Conceyos

La organización Iniciativa pol Asturianu denuncia nun comunicáu asoleyáu esta mañana que “recibió numberoses quexes de vecinos de Grau pola actuación del alcalde Antonio Rey González pa cola llingua asturiana. Apocayá cambiáronse los paneles informativos turísticos de los edificios más señalaos del conceyu y fízose pa ponelos namás en castellán, cuando hasta agora taben tamién n’asturianu. Esta entidá y los vecinos denunciantes nun son a entender que se faiga esta inversión pa dar pasos atrás nel yá probetayu usu que fai del asturianu’l Conceyu de Grau”.

Iniciativa pol Asturianu solicitó nesa mesma carta que se vuelvan a instalar los cartelos cola versión billingüe asturianu y castellán y aprovechó pa reivindicar al equipu de gobiernu que faigan polítiques de normalización nel conceyu: “El Conceyu de Grau nun usa l’asturianu nel so llabor habitual, nin na páxina web, nin na promoción del conceyu nin nes sos rellaciones colos ciudadanos. Lo más grave ye la falta d’usu de la toponimia oficial que’l propiu conceyu aprobó nel añu 2007 y que con una simple güeyada a l’actividá del Conceyu na propia villa o na páxina web, queda al descubiertu, nun usen la toponimia tradicional oficializada en cásique nengún ámbitu”.

La Oficina de Normalización Llingüística de Samartín del Rei Aurelio, col enfotu de potenciar l’emplegu de la so toponimia oficial, aprobada por decretu nel añu 2008, ta desendolcando a lo llargo d’esti mes de setiembre una iniciativa cola que se pretende informar a la población, l’alministración y los medios de comunicación de los nomes de los pueblos que deben usase. Baxo’l títulu “Mes de la toponimia”, durante setiembre van llevase a cabu distintes actividaes encaminaes a esi oxetivu.

La primera d’elles entama mañana vienres 5 de setiembre coincidiendo cola Feria de Muestres y Esposiciones FEMEX que se celebra nel Parque El Florán. Ehí va poder visitase un stand que va incluyir información rellacionada cola toponimia oficial del conceyu. Nos distintos paneles informativos van tar espuestos tolos topónimos oficiales, y va poder conocese l’orixe de dalgunos d’ellos y más información rellacionada col procesu de recuperación toponímica.

En pocu espaciu va poder accedese a una información virtual qu’enancha la información física yá presente nos cartelos y la complementa con enllaces web que s’activen al ser escaniaos cola aplicación Layar, que se pue instalar en tabletes o móviles d’última xeneración. Los paneles van incluyir más de 150 puntos de realidá enanchada. Tamién va haber xuegos rellacionaos cola toponimia destinaos a distintes edaes y regalos pa les persones participantes. Esti espaciu na FEMEX va poder visitase dende’l vienres 5 hasta’l llunes 8 n’horariu de mañana y tarde.

Iniciativa pol Asturianu vieno acabante d’amosar nuna nota de prensa’l so refugu a la esclusión de la llingua asturiana en toles estayes del grupu Transportes Unidos de Asturias S.A. (T.U.A.), qu’ufre’l serviciu públicu de tresporte d’autobús nel conceyu de la capital, y que ta acabante d’estrenar un nuevu web y llínies de serviciu. L’estrenu d’esta nueva páxina nes redes débese a la puesta en marcha de les nueves llínies de tresporte qu’agora dan serviciu a los carbayones.

Sicasí, Iniciativa pol Asturianu considera inescusable l’escaezu de la llingua asturiana nesti casu, que presentaba una ocasión mui afayadiza pa incluyila dafechu xunto al castellán, idioma nel que la compañía opera dafechu y n’esclusiva dende’l so entamu, hai más de 30 años.

Iniciativa pol Asturianu quier con esta nota, y la carta unviada a la compañía, “facer un llamamientu a les instituciones del conceyu y a la propia empresa p’asegurar la inclusión del asturianu nel serviciu de T.U.A., qu’atiende a milenta asturfalantes a diariu y a quienes nun pue discriminar baxo dengún conceptu. Especialmente mancante ye la falta d’usu de los nomes de llugar o topónimos tradicionales del conceyu d’Uviéu pa les llinies y paraes del serviciu”.

Esti vienres, l’Ayuntamientu de Castrillón celebra un actu institucional por cuenta de la celebración del Día de les Lletres Asturianes y como homenaxe a los escritores en llingua asturiana que va cuntar con una llectura de testos d’escritores y poetes asturianos, nel Salón de Plenos del Conceyu de Castrillón, a partir de les 13,30 hores y cola presencia de la Corporación Municipal y asociaciones del conceyu, tanto vecinales como culturales, de xubilaos o deportives.

Nel actu van participar tamién dellos artistes, equipos direutivos de los Centros Educativos del Conceyu y autoridaes, ente les que tán convidaes la Conseyera de Cultura, la Direutora Xeneral de Política Llingúística y la Presidenta de l’Academia de la Llingua AsturianaEnte otros.

Tamién con motivu del Día les Lletres, na biblioteca de Piedrasblancas, mañana a les 18:30, tendrá llugar un cuentacuentos musical a cargu del grupu Mestura.

L’Ayuntamientu de Castrillóin vien acabante de facer l’a nuncia la selmana pasada d’una convocatoria pala contratación per parte del Conceyu d’un llicenciáu en filoloxía y especialista en filoloxía asturiana destináu, con títulu expedíu pola Universidá d’Uviéu y a xornada completa, a cubrir el serviciu de normalización llingüística nel conceyu.

