérprete femenina dirá parar a Ángeles Arenas, Cristina Cillero o Eva Vallines. Cuatro son tamién los finalistes qu’opten al premiu al meyor profesional vinculáu al teatru asturianu: Aurelio Martínez, José Miguel Díaz y Nuria Blanco.

La quinta gala de los Premios de les Artes Escéniques, auspiciada pola Sociedá Xeneral d’Autores y Editores, cellebraráse nel nuevu teatru de La Felguera y entregará un galardón honoríficu a un profesional destacáu cuyu nome inda nun foi reveláu.

La convocatoria de los premios, en setiembre pasáu, valió pa que representantes de los actores y la patronal de les artes escéniques reclamaren más recursos y sales de xestión mista pa evitar la “desapaición” del teatru profesional asturianu, a lo que’l director xeneral de Promoción Cultura, Carlos Madera, retrucó ensalzando la “grandísima” inversión del Principáu nesa estaya y asegurando que la ufierta escénica privada “ye cero”.

Actores y empresarios piden más recursos y espacios pa evitar la “desapaición” del teatru profesional

Humor, ritmu, enerxía. Los intérpretes del musical ‘Mayumana’ prometieron una mecigaya d’esos tres elementos poco antes de salir a escena en Xixón y cumplieron la so pallabra énte un auditoriu completu. La compañía, d’oxixe israelí, defendió ayeri la variedá de les artes escéniques y la necesidá de “sacar al neñu” qu’hai dientro del espectador pa establecer un vínculu especial col públicu.

Hores antes d’estrenar el so espectáculu nel teatru Xovellanos, una representación d’intérpretes definió’l so montaxe como un mou de retomar movimientos ñaturales escaecíos na edá adulta y alvirtieron que tres de los estrueldosos númberos de percusión qu’integren l’espectáculu nun s’escuende nengún mensaxe ocultu: Namás se busca la identificación col públicu y una ‘terapia’ conxunta de bon humor.

Y asina ocurrió nel so estrenu na nueche xixonesa, que recibió con llenu el Xovellanos. Na so taquilla, van camín d’escosar les llocalidaes a la venta pa les seis funciones restantes que ‘Mayumana’ ufrirá en Xixón hasta’l domingu prósimu, nes que’l grupu de ocho artistes desplazaos a la ciudá saquen soníos y ritmos a cubos de basoria, llates de metal, tarros somorguiaos n’agua y aletes de bucéu.

Creada en 1996 por Eylon Nuphar y Boaz Berman, la compañía qu’anueche s’estrenó en Xixón echó a andar depués d’un llabor previu de dos años pa seleccionar un grupu inicial d’ocho intérpretes y ensayar les coreografíes. Anguaño, ‘Mayumana’ ufre funciones diaries n’Israel, llegó a más de 200.000 espectadores sólo nel so pasu por Madrid y axunta enriba l’escenariu a actores, acróbatas, guíes turísticos, camareres y baillarines de capoeira.

En xira per España dende ochobre pasáu, ‘Mayumana’ permanecerá en Xixón hasta’l domingu y viaxará depués al País Vascu pa pesllar ellí el so periplu de seronda, qu’inclúi ‘jam session’ de percusión xunta’l públicu, fuera de los teatros o nel so vestíbulu, depués de la última función de cada día, siempre que les condiciones lo permitan.

El V Premiu de testos Teatrales ‘Alejandro Casona’ viaxa pa Colombia. L’autor Orlando Cajamarca, director dende hai tres décades del teatru Esquina Latina na llocalidá de Cali, resultó ayeri premiáu colos 6.000 euros del galardón en reconocencia de la so obra ‘Elegí a… Lorca’, destacada pol xuráu como un notable “exerciciu d’intertestualidá sobre ún de los más grandes dramaturgos n’español”.

Asina lo destacaron los espertos encargaos d’elixir un ganador, ente quienes figuraron los profesores Joaquín Amores y Carmen Bobes, valorando’l llabor d’un autor -Cajamarca- qu’entiende el teatru como un motor xenerador d’autoestima y desarrollu nos pueblos, capaz d’amatagar les diferencies ente les estayes sociales privilexaes y les menos favorecíes.

Nacíu en Colombia hai agora 51 años, Orlando Cajamarca ye l’alma dende hai tres décades del teatru Esquina Latina de Cali, una entidá orixinariamente de calter universitariu y qu’anguaño ye un referente escénicu cuyes funciones circulen por unos venti barrios y municipios colombianos.

