La Banda de Gaites Llacín triunfa pel día nos desfiles y nes jam-session pela nueche

La Banda Gaites Llacín , del Conceyu Llanes ( Asturies ), surde nel añu 1998 pente los escolinos de la Escuela de Música Tradicional que pertenez a l’Asociación Cultural y Etnográfica Llacín de Porrúa. Esta asociación convirtiose pasu ente pasu nun referente como promotora d’iniciatives güei reconocíes, como’l Muséu Etnográficu del Oriente d’Asturies, el Mercáu de Porrúa y el Pueblu Cultural d’Europa, arriendes d’otres. Too ello fizo-y algamar un llugar cimeru nel desendolcu y nel estudiu de les manifestaciones culturales del conceyu llaniscu, y ser un puntu d’alcuentru pa tolos/es que tengan daqué enfotu nel conocimientu de los vezos y la hestoria d’Asturies.

Dende los sos anicios , la Banda ta dirixida por Vítor Carbajal y Nuria Tarodo medrando a lo llargo’l tiempu de los 28 a los 87 componentes de los nuesos díes faciendo asina una de les bandes más numberoses d’Asturies.

Como diz na so páxina web, “el repertoriu qu’executa xune temes tradicionales colos d’anguaño asturianos, tien composiciones propies, y en delles ocasiones tamién fai fusiones afayadices colos temes de los paises de la cultura del Arcu Atlánticu, de la que la Banda ye parte”. Y eso ye precisamente lo que ta amuesando en Lorient, tanto nes sos participaciones más series nes que lluz al mayor nivel, como nos momentos de lo qu’equí nomen como “Kitchen music” cuando l’alborecer ya se va arrimando.