‘Asturum Equitata’ celebra unes xornaes alredor de la cultura asturiana n’Alemaña

Redacción.

Los primeros actos celebráronse yá esti sábadu pasáu na Casa la Cultura de la ciudá alemana de Giessen cola proyeición de los documentales ‘Mirada’ d’Ana García, ‘La ría de Villaviciosa’ de Xurde Morán y ‘Melecina tradicional n’Asturies’, dirixíu por Berto Álvarez Peña. Darreu celebróse una espicha cola actuación d’una pareya de gaita y tambor formada por Carlos Blanco a la gaita y Ana Blanco al tambor.

El próximu vienres 25 de mayu van siguir les xornaes cola proyeición d’una serie de cuatro curtios en llingua asturiana y l’actuación del curdionista Xose Nel Esposito y el gaiteru Milio Martínez. Los actos van celebrase na mesma Casa la Cultura, na ciudá alemana de Giessen.

Los actos coordínalos dende Asturies, Frichu Yustas, llibreru, miembru de l’Asociación L’Arribada y habitual na organización d’actos culturales pa la difusión de la llingua y cultura del país colos asturianos del esterior en países como Belxica, El Líbanu, Alemaña, Francia, Israel y otros llugares del mundiu.