La Conseyería de Cultura vieno acabante d’asoleyar esti día la convocatoria d’una llinia nueva de subvenciones pa incrementar la dotación de llibros n’asturianu y gallego-asturianu nes biblioteques públiques. Los conceyos que sían titulares de centros de llectura integraos na Rede de Biblioteques del Principáu d’Asturies tienen hasta’l 5 d’avientu pa solicitar ayuda económica con esta finalidá.
La convocatoria, publicada nel Boletín Oficial del Principáu d’Asturies del 25 de payares, establez que l’adquisición de fondos nuevos tendrá d’efectuase en llibreríes que tengan los sos puestos de venta al públicu nel conceyu solicitante de l’ayuda. Van poder adquirise obres lliteraries de cualesquier xéneru publicaes n’asturianu o gallego-asturianu, incluyéndose tamién aquelles obres billingües o trillingües que contemplen l’asturianu o gallego-asturianu n’igualdá de condiciones tipográfiques coles otres llingües.