El Centru Asturianu de Puertu Ricu celebró 50 años d’esistencia

El Viceconseyeru de Seguridá, Emigración y Cooperación al Desarrollu, Valentín Ruiz García, asistió a los actos que, por aciu del so 50º Aniversariu, organizó la Xunta Directiva actual del Centru Asturianu de Puertu Ricu, presidida por Argentina Menéndez. Según datos del Censu d’Españoles residentes nel Esterior, recoyíos hasta’l 1 d’agostu de 2008, son un total de 357 les persones asturianes residentes en Puerto Rico.

La Xunta Directiva nueva, elixida esti añu, esplicó al Viceconseyeru cuestiones rellacionaes coles dos fiestes principales qu’organicen nel añu, coincidiendo col Día d’Asturies y Pascua. Tamién esplicaron que quieren diversificar les actividaes que desendolquen. Esti añu, comentaron, “representamos la obra de teatru La Dama del Alba en distintos sitios y foi tou un ésitu”. El Viceconseyeru animó a intensificar esfuercios y ofreció la collaboración del Gobiernu del Principáu d’Asturies.

L’actu oficial foi amenizáu por un tamboriteru y un gaiteru, Andrés Fernández Gutiérrez y Juan Antonio Barreiro Valdajos, procedentes de Chile, y qu’adquirieron gran parte de los sos conocimientos na Escuela de Branu d’Asturianía. Esta actividá foi sufragada pola Axencia Asturiana d’Emigración.

Na so intervención oficial, el Viceconseyeru de Seguridá, Emigración y Cooperación al Desarrollu, Valentín Ruiz García, eloxó l’espíritu d’unidá y solidaridá que siempre caracterizó a la población emigrante. “Cuestiones que surden pa satisfacer necesidaes individuales terminaron convirtiéndose en grandes proyectos colectivos pa mostrar públicamente y con arguyu, los vezos y tradiciones de la vuesa tierra d’orixe”, comentó en rellación cola gran actividá que desendolquen los distintos centros asturianos repartíos pel mundu.

Destacó qu’esti añu al frente de les polítiques d’emigración comprobó que “cuanto más lloñe s’alcuentra un asturianu o asturiana de la so tierra, más s’intensifica el sentimientu de ciñu, respetu y almiración pa ella”.

El Viceconseyeru destacó que güei, que la situación d’Asturies ye más favorable, “ye de xusticia que mos esforciemos por reconocer la vuestra herencia, la de la emigración asturiana en xeneral, cola so tierra y devolvamos parte de la xenerosidá qu’ellos demostraron con Asturies cuando esta necesitó d’ellos”.

Pa ello, detalló, que’l Gobiernu del Principáu d’Asturies, especialmente dende l’añu 1999, vien esforciándose por incrementar recursos, por implementar polítiques empobinaes a la nuesa población emigrante. Faló tamién del III Plan Integral d’Emigración 2008-2011 que con una cuantía de 20, 5 millones d’euros foi diseñáu “pa satisfacer d’una forma integral les demandes de la población emigrante en xeneral, pero emprestando especial atención a dos colectivos mui concretos: les persones mayores y la mocedá”.