Escéniques

Güei entama la XIV edición del ciclu teatral “Encuentros en Asturias”, organizáu por Cajastur, cola representación de la obra “Maquinahamlet” por parte del grupu La Mentira Teatro, nel Centru Cultural de Cajastur Colexiata de Sana Xuan Bautista, de Xixón El ciclu va cuntar con un total de 23 compañíes, que van poner n’escena 23 espectáculos en 28 funciones. Eso sedrá dende güei hasta’l 23 d’avientu nos centros culturales Cajastur de Xixón, Mieres y Uviéu y la representación, por primera vegada, d’otres obres nel Nuevu Teatru de La Felguera.
Mientres dura’l ciclu pondránse ver los trabayos de venticinco compañíes, dalgunes d’elles foriates como la italiana Scuola Speriamentale dell’Attore, l’arxentina Cecilia Hopkins asina como dalgunes otres del estáu español.

Salen a la venta les entraes pal Segundu Certame de Monólogu Modernu n’Asturianu organizáu pola asociación H.A XAREOS que se va celebrar el próximu día sábadu 28 d’ochobre na Sala Albeniz de Xixón. Esti festival, que busca que’l monólogu asturianu siga siendo un referente na vida cultural de los asturianos, y que siga siendolo n’asturianu, con unes formes y una temática renovaes, va tar presentáu por Inaciu Galán y González, contando coles actuaciones de Cellero, Lluis Antón González, Benxa Perez y l’estrenu de Delitu Rural y otros alumnos de la escuela Cellero.

Les entraes pa esti certame, que tienen un preciu de 6 € nos llugares de venta y de 8 € nel momentu de la entrada, pueden atopase na Llibrería Central (Xixón), Llibrería Zifar (Xixón), Merca Musical Mento (Xixón), Llibrería Alborá (Xixón), Cafe Trisquel (Xixón), El Barucu (Xixón), Llibrería Paradiso (Xixón), Llibrería Ítaca (Xixón), Piraña Family Discos (Xixón), Llibrería Paraxuga (Uvieu), Chigre Posafuelles (Uvieu), o llamando al telefonu 615982816.

Amás, esti añu’l Certame de Monólogu Modernu ta integráu dientro de los actos de l’ARRIBADA 2006 y van poder mercase les entraes nel puestu de l’asociación instaláu nel Antiguu Institutu de Xixón por mor d’estos actos na selmana del 23 al 28 d’ochobre.

El Teatru Xovellanos de Xixón remembra’l centenariu del nacimientu del dramaturgu irlandes Samuel Beckett cola representación de la pieza ‘Esperando a Godot’, testu col que’l ganador del Premiu Nobel de Lliteratura nel añu 1969, alcanzaría la fama mundial, siendo consideráu esti cuadru escritu en 1952 como la so gran obra maestra. Por esta razón, ‘Esperando a Godot’ ye la obra escoyida pola compañía de teatru Replica, baxo la dirección de Jaroslaw Bielski, pa representar nos escenarios xixoneses el próximu vienres día 13, a les ocho y media la tarde, cuando se cumplen cien años del nacimientu del so autor.

Jaroslaw Bilski dirixe a los interpretes Jesús Cortes, Raúl Chacón, Joaquín Abad, Luis Martí y Boj Calvo, nesta obra cume del teatru del absurdu cola que Beckett critica’l tediu y la falta de significáu de la vida moderna.

El grupu Barataria Teatro y l’Asociación Cultural Cauce Nalón van llevar los próximos díes 6 y 7 d’ochobre, a les ocho la tarde, nel Teatru de L’Entregu, una pieza dramática del frances Albert Camus, col envís de remembrar la Revolución d’Ochobre. Nuna representación única n’Asturies y España y per primer vez n’asturianu, nuna cuidada versión del escritor Milio Rodríguez Cueto, Barataria Teatro xube a los escenarios la pieza ‘Revuelva n’Asturies’ escrita n’Arxel en 196 pol escritor existencialista frances Albert Camus, pocos meses primero de qu’españare la guerra civil. Los ayuntamientos de Llaviana y Samartín del Rei Aurelio, asina como la Xunta Xeneral del Principáu, apoyen esti eventu nel 72º aniversariu del levantamientu obreru del 34.

