El guitarrista andaluz Raimundo Amador, el curdionista vascu Kepa Junkera y el grupu asturianu de folk Llan de Cubel compartirán escenariu n’Avilés el prósimu 17 d’avientu. La ciudá culminará con un conciertu collectivu una selmana solidaria empobinada a la mocedá y entamada pola Axencia de Cooperación del Principáu, que llevará a la villa a ponentes de Guatemala, Brasil y Palestina.
Asina lo anunció esta mañana el titular de l’Axencia Asturiana de Cooperación al Desarrollu, Rafael Palacios, quien precisó que’l recital sedrá de baldre pero les invitaciones p’asistir a él habrán retirase previamente nel Ayuntamientu pa evitar problemes d’aforu.
El bautizáu como primer Foru Solidariu desendolcaráse a partir del llunes 13 d’avientu, fecha señalada pa un actu d’unaguración y l’actuación del grupu Aratzá. Al otru día, martes, representantes del pueblu saharaui centrarán les actividaes nel mundu árabe, mientres que pal miércoles ta prevista la intervención d’una asesora’l Gobiernu de Brasil nel programa que’l Gobiernu d’esi país tien en marcha pa desaniciar la fame.
El xueves 16 d’avientu, la selmana solidaria d’Avilés debatirá cuestiones rellacionaes cola globalización con participación d’espertos guatemaltecos, y el programa d’actos pesllaráse el vienres col conciertu de Raimundo Amador, Llan de Cubel y Kepa Junkera, amás de la cellebración d’estremaos talleres nos colexos de la ciudá.