La Selmana de les Lletres concentra dalgunos de los actos más importantes nestos díes

Redacción.

Ayeri pela mañana presentóse la revista Formientu nel Campus del Milán d’Uvieu cola presencia de Ramón d’Andres, Xulio Viejo y el so direutor, Inaciu Galán, amás de dalgunos autores d’esti segundu númberu dedicáu a la narrativa: Benxa Perez, Nicolás V. Bardio, Ricardo Candás, Sergio Gutierrez, Jorge Fernández y Xaime Menendiz. Asistieron tamien Xuan Santori, Cristobal Ruitiña, Ana Gayol, Antón García y l’autor aragones Chuse Inazio Nabarro, que pela tarde tuvo nel ‘Alcuentru coles narratives españoles’.

Güei, la selmana sigue con dellos actos de gran importancia. Pela mañana, n’Aviles, la IV Xunta d’Escolinos y la presentación de la revista Formientu a la una del meudía. Na Xunta Xeneral del Principáu va facese la yá tradicional llectura pública de testos per parte de los Diputaos y otros políticos, como la Senadora Pilar Fernández Pardo o’l Conseyeru de Xusticia, Javier García Valledor.

Yá pela tarde, a les 20 hores, nel Teatru Filarmónica va representase’l Cabare-musical ‘Una mañana… (un viaxe sonoru a la patria les palabres)’, un espectáculu lliterario-musical, que’l Xefe de la Oficina de Política Llingüística, Ramón d’Andres, encamentaba esta mañana na presentación de la revista Formientu n’Uvieu. El ‘cabare-musical’ ta dirixíu por Dolfo Camilo Díaz y Laura Iglesias. La entrada ye de baldre. A la mesma hora, n’Aviles, va poder disfrutase del conciertu de Skama, La Matumba y Dixebra na carpa instalada en Les Meanes.

Los llectores d’ASTURNEWS.COM puen ver les semeyes de la presentación del númberu segundu de la revista Formientu n’Uvieu, ayeri pela mañana.

Calca pa ver les semeyes del actu d’ayeri