Cajamarca sucede nel palmarés del premiu ‘Alejandro Casona’ al autor castellanu Francisco Romero, qu’en 2003 algamó’l galardón con un montaxe sobre la confluencia del terrorismu islámicu y el maltratu domésticu.

Pachín de Melás, Gloria Fuertes, Henrik Ibsen y Antonio Buero Vallejo tienen asuntos comunes na parroquia xixonesa de Granda. El grupu de teatru aficionáu Trama, fundáu nesa llocalidá en 1979 y con 19 montaxes de 18 autores al llombu, repasa los sos 25 años d’hestoria con una esposición retrospectiva na que promete “amosar los nuesos interiores, lo qu’hai ente bambalines”.

Decoraos, pieces de vestuariu, recortes de prensa y testos varios, ente otros elementos, dan-y vida a una amuesa que pue visitase hasta’l prósimu domingu nel Centru de Cultura Antiguu Institutu de Xixón, de 10 a 14 hores poles mañanes y de 16 a 20,30 nel horariu de tarde, na que los componentes del grupu teatral evoquen el so recorríu en comuña y ufren espone-y al públicu “namás la puntina’l velu, porque la verdadera farsa gurdámosla pa nosotros”.

Entamáu en 1979 y protagonista d’una primer representación un añu depués, el collectivu Trama entamó ente 1983 y 2001 unes xornaes de teatru aficionáu en Granda qu’algamaron gran siguimientu. Sólo en 1980, el grupu llevó a escena cuatro obres: ‘El filandón’ y ‘Un xuiciu faltes’, del dramaturgu xixonés Pachín de Melás; la comedia costumista ‘El adiós a la quintana’, d’Antón de la Braña; y el montaxe ‘Papá Guitiérrez’, de Francisco Anguita.

A esos nomes siguiéronlos, nel hestorial de Trama, otros de sonadía como los de Gloria Fuertes, William Shakespeare, Álvaro de Laiglesia, Federico García Lorca y Henrik Ibsen, autores cuyes obres tomaron cuerpu nos actores del collectivu xixonés.

Ente otros galardones, Trama algamó en 2002 el premiu al meyor actor principal, meyor protagonista secundariu y meyor vestuariu nos alcuentros teatrales d’A Veiga d’Eo. El collectivu prepara agora l’estrenu, previstu pal añu qu’entra, de la obra ‘El servidor de dos patrones’, con testu de Carlo Goldoni.

Los miembros de la Plataforma Ciudadana ‘Cultura pal Arango’ van aprovechar la concentración avezada de los xueves pa poner a la vienda los primeros bonos por valor de 60 euros que si se cumplieran los cálculos del estudiu de viabilidá encargáu pol colectivu podía valir pa financiar un proyectu de recuperación del coliséu si polo menos una cifra de venti mil ciudadanos adquirieran el bonu de sofitu. Estes aportaciones voluntaries diben ser canxeables por entraes de los futuros espectáculos del teatru.

Boni Ortiz portavoz de ‘Cultura pal Arango’ amosó l’interés del colectivu por implicar a los xixoneses na salvación de la emblemática sala y evitar que se convierta na sede d’una conocida empresa dermoestética. Los 20.000 bonos de 60 euros que diben ser bastantes pa sumar un equivalente a la inversión anunciada polos arrendatarios del teatru, a xuiciu d’Ortiz: “ye una cifra alta y seguramente va ser difícil consiguila, tentiendo en cuenta la falta compromisu en xeneral de la xente pa con esta clase d’iniciatives desinteresaes”. La solución más segura, había pasar, pa los miembros de la Plataforma por espardir esi compromisu ente instituciones y empreses privaes.

El colectivu ‘Cultura pal Arango’ ve cierta rocea n’actitú aparentemente neutral del Ayuntamientu de la ciudá y una cierta ambigüedá nel comportamientu de los grupos municipales, mesmo nos que se posicionaran favoratiblemente al proyectu de la plataforma ciudadana. Boni Ortiz afirma que “échase en falta por parte d’aquellos que dicen públicamente apoyanos una actitú más decidía, como la qu’a menudo se toma énte otros asuntos de calter social”.

L’asociación en defensa del Teatru Arango tien entamao nos últimos díes contactos con agrupaciones asemeyaes del restu d’Asturies como ‘l colectivu uvieín ‘Oviedo no suena’ y una plataforma creada nel vai del Nalón pa la recuperación d’otra sala escénica na zona. A xuiciu d’Ortiz “la nuestra nun ye una causa local nin puntual, sinón que s’enmarca dientro d’una concepción crítica de la cultura y nesi sen los oxetivos xenerales compartímoslos toos los que puxamor pola creación cultural llibre y aparte de les instituciones”. ‘Cultura pal Arango’ sigue convocando tolos xueves una concentración a les puertes del edificiu.

