El Conceyu de Siero, dende’l Serviciu de Promoción Económica y Desenvolvimientu Local, tien entamao pa estos díes la V Edición de PEQUEXMAS, la FERIA INFANTIL NAVIDIEGA DE SIERO, un programa d’actividaes culturales, formatives y d’ociu y tiempu llibre destinaes a la población infantil y xuvenil del conceyu na redolada de les vacaciones navidiegues que se desenvuelve de forma simultánea en La Pola Siero y Llugones.
Les PEQUEXMAS de La Pola Siero y Llugones van constar de xuegos, talleres y actividaes venceyaos col iviernu y la navidá, destinaos al colectivu infantil y xuvenil del conceyu.
Les actividaes programaes busquen ente los sos oxetivos tresmitir transversalmente valores relativos a la igualdá de les persones, a la prevención de les violencies, fomentu de valores artísticos, culturales, medioambientales y del desenvolvimientu de vezos saludables na población infantil y xuvenil.
El proyectu busca de la mesma ser un espaciu alternativu d’ociu a estos colectivos ciudadanos, una midida de conciliación necesaria nestes feches vacacionales pa les families sierenses y xuna forma tantu d’atraer como retener a posibles consumidores navidiegos nes árees comerciales de Pola y Llugones, onde se concentra parte importante del comerciu minorista del conceyu y dinamizar la hostelería local.
La FERIA INFANTIL NAVIDIEGA DE SIERO va desenvolvese en La Pola Siero [Plaza de Abastos] y Llugones [Polideportivu de Llugones].
El marcu temporal del PEQUEXMAS asítiase en redol a les vacaciones escolares navidiegues:
• Llugones 26 d’avientu de 2019 al 3 de xineru de 2020.
• La Pola Siero del 30 d’avientu de 2019 al 4 de xineru de 2020.