Escéniques

Xixón axúntase güei a les cellebraciones del Día Mundial de la Dancia de la mano de la prestixosa compañía catalana de Sol Picó. El Teatru Xovellanos acueye la representación de ‘La Dona Manca, o Barbi Superestar’, un montaxe qu’intenta caciplar nel universu de la muyer y fai por reconstruyir n’escena los elementos del imaxinariu femeninu a partir de l’actuación de seis baillarines y seis músiques.

Sedrán sesenta minutos p’asoleyar un montaxe que vien de ganar dos galardones nos recientes Premios Max 2004, al meyor espectáculu teatral y a la meyor coreografía.

Embaxo la dirección teatral de Txiki Berraondo y la cordinación musical de Mireia Tejero, la llista d’intérpretes intégrenla Ana Criado, Iva Horvat, Lola López Luna, Maribel Martínez, Ana Roblas y Maria Stamenkovic Herranz. L’elencu complétase na parte musical con Dácil López y Maddish Falzoni.

Según la interpretación que Sol Picó fai del so propiu montaxe, l’espectador qu’esta nueche acuda al Xovellanos atoparáse con un paséu por un mundu subconsciente de rituales del que van surdiendo, mesmo que d’una coctelera, llugares imaxinarios y rellaciones imposibles.

Dancia, malabarismu, música y acrobacies. El Cirque du Soleil, la compañía de circu más premiada nos últimos años pola so renovación hacia l’arte del espectáculu circense, prepara la so visita a Xixón, onde ufrirá un total de 26 funciones a partir de finales de xunu nuna carpa asitiada pa la ocasión en terrenos del puertu d’El Musel. Les entraes, a precios d’ente 24 y 56 euros, pónense güei a la venta.

L’espectáculu col que los integrantes del Cirque du Soleil aporten a Asturies, ‘Saltimbanco’, pasó yá énte los güeyos de más de siete espectadores d’estremaos continentes, pero les incursiones de la compañía nel Estáu español sólo incluyeren hasta agora escales en Madrid, Barcelona, Bilbao y Sevilla. Les funciones de Xixón atrayerán poro, previsiblemente, a públicu d’otres comunidaes vecines, polo que la compañía actuará con un aforu de 2.500 persones por función.

No que cinca al restu de cifres, l’equipu circense que llegará a Xixón tará compuestu por unes cien persones, a les que se-yos amestarán hasta 125 trabayadores asturianos con contratu temporal, dende montadores d’estructures a azafates y promotores. Empreses de Trabayu Temporal de Xixón entamaron yá la primer selección de personal, col únicu requisitu esclusoriu de falar y entener inglés.

‘Saltimbanco’ lleva catorce años xirando por ciudaes de tol mundu y represéntase n’España dende 2002. Tien un acompañamientu musical compuestu espresamente pal montaxe que s’interpreta en directu.