Les invitaciones de baldre repartíes pol Ayuntamientu de L.lena p’asistir a los dos primeros actos del anováu teatru Vital Aza de La Pola esgotáronse alpenes dos díes de ser puestes a circular. La espectación énte la reapertura de la hestórica sala ye grande en tol conceyu y espérase que contine nos prósimos actos programaos: una representación de la compañia asturiana Margen y un conciertu de jazz del Mapi Quintana Quintet.

La inauguración del teatru coincide cola celebración de La Feria de la Miel de L.lena y va ser el pregón d’esta fiesta el primer actu nel escenariu rehabilitáu. La cita ye’l xueves 7 d’ochobre a les 19.30 hores y el pregon va tar a cargu d’Alberto Aza Arias, xefe de la Casa Real. Nel mesmu actu van entregase los premios del XI Concursu ‘Lena’ de dibuxu y pintura al aire llibre. Ente les actividaes programaes na reapertura del teatru el vestíbulu del ediciu acueye estos díes una esposición homenaxe al escritor l.leniegu José Manuel Castañón.

Xixón ye de dende’l domingu la capital asturiana de la danza contemporánea. L’estrenu nel teatru Xovellanosdel espectáculu ‘Orden de aparición’ pola compañía Dani Pannullo Dance Theatre, inauguró l’amuesa ‘Danza Gijón’04’,una ventana abierta a les últimes tendencies d’esti arte contemporáneu que va traer a lo llargo del mes d’ochobre alrodiu d’una docena de produciones d’otres tantes compañíes nacionales y internacionales.

‘Danza Gijón ’04’ va dedicar nesta edición un capítulu especial a les creaciones en videodanza con dos programas de proyecciones nel que se van amosar trabayos d’artistes de diverses nacionalidaes. Una serie de talleres empobinaos a escolinos de segundu y tercer ciclu d’Educación Primaria y otra de seminarios dirixíos a profesionaes, van completar el programa d’esti certame dedicáu a la danza contemporánea.

Hasta’l prósimu 23 d’ochobre van poder vese nos escenarios xixoneses espectáculos como ‘Abierto 24 horas. I never close my eyes’ de la Compañía Fernando Hurtado, ‘Si yo fuera gato’ de la Compañía Mulambo, ‘El barón de Munchausen’ de la Compañía Cienfuegog UG-DT, o ‘El amor brujo. Nana y Lila’ del Ballet de Blanca Li. El certame pesllarás’l xueves 23 nel teatru Xovellanos cola producción ‘Homenaje a Alwin Nikolais’de la Nikolais Dance Theatre y la Ririe-Woodbury Dance Company.

Accesu al teatru pa comprobar el so estáu, igual a fin de les protestes selmanales. Esta ye la ecuación que planteguen los miembros de la plataforma ‘Cultura pal Arango’, qu’esperen entá el permisu de los propietarios de la sala pa entrar nella y poder ellaborar un plan técnicu pa recuperar l’inmueble como espaciu cultural. El collectivu esperará cuatro díes antes d’estudiar un xiru nes sos movilizaciones.

Miembros y simpatizantes de la plataforma ciudadana participaron ayeri nuna nueva concentración na que llevantaron una simbólica muria que valtiaron darréu y cola que quisieron evitar metafóricamente la entrada na sala de Corporación Dermoestética, qu’asegura tener un alcuerdu peslláu colos dueños del Arango pa convertir el teatru en clínica d’estética nos prósimos venti años.

Según informa na so edición de güei el diariu La Voz de Asturias, ‘Cultura pal Arango’ recláma-y a los tres grupos políticos con representación nel Ayuntamientu de Xixón -PSOE, PP ya Izquierda Xunida-Bloque por Asturies- qu’espresen nuna sesión plenaria el so sofitu a la recuperación del Arango pa usu cultural, depués de meses de maniobres y declaraciones cruzaes que culminaron hai una selmana col compromisu de l’alcaldesa de la ciudá, Paz Fernández Felgueroso, de ‘conxelar’ por dos meses la conversión del teatru en macroclínica.

La plataforma en defensa d’un usu cultural pa la céntrica sala xixonesa cellebró el pasáu 16 de setiembre una manifestación nes cais de la ciudá qu’aconceyó a unes 300 persones y na que los responsables de la plataforma llamaron a siguir “suañando” cola reapertura’l teatru.

Web de la plataforma