Areces viaxa a México per segunda vegada

El presidente del Gobiernu Asturianu, Vicente Álvarez Areces, empieza güei una estancia d’ocho díes de duración en Mexico pa fortalecer les rellaciones económiques del Principáu con esti país, onde va ser recibíu pol so presidente, Vicente Fox. Esta nueche la delegación rexonal va visitar el Centru Asturianu de la capital federal, onde se va cellebrar una cena que va permitir tener contactu cola estensa colonia del DF.

Amás de la capital, el viaxe d’Areces –que tien aspectos políticos, comerciales y económicos y al que se van sumar dalgunos de los integrantes de la delegación del Principáu qu’anguaño tán en Cuba– va calar al Estáu de Zacatecas.

Esti desplazamientu ye’l segundu que fai Areces a Mexico nes dos llexislatures que lleva al frente del Gobiernu asturianu y nel va tar acompañáu por representantes del Parlamentu rexonal y d’una trentena d’empreses del Principáu, ente otres autoridaes.

De les trenta compañíes que van formar parte de la delegación institucional, ente les que figuren Duro Felguera, HC Enerxía o Arcelor, unes quince operen yá en Mexico o algamaron alcuerdos con compañíes del país. Nesti sen, Areces recordó que la cifra de negocios ente Asturies y Mexico en 2005 llegó a los 24 millones d’euros con un saldu comercial positivu pal Principáu que’l Gobiernu rexonal “aspira a incrementar” nos prósimos exercicios.

Según el xefe del Executivu, les rellaciones institucionales “al másimu nivel” que tien el so Gobiernu nos diferentes viaxes que fai al estranxeru, como ye nesti casu’l del presidente de la República de Mexico, son importantes “pa una comunidá de poco más d’un millón d’habitantes” y dexen ayudar a los empresarios.

Al marxe del aspectu económicu, la visita va valir pa contactar cola amplia colonia asturiana en Mexico, onde’l númberu de residentes con derechu a votu nel Principáu supera los siete mil, “pero hai decenes de miles de descendientes d’asturianos”, yá qu’esti país ye ún de los destinos tradicionales pa la emigración.

El viaxe va tener tabien un aspectu cultural cola inauguración, na se del Centru Asturianu en Mexico DF, –”una institución d’extraordinaria influencia na sociedá mexicana”, según Areces–, de la exposición fotográfica ‘Impresiones. XXV años de los Premios Príncipe d’Asturies’.

Al actu inaugural ta prevista l’asistencia d’una decena de gallardonaos colos Premios Príncipe d’Asturies dende la so fundación, en 1981: ente otros, l’escritor Álvaro Mutis; l’ex subdirector de la revista ‘Vuelta’ Enrique Krauze; la vilda d’Octavio Paz, Marie Joseph Paz, y los científicos Guido Münch y Francisco Bolívar Zapata, asina como’l premiu Nobel colombianu Gabriel García Márquez.

Na primer xornada d’estancia en Mexico, Areces, amás de la entrevista con Fox na so residencia oficial de Los Pinos, va reunise col director xeneral de la petrolera Pemex, Luis Ramírez Corzo, y col Xefe de Gobiernu del Distritu Federal, Alejandro Encinas Rodríguez.

La delegación del Principáu va quedar na capital federal hasta’l xueves, día 27, cuando va esplazase a Zacatecas pa firmar un alcuerdu de cooperación cola Gobernadora del Estáu, Amalia García.

El programa d’actos previstu pa güei ye’l siguiente (les referencies horaries son locales): A les 10 hores. Reunión de trabayu na se de la empresa Petróleos Mexicanos; a les 12.30 hores, entrevista ente Areces y el presidente de Mexico, Vicente Fox; a les 14 hores, encuentru del presidente del Principáu y el Xefe de Gobiernu del Distrito Federal; a partir de les 19 hores, encuentru cola colonia residente na se social del Centru Asturianu de Mexico y inauguración nel local de la exposición fotográfica ’25 años de los Premios Príncipe d’Asturies’, previamente a la cena qu’ufierta la Xunta Directiva.