Muséu de la selmana: Muséu Etnográficu de la Llechería

Redacción.

Una selmana más Asturnews.com ufierta a los sos llectores un percorríu per ún de los munchos museos qu’hai n’Asturies. Y la visita ye esta selmana al Museu Etnográficu de la Llechería, asitiáu en La Foz de Morcín, a namás seis quilómetros de la capital del conceyu, Santolaya.

La colección del museu tien más de quinientes pieces de cuasi tolos conceyos asturianos y tán distribuyíes en cuatro estayes: la ganadería, la lleche, la mantega y el quesu. Amás, tien una sala d’audiovisuales, biblioteca especializada y archivu documental.

Na visita pueden conocese los metodos utilizaos pa la ellaboración tradicional de la mantega, los preseos usaos y la so evolución, asina como la venta nos mercaos y tamien la so esportación. Esponse una bona colección de mantegueres, odres, botíes y firidores pa mazar la mantega, amás de delles desnatadores centrífugues ya instrumentos pal amasao ente otres munches coses.

Los horarios son de llunes a domingu de 10:00 a 13:30 y de 16:00 a 19:30 hores. Los precios van dende los 2 euros de los adultos al euru de neños y grupos qu’acuten la visita. Pa llegar tien de garrase la carretera N-630 y la comarcal AS-231 hasta La Foz de Morcín, el Museu ta cabu’l ríu, a 6 Km. de Santolaya.