L’asociación Araguaney inaugura la esposición ‘La emigración española a Venezuela’

Redacción.

El vienres día 1 de xunu a les 20 hores na Sala d’Esposiciones del Centru Municipal d’El Coto de Xixón, va tener llugar la inauguración de la esposición “La Emigración Española a Venezuela” fecha pola Asociación Cultural Venezolano-Asturiana ‘Araguaney’ cola collaboración de l’Axencia Asturiana d’Emigración.

La esposición, que va dar entamu a los actos pol Decimu Aniversariu de l’asociación, tien 15 paneles esplicativos y documentación varia sobre la emigración española a Venezuela de mediaos del sieglu pasáu. Nella va podese ver en forma resumida les causes que la motivaron, los pormenores del viaxe, los barcos que tresportaron a los emigrantes, los barcos clandestinos, la llegada y vida en Venezuela pa rematar cola torna y la nueva emigración venezolana a España.

El vienres día 8 de xunu, siguiendo colos actos pol Decimu Aniversariu, va producise l’actuación de la cantautora y poeta venezolana Fanny Fuguet que va ufiertar un conciertu de música venezolana nel Salón d’Actos del mesmu Centru Municipal d’El Coto, en Xixón.