Uviéu y Mieres siguen la güelga de Don Carnal. La capital asturiana y la villa minera centren les cellebraciones d’antroxu del fin de selmana depués del pieslle de la folixa nes dos cites más multitudinaries, les de Xixón y Avilés. La Sardina d’eses dos ciudaes revive na ‘Truchona’l Caudal’ y nuna queimada popular p’animar la segunda fola de fiestes de mázcares n’Asturies.
Un conciertu de Los Berrones na plaza la Catedral a partir de la medianueche’l vienres protagoniza la primer xornada d’antroxu n’Uviéu, que vendrá precedida d’una queimada popular nel mesmu escenariu y el recitáu d’esconxuros d’antroxu. Nel Palaciu los Neños, con accesu llibre y de baldre, desencólquense a lo llargo de güei talleres de maquillaxe y concursos infantiles de mázcares.
El sábadu, la folixa tendrá continuidá na capital con pasucáis a partir de les 17,00 hores con llegada de toles charangues a la plaza la Catedral, onde se cellebrarán los estremaos concursos de mázcares y darréu tendrá llugar l’intierru de la Sardina, con participación d’una decena de compañíes teatrales d’Asturies, Cataluña, País Valencianu, Estremadura y Francia.
Sardina que nel casu de Mieres ye ‘Truchona’ y que dende esti mediudía ta siendo velada nes inmediaciones de la plaza l’Ayuntamientu, dientro d’un programa que centraliza nel vienres los festexos d’antroxu na villa minera y que prevé pasucáis, un desfile y l’intierru de la Truchona nel mesmu día, coles principales actividaes allugaes nel Parque Xovellanos.