La contratación d’esti especialista lleva tol añu esperándose por parte de les asociaciones culturales del conceyu y aporta ente les crítiques del grupu del PP que camienta que nun ye necesariu.

El so cometíu va ser traducir al asturianu folletos y tou tipu de publicaciones editaes pol Conceyu, los rótulos de les dependencies municipales, los discursos institucionales y la web del Valey Centru Cultural, amás de participar n’actividaes extraescolares cola fin d’asesorar a los monitores.

La convocatoria ta abierta a lo llargo d’e3sta selmana y los interesaos pueden presentar les sos solicitúes nel rexistru municipal a lo llargo de los próximos diez díes llaborables. Les bases completes de la convocatoria puen descargase na web del conceyu.

Catorce ayuntamiento asturianos, ente ellos los d’Avilés y Corvera, yá cunten col serviciu de normalización llingüística.

Bases de la convocatoria

El gobiernu del Conceyu d’Uviéu aprobó estos díes una modificación del so Reglamentu Orgánicu de Gobiernu y Alministración y de magar estos díes, tal y como diz agora’l testu: «tendráse por válido a tolos efectos l’usu del bable/asturianu nes comunicaciones orales o escrites de los ciudadanos».

El Círculu Cultural de Valdediós, en Villaviciosa, celebra un recital poéticu con Alba González Sanz, José Cereijo, Esther García y Diego Álvarez Miguel, esti vienres 19 de xunetu a les siete y media la tarde. Sedrán nel propiu Conventín de Valdediós y cuntará cola presentación de José Luis García Martín.

Güei, 27 de mayu, a les 19:00 hores, la Casa Cultura Teodoro Cuesta de Mieres del Camín acueye la presentación del llibru “El movimiento obrero en Asturias durante el franquismo (1937-1977)”. Esti llibru ye la resultancia del un proyectu d’investigación que buscaba sintetizar la hestoria del movimientu obreru asturianu mientres el Franquismu, dende la cayida del frente del norte n’ochobre de 1937 hasta les elecciones xenerales de xunu de 1977. Trástase d’una iniciativa de la Fundación Juan Muñiz Zapico y del Archivu de Fontes Orales pa la Hestoria Social d’Asturies, empecipiáu en 2010 y editáu anguaño cola editorial KRK. Cuntando cola coordinación académica del hestoriador y profesor de la Área d’Hestoria Contemporanea de la Universidá d’Uviéu Rubén Vega García.

Pa llevalo a cabu articúlose un equipu d’investigación formáu por reconocíos especialistes venceyaos al mundu académicu y con una amplia esperiencia sobre l’ámbitu del estudiu: Rubén Vega García (Coordinador), Claudia Cabrero Blanco, Benigno Delmiro Coto, Holm-Detlev Kohler, Diego Díaz, Irene Díaz Martínez, Francisco Erice Sebares, Ramón García Piñeiro y Carlos Gordon.

Buscaben apurrir una visión de conxuntu novedosa sobre árees como’l desenvolvimientu xeneral del movimientu obreru asturianu nel panorama xeneral del Franquismu, la condición y situación de la clas obrera ente 1937 y 1977, la evolución de les estructures social y económicu del país nesos cuarenta años. Afondando na represión a la que se vieron sometíos el trabayadores y trabayadores na so llucha contra la dictadura, les modalidaes de la conflictividá llaboral, los repertorios de protesta y solidaridá a lo llargo del tiempu, los mecanismos de movilización, acordies con una perspectiva de xéneru sobre la cultura política y social del antifranquismu o la evolución de les organizaciones obreres.

Al llibru acompáñalu un CD anexu con materiales pal so estudiu.

Dientro de la campaña pro-conceyos entamada anteriormente , Conceyu Abiertu organiza’l sábadu 13 d’Abril na Casa Cultura de Bimenes –asitiada en Santuyano- una charra-alderique titulada “En defensa de los conceyos asturianos y pola democracia participativa”. Na mesma participarán Ástor Llaneza –voceru de Conceyu Abiertu-, Aitor García –conceyal del PAS en Bimenes- y Jesús Garmón –llicenciáu en drechu-.

“L’envís d’esta actividá ye defender que nun sobra nengún conceyu n’Asturies”, espliquen dende CA. “Dende esta campaña defendemos la cadarma conceyil tanto dende’l puntu identitariu como’l de los drechos democráticos”, recordando tamién la necesidá de que los conceyos nun seyan “chiringos nes manes de los alcaldes y conceyales de turnu, que los representantes na casa conceyu tean realmente al serviciu de les clases populares, o qu’esos cargos tean ocupaos por persones que escuchen, atiendan y participen en xuntes populares del conceyu o conceyos abiertos, son dalgunes de les midíes defendíes”.

D’estes custiones y munches otres va a tratase nesta charra-alderique, al rodiu d’una temática calificada polos organizadores como “de gran interés pal conxuntu de la sociedá asturiana”.

Güei, vienres 22 de marzu a les 19:30 l’Aula Cultural la Plaza de Sotrondio acueye una charra de Xosé Lluis García Arias que lleva por títulu “Los nomes de los pueblos del conceyu de Samartín del Rei Aurelio”.

Esta actividá ta entamada pola Asociación Cultural Antiguos Alumnos de l’Academia D. Juan José Calvo Miguel y forma parte del XI Ciclu de Conferencies que se ta celebrando esti mes de marzu en Sotrondio.