L’Arribada 2007 entama mañana cola llegada a puertu de los escritores y la llectura de los políticos

Mañana a les 12 la mañana va presentase’l númberu 2 del periódicu Vagamar, periódicu oficial d’Arribada dirixíu por Inaciu Galán. Esti va ser l’entamu de los actos de l’Arribada 2007. Pero’l platu fuerte va llegar pela tarde, cuando los escritores y dellos políticos xixoneses van arribar a El Muelle de Xixón, na rampla asitiada delantre de la estatua de Pelayo, será a les 5 la tarde.

Darréu, un pasacais nel que participa la Banda de Gaites ‘Ciudá d’Uviéu’, escritores y políticos xixoneses va percorrer los Xardinos de la Reina, la Cai Corrida, Zarrazina, Tomás y Valiente y la Plaza’l Parchís, p’aportar al patiu del Antiguu Institutu Xovellanos. Yá dientro y a les 18:00 hores, nel Salón d’Actos, el conceyal de cultura de Xixón, Justo Vilabrille, la Directora de Promoción Cultural y Política Llingüística, Consuelo Vega y el coordinador de la edición 2007, Humberto Gonzali, van inaugurar l’Arriabada con unes pallabres a los asistentes.

A les 18:30 va celebrase un actu que quier implicar a los políticos na defensa de la lliteratura y la llingua asturianes. Asina, 6 conceyales del Partíu Popular de Xixón, ente los que va tar la senadora Pilar Fernández Pardo y 5 del PSOE, ente los que van tar conceyales como Sanjurjo, amás del diputáu d’Izquierda Xunida, Francisco Javier García Valledor y el conceyal Jesús Montes Estrada ‘Churruca’, van lleer poemes en llingua asturiana. Tará tamién nesti actu la presidenta de l’Academia de la Llingua Asturiana.

Yá a les siete y media, va inaugura la esposición ‘Palabres pa la Llibertᒠorganizada pola Arribada y pol Foru Arte Ciudá y coordinada pol artista Ánxel Nava. El día piésllase cola actuación del grupu ‘Ayalga Sinfónica’.

A partir de mañana vienres pela mañana y hasta’l vienres 21, van tar abiertos puestos de llibros y otros productos asturianos nel Patiu del Antiguu Institutu. Los próximos 9 díes van ser, dende llueu, unu de los actos más importantes organizáu nunca alredror de la lliteratura asturiana.