Esti martes, Mark Zuckerberg, fundador de Facebook y máximu responsable del escándalu del usu ilexítimu de datos de la so plataforma, según él mesmu espresó, testificó nel Senáu estadounidense asumiendo la culpa del problema.
L’empresariu trató de dar una imaxe del que reconoz la gravedá d’una infracción, asume la so culpa y, arriendes d’ello, púnxose manes a la obra por que lo acaecío nun se repita nel futuru.
La publicación Recode fixo públiques esta selmana les resultancies d’un sondéu online qu’amuesen como’l 56% de los estadounidenses afirma que Facebook ye la empresa tecnolóxica na que menos confíen al respective de la xestión de los sos datos personales. Estos, sobre los que Recode nun facilita datos sobro’l tamañu de l’amuesa y el periodu de recoyida de respuestes, inda nun pueden reflexar l’efectu del interrogatoriu a Zuckerberg na opinión pública, si ye que lo hubo. Sicasí, dáu’l distintu nivel d’enfotu respecto al restu de compañíes (la siguiente empresa vista como menos honesta nesti campu ye Google con un 5%), puede adelantrase que Facebook nun lo va tener fácil pa recuperar l’enfotu de los sos usuarios.