La llectura dramatizada de ‘Revuelta n’Asturies’ va contar con un total de 12 actores, dirixíos por Roberto Corte, y ayudaos por amplios efectos sonoros y de lluces, nel que too ta absolutamente midío y cuidao hasta’l puntu de que cada personaxe va tener el so acentu propiu, según la so procedencia. Hai que señalar, pa encamentar inda más la so valía, que la obra Revuleta n’Asturies de Camus nunca fuere representada tovía n’España, razón de más pa valorar esti estrenu.

El Teatru Municipal de Samartín del Rei Aurelio, en L’Entregu, vuelve a l’actividá normal cola seronda representando’l próximu vienres 29 de setiembre, a les ocho la tarde, ‘Harpías, la comedia de la Compañía Konjuro Teatro, dirixida por Jorge Moreno, qu’esti añu foi una de les obres de más exitu nos escenarios asturianos. Per otra parte, el Coru Camerata Revillagigedo va ofrecer esti sábadu un recital na Ilesia Parroquial de Sotrondio.

Esti sábadu día 30, a partir de les siete y media, la Ilesia Parroquial de Sotrondio va acoyer un entreteníu conciertu del Coru Camerata Revillagigedo que va repasar dende les tradicionales obres del Padre Galo a les yá clásiques de Disney Movie Magic. Asina, El Rey León, El Jorobado de Notre-Dame, Los 101 Dálmatas, Pocahontas y Hercules van visitar la Ilesia de Sotrondio de mano de les voces del Coru Camerata Revillagigedo, talu como lo vienen faciendo nel Circuitu organizáu pola Obra Social de CaxAstur per toa Asturies.

Nelson Calderón, Xabier Gállego, Mariola del Pozo, Mariano Martínez, Wayki Trotacuentos, Alberto Sebastian, Albert Marques, Carlos Alba, Milio’l del nido y Manolo la Caben, Joaquín Hernández, Domingo Chinchilla, Edgardo Franzetti y los bandurrieros asturianos Diego García y Hector Braga como representantes de los contadores d’hestories más tradicionales, van reunise nos IV Encuentos qu’organiza’l grupu avilesín Ventanilla 69. La cita colos meyores contadores de cuentos empieza güei y va durar hasta’l martes 12 de setiembre.

A lo llargo de la selmana, los artistes invitaos a estos Encuentos 2006 van actuar per distintos locales d’Aviles, como’l Palaciu de Valdecarzana, El Albergue, Garach, El Cabanón, El Cafetón, Bar El Retiro, El Urrielu, Entama Rock, Masaveu 55 (Uvieu), Ave Fenix y el Bar Padul, ente otros.

Programa d’actuaciones

El director Jose Luis Garci, premiáu con un Oscar por ‘Volver a empezar’, vuelve a escoyer a Asturies, concretamente Noreña, como escenariu de la prósima película. ‘Luz de domingo’ sedrá una adaptación de la novela homónima de Ramón Perez de Ayala que cuenta la vida rural a primeros del sieglu XIX, na que la protagonista femenina va ser la candasina Paula Echevarría y que va tener como collaborador, apareciendo como gaiteru de la epoca, a Jose Ángel Hevia.

La película, que va empezar a rodase a partir del 25 de setiembre, tien como escenarios les localidaes asturianes de Noreña, Xixón, Uvieu, Aviles, Onís y La Pola Siero, llugares onde se van celebrar oportunos castings pa seleccionar los 2000 o 2500 ‘extras’ que necesita la producción.

La collaboración especial del gaiteru Jose Ángel Hevia debesa a la amistá personal del músicu col encargáu de producción de la película. La so aparición ta prevista como gaiteru mayor dientro d’una romería de la epoca anque nun se descarta que pueda llegar a participar en dalguna canción de la banda sonora de ‘Luz de domingo’.

