La Escuela d’Asturianía pieslla

El Director de l’Axencia Asturiana d’Emigración, Luis Miguel Fernández Romero, y el Conseyeru de Xusticia, Francisco Javier García Valledor, van clausurar el primer Cursu de la Segunda Edición de la Escuela d’Asturianía, xunta los responsables d’esta Escuela y los del Conseyu de COmunidaes güei xueves 28 de xunetu a les 19.30 hores nel Teatru Filarmónica. Darréu de la clausura ta prevista una espicha nel llagar Quelo, en Tiñana.

Esti programa, que tuvo la so primer promoción ente los años 2002 y 2004 ufierta a los fíos de los emigrantes una formación afayadiza de l’Asturies actual y afalalos a participar nes actividaes de los centros y cases asturianes del esterior. Atendiendo a ello, el Plan Integral d’Emigración (2004-2007) incorpora la Escuela de Veranu d’Asturianía dientro la so cuarta estaya: “Pa que los asturianos del mundu s’organicen en comunidá”, como llínea d’ actuación xestionada pol Conseyu de Comunidaes.

Los oxetivos de la Escuela son l’afondamientu del significáu de la “Asturianía” y el so ordenamientu normativu;divulgar la estructura, organización y funcionamientu del Conseyu de Comunidaes Asturianes y de los centros asturianos y entidaes asemeyaes homologaes pol Principáu; potenciar la conservación de les nuestres tradiciones y velar poles características esenciales y diferenciadoras de la nuestra cultura popular. El programa tamién tien una parte formativa pa cualificar monitores de cultura y música tradicional asturianes que puedan formar a la so vez a otres persones y dinamizar l’actividá cultural nos sos centros asturianos.

El Plan d’estudios desenvuélvese nun ciclu de tres cursos de 15 díes caún que se van desendolcar n’Uviéu los meses de xunetu de 2005, 2006 y 2007, con un total de 300 hores llectivas (100 hores por cursu). L’alumnáu puede escoyer ente les especialidaes de Baile Tradicional o Gaita. Y al final del ciclu reciben un “Diploma de Monitor/a de Cultura y Música Tradicional Asturianes”, que ye’l que van recoyer dientru dos años los 26 participantes que s’alcuentre esti mes de xunetu n’Asturies recibiendo les clas del primer módulu.

El Conseyu de Comunidaes presentó la II Promoción de la Escuela de Veranu d’Asturianía