El Palacio Valdes d’Aviles va acoyer na nueva edición del ciclu ‘Hecho en Asturias’ que va inaugurase’l prósimu 17 de payares cuatro estrenos absolutos de cuatro compañíes asturianes de teatru. ‘La aldea perdida’ de Teatru Kumen, ‘Cocinando con Elisa’ de Producciones Nun Tris, ‘Travesía sobre nieve de Bagdad’ de Barataria Teatru y ‘Vecinos’ d’Eladio de Pablo van poder vese por un preciu únicu d’abonu de 21 euros o a 7 euros cada entrada suelta.

El ciclu ‘Hecho en Asturias’ va inagurase’l 17 de payares cola representación y estrenu absolutu de la pieza de Teatru Kumen que versiona L’aldea perdida de Palacio Valdes. ‘Cocinando con Elisa’ ye la última obra dirixida por Antón Caamaño ya Inma Rodríguez pa Producciones Nun Tris, mentes que Barataria Teatru xube a escena un testu del so director, Roberto Corte, que lleva por títulu ‘Travesía sobre nieve de Bagdad’.

El ciclu va echar el piesllu con ‘Vecinos’ un testu orixinal dirixíu por Eladio de Pablo que va ser interpretáu por Enrique Villanueva y Mari Juani G. Hernández.

El grupu asturianu de teatru Margen va echar el piesllu la selmana qu’entra al ciclu de teatru que l’Ayuntamientu d’Uvieu programó pa les nueches de los miercoles de los meses de xunetu y agostu na Plaza’l Fontán. La versión asturiana y n’asturianu de ‘La señorita Julia’ de Strindberg, fecha pol escritor Pablo Texón pa la compañía Margen, va poder vese’l miercoles 30 d’agostu a les once de la nueche.

L’acción del drama asítiase a finales del sieglu XIX nun llugar de la vieya Europa campesina. Na nueche máxica de San Xuan. Xulia, la fía y única heredera d’un señor rural, n’ausencia del padre baxa a beber y a bailar colos criaos cola fin d’olvidar el desaire que’l so prometíu-y fizo abandonándola. D’ehí pa en delantre desarróllase una acción enllena de tensiones dramátiques y emociones esceniques que la veterana maestría de los actores de Margen llogren caltener en tou momentu.

Verónica Gutierrez, Jose Antonio Lobato y Ángeles Arenas, dirixíos por Arturo Castro, van ser los encargaos de dar vida a los personaxes del drama de Strindberg, nuna versión del so clásicu “La Señorita Julia” ellaborada por Arturo Castro y Jose Antonio Lobato y tornada al asturianu pol escritor Pablo Texón.

La entrada a ver l’espectáculu ‘Xulia’ esti prósimu miercoles na Plaza’l Fontán ye llibre.

Cinco monólogos ineditos escritos pol equipu del “Club de la comedia” nos que se puede ver a homes y muyeres sobre un mesmu escenariu dispuestos a contalo too sobre la so rellación de pareya. Dirixíos por Ana Rivas y Jose Miguel Contreras, los actores Pilar Sánchez Bermúdez, Cristina Peña, Alexandra Jimenez, Fernando Albizu, Neus Sanz, Queque, Eva Hache, Goizalde Núñez, Goyo Jimenez, Juanjo Cucalón y Núria González van llevar los díes 24, 25 y 26 d’agostu al Xovellanos la obra ‘5 hombres y 5 mujeres.com’.

‘5 hombres y 5 mujeres.com’ ye una obra formada por cinco monólogos ineditos nos que l’espectador va descubrir lo distinta que puede llegar a ser la mesma situación dende’l puntu de vista de cada sexu. Asina, el día 24 d’agostu a les ocho y media la tarde, y los díes 25 y 26 en dos sesiones, a les ocho y les once la nueche, el Teatru Xovellanos va desenguedeyar la historia común d’estos diez actores, enredaos en cinco monólogos de comedia.